MAGHUHUKUM
1
JŪD MAGHUHUKUM
Palbahagiꞌan Kitab Jabul
Nirugpak saga Bangsa Kanaꞌan Takapin
1 Na, pagpatay paꞌin si Yussaꞌ, angaru saga bangsa Israꞌil ni si Yawe ya Tuhan sigām, yuk-i, “Sai min kami ya dahū angandugpak ni bangsa Kanaꞌan?”
2 Ya sambung PANGHŪꞌ-Yawe, “Panubuꞌ si Yuda ya parahū, sabab bay pamuwanku bahagiꞌ lahat ilu ni komkoman sigām.”
3 Manjari ahꞌlling saga aꞌa bangsa Yuda ni saga kampung sigām bangsa Simiyun, yuk-i, “Gapiꞌinbi kami pehēꞌ ni paglahat ya pamasukuꞌ kami ati magdongan kitam angandugpak ni bangsa Kanaꞌan. Pasꞌlleꞌ kami isāb anganggapiꞌ kaꞌam bang pehēꞌ ni paglahat ya pamasukuꞌ kaꞌam.” Jari tinabangan bangsa Yuda eꞌ bangsa Simiyun.
4 Na, parugpak paꞌin saga aꞌa bangsa Yuda, pinaraꞌug sigām eꞌ PANGHŪꞌ min bangsa Kanaꞌan maka bangsa Peres, ati sangpūꞌ ngibu heka aꞌa bay tapapatay sigām ma lahat Besek. 5 Talanggal isāb mainaꞌan si Adoni-Besek ya pagpanghūꞌan saga aꞌa Besek. Binowa iya magbonoꞌ ati pinalahi saga bangsa Kanaꞌan maka bangsa Peres. 6 Si Adoni-Besek bay makalahi isab, sagōꞌ tinurul iya eꞌ aꞌa Yuda sampay tasaggaw. Pagsaggaw itu, pinōngan bokol tanganna maka bokol tapeꞌna karuwambilaꞌ.
7 Jari ahꞌlling si Adoni-Besek, yukna, “Pitumpūꞌ heka sultan bay kapōnganku bokol tangan maka bokol tapeꞌ sigām. Ya sadja takakan eꞌ sigām momok kinakan apakpak min lamisahanku. Angkan ma buwattinaꞌan itiyaꞌ na aku tinungbasan eꞌ Tuhan ma bay tahinangku ma sigām.” Manjari binowa iya eꞌ saga aꞌa Yuda ni daꞌira Awrusalam ati mahēꞌ kamatayanna.
8 Bay tarugpak asal daꞌira Awrusalam eꞌ saga aꞌa Yuda ati taꞌagaw eꞌ sigām. Pinapagpatay eꞌ sigām saga aꞌana, pinagtautunuꞌ isāb kalumaꞌanna. 9 Pagubus, palūd saga aꞌa Yuda boꞌ angandugpak ni saga aꞌa Kanaꞌan ya patꞌnnaꞌ ma lahat kabūran, maka ma lahat Negeb, maka ma kabūd-būran tampal ni sꞌddopan. 10 Tatꞌkka isāb eꞌ sigām bangsa Kanaꞌan ya patꞌnnaꞌ ma kauman Hebron (ya bay niōnan Kiriyat-Arba ma waktu tagnaꞌ) ati taraꞌug eꞌ sigām disi Sesay, si Ahiman maka si Talmay.
11 Aubus paꞌin min Hebron, parugpak sigām ni saga aꞌa patꞌnnaꞌ ma kauman Deber (ya bay niōnan Kiriyat-Seper ma waktu tagnaꞌ.) 12 Jari ahꞌlling si Kaleb yukna, “Pamakawinku anakku si Aksa ma lꞌlla ya makatawakkal angandugpak maka angalongkopa Kiriyat-Seper.” 13 Si Otniyel ya makalongkop kauman inān, ati pamakawin ma iya eꞌ si Kaleb anakna si Aksa. Si Otniyel itu siyali si Kaleb, si Kenas ya mmaꞌ sigā.
14 Manjari dakayuꞌ llaw pinogos eꞌ si Aksa si Otniyel, sinōꞌ angamuꞌ tanaꞌ min matoꞌana si Kaleb. Sakali pehēꞌ si Aksa ni mmaꞌna. Makareyoꞌ paꞌin iya min kuraꞌna, tinilaw iya eꞌ si Kaleb, yuk-i, “Ai tapanabangku ma kaꞌa, arung?”
15 Yuk sambung si Aksa, “Dūlin aku ma kabayaꞌanku. Pagga aku bay buwanannu tanaꞌ ma Negeb, buwanin giꞌ isab aku saga tuburan boheꞌ.” Jari kabuwanan iya saga tuburan boheꞌ ma kabūd-būran maka ma kapantayan.
16 Na, magbeyaꞌ saga aꞌa Yuda maka saga aꞌa Kēn ya panubuꞌ matoꞌa si Musa. Alaꞌan sigām min daꞌira Kapalmahan boꞌ papinda ni paslangan Yuda. Pasakaum sigām ma saga aꞌa ya asal maglahat mainaꞌan ma Negeb, ma kasekotan kauman Arad.
17 Pagubus, paseheꞌ saga aꞌa Yuda ma kaukampungan sigām bangsa Simiyun ati tarugpak eꞌ sigām bangsa Kanaꞌan ya patꞌnnaꞌ ma daꞌira Sepat. Jari alubu eꞌ sigām daꞌira inān maka kalumaꞌanna angkan pinagōnan daꞌira Hormab. 18 Kalongkopan isāb eꞌ aꞌa Yuda saga daꞌira Gasa, Askelon maka Ekron, beyaꞌ isab tanaꞌ ma sakalingkal saga daꞌira inān.
19 Pagapiꞌ na paꞌin PANGHŪꞌ-Yawe ma bangsa Yuda ati taꞌagaw eꞌ sigām saga kalumaꞌan ma kabūd-būran. Malaingkan halam takoleꞌ eꞌ sigām tinꞌggal saga bangsa ya maglahat ma kapantayan, sabab aniyaꞌ ma sigām kalesa pagdayaw basiꞌ. 20 In kauman Hebron bay pamasukuꞌ ma si Kaleb buwat bay panganjanjiꞌ si Musa, ati tinꞌggal eꞌ si Kaleb tꞌllungan tumpukan bangsa Annak ya bay patꞌnnaꞌ mainaꞌan. 21 Boꞌ arapun in bangsa Jibus ya maglahat asal ma Awrusalam halam bay tapalaꞌan eꞌ bangsa Benjamin. Angkan sigām duwa bangsa masi magsakaum mainaꞌan.
22 Bay isāb nirugpak eꞌ bangsa Yusup daꞌira Betel, pagka sigām ginapiꞌ eꞌ PANGHŪꞌ. 23 Waktu sigām amapehēꞌ mata-mata ni Betel (ya bay niōnan Lūs waktu tagnaꞌ), 24 aniyaꞌ lꞌlla taꞌndaꞌ paluwas min daꞌira inān. Yuk saga mata-mata ma iya, “Panduꞌin kami bang buwattingga pasōd ni daꞌira ilu ati mbal ka inay kami.” 25 Jari tinuliꞌan sigām pasōd pehēꞌ. Pinapatay eꞌ sigām kamemon aꞌa ya maglahat ma daꞌira Betel. Saguwāꞌ in lꞌlla bay anuliꞌan sigām niliyus magtaiꞌanak eꞌ saga mata-mata. 26 Puwas paꞌin heꞌ-i, pehēꞌ aꞌa inān ni lahat bangsa Hīt ati mahēꞌ iya amaniyaꞌ daꞌira. Niōnan eꞌna Lūs, jari Lūs ya ōnna sampay ni kabuwattituhan.
27 Malaingkan halam bay tatꞌggal eꞌ bangsa Manasse saga aꞌa ya maglahat ma Bet-Sān, ma Taꞌanak, ma Dōr, ma Ebleyam, ma Megiddo, sampay isāb ma baꞌanan kalumaꞌan ya ma katilibut saga paglahat itu. Tuꞌud magniyat bangsa Kanaꞌan mbal alaꞌan min paglahat inān. 28 Agaꞌos paꞌin bangsa Israꞌil, niata eꞌ sigām bangsa Kanaꞌan, sinōꞌ maghinang abuhat, sagōꞌ halam bay tapalaꞌan tūy. 29 Damikiyanna isāb bangsa Epraꞌim, halam bay makatꞌggal bangsa Kanaꞌan ya patꞌnnaꞌ ma Geser angkan masi na paꞌin sigām duwa bangsa magsakaum. 30 Damikiyanna bangsa Sibulun halam du isāb bay makatꞌggal bangsa Kanaꞌan ya patꞌnnaꞌ ma Kitron maka ma Nahalol. Angkan masi sigām magsakaum mainaꞌan. Sagōꞌ niata sigām eꞌ bangsa Sibulun sinōꞌ maghinang abuhat. 31 Damikiyanna isab bangsa Aser, halam bay makatꞌggal saga aꞌa patꞌnnaꞌ ma Akko, ma Sidun, ma Alab, ma Aksib, ma Helba, ma Apek, maka ma Rehob. 32 Angkan bangsa Aser masi magsakaum maka bangsa Kanaꞌan ya patꞌnnaꞌ ma jadjahan inān. 33 Damikiyanna bangsa Naptali halam bay makatꞌggal saga aꞌa patꞌnnaꞌ ma Bet-Semes maka ma Bet-Anat, angkan inaꞌan sigām magsakaum maka bangsa Kanaꞌan ya patꞌnnaꞌ asal mainaꞌan. Ya aꞌa Bet-Semes maka Bet-Anat tahinang ata du isab eꞌ bangsa Naptali.
34 In bangsa Dān isāb bay pinaghāran eꞌ bangsa Amor ma kabūd-būran, mbal tinugutan patꞌnnaꞌ ma kapantayan. 35 Ahogot isab pagniyat bangsa Amor in sigām mbal alaꞌan min Būd Heres, Ayjalon maka Saꞌalbim. Saguwāꞌ taꞌabut paꞌin pasōng gaꞌos bangsa Yusup, ya du bangsa Amor nihinang ata. 36 Ya tobtoban tanaꞌ bangsa Amor itu anagnaꞌ min Lꞌbbak Jalalangking sampay ni lahat Sela maka paliyu lagiꞌ minnēꞌ.