1 Zaŋ 1

Dʋ́ŋdʋ́ʋ̃́ kɛnɔ ná

Zaŋ

há pʋ́ŋsɛ́

Wɩ́bʋlɛ ná há kéŋ hiẽsó

1 Á pʋ́ŋsɛ kɛnɔ né pɛ́ɩ́wa, ráá bʋl wɩ́bʋlɛ ná há kéŋ hiẽsó wɩ́ɛ́ nɛ́, a pɛ́ɩ́wa. Onni wuu púle mí, rɩ ɛ́ wɩ́bʋlɛ mɩ́nɔ́: Á nʋ́ʋ́ liŋó, á tɩɩ sɩ́ɩ́ nɛ́ nóú, á bɛ́llʋ́, a pi nɛ́ŋsa tɩ́kʋ́ mɛ́. 2 Ɛ́ hiẽsó bɩ́rmɛ́ nɩbíŋ, a ko nyɩɩsɛ, á nóú; ɛ́ nɛ́ tɛ, a bʋ́bʋ́lʋ́ wɩ́ɛ́, a máŋsɛ mɩɩsɛ ná há waá tenni, a fa mɩŋ Ana Wɩɩsɛ laka, ká kánʋ́ tɩɩ ko nyɩ́ɩ́sɩ́rá mɛ́ wɩ́ɛ́, aá pɛ́ɩ́wa. 3 Hiẽsó ná á há nʋ́ʋ́ wɩ́ɛ́, a sɩ́ɩ́ má nóú, ʋ wɩ́ɛ́ nɛ́ á bʋl aá pɛ́ɩ́wa má, a makɛ ráá rɩ́rɩ́wa wuu hé náŋá mɛ́, a ka nʋtʋmɛ balá, nʋtʋmɛ ná á rɩ́rá Ana Wɩɩsɛ rɩ́rʋ́ Bio Zeezi Kirisi há kené. 4 Á sɩɛ́ pʋ́ŋsɛ nyáŋ wuu aá pɛ́ɩ́wa, a makɛ ráá sɩɛrʋ de tɔrɛ ɓóŋ ní.

Wɩɩsɛ ká pʋmmɔ nɛ́

5 Liŋó ná á há nɩ́ɛ́ Zeezi Kirisi rɩ́, a pii bʋl aá pɛ́ɩ́wa nɛ́ ká: Wɩɩsɛ ká pʋmmɔ nɛ́, bíno mʋɔ́ wuu tóú mí. 6 Raá sɩ́rá rɩ́rʋ́ kéŋ nʋtʋmɛ, ká á mɩŋ bíno sɩɛrʋ, áá nyɛ nyɩɛrʋ nɛ́. Taŋá tórá wɩ́'állɛ rɩ́rá wɩ́bʋlɛ́ mɛ́. 7 Amá raá nɛ́ mɩŋ pʋmmɔ sɩɛrʋ, anɛ ʋ tɩɩ há mɩŋ pʋmmɔ sɩɛrʋ, á rɩ́rá náŋa kéŋ nʋtʋmɛ, ká rʋ́ʋ́ Bio Zeezi cɛ́l sɩ́sɛ́sɩ́rá wɩ́bɔmɔ wuu duó.

8 Raá sɩ́rá wɩ wɩ́bɔmɔ kené, áá nyɩ́sɩ́rá tɩɩ nɛ́, ká taŋá tórá mɛ́. 9 Amá raá ɩ́ɔ̃́ ráá á wɩ́bɔmɔ, a cesi pá Wɩɩsɛ, ʋ ká tékétéké, a wʋ́ʋ́ nʋɔ hár bɩrɛ, ʋ sɩ́ hérá wɩ́bɔmɔ suúri, ká sɛ́sɩ́rá wɩ́zɔkɛ́ wuu tá. 10 Raá sɩ́rá wɩ wɩ́bɔmɔ ɛ́ɛ́, á pí Wɩɩsɛ makɛ nyɛtɩ́ŋ rɛ́, ʋ wɩ́bʋlɛ tórá sɩɛrʋ.