6
Si Gidiyun
1 Pabalik na isab saga bangsa Israꞌil maghinang kalaꞌatan ya landuꞌ asammal ma pangꞌndaꞌ PANGHŪꞌ-Yawe, angkan sigām pinasagaran eꞌna ginaꞌos eꞌ bangsa Midiyan ma deyom pituntahun. 2 Ma sabab kabisa pamissokoꞌ bangsa Midiyan, makalahi saga bangsa Israꞌil ni kabūd-būran boꞌ angahinangan di-sigām kubuꞌ-kubuꞌ ma saga songab batu maka ma saga tapukan ya ahunit sinōd. 3 Tiyap-tiyap sigām ananom, magtūy sinōd paglahat sigām eꞌ saga bangsa Midiyan, bangsa Amalek maka saga bangsa kaseheꞌan bay min sobangan. 4 Kapagpustuhan eꞌ bangsa liyu inān saga tanaꞌ ya pananoman bangsa Israꞌil taꞌabut sampay ni lahat Gasa. Jari pinakaꞌat ai-ai bay tinanom eꞌ bangsa Israꞌil ati halam aniyaꞌ kinapinan pagkakan sigām. Pinagāꞌ isāb kamemon saga bili-bili, sapiꞌ maka saga kuraꞌ ya sukuꞌ bangsa Israꞌil. 5 Angulatap saga bangsa liyu inān pehēꞌ ni tanaꞌ Israꞌil, sapantun heka ampan dulu. Tabowa saga kahayopan sigām maka baꞌanan lumaꞌ sigām tolda. Mbal agon taitung heka puhuꞌ maka untaꞌ ya bay patꞌkka ni lahat eꞌ boꞌ supaya taꞌagaw kaꞌlluman aꞌa Israꞌil. 6 Jari magkamiskinan bangsa Israꞌil eꞌ bangsa Midiyan angkan sigām parahing angamuꞌ tabang ni PANGHŪꞌ-Yawe.
7 Pagga sigām bay parahing ni PANGHŪꞌ ma pasalan bangsa Midiyan, 8 bay sigām pinabeyaꞌan dakayuꞌ nabi. Ahꞌlling nabi inān, yukna, “Ya itu pangallam si Yawe ya pagtuhananbi, yukna, ‘Bay kam bowaku paluwas min lahat Misil, ya lahat bay pamanyagaꞌan kaꞌam. 9 Bay kam paluwasku min pangꞌntan bangsa Misil maka min komkoman saga aꞌa amissokoꞌ kaꞌam. Bay tꞌggalku saga bantabi maka bay pamuwanku ni kaꞌam lahat sigām. 10 Bay sa kam hakaꞌanku, yukku, “Aku si Yawe ya pagtuhananbi. Daꞌa kam anumba ni saga tuhan-tuhan bangsa Amor, ya bay tag-sukuꞌan lahat patꞌnnaꞌanbi ilu.” Saguwāꞌ halam aku bay ikutbi.’ ”
11 Manjari atꞌkka malaꞌikat si Yawe ni lahat Opra boꞌ aningkōꞌ ma sindungan poꞌon kayu aheya, ya sukuꞌ si Jowas aꞌa min bangsa Abeꞌeser. Inaꞌan isāb anakna lꞌlla ya niōnan si Gidiyun anganggiꞌikan pai-tirigu ma deyom pagpꞌggaꞌan buwaꞌ anggul. Mahēꞌ iya maggiꞌik boꞌ mbal taꞌndaꞌ eꞌ bangsa Midiyan. 12 Magpaꞌndaꞌ paꞌin malaꞌikat ma si Gidiyun, yukna, “Kaꞌa ya bobonoꞌun aesog maka akosog, pataptap si Yawe ma kaꞌa.”
13 Ya sambung si Gidiyun, “Tuwan, bang si Yawe bꞌnnal pataptap ma kami, angay kami pinatꞌkkahan baꞌanan saga pakaradjaꞌan itu? Angay kami halam pinaꞌndaꞌan saga hinang kainu-inuhan ya pinagsuli-suli eꞌ kamattoꞌahan kami? Bay konoꞌ sigām binowa eꞌ si Yawe paluwas min lahat Misil. Saguwāꞌ ma buwattinaꞌan, siniya-siya kami eꞌ PANGHŪꞌ boꞌ tinugutan ni komkoman bangsa Midiyan.”
14 Palingiꞌ PANGHŪꞌ boꞌ ahꞌlling ni si Gidiyun, yuk-i, “Pehēꞌ na ka, gunahun kosognu ati lappasun bangsa Israꞌil min gaꞌosan bangsa Midiyan. Aku ya anohoꞌ kaꞌa.”
15 Atilaw si Gidiyun, yukna, “Ahoꞌ panghūꞌ, sagōꞌ buwattingga eꞌku angalappas bangsa kami Israꞌil? Sabab ma panubuꞌ Manasse, in pangkatan kami ya halam toꞌongan aniyaꞌ gaꞌosna. Maka aku itu areyoꞌ toꞌongan ma kakampungan kami.”
16 Ya sambung PANGHŪꞌ, “Pabeyaꞌ du aku ma kaꞌa ati talaglagnu kamemon saga bangsa Midiyan buwat eꞌnu amonoꞌ aꞌa dangan.”
17 Anambung si Gidiyun, “Na, bang hati ka kasulutan ma aku, buwanin aku paltandaꞌan in kaꞌa toꞌongan amissala ni aku. 18 Daꞌa busung, daꞌa lagiꞌ ka alaꞌan sampay aku makabalik piꞌitu amowa tutukbalan pangahulmatku kaꞌa.”
Yuk PANGHŪꞌ-Yawe, “Na, lagaranta paꞌin ka sampay ka makabalik piꞌitu.”
19 Sakali pehēꞌ na si Gidiyun ni lumaꞌ boꞌ angadjal kambing abataꞌ. Angaddun isāb iya saga nnom gantang tirigu nihinang tinapay halam pasuligna. Atahak paꞌin, niꞌisi eꞌna isi sumbaliꞌan ma ambung, maka lohoꞌna niꞌisi ma kaldero boꞌ yampa bowana panghulmat malaꞌikat Tuhan ya ma sindungan kayu.
20 Jari yuk malaꞌikat ni iya, “Ngāꞌun isi sumbaliꞌan maka tinapay halam pasuligna boꞌ patꞌnnaꞌun ma batu itu, ati buꞌusin lohoꞌ.” Bineyaꞌ magtūy eꞌ si Gidiyun. 21 Jari niabut sumbaliꞌan maka tinapay inān maka tōng tungkud ya ma tangan malaꞌikat si Yawe. Saruꞌun-duꞌun pasuleyab api luwas min batu inān, ati atunuꞌ kamemon bay tabowa eꞌ si Gidiyun. Alanyap isāb malaꞌikat si Yawe.
22 Tataꞌu paꞌin eꞌ si Gidiyun malaꞌikat PANGHŪꞌ ya bay papaꞌndaꞌ ni iya, magtūy iya amanyabut, “Arōy, PANGHŪꞌ Sangat Kawasa! Bay aku makapagbaihuꞌ maka malaꞌikatnu!”
23 Saguwāꞌ amissala PANGHŪꞌ ni iya, yuk-i, “Pahantap ka! Daꞌa ka tināw, mbal du ka amatay.” 24 Jari aniyaꞌ batu tinambak eꞌ si Gidiyun mainaꞌan pagtutukbalan ni PANGHŪꞌ, niōnan eꞌna ‘Si Yawe ya Kasannangan.’ Inaꞌan masi sampay ni buwattinaꞌan ma Opra ya ma tanaꞌ bangsa Ebeꞌeser.
25 Na, ma sangom heꞌ-i du, amissala PANGHŪꞌ-Yawe ni si Gidiyun, “Angāꞌ ka dakayuꞌ sapiꞌ pituntahun umulna min saga sapiꞌ mmaꞌnu ya pasunuꞌ kahāpna min kaseheꞌan. Pagāꞌnu, langkatun pagtutukbalan ya pasumbahan mmaꞌnu ni tuhan-tuhan Baꞌal, maka pōngun isāb hāg si Asera ya ma bihing inaꞌan-i. 26 Talangkat paꞌin, angahinang ka pagtutukbalan ya tōp panumbahan si Yawe ya pagtuhanannu. Hinangun mailu ma diyataꞌ būd-būd itu. Ngāꞌun hāg tuhan-tuhan Asera ya bay pinagpōng-pōng, panunuꞌ sapiꞌ ya pasunuꞌ kahāpna ilu pagkulbannu ni Tuhan.”
27 Angkan si Gidiyun bay amowa sangpūꞌ puhuꞌ ya sosohoꞌanna boꞌ bineyaꞌ eꞌna bay pangallam PANGHŪꞌ ma iya. Boꞌ arapun nihinang eꞌna ma waktu sangom sabab tināw iya ma saga kampungna maka saga aꞌa maglahat ma kauman inān.
28 Pagsubu, magbatiꞌan paꞌin saga aꞌa maglahat mainaꞌan, takuddat sigām pagga alubu na pagtutukbalan ni si Baꞌal, maka hāg si Asera ya ma bihingna bay pinuwad, maka in sapiꞌ karuwana bay na pangungsud ma pagtutukbalan ya bahaꞌu nihinang. 29 Jari magtilaw-tilawan sigām di-sigām, “Sai bay magkahinangan itu?” Tapariksaꞌ paꞌin saga aꞌa pasal palkalaꞌ itu, tataꞌu na in si Gidiyun anak si Jowas ya bay magkahinangan.
30 Magtūy pinalinganan si Jowas, sinōꞌ pinaluwas anakna, sabab yuk sigām, “Patut iya pinapatay sabab talangkat eꞌna pagtutukbalan ni si Baꞌal, maka tapuwad eꞌna hāg si Asera ya bay ma bihing pagtutukbalan eꞌ.”
31 Saguwāꞌ sinambungan pakosog eꞌ si Jowas saga aꞌa bilahi amapatay si Gidiyun, “Angay dapitanbi si Baꞌal? Bilahi kam angalappas iya? Sasuku anganggapiꞌ iya subay pinapatay salung subu! Bang bꞌnnal tuhan si Baꞌal, makarapitan iya di-na bang aniyaꞌ gantaꞌ amakaꞌat lugal pagtutukbalan ma iya.” 32 Angkan ma llaw heꞌ-i du in si Gidiyun niōnan eꞌ sigām Jerub-Baꞌal ma sabab pangalangkatna ma lugal pagtutukbalan si Baꞌal. Ya sambatan sigām, “Pasagaranta si Baꞌal angandapitan di-na.”
33 Na ma waktu inaꞌan, magsakaum bangsa Midiyan maka bangsa Amalek maka saga bangsa kaseheꞌan ya min lahat sobangan ati pauntas sigām kamemon min dambilaꞌ sapaꞌ Jordan boꞌ magpustu ma kapantayan Jesdeꞌel. 34 Jari pahōp Rū Yawe ma si Gidiyun, angkan iya bay amahꞌlling tiyup-tiyup pangalinganna ma saga panubuꞌ Abeꞌeser sinōꞌ ameyaꞌ ma iya. 35 Aniyaꞌ isāb saga sosohoꞌan bay pinapehēꞌ eꞌ si Gidiyun amasaplag bissala ma bangsa Manasse, sinōꞌ magtakos. Pinasaplagan isāb bangsa Aser, Sibulun maka Naptali, jari ya du sigām bay pasakaum ma disi Gidiyun.
36 Yuk si Gidiyun ni Tuhan, “Bang bꞌnnal in aku gunanu angalappas bangsa Israꞌil ma buwat bay janjiꞌnu, 37 na, amatꞌnnaꞌ aku bulbul bili-bili ma lugal paggiꞌikan pai-tirigu. Bang hal bulbul ya abaseꞌ eꞌ aluꞌ, ati atohoꞌ tanaꞌ ya ma sakalibutna, minnēꞌ kataꞌuwanku aku ya gunanu angalappas bangsa Israꞌil buwat bay pangallamnu.” 38 Jari buwattēꞌ ya kapaniyaꞌna. Pagkꞌllat subu, daiꞌ-daiꞌ llaw giꞌ, abatiꞌ na si Gidiyun. Piniyutan eꞌna bulbul bili-bili ati apꞌnnoꞌ dapinggan eꞌ boheꞌ aluꞌ.
39 Aniyaꞌ giꞌ pahꞌlling si Gidiyun ma Tuhan, yukna, “Daꞌa busung. Daꞌa paꞌin apꞌddiꞌ ataynu ma aku pagka aniyaꞌ giꞌ amuꞌku ni kaꞌa. Tugutin lagiꞌ aku amiha dakayuꞌ paltandaꞌan ma bulbul bili-bili itu. Ma waktu itu, kabayaꞌanku subay tanaꞌ ya abaseꞌ eꞌ aluꞌ ati bulbul bili-bili ya atohoꞌ.” 40 Jari ma sangom du heꞌ, tahinang eꞌ Tuhan buwat bay pangamuꞌ eꞌ si Gidiyun. Hal bulbul bili-bili ya atohoꞌ. Ya tanaꞌ ma sakalibutna inān abaseꞌ kamemon eꞌ aluꞌ.