Bʋllɛ kɛnɔ ná
Pɩɛrɛ
há pʋ́ŋsɛ́
Cʋɔla
1
1 Ŋ é Sɩmɔŋ* Pɩɛrɛ* há ká Zeezi Kirisi tʋtʋ́nnʋ́, a ɔ́ʋ́ nɩtʋmɩ́* má, ŋ nɛ́ pʋ́ŋsɛ kɛnɔ né, aá pá nɩɛ ná há lá Zeezi Kirisi dí, anɛ á má há lɔ́ʋ́ dí ɛ́; ʋ sɩɛ́ ká wɩ́wérí rí, Wɩɩsɛ, rɩ́rá Laataarɔ Zeezi Kirisi há ká tékétéké tʋŋ párá.
2 Rɩ́ Wɩɩsɛ bárka rɩ́ tɛŋfɩ́ɛ́l péríwa kɩ́ŋkáŋ, a tɩŋ zɩmɛ́ ná ɩ́ há kené, a mʋ́ tɩɩnɛ Wɩɩsɛ rɩ́rá Nyuutɩna Zeezi Kirisi mí!
Ɩ́ sɩ́ sʋ́llʋ́ rɩ Wɩɩsɛ nɛ́ tɩ́ɩ́wa
3 Wɩɩsɛ tɩ́ŋʋ́ dóé mí, a párá onni ná wuu há sɩ́ wóllírá mɛ́ sáŋ, á hiẽsó mí, ráá tɩŋ Wɩɩsɛ wɩ́ɛ́ wérí; ʋ nɛ́ ɛ́ɛ́ á zɩŋ nɛrɔ ná há yɩ́rɩ́rá á ka ker, ʋ píŋ rɩ́rʋ́ málwero wuu sɩɛrʋ.
4 Ɛ́ nɛ́ tɛ, Wɩɩsɛ párá onni ná zeŋsí rɩ́wɔ́ píŋ há kɛ onni wuu, ʋ fa há tá nʋɔ bʋlʋ́ sɩ́ tɛ.
Ʋ sɩɛ́ párá ɛ́ onni, a makɛ ráá lɩ́sɩ́rá tɩɩ dúníé wɩ́sʋɔrɛ́ mɛ́; nɩbííne wɩ́hɩɛ̃nɛ́ nɛ́ héwó.
Á sɩɛ́ lɩ́sɩ́rá tɩɩ, a nɩɛsɛ Wɩɩsɛ tɩɩ mála.
5 Ɛ́ wɩ́ɛ́, ɩ́ héíwa taŋá wuu, ká rɩ́ málwero súúri yardá ná ɩ́ há kené mí, rɩ́ zɩmɛ́ má súúri málwero mí,
6 rɩ́ wóllí tɩɩ má baa súúri zɩmɛ́ mɛ́, rɩ́ nyamma má súúri wóllí tɩɩ mɛ́, rɩ́ Wɩɩsɛ tɩŋɛ́ taŋá má baa súúri nyamma mɛ́,
7 rɩ́ maábiirí náŋá zíle má baa súúri Wɩɩsɛ tɩŋɛ́ taŋá mɛ́, rɩ́ náŋá cólle sɩɛ́ súúri maábiirí náŋá zíle mí.
8 Rɩ wɩ́ɛ́ nyáŋ nɛ́ rɩ́ɩ́wa ɩ́'a kɩ́ŋkáŋ, ɛ́ sɩ́ a rɩ́ɩ́wa ɔsɛ zɩŋ Nyuutɩna Zeezi Kirisi, a tʋ́tʋŋ wérí ʋ zɩmɛ́ ná sɩɛrʋ.
9 Nɛrɔ ná há wɩ ɛ́ wɩ́ɛ́ a, ʋ nɩhɩ̃́ nyʋmmɔ nɛ́, ʋ wɩ dɩbólí ná; ʋ sʋ́llɔ́, rɩ Wɩɩsɛ fa hóú tésíé wɩ́zɔkɛ́ suúri.
10 Ɛ́ wɩ́ɛ́, maábináŋa, Wɩɩsɛ há yɩ́rɩ́wa, a tʋ́ɔ́sɩ́wa, ɩ́ ɔsɛ hé dóé, a cɩ́ ɛ́ naa mɛ́ wérí.
Rɩɩ́wa nɩ́ɩ́ tʋŋ ɛ́, ɩ́ waá gɛnnɛ má tɩɩ, Wɩɩsɛ ŋmɛ́nɔ mɛ́.
11 Ɛ́ é, ŋmɛ́nɔ sɩ́ jɛ́llɛ pɛ́ɩ́wa, rɩ́ɩ́wa zʋ́rá Laataarɔ Nyuutɩna Zeezi Kirisi kuorí ná há wɩ dɩtenní kené sɩɛrʋ.
12 Ɛ́ nɛ́ tɛ, tɛ́ŋ wuu mí, ŋ ha sɩ́ lílíísíwa arɩ́ ɛ́ wɩ́ɛ́.
Ɩ́ ɩ̃́wɔ́ rɛ́ wáárɛ, a ka wérí, a cɩ́ tɩkɛ taŋá ná ɓa há píé kármɩ́wa.
13 Ŋ taŋa ha há mɩŋ dúníé né mí, ŋ nóó rʋʋ cɛ́rɔ́ a páŋ, ŋ hiẽsó mí, rɩ́ŋ ha pi wɩ́ɛ́ nyáŋ lílíísíwa, a makɛ rɩ́ɩ́wa sɩ́ sʋ́llʋ́, ká pɔ́ wérí.
14 Ŋ ɩ́ɔ̃́ rɩ́ŋ báá waá a rɩ́ŋ dáánɛ tɔ́ɔ́ mɛ́, anɛ ɛ́, á Nyuutɩna Zeezi Kirisi há máŋsɛ́ páŋ.
15 Ɛ́ wɩ́ɛ́, ŋ sɩɛ́ sɩ́ hé dóé, a makɛ rɩŋ nɛ́ sʋ́wɛ́ má, rɩ́ɩ́wa ka ɛ́ wɩ́ɛ́ lílíísíwa tɩɩ, tɛ́ŋ wuu mí.
Wɩɩsɛ mákɔ́ párá rʋʋ Bio ní ká Zeezi
16 Taŋá, ʋ to anɛ nɩbííne zɩmɛ́ wɩ́luké ní á luki, a a nɩɛ zɩ́ŋrá Nyuutɩna Zeezi Kirisi, háá á rʋ́ʋ́ kó dúníé arɩ́ dóé, amá á tɩɩ sɩ́ɛ́ nɛ́ nóú píŋ, a máŋsɛ pá nɩɛ.
17 Ʋ ná yɩr arɩ́ píŋ ná ʋ Ana Wɩɩsɛ rɩ́ nɛ́; ká Wɩɩsɛ nɛ́ sɩɛ́ há ká píŋ ná nɔ́ŋɔ há toó, ʋ nʋ́ʋ́ liŋó há sɛ́:
«Ŋ Bicólli tɩɩ nɛ́ nyɛ, ŋ sɩɛrʋ wuu ní tɔ́rʋ́ wɩ́ɛ́.»
*f1*
18 Ɛ́ liŋó há lɛ́ bána rɩ́ tuwi, á tɩɩ nʋ́ʋ́, bee wɩ́ɛ́ á rɩ́ Nyuutɩna Zeezi wuu ní fa mɩŋ paalɔ ná nyúú, Wɩɩsɛ há túwé.
19 Ɛ́ nɛ́ tɛ, á ɔsɛ la Wɩɩsɛ wɩ́laabʋlla* wɩ́bʋlɛ́ aá dí ɛ́.
Ʋ sɩɛ́ mɔhɔ̃́ rɩ́ɩ́wa zesi ɛ́ wɩ́ɛ́ wérí, a kaá ja tɔ́ɔ́ pʋlɛ́, rɩ́ nyɩnyaŋwʋl sɩɛ́ póŋ, a cáánɩ́wa baŋcɩllɛ; ɓa nɩhɩ̃́ caanɔ́ háá tʋl bíno sɩɛrʋ nɛ́.
20 Wɩ́ɩ́ ná há ká wɩ́fɩ́ɛ́ŋ, a mɔ rɩ́ɩ́wa la sɩ́ɛ́ zɩŋ nɛ́ ká:
Wɩ́ɛ́ ná Wɩɩsɛ wɩ́laabʋlla há bʋ́lɛ́, a pʋ́ŋsɛ hé Wɩɩsɛ Kɛnɔ sɩɛrʋ, nɛ́ŋ wuu wʋ́ʋ́ tɩɩ wɩ́zɩmɛ wuo kaá lɩ́sɛ ɛ́ wɩ́ɛ́ mʋ́ʋ́la.
21 Ɓa háá bʋ́l wɩ́ɛ́ ná wʋ́ɔ́ tɩɩ cólle ní lɩ́ɛ́.
Amá Wɩɩsɛ Sabɩɩna* nɩ́ mɩ́ŋwɔ́ mɛ́, a yíkwó, ɓa la Wɩɩsɛ nʋɔ wɩ́ɛ́ aá bʋl.