Bʋllɛ kɛnɔ ná
Zaŋ
há pʋ́ŋsɛ́
1
1 Ŋ é nɔhɔ̃́,* ŋ nɛ́ pʋ́ŋsɛ kɛnɔ né, aá pá háálɔ*f1* ná Wɩɩsɛ há lɩ́sɛ́, rɩ́rʋ́ bɛlɛ; ŋ cóíwa arɩ́ taŋá.
Ŋ má dʋŋɔ ra sɩɛ́ wɩ́ɩ́wa có, amá nɩɛ ná wuu há ɛ̃ taŋá, má cóíwa rɛ́,
2 a tɩŋ taŋá ná há mɩ́ŋrá sɩɛrʋ wɩ́ɛ́; ɛ́ taŋá há mɩ́ŋrá sɩɛrʋ waá ténní ná.
3 Ráá Ana Wɩɩsɛ rɩ́rʋ́ Bio Zeezi Kirisi, párá bárka, susufárʋ arɩ́ tɛŋfɩ́ɛ́l, taŋá rɩ́ cólle sɩɛrʋ!
Taŋá rɩ́ cólle ŋmɛ́nɔ
4 Ŋ sɩɛrʋ tɔ́rɔ́ wérí, ŋ há néé rɩɩ bɛlɛ náŋá tɩŋ taŋá, anɛ ɛ́ Ana Wɩɩsɛ há máŋsɛ́ párá.
5 Mʋ́l néé mí sɩɛ́, háwérí, ŋ háá sʋ́lʋ́ ná ɩ rɩ́ nɛ́ ká:
Á cólli náŋá.
Ʋ ɛ́ sɩɛ́ to wɩ́fɛ́lɛ́, ŋ pʋ́ŋsɛ aá pɛ́ɩ́, wɩ́ɩ́ ná Wɩɩsɛ há máŋsɛ́ párá púle wuu mí ní.
6 Cólle kanɛ́ nɛ́ sɩɛ́ ká Wɩɩsɛ wɩ́máŋsɛ tɩŋɛ́.
Wɩɩsɛ wɩ́máŋsɛ ná ɩ há nɩ́ɛ́ púle wuu mí ní ká:
Ɩ́ cólli náŋá.
Nɩnyɩɩsɔ ná há ká Kirisi dɩŋdɔmɔ
7 Nɩnyɩɩsa ɓɩkana céŋ dúníé wuu, a vɛ rɩ́wɔ́ bʋlɛ́ Zeezi Kirisi ɓɩɛ́na bɩ́rmɛ́ nɩbíŋ á ko dúníé.
Nɛrɔ ná há nɩhɩ̃́ ɛ́, ká nɩnyɩ́ɩ́sʋ́ rɛ́; Kirisi dɩŋdɔmɔ nɛ́.
8 Ɩ́ pɔ́ɩ́wa tɩɩ mɛ́, rɩ́ɩ́wa tʋmɛ́ ná nyʋɔrɛ́ sɩ́ yʋ́ksʋ́, ká rɩ́ɩ́wa ná siile kɩ́ŋkáŋ.
9 Nɛrɔ ná wuu há to wɩ́ɛ́ ná Kirisi há píé karmɛ nɩɛ sɩɛrʋ, ká aa daarɛ, a súúri wɩ́ɛ́ náŋa, ʋ wɩ Wɩɩsɛ ɛ̃.
Amá nɛrɔ ná há mɩŋ Kirisi karmɛ́ ná sɩɛrʋ, ʋ ɛ̃ Ana, a zɩŋ Bio má.
10 Rɩ nɛ́ŋ kéŋ karmɛ́ kóíwa rɩ́, rɩ Kirisi karmɛ́ ná rá, ɩ́ sɩ́ tɩ́na láá héíwa jaa mɛ́, ɩ́ sɩ́ tɩ́na bɔ́llʋ́.
11 Rɩɩ ná bɔ́llʋ́, ɩ pɔ́ʋ́ mɛ́ tʋŋ tʋtʋ́ŋbɔmɔ ná ʋ háá tʋmɛ́ nɛ́.
Dɩtenní
12 Ŋ kéŋ wɩ́ɛ́ ɓɩkana aá ja rɩ́ŋ bʋl pɛ́ɩ́wa.
Ŋ taŋa wɩ có rɩŋ pʋ́ŋsɩ́wɔ́ wuu hé kɛnɔ mɛ́, a pɛ́ɩ́wa.
Amá ŋŋ́ já rɩ́ŋ kóíwa dɩhɩ̃́ nɛ́, a ka nʋɔ bʋl pɛ́ɩ́wa, a makɛ ráá wuu sɩɛrʋ tɔrɛ wérí.
13 Ɩ nɔ́ŋɔtɩ́na*f2* ná má Wɩɩsɛ há lɩ́sɛ́, ʋ bɛlɛ sɛ́ rɩŋ bɔ́llɩ́.
\f1 (1.1) Háálɔ (2 Zaŋ 1.1) Wɩcʋɔla púl ní Zaŋ pii yɩ́rɛ Háálɔ ɛ́.
Ɛ́ Háálɔ bɛlɛ nɛ́ ká púl ná sɩɛrʋ wɩcʋɔla wuu.
\f2 (1.13) Nɔ́ŋɔtɩ́na (2 Zaŋ 1.13) Wɩcʋɔla púl ní Zaŋ pii yɩ́rɛ Nɔ́ŋɔtɩ́na ɛ́.
Ɛ́ Nɔ́ŋɔtɩ́na ní nyɛ mɛ́ ká púl ná sɩɛrʋ Zaŋ fa há mɩnɛ́.