2
Malaꞌikat si Yawe Angalapal
1 Na, in malaꞌikat PANGHŪꞌ-Yawe bay patukad min Gilgal ni lahat Bokim boꞌ ahꞌlling ni bangsa Israꞌil, yukna, “Bay kam bowaku paluwas min lahat Misil tudju ni lahat ya bay paljanjiꞌanku ma saga kaꞌmboꞌ-mboꞌanbi. Yukku ma waktu inaꞌan, ‘Mbal balubahanku janjiꞌku ya pagsulutanku maka kaꞌam. 2 Bay kam sohōꞌku subay daꞌa angahinang pagsulutan maka saga aꞌa porol ma paglahat ilu. Gom paꞌin lubuhunbi saga tampat ya pagpudjihan sigām.’ Saguwāꞌ halam aku bay beyaꞌbi. Angay bahāꞌ? 3 Angkan hakaꞌanta na kam, mbal tꞌggalku saga bangsa inān, angkan sigām sapantun iting makasulaman kakīranbi. Tajallat isāb kam eꞌ baꞌanan tuhan-tuhan ya tinaꞌat eꞌ sigām.”
4 Aubus paꞌin pangallam malaꞌikat PANGHŪꞌ inān, magtūy maglemong anangis kamemon saga aꞌa Israꞌil. 5 Angkan Bokima ya pangōn sigām ma lahat inān, ati mainaꞌan sigām angungsuran tutukbalan ni PANGHŪꞌ.
Panoway ma Kabayaꞌan si Yawe
6 Na, bay paꞌin tapatulak eꞌ si Yussaꞌ saga aꞌa Israꞌil, palanjal sigām minnēꞌ boꞌ nirapu eꞌ sigām saga katanaꞌ-tanaꞌan ya pamasukuꞌ katumpukan sigām pakaniya-pakaniya. 7 Jari satꞌggol allum si Yussaꞌ, atukid saga aꞌa Israꞌil angisbat si Yawe ya Tuhan sigām. Angisbat na paꞌin sigām sampay magpatayan na saga pagmattoꞌahan sasuku bay makaꞌndaꞌ saga kahinangan kawasahan ya tahinang eꞌ PANGHŪꞌ-Yawe ma pasalan bangsa Israꞌil.
8 Jari si Yussaꞌ anak si Nūn, ya pinagōnan ‘Sosohoꞌan si Yawe’, amatay ma umulna dahatus maka sangpūꞌ. 9 Takubul iya ma lahat palsukuꞌanna ma Timnat Heres ya ma kabūd-būran Epraꞌim, tampal uttalaꞌ min Būd Gaꞌas.
10 Na, magpatayan paꞌin kapanubuꞌan inaꞌan-i, aniyaꞌ tubuꞌan bahaꞌu pasꞌlleꞌ, ya mbal makakilā PANGHŪꞌ-Yawe, maka halam isāb makataꞌu ma bay tahinang eꞌna ma bangsa sigām Israꞌil. 11 Pagga buwattēꞌ, tahinang eꞌ bangsa Israꞌil kalaꞌatan ya landuꞌ asammal ma pangꞌndaꞌ PANGHŪꞌ,b ati sinumba eꞌ sigām saga Baꞌal. 12 Angꞌbba sigām min si Yawe ya bay pagtuhanan saga kaꞌmboꞌ-mboꞌan sigām. In iya PANGHŪꞌ bay amowa saga kaꞌmboꞌ-mboꞌan eꞌ paluwas min lahat Misil, sagōꞌ bineyaꞌ maka sinumba eꞌ sigām saga tuhan-tuhan ya tinaꞌat eꞌ maglalahat ma jadjahan inaꞌan. Akagit atay PANGHŪꞌ ma sigām 13 ma sabab kataikut sigām min iya boꞌ papinda anumba ni Baꞌal maka saga Astoret. 14 Pagka aheya kaꞌastol PANGHŪꞌ ma bangsa Israꞌil inān, bay pasagaranna sigām nilangpasan heꞌ saga mundu. Pinasagaran isāb sigām niraꞌug eꞌ saga palbantahan ya ma katilibut paglahat sigām. Mbal sigām makaꞌatu, 15 sakahabaꞌ waktu sigām angatubang amonoꞌ, mbal sigām bay pinaraꞌug eꞌ PANGHŪꞌ. Ya na inaꞌan bay panganjanjiꞌna. Gom paꞌin paheya kasukkalan sigām.
16 Na, pagga buwattēꞌ kahālan bangsa Israꞌil, aniyaꞌ saga maghuhukum bay pinaniyaꞌ eꞌ PANGHŪꞌ angalappas sigām min gaꞌosan saga mundu heꞌ. 17 Malaingkan mbal akale bangsa Israꞌil ma saga maghuhukum ya magmakōkan sigām, gom paꞌin sigām angꞌbba min si Yawe boꞌ papinda anumba ma saga tuhan-tuhan saddī. Pabiddaꞌ saga bangsa Israꞌil itu min bay kaꞌmboꞌ-mboꞌan sigām tagnaꞌ, sabab magdaiꞌ-daiꞌ sigām pasihaꞌ min kalꞌngnganan saga kaꞌmboꞌ-mboꞌan eꞌ. Halam bineyaꞌ kabiyaksahan sigām ameyaꞌ ma panohoꞌan PANGHŪꞌ. 18 Bang aniyaꞌ aꞌa pinaniyaꞌ maghukum sumiyan-sumiyan, ginapiꞌ iya eꞌ Tuhan boꞌ supaya talappas saga aꞌa Israꞌil min komkoman saga palbantahan sigām. Buwattēꞌ na paꞌin kahālan satꞌggol masi allum aꞌa maghukum eꞌ. Maꞌaseꞌ PANGHŪꞌ ma bangsa Israꞌil pagka sigām magaruhuy ma sabab pinissokoꞌ maka nijahulakaꞌ eꞌ banta sigām. 19 Saguwāꞌ taꞌabut paꞌin amatay maghuhukum eꞌ, magtūy sigām pabalik maghinang kalaꞌatan akalap lagiꞌ laꞌatna min bay kahinangan kamattoꞌahan sigām. Tinaꞌat maka pinudji eꞌ sigām saga tuhan-tuhan saddī. Minsan niꞌinay, mbal sigām pataikut min kahinangan alaꞌat, maka magmatuwas na paꞌin kōk sigām.
20 Angkan landuꞌ akagit atay PANGHŪꞌ ma bangsa Israꞌil. Yukna, “In bangsa itu hal anaggaꞌ ma pagsulutan ya bay janjiꞌku ma kaꞌmboꞌ-mboꞌan sigām, mbal isab akale ma aku. 21 Angkan mbal palaꞌanku min sigām saga bangsa ya halam bay taraꞌug ma waktu kallum lagiꞌ si Yussaꞌ. 22 Jari gunaku saga bangsa itu panulayan bangsa Israꞌil boꞌ tataꞌuku bang bꞌnnal sigām anꞌppu kaꞌmboꞌ-mboꞌan sigām ameyaꞌ ma kabayaꞌanku.” 23 Angkanna saga bangsa kaseheꞌan bay pinasagaran patꞌnnaꞌ ma lahat inān. Halam sigām bay pinalaꞌan eꞌ PANGHŪꞌ saruꞌun-duꞌun. Halam isāb bay dūlanna si Yussaꞌ angandaꞌug min sigām.