5
Kalangan si Debora
1 Ma llaw inaꞌan du, magkalang si Debora maka si Barak ya anak si Abinowam. Yuk pagkalang sigā:
2 “Pudji ni si Yawe!
Saga aꞌa bangsahan angatas na magmundaꞌ ma pagkahi sigām bangsa Israꞌil,
lillaꞌ isāb saga aꞌa anukbalan baran sigām.
3 Pakale kam, saga sultan! Pakale kam saga aꞌa bangsahan.
Angalang aku ni si Yawe, angalang aku.
Anukbal aku kalangan pamudji si Yawe ya pagtuhanan bangsa Israꞌil.
4 O Yawe, paglaꞌannu paꞌin min lahat Seꞌer,
paglanjalnu min lahat Edom,
ajogjog dunya, alandos makalanduꞌ ulan,
patumbuk ulan min kagabunan.
5 Ajogjog saga kabūran ma kapiꞌitu si Yawe,
ya Tuhan tag-sukuꞌan būd Turusina.
Ahoꞌ, ajogjog ma baihuꞌan si Yawe, ya pagtuhanan bangsa Israꞌil.
6 Ma waktu kapaghukum si Samgar anak si Anat,
maka ma waktu si Jaꞌel,
halam aniyaꞌ bay makalabay min lān aheya.
Sasuku magtulakan subay palabay min saga lān kabikluꞌ-bikluꞌan.
7 Akulang du bay makapaglahat ma kahuma-humaꞌan tanaꞌ Israꞌil,
satꞌggol halam bay patuwaꞌ si Debora,
ya kinilā paginaꞌan bangsa Israꞌil.
8 Ma waktu kapapinda bangsa Israꞌil ni saga tuhan-tuhan saddī,
waktu isāb katꞌkka bonoꞌ ma pagsōran daꞌira,
halam aniyaꞌ tampan atawa budjak
ma saga lꞌlla bangsa Israꞌil mpat ngibu hekana.
9 Akōg pangatayanku ma saga aꞌa Israꞌil bangsahan,
maka ma saga aꞌa ya magmalillaꞌ palamud ma pagbonoꞌ.
Pudji ni si Yawe!
10 Pakale kam, sasuku kam pakuraꞌ ma kuraꞌ poteꞌ,
ya aningkōꞌ ma lampik pakol alingkat,
beyaꞌ isāb kaꞌam magbabaklay ma lān,
ya patimuk ma atag kakꞌppongan.
Niusul eꞌ sigām pasal kahinangan PANGHŪꞌ-Yawe, kahinangan aꞌadil lullun,
niusul kahinangan saga aꞌa Israꞌil ya aesog amonoꞌ.
Maglūran na saga ummat PANGHŪꞌ
pehēꞌ ni tongod lawang ya pagsōran daꞌira.
12 ‘O Debora, pakosog ka boꞌ pakosog!
Pakosog ka magkalang!
O Barak, pakuyas ka!
O Barak, kaꞌa anak si Abinowam,
saggawun saga aꞌa bay anaggaw kaꞌa.’
13 Sasuku takapin allum ma bangsa Israꞌil
bay patipun ni saga pagnakuraꞌan sigām.
Bay patimuk ma aku saga ummat si Yawe,
beyaꞌ isāb saga aꞌa ya aesog amonoꞌ.
14 Aniyaꞌ sigām kaseheꞌan bay min lahat Epraꞌim,
ya bay paglahatan bangsa Amalek ma waktu tagnaꞌ.
Inaꞌan isāb saga panubuꞌ si Benjamin
bay palamud ma saga aꞌa ya aneheꞌan kaꞌa.
Aniyaꞌ saga kapitan palūd pinaꞌan bay min Makir.
Aniyaꞌ isāb saga aꞌa Sibulun amowa tungkud kapitan.
15 Saga aꞌa bangsahan min bangsa Issakar bay parongan ma si Debora.
Ahoꞌ, inaꞌan saga panubuꞌ si Issakar parongan ma si Barak,
magdaganan maka iya ni kapantayan.
Saguwāꞌ magduwa-ruwa pikilan bangsa Rubin,
mbal agon makapagdakayuꞌ garaꞌ.
16 Kaꞌam bangsa Rubin, angay kam bay patꞌddas ma koralanbi,
anaenghog tiyup-tiyup ya pangalingan aꞌa ma bili-bili sigām?
Bꞌnnal, aheya pagduwa-ruwabi ameyaꞌ maka mbal.
17 Saga aꞌa Giliyad bay magpaꞌbba ma dambilaꞌ sapaꞌ Jordan,
maka bangsa Dān bay angagad sadja ma saga kumpit.
Bangsa Aser isāb bay patꞌddas ma bihing tahik,
halam sigām bay maglaꞌanan min deyom kaloꞌokan.
18 Malaingkan in bangsa Sibulun bay anawakkalan kallum sigām ni pagbonoꞌan,
damikiyanna isab bangsa Naptali ma kabūd-būran.
19 Sakali magtꞌkkahan saga sultan bangsa Kanaꞌan.
Pakuyas sigām magbonoꞌ, apaslod pagdugpak sigām
ma kutaꞌ Taꞌanak ya ma bihing boheꞌ Megiddo,
saguwāꞌ halam aniyaꞌ pangaltaꞌ bay talangpas sigām.
20 Palamud isāb saga bituꞌun amonoꞌ ma si Sesera.
Anabang saga mamahi sabu paꞌin maguntasan min sobangan ni sꞌddopan.
21 Talaran si Sesera maka saga tendogna eꞌ sꞌllog,
talaran sigām eꞌ sapaꞌ Kisun, ya sapaꞌ bay awal giꞌ.
Ahꞌllingan aku di-ku. Paesog ka, yukku, palanjal ka.
22 Jari takale toꞌongan tagandak saga kuraꞌ si Sesera.
Inaꞌan saga kuraꞌna aesog magdaganan na paꞌin, magdaganan.
23 ‘Sapdahin saga aꞌa ma kauman Meros,’ yuk malaꞌikat si Yawe.
‘Sapdahin sigām toꞌongan,
sabab halam sigām bay palamud anganggapiꞌ ma si Yawe,
halam sigām bay pagapiꞌ ma iya angatu ma saga aꞌa gaꞌosan.’
24 Bang paꞌin binarakatan si Jaꞌel, hꞌnda si Heber bangsa Kēn.
Bang paꞌin iya binarakatan labi min kamemon karꞌndahan
ya patꞌnnaꞌ ma lumaꞌ tolda.
25 Angamuꞌ paꞌin boheꞌ si Sesera, gatas ya pamuwan eꞌ si Jaꞌel,
gatas pinapīt niꞌisi ma pinggan,
pinggan tōp pagiꞌinuman aꞌa bangsahan.
26 Pagubus, pinaꞌabut tanganna dambilaꞌ ni tuku tolda,
tanganna kowan ya pangꞌntanna tukul.
Jari binonoꞌ eꞌna si Sesera, apꞌssaꞌ kōkna,
nirugsuꞌ iya ma kīd tuktukna boꞌ alopot kōkna.
27 Ati palukbuꞌ iya ma dahūan tapeꞌ si Jaꞌel.
Pahantal iya mainaꞌan,
jari mainaꞌan kamatayanna.
28 Inaꞌan inaꞌ si Sesera patīk min tandawan,
inaꞌan iya ma bilikna maglemong na paꞌin.
Magtilaw-tilawan di-na, ‘Ai bahāꞌ makatꞌggolan kalesana?
Angay halam giꞌ takaleku tagandak saga kuraꞌna?’
29 Manjari sinambungan iya eꞌ dakayuꞌ tendogna
ya aladju pikilanna min kahekaꞌan dꞌnda.
30 Ya du isāb inaꞌ si Sesera ahꞌllingan di-na, yukna,
‘Tantu sigām tꞌggolan magbahagiꞌan pangaltaꞌ ya talangpas sigām,
dakayuꞌ atawa duwangan dꞌnda ma dakayuꞌ lꞌlla,
saga sꞌmmek ahalgaꞌ pamahampit si Sesera,
saga sꞌmmek buldahan, sꞌmmek alutuꞌ durukanna,
pamasalay ma kꞌllongku.
Tantu aheka tataban eꞌ sigām.’
31 Ya PANGHŪꞌ, bang paꞌin alaglag kamemon palbantahannu!
Malaingkan sasuku alasahan kaꞌa,
bang paꞌin sigām asahaya sapantun mata llaw bang pasinag toꞌongan.”
Sakali aniyaꞌ kasannangan ma paglahat inān ma deyom mpatpūꞌ tahun.