7
Taraꞌug eꞌ si Gidiyun saga Aꞌa Midiyan
1 Jari daiꞌ llaw paꞌin, magpustu si Jerub-Baꞌal (ya na si Gidiyun) maka kamemon saga aꞌana ma atag dakayuꞌ tigbaw ya niōnan Harod. Inaꞌan isāb bangsa Midiyan magpustu tampal ni uttalaꞌ, ma kapantayan ya asekot ni būd More. 2 Yuk PANGHŪꞌ-Yawe ni si Gidiyun, “Mbal ka taparaꞌugku min bangsa Midiyan sabab aheka makalanduꞌ saga aꞌanu. Bang kam gantaꞌ angandaꞌug ma buwattilu hekabi, ya aniyaꞌ magmalangkahi kam in kosogbi ya sababan angkan kam angandaꞌug. 3 Angkanna ka sohoꞌku amatanyagan saga aꞌanu buwattinaꞌan. Ya yuknu ma sigām, ‘Sasuku kam tināw maka nileyaꞌ-leyaꞌ makajari alaꞌan min būd Giliyad itu boꞌ amoleꞌ.’ ” Jari aniyaꞌ duwampūꞌ karuwa ngibu saga aꞌa bay alaꞌan, ati sangpūꞌ ngibu laꞌa ya takapin.
4 Saguwāꞌ yuk PANGHŪꞌ ni si Gidiyun, “Masi giꞌ kam aheka makalanduꞌ. Bowahun saga aꞌanu ilu palūd ni tigbaw, ati mahēꞌ aku ameneꞌ bang sai ya ameyaꞌ maka mbal. Bang yukku, ‘Aꞌa itu subay ameyaꞌ ma kaꞌa’, na ameyaꞌ iya. Saguwāꞌ bang yukku, ‘Aꞌa itu subay mbal ameyaꞌ’, na, daꞌa pabeyaꞌun.”
5 Jari binowa eꞌ si Gidiyun saga aꞌana palūd ni tigbaw, ati mainaꞌan iya kinallaman eꞌ PANGHŪꞌ, yuk-i, “Hinangun sigām duwa tumpuk. Ma tumpuk dakayuꞌ saga aꞌa ya anginum min tangan sigām, hatina dꞌllaꞌ sigām ni boheꞌ buwat eroꞌ. Ma tumpuk dakayuꞌ isāb saga aꞌa ya angōk-tuꞌut boꞌ anginum.” 6 Jari tꞌllu hatus aꞌa ya angakup boheꞌ boꞌ anginum. Ya kaseheꞌan waꞌi angōk-tuꞌut anginum.
7 Pagubus, yuk PANGHŪꞌ ni si Gidiyun, “Gunaku saga tꞌllu hatus aꞌa ya bay anginum min tangan sigām ilu, ati lappasta kam maka buwananta kam daꞌugan min saga aꞌa Midiyan. Sohoꞌun saga aꞌa kaseheꞌan ilu amoleꞌ ni kalahatan sigām pakaniya-pakaniya.” 8 Jari tinimuk eꞌ si Gidiyun baꞌanan balanjaꞌ maka tiyup-tiyup ya bay ma saga bangsa Israꞌil kaseheꞌan boꞌ yampa sigām papoleꞌna. Sagōꞌ, in tꞌllu hatus aꞌa bay magpaꞌbba ma iya sampay ya bay tatimuk eꞌ.
Jari ya pustu bangsa Midiyan inaꞌan ma lꞌbbak būd ma kapantayan. 9 Ma sangom du inān, yuk PANGHŪꞌ ma si Gidiyun, “Punduk ka boꞌ ka pehēꞌ parugpak ni pustu inān sabab paraꞌugku ka min sigām. 10 Saguwāꞌ bang ka tināw amonoꞌ, bowahun tendognu si Pura paneheꞌ. 11 Taenghogin bang ai pagsuli-sulihan sigām. Minnēꞌ ka anawakkal parugpak ni pustu.” Angkanna palūd si Gidiyun maka tendogna si Pura pehēꞌ ni pagjajagahan ma tōng pustu. 12 Na, angulatap saga bangsa Midiyan maka bangsa Amalek maka baꞌanan bangsa kaseheꞌ ya bay min lahat sobangan. Inaꞌan sigām ma kapantayan, saliꞌ sapantun ampan dulu ya heka sigām. Ya untaꞌ sigām isāb mbal taꞌambat niꞌitung, buwat sapantun gusung ma bihing tampe.
13 Pagtꞌkka paꞌin si Gidiyun, magsaltaꞌ takalena dangan aꞌa magsuli-suli maka bagayna pasal uppina. Yuk dangan itu, “Aniyaꞌ dansolag tinapay atibulung bay tauppiku. In tinapay itu bay pagulung ni tꞌngngaꞌ pustu Midiyan boꞌ parugtul ni lumaꞌ tolda. Landuꞌ akosog hamiyuna angkan abulangkayat tolda inān sampay ahꞌbbaꞌ.”
14 Anambung bagayna, “Ā, tantu halam aniyaꞌ maꞌanana saddī. Kalis si Gidiyun koꞌ ilu, ya anak si Jowas aꞌa bangsa Israꞌil. Pinaraꞌug iya eꞌ Tuhan min bangsa Midiyan ati ma iya na pustu itu maka saga aꞌana.”
15 Takale paꞌin eꞌ si Gidiyun suli-suli itu pasal uppi maka maꞌanana, pinudji eꞌna Tuhan, ati pabalik iya ni pustu Israꞌil maka eꞌna angalingan, yuk-i, “Magsakap kam! Ma waktu itu pinaraꞌug kitam eꞌ PANGHŪꞌ min bangsa Midiyan ati makani-kitam in pustu sigām.” 16 Jari binahagiꞌ tꞌllu eꞌ si Gidiyun saga aꞌana, dahatus hekana ma datumpuk. Aniyaꞌ isāb tiyup-tiyup tanduk kambing bay patꞌnnaꞌna ma saga aꞌa inān dangan-parangan, maka kibut halam isihan maka isāb suwariyan. 17 Pagubus, yukna ma sigām, “Ndaꞌunbi aku maka beyaꞌunbi bang ai hinangku. Pagtꞌkkaku ni bihing pustu, sengorinbi aku. 18 Libutunbi pustu inān, jari bang takalebi aku maka saga seheꞌku amahꞌlling tiyup-tiyup kami, ameyaꞌ-meyaꞌ kam amahꞌlling saga tiyup-tiyupbi. Angolang kam pakosog isāb, yukbi, ‘Ma si Yawe maka si Gidiyun.’ ”
19 Jari atongaꞌ paꞌin bahangi, atꞌkka na si Gidiyun maka saga aꞌa karahatus hekana pehēꞌ ni tobtoban pustu, hinabu bahaꞌu bay maggantiꞌ saga jaga. Magtūy tiniyup eꞌ disi Gidiyun saga tiyup-tiyup, maka nilopot isāb saga kibut ya bay bowa sigām. 20 Magsabu in tꞌllu tumpukan bangsa Israꞌil amahꞌlling tiyup-tiyup maka angalopot saga kibut. Tangan sigām gibang ya pangꞌntan suwariyan, maka tangan kowan ya pangꞌntan sigām tiyup-tiyup. Jari angolang sigām patanog, “Kalis si Yawe! Kalis si Gidiyun!” 21 Sakali itu, hinabu patanam saga aꞌa Israꞌil ma katilibut pustu, maglahian kamemon aꞌa Midiyan maka eꞌ sigām magpangolang.
22 Paghꞌlling paꞌin saga tiyup-tiyup tꞌllu hatus hekana, pinapagatu eꞌ PANGHŪꞌ-Yawe saga aꞌa Midiyan ma kaluhaꞌan pustu ati magbonoꞌ-biyonoꞌi sigām dampagkahian. Maglahian sigām sampay ni kauman Bet-Sita tampal ni Serera, sampay taꞌabut isāb tobtoban lahat Abel Mehola ya asekot ni Tabat. 23 Jari pinalinganan saga aꞌa Israꞌil ya min bangsa Naptali maka Aser, maka min kamemon bangsa Manasse, sinōꞌ angapasa bangsa Midiyan. 24 Pagubus, aniyaꞌ saga sosohoꞌan pinapehēꞌ eꞌ si Gidiyun ni kabūd-būran lahat Epraꞌim boꞌ ahꞌlling ni saga aꞌa mainaꞌan, yuk-i, “Palūd kam ni sapaꞌ Jordan ma atag kalumaꞌan Bet-Bara ati hapaꞌinbi saga aꞌa Midiyan boꞌ mbal makauntas.” Magtūy bineyaꞌ panohoꞌan si Gidiyun ati maglūran bangsa Epraꞌim ni sapaꞌ Jordan anungguꞌan labayan sampay ni Bet-Bara. 25 Tasaggaw isāb eꞌ sigām duwa aꞌa pagnakuraꞌan bangsa Midiyan ya niōnan si Oreb maka si Seꞌeb. Si Oreb bay pinapatay eꞌ sigām ma dakayuꞌ batu, ya niōnan Batu si Oreb, maka si Seꞌeb bay pinapatay ma pagpꞌggaꞌan buwaꞌ anggul, ya niōnan Pagpꞌggaꞌan si Seꞌeb. Pagubus, tinurul na paꞌin saga bangsa Midiyan eꞌ bangsa Epraꞌim. Pinonggolan eꞌ sigām kōk si Oreb maka si Seꞌeb boꞌ binowa ni si Gidiyun, ya inaꞌan lagiꞌ ma bihing sapaꞌ Jordan.