Zeezi kárá laazɩŋpáárɔ nɛ́
2
1 Ŋ bɛ́lɛ́, ŋ pʋ́ŋsɛ wɩ́ɛ́ nyáŋ pɛ́ɩ́wa, a makɛ rɩ́ɩ́wa sɩ́ wɩ́bɔmɔ á nɛ́.
Amá rɩ oro kúó rʋʋ á wɩ́bɔ́ŋ má, á kéŋ laazɩŋpáárɔ,* ʋ mɩ́ŋrá Ana Wɩɩsɛ laka, ʋ nɛ́ ká Zeezi Kirisi há ká tékétéké.
2 Ʋ nɛ́ sáŋɛ́ ɓa ɓʋ́ʋ́, anɛ vʋk pʋna, a makɛ rɩ́ Wɩɩsɛ hérá wɩ́bɔmɔ suúri.
Á dʋŋɔ wɩ́bɔmɔ yɩr mɛ́ rá sɩɛ́, dúníé nɩbííne wuu wɩ́bɔmɔ yɩr mɛ́ nɛ́.
3 Raá nɛ́ sáŋɛ́ aá tɩ́ŋʋ́ wɩ́máŋsɛ, ɛ́ nɛ́ ráá zɩŋ ráá ɓɩɛ́na ʋ́ʋ̃́.
4 Nɛrɔ ná wuu há sɛ́:
«Ŋ ʋ́ʋ̃́», ká wʋ́ʋ́ wɩ́máŋsɛ́ tɩŋ, tɩ́na ká nyɛtɩɩnɔ nɛ́, taŋá mʋ́ɔ́ wuu tóú mí.
5 Ká nɛrɔ ná háá tɩŋ Wɩɩsɛ wɩ́bʋlɛ, ʋ tɩ́na nɛ́ có Wɩɩsɛ kɩ́ŋkáŋ, ʋ sɩɛrʋ.
Áá tɩŋ ɛ́ mɛ́ nɛ́, rɩ́ɩ́ zɩŋ ráá kɔ́ʋ́ nɩɛ nɛ́.
6 Nɛrɔ ná há sʋ́ʋ́ cɔ́ʋ́ mɛ́ ʋ rɩ́rʋ́ a balá, tɩ́na mɔhɔ̃́ rʋ́ʋ́ wɩ́'állɛ nɛ Nyuutɩna Zeezi Kirisi wɩ́'állɛ nɛ́.
Pʋmmɔ sɩɛrʋ nɩɛ có náŋá
7 Ŋ bicólle, ŋ wɩ pʋ́ŋsɛ́ aá ja rɩ́ŋ máŋsɛ wɩ́fɛ́lʋ́ pɛ́ɩ́wa; wɩ́bɩnɛ́ ná ɩ́ há nʋ́ʋ́ wɩ́ɛ́ púle mí wuu ní.
Ɛ́ wɩ́máŋsɛ nɛ́ ká wɩ́bʋlɛ ná, ɩ́ há nʋ́ʋ́ wɩ́ɛ́.
8 Ká wɩ́máŋsɩfɛ́lʋ́ wɩ́ɛ́ rɩ́ sɩɛ́, ŋ pʋ́ŋsɛ aá pɛ́ɩ́wa.
Ɛ́ wɩ́máŋsɛ kéŋ taŋá, ʋ nyɩ́ɩ́sɛ́ Kirisi mí, a nyɩ́ɩ́sɩ́wa má mɛ́.
Bínó cól ní, ká pʋmmɔ tɩɩ ko lɛ, a wáárɛ aá cuoli.
9 Nɛrɔ ná há sʋ́ʋ́ mɩŋ pʋmmɔ mɛ́, ká bɛ́rɩ́ maábinɔ́ŋɔ, ɩ ha mɩŋ bíno sɩɛrʋ nɛ́.
10 Ká nɛrɔ ná há cóú maábinɔ́ŋɔ, ʋ mɩŋ pʋmmɔ sɩɛrʋ nɛ́.
Ʋ wɩ wɩ́ɩ́ wuu kené, ʋ há sɩ́ yiki nɛrɔ hé wɩ́bɔmɔ mɛ́.
11 Amá nɛrɔ ná há bɛ́rʋ́ maábinɔ́ŋɔ, ʋ mɩŋ bíno sɩɛrʋ nɛ́; ʋʋ́ va bíno sɩɛrʋ, ká wʋ́ʋ́ háá mʋ́ ráŋ ɛ̃, bee wɩ́ɛ́ bíno ná nyʋ́mmʋ́.
Ɩ́ sɩ́ dúníé cóllú
12 Ŋ bɛ́lɛ́, ŋ pʋ́ŋsɔ́ aá pɛ́ɩ́wa,
bee wɩ́ɛ́ Wɩɩsɛ héíwa wɩ́bɔmɔ suúri,
a tɩŋ Kirisi yɩr wɩ́ɛ́.
13 Ánáwa, ŋ pʋ́ŋsɔ́ aá pɛ́ɩ́wa,
bee wɩ́ɛ́ ɩ́ ɛ̃ nɛrɔ ná há mɩ́nɔ́,
dúníé púle wuu mí.
Heŋbiwafɛlɛ, ŋ pʋ́ŋsɔ́ aá pɛ́ɩ́wa,
bee wɩ́ɛ́ ɩ́ dí dóé Sɩtaanɛ* nyúú.
14 Ŋ bɛ́lɛ́, ŋ pʋ́ŋsɔ́ aá pɛ́ɩ́wa,
bee wɩ́ɛ́ ɩ́ ɛ̃ Ana Wɩɩsɛ.
Ánáwa, ŋ pʋ́ŋsɔ́ aá pɛ́ɩ́wa,
bee wɩ́ɛ́ ɩ́ ɛ̃ nɛrɔ ná há mɩ́nɔ́,
dúníé púle wuu mí.
Heŋbiwafɛlɛ, ŋ pʋ́ŋsɔ́ aá pɛ́ɩ́wa,
bee wɩ́ɛ́ ɩ́ kéŋ dóé;
Wɩɩsɛ wɩ́bʋlɛ mɩ́nɩ́wa sɩɛrʋ,
ká ɩ́ wólli dí dóé Sɩtaanɛ nyúú.
15 Ɩ́ sɩ́ dúníé cóllú, ɩ́ sɩ́ dúníé óŋ wuu má cóllú.
Nɛrɔ ná há có dúníé, ʋ wɩ Ana Wɩɩsɛ có.
16 Óŋ ná wuu há ká dúníé óŋ, anɛ:
nɩbinní wɩ́cólle, sɩ́ɩ́ nóó wɩ́hɩɛ̃nɛ́, kuorí nyʋkɔ, ɓa wɩ Ana Wɩɩsɛ lɩ́ɛ́, ɓa wuu lɛ́ dúníé ní.
17 Dúníé sɩɛ́ dáárʋ́ rɛ́, onni ná má há mɩ́nʋ́ sɩɛrʋ nɩbííne hɩ́hɩ́ɛ̃́nɩ́wɔ́ má dɩ́daarɛ; ká nɛrɔ ná háá tʋŋ Wɩɩsɛ cólle, ʋ é kéŋ mɩɩsɛ ná há waá tenni.
Kirisi dɩŋdɔmɔ wɩ́ɛ́
18 Ŋ bɛ́lɛ́, dúníé isé pérí tɛ́sɩ́ɩ́.
Ɩ́ nɩ́ɔ́ rɩ ɓa sɛ́:
«Kirisi dɩŋdɔmɔ sɩ́ ko.»
Mʋ́l néé mí sɩɛ́, Kirisi dɩŋdɔma káŋ, a ko, ɛ́ nɛ́ á zɩŋ rɩ́ dúníé isé pérí tɛ́sɩ́ɩ́.
19 Ɛ́ nɩɛ fa mɩ́ŋrá púl sɩɛrʋ, ká á rɩ́wɔ́ fa to balá, ɛ́ nɛ́ ɓa lɩ́rá sɩɛrʋ; raá rɩ́wɔ́ fa ká balá rɛ́, ɓa fa wɩ́rá sɩɛrʋ́ lɛ.
Amá ɓa lɩ́rá sɩɛrʋ, a makɛ ráá de caasɛ zɩŋ ráá rɩ́wɔ́ to balá nɛ́.
20 Amá ɩ́ é kéŋ Wɩɩsɛ Sabɩɩna* ná Kirisi há píé pá nɩɛ, ɛ́ nɛ́ tɛ, ɩ́ wuu zɩŋ taŋá.
21 Ʋ to anɛ ɩ́ wɩ taŋá ɛ̃ nɛ́ tɛ, ŋ pʋ́ŋsɛ kɛnɔ pɛ́ɩ́wa, ɩ́ há ʋ́ʋ̃́ nɛ́ tɛ; ɩ́ sɩɛ́ ɩ́ɔ̃́ rɩ́ nyɩɛrʋ wuu wɩ taŋá sɩɛrʋ lɩ́ɛ́.
22 Áŋ rɩ́ sɩɛ́ ká nyɛtɩɩnɔ?
Nɛrɔ ná há sɛ́ Zeezi rá to Kirisi ní ká nyɛtɩɩnɔ.
Ʋ tɩ́na nɛ́ ká Kirisi dɩŋdɔmɔ, a vɛ, a wɩ sáŋɛ́ rɩ Wɩɩsɛ ká Ana, ká Kirisi má ɔ́ʋ́ Bio.
23 Nɛrɔ ná há vɛ́ɛ́, a wɩ sáŋɛ́, rɩ Kirisi ká Wɩɩsɛ Bio, ʋ wʋ́ʋ́ Ana má ɛ̃ nɛ́.
Ká nɛrɔ ná há sáŋɛ́ rɩ Kirisi ká Wɩɩsɛ Bio ní, ʋ ʋ́ʋ̃́ Ana má rɛ́.
24 Ɩ́ há nɛ́ wɩ́ɛ́ ná púle wuu mí, ɩ́ lo rɩ́wɔ́ mɩ́nɩ́wa sɩɛrʋ.
Rɩ ɛ́ wɩ́ɛ́ ɩ́ há nɩ́ɛ́ púle wuu mí ní mɩ́nɩ́wa sɩɛrʋ, ɩ́ rɩ́ Wɩɩsɛ Bio sɩ́ cɔ́ náŋa mɛ́, rɩ́ɩ́wa rɩ́rʋ́ Ana má cɔ́ náŋá mɛ́ wuu.
25 Ká Kirisi sɩɛ́ há tá nʋɔ, a bʋ́lʋ́ já rʋ́ʋ́ pi omo ná párá nɛ́ ká, mɩɩsɛ ná há waá tenni.
26 Nɩɛ ná háá jɔ́wɔ́ yéŋŋíwa wɩ́ɛ́ nɛ́, ŋ pʋ́ŋsɛ nyɛ a pɛ́ɩ́wa.
27 Kirisi púú Sabɩɩna pɛ́ɩ́wa é.
Ʋ Sabɩɩna ná sɩɛ́ há mɩ́nɩ́wa sɩɛrʋ, ɩ́ báá wɩ nɛ́ŋ ja rʋ́ʋ́ ko mákɩ́wa.
Sabɩɩna ná mákɛ́ wɩ́ɩ́ wuu ní, aá pɛ́ɩ́wa.
Ʋ wɩ́makɩ́ wuu sɩɛ́ ká taŋá nɛ́, ʋ to nyɩɛrʋ́.
Ɛ́ wɩ́ɛ́, ɩ́ cɔ́ Kirisi mí, anɛ ʋ Sabɩɩna há mákɩ́wa ɛ́.
28 Taŋá nɛ́, ŋ bɛ́lɛ́, ɩ́ cɔ́ Kirisi mí, a makɛ kál ná ʋ háá bɩrko rɩ́ɩ́ nyɩɩsɛ, ráá lɩɩ cɩ́nʋ́ sɩ́ɛ́, a ka yɩɛla, ká rɩ́ hɩɩ̃sɛ sɩ́rá kánʋ́.
29 Ɩ́ ɩ́ɔ̃́ rɩ́ Kirisi ká tékétéké, ɩ́ sɩɛ́ zɩŋ rɩ́ nɛrɔ ná wuu háá a wɩ́ɛ́ ná há ká tékétéké, ʋ má ká Wɩɩsɛ bio ní.