3
1 Na, ya itu saga bangsa bay pinasagaran eꞌ PANGHŪꞌ-Yawe panulayna ma saga aꞌa Israꞌil ya halam bay makalabay pagbonoꞌ ma lahat Kanaꞌan. 2 (Subay sigām kapanduꞌan amonoꞌ sabab ya kahekaꞌan sigām halam bay makalabay bonoꞌ ma waktu tagnaꞌ.) 3 Inaꞌan masi ma lahat Kanaꞌan saga datuꞌ lima hekana ya pagnakuraꞌan bangsa Pilistin, inaꞌan isāb saga bangsa Kanaꞌan magtumpuk-manumpuk, maka inaꞌan isāb bangsa Sidun maka bangsa Hīb ya patꞌnnaꞌ ma kabūd-būran Lebanon, min būd Baꞌal-Hermon sampay ni Lebo-Hamat. 4 Tinugutan saga bangsa itu anulay ma saga aꞌa Israꞌil boꞌ tataꞌu bang bineyaꞌ eꞌ sigām saga panohoꞌan PANGHŪꞌ ya bay pangꞌbbana ma kaꞌmboꞌ-mboꞌan sigām labay min si Musa.
5 Na, pasakaum saga aꞌa Israꞌil ma bangsa Kanaꞌan, bangsa Hīt, bangsa Amor, bangsa Pirisi, bangsa Hīb maka bangsa Jebus. 6 Magpikit-pikiti isāb bangsa Israꞌil maka bangsa saddī inān, ati tabowa anumba ni saga tuhan-tuhan sigām.
Si Otniyel
7 Jari tahinang eꞌ saga bangsa Yahudi kalaꞌatan ya landuꞌ asammal ma pangꞌndaꞌ PANGHŪꞌ-Yawe. Takalipat eꞌ sigām si Yawe ya pagtuhanan sigām boꞌ anumba ni saga tuhan-tuhan Baꞌal maka Astoret. 8 Aheya kakagit atay PANGHŪꞌ-Yawe angkan pasagaranna bangsa Israꞌil niraꞌug eꞌ si Kusan-Risataim ya sultan ma Aram Naharaim. Jari waluntahun tꞌggol sigām ma komkoman sultan eꞌ. 9 Malaingkan parahing paꞌin sigām ni PANGHŪꞌ, aniyaꞌ aꞌa pinaniyaꞌ eꞌna angaliyusan sigām. Ōn aꞌa itu si Otniyel anak si Kenas, ya siyali si Kaleb lꞌlla. Jari talappas saga aꞌa Israꞌil eꞌ si Otniyel. 10 Pahōp Rū si Yawe ma iya ati tahinang iya maghuhukum ma bangsa Israꞌil. Aesog iya ma pagbonoꞌan maka karūlan iya eꞌ PANGHŪꞌ-Yawe angkan taraꞌug eꞌna si Kusan-Risataim ya sultan bangsa Aram. 11 Jari aniyaꞌ na kasannangan ma lahat inān ma deyom mpatpūꞌ tahun, sampay ni waktu kamatay si Otniyel anak si Kenas.
Si Ehod
12 Jari pabalik na isāb saga bangsa Israꞌil angahinang kalaꞌatan ya asammal ma pangꞌndaꞌ PANGHŪꞌ, angkan sigām tagaꞌos eꞌ si Eglon sultan bangsa Mowab, min kahandak PANGHŪꞌ. 13 Si Eglon inān bay mikigapiꞌ ma bangsa Ammon maka bangsa Amalek, ati tarugpak eꞌ sigām bangsa Israꞌil boꞌ kalongkopan eꞌ sigām daꞌira Kapalmahan. 14 Sangpūꞌ ka waluntahun ya tꞌggol bangsa Israꞌil ma komkoman si Eglon sultan bangsa Mowab eꞌ.
15 Manjari pabalik na isab saga bangsa Israꞌil parahing ni PANGHŪꞌ ati aniyaꞌ isāb aꞌa bay patꞌnnaꞌna angaliyusan sigām min kasigpitan. Ōnna si Ehod anak si Gera, panubuꞌ si Benjamin, aꞌa sakap gibang. Jari itu, sinohoꞌ iya eꞌ saga pagkahina bangsa Israꞌil angꞌndeꞌan buwis ni si Eglon ya sultan bangsa Mowab. 16 Na aniyaꞌ punyal saga tꞌllu hꞌkka tahaꞌna bay tahinang eꞌ si Ehod itu, kaengkotan eꞌna ni paꞌana kowan boꞌ katambunan eꞌ sꞌmmekna. 17 Pagubus, binowa buwis eꞌ si Ehod ni si Eglon sultan bangsa Mowab. Alꞌmmok asal si Eglon. 18 Na, kaꞌndeꞌan paꞌin buwis itu, pinapoleꞌ eꞌ si Ehod saga maghahangkut pilak pamuwis. 19 Makaꞌabut paꞌin sigām ni saga batu ukilan ya ma tongod kauman Gilgal, si Ehod bay pabalik pehēꞌ ni sultan Eglon boꞌ ahꞌlling ma iya, yuk-i, “Aniyaꞌ pahꞌllingku ma kaꞌa, tuwan sultan, ma halam aniyaꞌ makakale.”
Yuk sultan ma saga sosohoꞌanna, “Daꞌa kam asagaw!” Ati paluwas sigām minnēꞌ.
20 Manjari pasekot si Ehod ni sultan eꞌ, hinabuna aningkōꞌ karangan-danganan ma bilik angkap diyataꞌ ya paghayang-hayanganna. Yuk si Ehod, “Aniyaꞌ lapal Tuhan pasampayku ni kaꞌa, tuwan.” Hinabu pabuhat sultan min paningkōꞌanna, 21 nihublut eꞌ si Ehod punyal bay ma paꞌana kowan. Nihublut eꞌna maka tanganna gibang ati pangandugsuꞌna ni bꞌttong sultan. 22 Ā, paloblob punyal sampay puhanna ni bꞌttong sultan, palatus pehēꞌ ni bukutna. Halam tahellaꞌ eꞌ si Ehod punyalna inān sabab katambunan eꞌ kalꞌmmokan sultan. 23 Jari paluwas si Ehod ni saurung lumaꞌ boꞌ kinunsiꞌ eꞌna saga tambol ma bilik angkap diyataꞌ inān.
24 Makalaꞌan paꞌin iya, pinaꞌan saga sosohoꞌan sultan ni bilikna inān ati taꞌndaꞌ eꞌ sigām saga tambolna bay kinunsiꞌ. “Ā,” yuk sigām, “kalu waꞌi giꞌ ajamban.” 25 Sakali angagad-ngagad na paꞌin sigām sampay sigām sinōd iyaꞌ, sagōꞌ halam taukab tambol eꞌ sultan. Angkan sigām bay angāꞌ kunsiꞌ pangukab. Pagukab itu, taꞌndaꞌ eꞌ sigām panghuluꞌ sigām amatay pahantal ma lantay.
26 Hinabu angagad saga sosohoꞌan eꞌ, waꞌi makalahi si Ehod. Talabay eꞌna saga batu ukilan boꞌ patudju ni lahat Seꞌera. 27 Pagtꞌkkana paꞌin pehēꞌ ni kabūd-būran ya paglahatan panubuꞌ si Epraꞌim, amahꞌlling iya tiyup-tiyup. Sakali patimuk ni si Ehod saga bangsa Israꞌil bay min kaburan inān, ati magbeyaꞌ sigām palūd minnēꞌ.
28 “Piꞌitu kam ameyaꞌ ma aku,” yuk panohoꞌan si Ehod, “sabab saga bantabi bangsa Mowab pinaraꞌug eꞌ PANGHŪꞌ ma kaꞌam.” Angkan sigām paurul ma si Ehod, ati taꞌagaw eꞌ sigām saga kababawan ma sapaꞌ Jordan, ya palabayan ni lahat Mowab. Halam aniyaꞌ minsan sai bay tinugutan eꞌ disi Ehod pauntas parambilaꞌ sapaꞌ heꞌ. 29 Jari ma llaw inaꞌan-i, aniyaꞌ saga sangpūꞌ ngibu aꞌa Mowab tapapatay heꞌ sigām, aꞌa bahani maka akosog. Halam aniyaꞌ minsan dangan bay makalahi. 30 Ma llaw heꞌ-i du tagaꞌos bangsa Mowab eꞌ bangsa Israꞌil ati asannang paglahat inān ma deyom walumpūꞌ tahun.
Si Samgar
31 Manjari ya pasꞌlleꞌ ma si Ehod itu si Samgar anak si Anat. Si Samgar itu bay makapapatay nnom hatus aꞌa bangsa Pilistin. Luwal tungkud panganjudjal sapiꞌ ya pakokosna. Bay isāb iya angaliyusan bangsa Israꞌil min kasigpitan sigām.