Yardá nɛ́ ká ballɩ́ ŋmɛ́nɔ
5
1 Nɛrɔ ná wuu há lɛ́ɛ́ dí, rɩ Zeezi ní ká Wɩɩsɛ Nɩlɩsɛ,* ʋ tɩ́na ká Wɩɩsɛ bio ní.
Nɛrɔ ná wuu sɩɛ́ há có áná, ʋ cóú bɛlɛ má rɛ́.
2 Á sɩɛ́ sɩ́ zɩŋ, ráá có Wɩɩsɛ bɛlɛ, raá nɛ́ có Wɩɩsɛ, aá tɩ́ŋʋ́ wɩ́máŋsɛ.
3 Wɩɩsɛ cólle kanɛ́ nɛ́ kɔ́ʋ́ wɩ́máŋsɛ ná tɩŋɛ́.
Ʋ wɩ́máŋsɛ ná sɩɛ́ wɩ duoki daarɛ.
4 Nɩɛ ná wuu há ká Wɩɩsɛ bɛ́lɛ́, ɓa sɩ́ dí dóé dúníé nɩɛ nyúú.
Á yardá nɛ́ sɩɛ́ párá dóé, á wólli dúníé nɩɛ.
5 Áŋ rɩ́ ká bɩbar, a wólli dúníé rɩ́rʋ́ nɩɛ wuu?
Nɛrɔ ná há lɛ́ɛ́ dí, rɩ Zeezi ká Wɩɩsɛ Bio ní.
6 Ʋ Zeezi Kirisi ní tɩ́ŋ nyimuŋsi rɩ́ cɛ́l mɛ́, a ko dúníé; ʋ wɩ nyii dʋŋɔ mɛ́ nɛ́ tɩ́ŋɛ́ ko, amá ʋ tɩ́ŋ nyii rɩ́ cɛ́l mɛ́ nɛ́ ko.
Wɩɩsɛ Sabɩɩna tɛ́ sɩɛ́da, rɩ ɛ́ ká taŋá, ɛ́ Sabɩɩna nɛ́ sɩɛ́ ká taŋá.
7 Dáŋsɩ́ɛ́wa nɛ́ botoro:
8 Sabɩɩna, nyii arɩ́ cɛ́l.
Ɓa wuu botoró tɛ sɩɛ́da bála nɛ́.
9 Nɩbííne háá tɛ́ wɩ́ɩ́ sɩɛ́da, áá laa dí rʋʋ ká taŋá nɛ́.
Wɩɩsɛ há tɛ́ wɩ́ɩ́ sɩɛ́da nɛ́ sɩɛ́ ká taŋá wuu.
Wɩɩsɛ sɩɛ́da ná sɩɛ́ ká ʋ Bio sɩɛ́da nɛ́ ʋ tɛ.
10 Ɛ́ sɩɛ́da sɩɛ́ mɩŋ nɛrɔ ná wuu há lá Wɩɩsɛ Bio wɩ́ɛ́ dí sɩɛrʋ.
Ká nɛrɔ ná wuu há wɩ Wɩɩsɛ lɛ́ɛ́ dí, ʋ púú makɛ nyɛtɩɩnɔ nɛ́, bee wɩ́ɛ́ ʋ wɩ Wɩɩsɛ há tɛ́ sɩɛ́da ná pɔ́ʋ́ Bio lɛ́ɛ́ dí.
11 Ɛ́ sɩɛ́da nɛ́ nyɛ:
Wɩɩsɛ pí mɩɩsɛ ná há waá tenni párá, ʋ sɩɛ́ tɩ́ŋʋ́ Bio mí ní párá.
12 Nɛrɔ ná há kéŋ Wɩɩsɛ Bio, ʋ kéŋ ɛ́ mɩɩsɛ, nɛrɔ ná há wɩ Wɩɩsɛ Bio kené, ʋ wɩ mɩɩsɛ kené.
Mɩɩsɛ ná há waá tenni wɩ́ɛ́
13 Ŋ pʋ́ŋsɛ kɛnɔ né pɛ́ɩ́wa, ɩ́ nɩ́ɛ́ ná há lá Wɩɩsɛ Bio wɩ́ɛ́ dí, rɩ́ɩ́wa zɩŋ rɩ́ɩ́wa kéŋ mɩɩsɛ ná há waá tenni.
14 Á kéŋ yɩɛla Wɩɩsɛ rɩ́, raá sʋ́l óŋ ʋ rɩ́, ʋ cólle sɩɛrʋ, ʋ sɩ́ zésírá sʋlɛ́.
15 Á sɩɛ́ há ɩ́ɔ̃́ rʋʋ́ zésírá sʋlɛ́, ɛ́ nɛ́ á zɩŋ rɩ́ omo ná duo wuu á háá sʋ́lʋ́ rɩ́, ʋ sɩ́ párá.
16 Rɩ nɛ́ŋ néí maábinɔ́ŋɔ, rʋʋ́ a wɩ́bɔmɔ ná há wɩ mɔhɛ̃́ rʋ́ʋ́ sʋwɛ ɛ́ wɩ́ɛ́, ʋ́ʋ́ cʋɔlɛ Wɩɩsɛ pɔ́ʋ́, Wɩɩsɛ sɩ́ pi hiẽsó pɔ́ʋ́ maábinɔ́ŋɔ ná.
Wɩɩsɛ sɩ́ pi hiẽsó pá nɩɛ ná wuu há á wɩ́bɔmɔ ná há wɩ mɔhɛ̃́ rɩ́wɔ́ sʋsɛ ɛ́ wɩ́ɛ́.
Wɩ́bɔ́ŋ rɛ́ mɩnɛ́, rɩ nɛrɔ ɔ́ʋ́, ɩɩ́ sʋ́wʋ́ nɛ́; ɛ́ wɩ́bɔmɔ wɩ́ɛ́ rá ŋ sɩ́ɩ́wa cʋɔlɛ Wɩɩsɛ.
17 Wɩ́tɔk é wuu ká wɩ́bɔmɔ nɛ́; wɩ́bɔma náŋa mɩ́nɔ́, ɓa wɩ nɩɛ kené aá mʋ́ sʋʋ rɩ́.
18 Á ɩ́ɔ̃́ rɩ́ Wɩɩsɛ bio é wuu, ʋ báá wɩ válɛ́ aá a wɩ́bɔmɔ.
Wɩɩsɛ Bio Zeezi tɩɩ pɔ́ʋ́ mɛ́, Sɩtaanɛ wʋ́ʋ́ wɩ́ɩ́ wuu wuó a.
19 Á ɩ́ɔ̃́ zɩŋ rɩ́ Wɩɩsɛ nɛ́ tɩ́rá, ká dúníé wuu mɩŋ Sɩtaanɛ vapol mʋ́l nɛ́.
20 Á báá ɩ́ɔ̃́ rɩ́ Wɩɩsɛ Bio kúó, a párá sɩ́puró, ráá zɩŋ Wɩɩsɛ ná há ká taŋá Wɩɩsɛ.
Á rɩ́ Wɩɩsɛ ná há ká taŋá Wɩɩsɛ, á ká óŋ balá, a tɩ́ŋʋ́ Bio wɩ́ɛ́.
Ʋ nɛ́ ká taŋá Wɩɩsɛ, ʋ nɛ́ ká mɩɩsɛ ná há waá tenni.
21 Ŋ bɛ́lɛ́, ɩ́ pɔ́ɩ́wa tɩɩ mɛ́ arɩ́ venni.