Á ká Wɩɩsɛ bɛlɛ nɛ́
3
1 Ɩ́ ná Ana Wɩɩsɛ há córá mɔ ɛ́, a káŋrá aá yɩ́rʋ́ bɛlɛ!
Á sɩɛ́ ɓɩɛ́na kɔ́ʋ́ bɛlɛ nɛ́.
Rɩ dúníé nɩɛ nɛ́ wɩ́rá ɛ̃, ɓa há wɩ Wɩɩsɛ ɛ̃ nɛ́ tɛ.
2 Ŋ nɩcólle, mʋ́l néé mí, á ká Wɩɩsɛ bɛlɛ nɛ́.
Ká, á cíé háá á ráá nɛ ɛ́, ʋ ha to nyaamɩ́, á sɩ́ɛ́ mɛ́.
Á taŋa ɩ́ɔ̃́ zɩŋ rɩ́ Kirisi háá bɩ́rko rɩ́ɩ́ nyɩɩsɛ, á sɩ́ nʋ́ʋ́ há nɩhɩ̃́ ɛ́, bee wɩ́ɛ́ á sɩ́ nóú há nɩhɩ̃́ ɛ́ ná.
3 Nɛrɔ ná wuu há kéŋ nyɛ yɩɛla Kirisi rɩ́, ʋʋ́ pɩ́ɩ́rʋ́ tɩɩ nɛ́, anɛ Kirisi há ká páár ɛ́.
4 Nɛrɔ ná wuu háá a wɩ́bɔmɔ, ʋ zɔ́kɛ́ Wɩɩsɛ kíŋse.
Wɩ́bɔmɔ ɛɛ nɛ́ ká kíso zɔkɛ́.
5 Ɩ́ sɩɛ́ ɩ́ɔ̃́, rɩ́ Kirisi kúó rʋ́ʋ́ lárá wɩ́bɔmɔ nɛ́ tá, ká tɩɩ wɩ wɩ́bɔ́ŋ wuu kené.
6 Nɛrɔ ná wuu há cɔ́ Kirisi mí, ʋ báá wɩ válɛ́ aá a wɩ́bɔmɔ; ká nɛrɔ ná ha háá a wɩ́bɔmɔ, ʋ wɩ Kirisi néé ná, a wʋ́ʋ́ ɛ̃ má tɩɩ.
7 Ŋ bɛ́lɛ́, ɩ́ sɩ́ ló rí nɛ́ŋ wuu yéŋŋíwa.
Nɛrɔ ná wɩ́'állɛ há ká tékétéké, ʋ tɩ́na tɩɩ ká tékétéké, anɛ Zeezi Kirisi há ká tékétéké ɛ́ nɛ́.
8 Amá nɛrɔ ná háá a wɩ́bɔmɔ, ʋ ká Sɩtaanɛ nɛrɔ nɛ́, bee wɩ́ɛ́ Sɩtaanɛ ká wɩ́bɔŋ'ár, púle mí wuu ní.
Wɩɩsɛ Bio sɩɛ́ kúó rʋ́ʋ́ zɔkɛ Sɩtaanɛ tʋtʋmɛ́ nɛ́.
9 Nɛrɔ ná wuu há ká Wɩɩsɛ bíí, ʋ wɩ válɛ́ aá a wɩ́bɔmɔ, bee wɩ́ɛ́ Wɩɩsɛ hiẽsó dóé mɩ́nʋ́ mɛ́; Wɩɩsɛ há kɔ́ʋ́ Ana wɩ́ɛ́, ʋ báá wɩ válɛ́ aá a wɩ́bɔmɔ.
10 Wɩ́ɩ́ ná háá caksɛ Wɩɩsɛ bɛlɛ rɩ́ Sɩtaanɛ bɛlɛ náŋá mɛ́ nɛ́ nyɛ.
Nɛrɔ ná wuu wɩ́'állɛ há to tékétéké, a wʋ́ʋ́ maábinɔ́ŋɔ có, ʋ to Wɩɩsɛ bíí.
Á cólli náŋá
11 Wɩ́ɩ́ ná ɩ́ há nɩ́ɛ́ púle wuu mí ní ká:
Á cólli náŋá.
12 Á sɩ́ Kayɛŋ* nɛ́.
Sɩtaanɛ nɛ́ fa tʋ́ʋ́, ɛ́ nɛ ʋ́ ɓʋ́ʋ́ maábio.
Bee wɩ́ɛ́ sɩɛ́, ʋ ɓʋ́ʋ́?
Kayɛŋ wɩ́'állɛ fa bɔ́ŋ, ká ʋ maábio wɩ́'állɛ a tékétéké.
13 Maábináŋa, rɩ dúníé nɩɛ bɛ́rɩ́wa, ɩ́ sɩ́ ló rɩ́ ɛ́ a wɩ́'urí ɩ́ mɛ́.
14 Á é córá maábináŋa, ɛ́ nɛ́ tɛ, á zɩŋ ráá lɛ́ nɩsʋsɛ sɩɛrʋ, a zʋ nɩwómme sɩɛrʋ.
Nɛrɔ ná há wʋ́ʋ́ maábinɔ́ŋɔ có, ʋ ha mɩŋ nɩsʋsɛ sɩɛrʋ nɛ́.
15 Nɛrɔ ná wuu há bɛ́rʋ́ maábinɔ́ŋɔ, ʋ́ ká nɩɓʋ́ʋ́rɔ nɛ́.
Ɩ́ sɩɛ́ ɩ́ɔ̃́ rɩ́ nɩɓʋ́r wuu, wɩ mɩɩsɛ ná há waá tenni kené.
16 Zeezi Kirisi púú mɩɩsɛ lenni sʋʋ, á wɩ́ɛ́, ɛ́ mɛ́ nɛ́, á zɩŋ cólle há ká óŋ ná.
Ɛ́ wɩ́ɛ́, ʋ mɔhɔ̃́ ráá má pírá mɩɩsɛ lenni sʋʋ, á maábináŋa wɩ́ɛ́.
17 Rɩ nɛ́ŋ rɩ́ kéŋ ɓɩɛ, ká nóú maábinɔ́ŋɔ rʋʋ́ yáárʋ́, ká ʋ wʋ́ʋ́ susu fɛ́ɛ́, ká nyúmmú sɩ́ɛ́ rɩ́rʋ́, ɛ́ ɓɩɛ tɩ́na sɩ́ wólli bʋlʋ́ có Wɩɩsɛ?
18 Ŋ bɛ́lɛ́, ɩ́ sɩ́ ló ráá cólli nɩɛ rɩ́ nʋɔ yɔ́ɔ́, arɩ́ nʋŋmɔ́ŋ wɩ́bʋlɛ́ dʋŋɔ.
Ɩ́ lo ráá cólli nɩɛ arɩ́ taŋá a a wɩ́were aá pɔ́wɔ́.
19 Raá tʋŋ ɛ́, á sɩ́ zɩŋ ráá ká taŋá nɩ́ɛ́, ká ráá baŋcɩllɛ má pɩ́ dɩbalá Wɩɩsɛ sɩ́ɛ́.
20 Raá sabɩɩna nɛ́ ɩ̃́rá wɩ́zɔkɛ́, a bʋl aá yórá, Wɩɩsɛ kɩ́rá sabɩɩna, ʋ ɛ̃ wɩ́ɩ́ wuu ní.
21 Ŋ nɩcólle, raá sabɩŋsɛ nɛ́ wɩ bʋ́lɛ́ aá yórá, á kéŋ yɩɛla ná há waá giri, Wɩɩsɛ sɩ́ɛ́ mɛ́.
22 Ɛ́ wɩ́ɛ́, raá sʋ́l óŋ wuu ʋ rɩ́, ʋ sɩ́ párá, bee wɩ́ɛ́ áá tɩŋ wɩ́ɛ́ ná ʋ há máŋsɛ́ párá, áá a wɩ́ɛ́ ná má, háá tɔ́rʋ́ sɩɛrʋ.
23 Ʋ sɩɛ́ há máŋsɛ wɩ́ɩ́ ná párá, ráá a nɛ́ ká:
Ráá lɔ́ʋ́ Bio Zeezi Kirisi wɩ́ɛ́ dí, ká cólli náŋá má, anɛ ɛ́ ʋ há makɛ párá.
24 Nɛrɔ ná há sáŋɛ́ aá tɩŋ Wɩɩsɛ wɩ́máŋsɛ ná, ʋ kenú tɩɩ cɔ́ Wɩɩsɛ mɛ́ nɛ́, ká Wɩɩsɛ má cɔ́ tɩ́na mɛ́.
Á sɩɛ́ tɩ́ŋʋ́ Sabɩɩna ná ʋ há píé párá mɛ́ nɛ́, a zɩŋ rɩ́ Wɩɩsɛ cɔ́rá mɛ́.