Wɩɩsɛ Sabɩɩna mɩ́nɔ́, ká Kirisi dɩŋdɔmɔ sabɩɩna má mɩŋ
4
1 Ŋ nɩcólle, nɩɛ ná wuu há sɩ́ Wɩɩsɛ Sabɩɩna dóé ní mɩ́ŋwɔ́ mɛ́, ɩ́ sɩ́wɔ́ wuu láá dí.
Amá ɩ́ kɩ́ɛ́lɩ́wɔ́ wérí, a ná, rɩ ɓa sabɩŋsɛ lɛ́ Wɩɩsɛ nɛ́; bee wɩ́ɛ́ nyɩɛrʋ wɩ́laabʋlla ɓɩkana zʋ́ dúníé.
2 Ná ɩ́ háá tɩŋ ɛ́, káá zɩŋ Sabɩɩna ná há lɛ́ Wɩɩsɛ:
Nɛrɔ ná wuu há cɩ́ nɩɛ sɩɛrʋ, ká bʋlɛ́ Zeezi Kirisi ɓɩɛ́na bɩ́rmɛ́ nɩbíŋ, Wɩɩsɛ Sabɩɩna nɛ́ mɩŋ tɩ́na mɛ́.
3 Nɛrɔ ná há wɩ ɛ́ wuó bʋl, aá tɩɩnɛ Zeezi mí, sabɩɩna ná há mɩ́nʋ́ mɛ́, ʋ wɩ Wɩɩsɛ lɩ́ɛ́, Kirisi dɩŋdɔmɔ sabɩɩna nɛ́ mɩ́nʋ́ mɛ́.
Ɛ́ dɩŋdɔmɔ koe wɩ́ɛ́ nɛ́, ɓa bʋl pɛ́ɩ́wa ɛ́.
Mʋ́l néé mí, ʋ wáárɔ́ ko dúníé rí.
4 Ŋ bɛ́lɛ́, Wɩɩsɛ nɛ́ tɩ́ɩ́wa é, ɩ́ wo wɩ́laabʋlla ná wuu há ká nyɛtɩ́ɩ́ná nɛ́, bee wɩ́ɛ́ Wɩɩsɛ Sabɩɩna ná há mɩ́nɩ́wa mɛ́, ʋ duoki sabɩɩna ná há mɩŋ dúníé nɩɛ mɛ́.
5 Ɓaá bʋl dúníé wɩ́bʋlɛ nɛ́, ɛ́ nɛ́ tɛ́, dúníé nɩɛ zízésíwó, bee wɩ́ɛ́ dúníé nɛ́ tɩ́wɔ́.
6 Wɩɩsɛ nɛ́ tɩ́rá é; ɛ́ nɛ́ tɛ, nɛrɔ ná há ɛ̃ Wɩɩsɛ, ʋ zízésírá wɩ́ɛ́.
Ká nɛrɔ ná há to Wɩɩsɛ nɛ́ŋ, ʋ é wɩ́rá wɩ́ɛ́ zesi.
Ɛ́ mɛ́ nɛ́, á tɩŋ zɩŋ Sabɩɩna ná há ká taŋá Sabɩɩna, arɩ́rʋ́ ná há ká nyɩɛrʋ sabɩɩna.
Wɩɩsɛ nɛ́ ká cólle
7 Ŋ nɩcólle, ɩ́ lo ráá cólli náŋa; cólle lɛ́ Wɩɩsɛ nɛ́.
Ɛ́ nɛ́ tɛ́, nɛrɔ ná há có nɩɛ, ʋ ká Wɩɩsɛ bio ní, a zɩŋ Wɩɩsɛ.
8 Nɛrɔ ná há wɩ nɩɛ có, ʋ wɩ Wɩɩsɛ ɛ̃, bee wɩ́ɛ́ Wɩɩsɛ nɛ́ ká cólle.
9 Ɩ́ ná Wɩɩsɛ há mákʋ́ cólle párá ɛ́:
Ʋ Bibala nɛ́ ʋ tʋŋ dúníé mí, a makɛ ráá tɩ́ŋʋ́ mɛ́ a ná mɩɩsɛ.
10 Ʋ sɩɛ́ to anɛ á há cóú ní tɛ, ʋ mákʋ́ cólle párá ɛ́, amá ʋ há córá nɛ́ tɛ́, ʋ tʋ́mʋ́ Bio ʋ ko sʋwɛ, anɛ vʋk'ɔsɔ́ á wɩ́bɔmɔ suúri wɩ́ɛ́; ɛ́ nɛ́ ká cólle.
11 Ŋ nɩcólle, rɩ Wɩɩsɛ nɛ́ sɩɛ́ córá mɔ nyɛ, ʋ mɔhɔ̃́ ráá má cólli náŋá rɛ́.
12 Nɛ́ŋ wuu ha wɩ Wɩɩsɛ néé ná.
Raá nɛ́ có náŋá, Wɩɩsɛ mɩ́ŋrá sɩɛrʋ, ɛ́ nɛ́ rʋ́ʋ́ cólle cesi, á sɩɛrʋ.
13 Wɩɩsɛ há púú Sabɩɩna ná párá, ɛ́ nɛ́ á zɩŋ ráá cɔ́ʋ́ mɛ́, ká ʋ má cɔ́rá mɛ́.
14 Wɩɩsɛ tʋ́mʋ́ Bio rʋ́ʋ́ ko la dúníé nɩɛ tá, á sɩ́ɩ́ nóú, ɛ́ nɛ́ á bʋl aá pá nɩɛ.
15 Nɛrɔ ná wuu há sáŋɛ́, a bʋlɛ́ Zeezi ká Wɩɩsɛ Bio ní, Wɩɩsɛ cɔ́ tɩ́na mɛ́, ká tɩ́na má cɔ́ Wɩɩsɛ mɛ́.
16 Wɩɩsɛ há mákʋ́ cólle ná párá, á é ʋ́ʋ̃́, a lɔ́ʋ́ wɩ́ɛ́ dí.
Wɩɩsɛ nɛ́ ká cólle.
Nɛrɔ ná há mɩŋ cólle sɩɛrʋ, ʋ cɔ́ Wɩɩsɛ mɛ́, ká Wɩɩsɛ má cɔ́ tɩ́na mɛ́.
17 Rɩ cólle ní césé á sɩɛrʋ, á sɩ́ ka yɩɛla ná há waá giri, kál ná Wɩɩsɛ háá á rʋ́ʋ́ dí sarɩ́ya, bee wɩ́ɛ́ Zeezi hiẽsó há nɩhɩ̃́ ɛ́, á má dúníé nyúú rɛɛ́ hiẽsó nɩhɩ̃́ ɛ́ nɛ́.
18 Héwíŋ to cólle sɩɛrʋ, amá taŋá taŋá cólle kírí héwíŋ ní aá tá.
Héwíŋ fɛ́ɛ́ é wuu, ʋ lɛ́ wɩɩla ná háá kué ní.
Nɛrɔ ná háá fá héwíŋ, ʋ cólle wɩ césé.
19 Á é có Wɩɩsɛ, bee wɩ́ɛ́ ʋ nɛ́ lá sɩ́ɛ́ cóllírá.
20 Rɩ nɛ́ŋ sʋ́ʋ́ có Wɩɩsɛ, ká bɛ́rʋ́ maábinɔ́ŋɔ, ʋ ká nyɛtɩɩnɔ nɛ́.
Nɛrɔ ná há wʋ́ʋ́ maábinɔ́ŋɔ ná ʋ sɩ́ɩ́ háá néé có, ʋ wɩ Wɩɩsɛ ná ʋ há wʋ́ʋ́ ná má wuó cólli.
21 Ɩ́ ná Kirisi há máŋsɛ wɩ́ɩ́ ná párá:
Nɛrɔ ná há có Wɩɩsɛ, ʋ mɔhɔ̃́ rʋ́ʋ́ cóllú maábinɔ́ŋɔ má.