4
Si Debora
1 Amatay paꞌin si Ehod, pabalik na isab saga bangsa Israꞌil maghinang kalaꞌatan ya landuꞌ asammal ma pangꞌndaꞌ si Yawe ya Tuhan sigām. 2 Jari sinōngan sigām eꞌ PANGHŪꞌ-Yawe ni komkoman si Jabin, sultan bangsa Kanaꞌan ya amarinta ma daꞌira Hasor. Ya magnakuraꞌ ma saga sundalu si Jabin itu si Sesera, aꞌa patꞌnnaꞌ ma Haroset Haggoyim. 3 Aniyaꞌ ma si Jabin saga kalesa basiꞌ siyam hatus hekana. Nijahulakaꞌ eꞌna bangsa Israꞌil, pinissokoꞌ ma deyom duwampūꞌ tahun, angkan sigām parahing ni PANGHŪꞌ angamuꞌ tabang.
4 Ma waktu inān, si Debora hꞌnda si Lapidut ya magnakuraꞌ ma bangsa Israꞌil. Nabi isab iya. 5 Ya kabiyaksahan si Debora itu bang maghukum ma saga aꞌa Israꞌil subay ma sindungan kayu ya pinagōnan Palma,a inaꞌan ma llot Rama maka Betel ya ma kabūran Epraꞌim. Pehēꞌ ni iya saga aꞌa Israꞌil amapasalassay baꞌanan palsaggaꞌan sigām. 6 Jari aniyaꞌ waktu kapanambuku si Debora ma si Barak, anak si Abinowam lꞌlla ya patꞌnnaꞌ ma kauman Kedes ma lahat bangsa Naptali. Ya lapal si Debora ma si Barak, “Si Yawe ya pagtuhanan bangsatam Israꞌil magpanohoꞌan ma kaꞌa. Sinōꞌ ka pehēꞌ ni būd Tabor, beyaꞌ isāb saga aꞌa sangpūꞌ ngibu hekana min bangsa Naptali maka min bangsa Sibulun. 7 Yuk Tuhan isab, ‘Sasatku si Sesera ya pagmakōkan saga sundalu si Jabin, supaya iya tabowa pehēꞌ ni sapaꞌ Kisun, iya baranna maka saga kalesana basiꞌ sampay baꞌanan saga sundaluna. Ati sōnganku sigām ni gaꞌosannu.’ ”
8 Sakali ahꞌlling si Barak ni si Debora, yukna, “Ahoꞌ, pehēꞌ aku bang paꞌin kaꞌa ya aneheꞌan aku. Sagōꞌ bang ka mbal ameyaꞌ, na mbal aku.”
9 “Ahāp na koꞌ ilu,” yuk si Debora. “Ameyaꞌ aku ma kaꞌa. Sagōꞌ pagka buwattilu paghonaꞌ-honaꞌnu, halam aniyaꞌ kamahaldikaꞌan maka-ni kaꞌa bang taraꞌug si Sesera. Subay dꞌnda ya binuwanan daꞌugan eꞌ PANGHŪꞌ.” Jari parongan si Debora ma si Barak pehēꞌ ni Kedes. 10 Ma Kedes paꞌin, pinalinganan eꞌ si Barak saga aꞌa panubuꞌ si Sibulun maka si Naptali, ati sangpūꞌ ngibu ya heka sigām magbeyaꞌ maka iya. Ya du si Debora bay ameyaꞌ.
11 Na, ma waktu inaꞌan du, aniyaꞌ aꞌa niōnan si Heber bay pasaddī min pagkahina bangsa Kēn. In bangsa Kēn itu panubuꞌ si Hobab, ya bay ipal si Musa lꞌlla. Jari si Heber itu bay amatꞌngge lumaꞌna tolda ma atag kayu Saꞌanannim, dakayuꞌ poꞌon kayu aheya asekot ni Kedes.
12 Kahakaꞌan si Sesera pasal si Barak anak si Abinowam waꞌi patukad ni būd Tabor. 13 Angkan tinimuk eꞌ si Sesera saga kalesana basiꞌ siyam hatus hekana maka kamemon kalꞌllahan ya tendogna, ati sohoꞌna sigām pehēꞌ min Haroset Haggoyim ni sapaꞌ Kisun.
14 Pagka buwattēꞌ, ahꞌlling si Debora ni si Barak, yukna, “Sūng! Ya na itu llaw panukbal si Sesera ni kaꞌa eꞌ PANGHŪꞌ! Tuhan ya magmundaꞌ ma kaꞌam!” Angkan palūd si Barak min būd Tabor maka saga aꞌa sangpūꞌ ngibu hekana. 15 Manjari itu, makarugpak paꞌin disi Barak, pinalengog si Sesera eꞌ PANGHŪꞌ, talapay isāb kamemon saga aꞌana magkalesa maka sundaluna. Si Sesera baranna bay pakuppa min kalesana boꞌ alahi. 16 Saguwāꞌ niapas eꞌ si Barak saga kalesa maka katumpukan sundalu inān sampay ni Haroset Haggoyim. Talagut saga sundalu si Sesera kamemon, halam aniyaꞌ minsan dangan takapin allum. 17 Malaingkan si Sesera itu bay makalahi ni lumaꞌ tolda ya patꞌnnaꞌan si Jaꞌel hꞌnda si Heber bangsa Kēn. Magbagay asal si Jabin sultan Hasor maka kakampungan si Heber.
18 Na, paluwas si Jaꞌel min lumaꞌna anagina si Sesera. Yukna, “Palanjal ka, tuwanku. Pasōd ka piꞌitu, daꞌa ka tināw.” Jari pasōd iya ni lumaꞌ tolda boꞌ minantahan eꞌ si Jaꞌel.
19 Yuk si Sesera ma iya, “Atohoꞌ kꞌllongku. Bang manjari, buwanin aku boheꞌ.” Ati niukab eꞌ si Jaꞌel dakayuꞌ pangisihan gatas pamainum iya. Pagubus tinambunan iya pabalik.
20 Ahꞌlling giꞌ si Sesera ma si Jaꞌel, yukna, “Anꞌngge ka ma bowaꞌ lawang ilu. Bang aniyaꞌ piꞌitu atilaw bang aniyaꞌ giꞌ aꞌa saddī maitu, sambungin ‘halam’.”
21 Saguwāꞌ addok paꞌin tuli si Sesera ma sabab kamaleꞌna, niāꞌ tuku tolda maka tukul eꞌ si Jaꞌel hꞌnda si Heber inān. Paꞌagak-agak iya ni bihing si Sesera. Tinukul eꞌna tuku inān ni kīd tuktukna, tinukul pahāp boꞌ palatus parambilaꞌ paꞌabut ni tanaꞌ. Minnēꞌ amatay si Sesera.
22 Na, pinaꞌan isāb si Barak amiha si Sesera ati paluwas si Jaꞌel amāk iya. “Piꞌitu ka,” yukna, “paꞌndaꞌanku kaꞌa ya aꞌa pihanu.” Angkan ameyaꞌ si Barak ma si Jaꞌel pasōd. Taꞌndaꞌ eꞌna si Sesera amatay pahantal, maka masi tuku tolda ma kōkna.