8
Si Seba maka si Salmunna
1 Na, atilaw saga aꞌa Epraꞌim ni si Gidiyun, yuk-i, “Angay kami mbal pagaddatannu? Angay kami halam bay palinganannu ma waktu kapehēꞌbi magbonoꞌ maka bangsa Midiyan?” Ati sinoway eꞌ sigām si Gidiyun.
2 Saguwāꞌ ya sambungna ni sigām, “Mbal makasaliꞌ ai-ai bay tahinangku ni bay tahinangbi. Aheya lagiꞌ kahāpan ya kapin buwaꞌ anggul tapuwaꞌ ma lahat Epraꞌim min kamemon pungutan buwaꞌ anggul ya takꞌttuꞌ eꞌ bangsa Abiseꞌer. 3 Bay kam pinaraꞌug eꞌ Tuhan ati tasaggawbi si Oreb maka si Seꞌeb, duwangan nakuraꞌ bangsa Midiyan. Mbal makasaliꞌ ya tahinangku ni bay tahinangbi.” Minnēꞌ alaꞌan kagit atay sigām ma si Gidiyun.
4 Na, apaya si Gidiyun maka saga aꞌana tꞌllu hatus hekana, sagōꞌ sinandalan na paꞌin eꞌ sigām bang paꞌin taꞌapas saga banta sigām. Makaꞌabut paꞌin sigām ni sapaꞌ Jordan, magtūy sigām pauntas parambilaꞌ. 5 Ma dambilaꞌ paꞌin, yuk si Gidiyun ni saga aꞌa Sokkot, “Buwaninbi tinapay saga sundaluku itu. Apaya sigām sabab masi kami angapas si Seba maka si Salmunna, ya sultan bangsa Midiyan.”
6 Saguwāꞌ ahꞌlling saga pagnakuraꞌan ma Sokkot, yuk-i, “Halam giꞌ tasaggawbi si Seba maka si Salmunna angkan kami mbal amuwan tinapay ma saga sundalunu.”
7 Angkan anambung si Gidiyun, yukna, “Pagga buwattēꞌ, bang aku karūlan na eꞌ PANGHŪꞌ anaggaw si Seba maka si Salmunna, gilay-gilayku baranbi maka saga kayu itingan ya tapuwaꞌ ma paslangan.”
8 Paglaꞌan minnēꞌ, palanjal sigām ni Peniyēl ati binalikan eꞌ si Gidiyun bay pangamuꞌna dahū ma aꞌa Sokkot. Saguwāꞌ ya lling aꞌa Peniyēl ma si Gidiyun saliꞌ du maka buwat bay lling aꞌa Sokkot. 9 Angkan sinambungan saga aꞌa Peniyēl inān eꞌ si Gidiyun, yukna, “Bang kami makaraꞌug, pabalik du kami piꞌitu angalubu pamantawanbi itu.”
10 Na, si Seba maka si Salmunna waꞌi ma lahat Karkor maka sundalu sigām saga sangpūꞌ kalima ngibu hekana. Luwal sigām ya takapin ma kamemon saga aꞌa sobangan. Aniyaꞌ saga dahatus maka duwampūꞌ ngibu aꞌa sigām magtakos kalis bay tapapatay eꞌ disi Gidiyun. 11 Jari magtukaran disi Gidiyun labay min lān palabayan saga aꞌa maglilitu. In lān inān asal ma jadjahan lahat Noba maka Jogbeya, tampal ni sobangan. Pataggahaꞌ, tarugpak bangsa Midiyan eꞌ disi Gidiyun. 12 Makalahi si Seba maka si Salmunna, ya duwangan sultan bangsa Midiyan, saguwāꞌ niapas na paꞌin eꞌ disi Gidiyun sampay tasaggaw na. Arimpulag isāb baꞌanan saga sundalu sigām.
13 Pagubus, si Gidiyun anak si Jowas pabalik na min pagbonoꞌan labay min lān ma llot būd, ya niōnan Lān Heres. 14 Aniyaꞌ aꞌa Sokkot, ondeꞌ bahaꞌu, tasaggaw eꞌ si Gidiyun mainaꞌan. Sinohoꞌ iya anulat ōn aꞌa ya pagnakuraꞌan ma kauman Sokkot. Jari pitumpūꞌ ka pituꞌ ōn saga pagmattoꞌahan ya tasulat. 15 Pagubus, pehēꞌ si Gidiyun ahꞌlling ni saga aꞌa Sokkot, “Itiyaꞌ na si Seba maka si Salmunna ya bay pagtunggīnganbi aku ma bay yukbi, ‘Halam giꞌ tasaggawbi si Seba maka si Salmunna, angkan kami mbal amuwan tinapay ni saga sundalunu magpayahan.’ ” 16 Sakali saga pagmattoꞌahan ma kauman Sokkot inān bay niraplosan eꞌ si Gidiyun maka kayu itingan ya patomoꞌ ma paslangan. Minnēꞌ amintāng saga kalꞌllahan ma lahat Sokkot. 17 Nilubu isāb eꞌ si Gidiyun ya pamantawan ma kauman Peniyēl, maka pinapatay isāb saga kalꞌllahanna ma kauman inān.
18 Pagubus, tinilaw eꞌna si Seba maka si Salmunna, “Buwattingga luwa saga kalꞌllahan bay tapapataybi ma Tabor?”
Ya sambung sigām, “Kalꞌllahan buwat kaꞌa, pangluwahan balbangsa.”
19 Yuk sambung si Gidiyun, “Saga danakanku lissi koꞌ heꞌ, da-inaꞌ kami. Sapahanku ma ōn si Yawe ya Tuhan kakkal salama-lama, bang sigām halam bay tapataybi, mbal du kam papatayku.” 20 Magtūy lingiꞌna si Jeter ya anakna kasiyakahan, “Papatayun sigām itu!” yukna. Saguwāꞌ halam bay nihublut eꞌ si Jeter kalisna, tuꞌud iya tināw sabab masi giꞌ iya abataꞌ.
21 Yuk si Seba maka si Salmunna ni si Gidiyun, “Daiꞌ ka, kaꞌa ya amapatay. Kalu takoleꞌnu bang aniyaꞌ isāb kosognu.” Angkan pasōng si Gidiyun ni dahūan amapatay sigām. Ningāꞌ isāb eꞌna saga pamulawan ya pamaꞌalti kꞌllong untaꞌ sigām.
Epod si Gidiyun
22 Yuk saga bangsa Israꞌil ni si Gidiyun, “Kaꞌa na pagnakuraꞌan kami, kaꞌa maka anak-mpunu, sabab bay kami lappasnu min komkoman saga aꞌa Midiyan.”
23 Saguwāꞌ mbal si Gidiyun. Ya sambungna ma sigām, “Mbal kam pagnakuraꞌanku, damikiyanna isab anakku. PANGHŪꞌ-Yawe ya magnakuraꞌan kaꞌam.” 24 Maka yukna giꞌ, “Aniyaꞌ dakayuꞌ amuꞌku ni kaꞌam dangan-parangan. Buwaninbi aku aretes min lalangpasan bay tahampitbi.” (Ya addat saga aꞌa Ismaꞌil magaretes bulawan.)
25 Ya sambung sigām, “Ahoꞌ. Amuwan kami.” Angkan binꞌllat eꞌ sigām dakayuꞌ juba, ati dangan-parangan angalarukan aretes min bay pamahagiꞌ ma iya. 26 Ya buhat saga aretes bulawan bay taꞌamuꞌna, sangpūꞌ ka pituꞌ hatus sekel, halam giꞌ beyaꞌ saga pamulawan pangalti maka saga tonton engkot kꞌllong. Saddī isab saga kakanaꞌ taluk ya pinagpakay eꞌ kasultanan Midiyan, maka saga kili-kili bulawan ya ma kꞌllong saga untaꞌ sigām. 27 In kamemon bulawan bay pinahinang epod eꞌ si Gidiyun pinatꞌnnaꞌ eꞌna ma Opra, ya kauman palahatanna. Sakali kamemon saga bangsa Israꞌil pataikut min Tuhan boꞌ anumba pinaꞌan ni epod, ati tahinang itu sasat ma pagtaliꞌanak si Gidiyun.
Kamatay si Gidiyun
28 Buwattēꞌ kahālan bay paniyaꞌ ma bangsa Midiyan, taraꞌug sigām eꞌ bangsa Israꞌil ati halam na sigām makaꞌatu pabalik. Ma waktu bay kallum si Gidiyun, aniyaꞌ mpatpūꞌ tahun ya tꞌggol kasannangan ma paglahat.
29 Ya katapusanna, si Jerub-Baꞌal ya anak si Jowas amoleꞌ na ni lahatna. 30 Aheka kahꞌndaꞌanna ati aniyaꞌ pitumpūꞌ anakna lꞌlla. 31 Ya hꞌnda-hꞌndana patꞌnnaꞌ ma Sekem, bay anganak lꞌlla ati niōnan eꞌna si Abimelek. 32 Sakali si Gidiyun anak si Jowas, amatay ma katoꞌana maka kinubul ma bay pangubulan mmaꞌna ma kauman Opra ya sukuꞌ bangsa Abeꞌeser.
33 Halam lagiꞌ atꞌggol kapatay si Gidiyun, pabalik na isab saga bangsa Israꞌil pataikut min Tuhan boꞌ pasumba ni saga tuhan-tuhan Baꞌal. Baꞌal-Berit ya tahinang pagtuhanan sigām, 34 ati takalipat eꞌ sigām si Yawe ya pagtuhanan sigām luggiyaꞌ, ya bay angalappas sigām min pangꞌntanan saga palbantahan sigām paruruwambilaꞌ. 35 Halam isāb amaꞌndaꞌ kahāpan ni tautaiꞌ-anak si Jerub-Baꞌal (ya na si Gidiyun) ma pasal kamemon kahāpan ya bay tahinangna ma sigām.