Nyuutɩna Zeezi Kirisi bɩrkoe wɩ́ɛ́
3
1 Ŋ nɩcólle tɩɩ, ɩ́ nóú, ŋ bʋllɛ kɛnɔ nɛ́ nyɛ, ŋ pʋ́ŋsɛ aá pɛ́ɩ́wa wáárɛ.
Ŋ kɛnnɛ ná wuu bɛllɛ sɩɛrʋ, ŋ há bʋ́l wɩ́ɛ́ ná ká wɩ́liisé rí, a makɛ rɩ́ŋ sáŋɩ́wa mɛ́, rɩ́ɩ́wa ka sabɩŋsɛ ná há wéró, a tɩŋ Wɩɩsɛ mɛ́.
2 Ŋŋ́ já rɩ́ɩ́wa lílíísíwa tɩɩ, arɩ́ wɩ́ɛ́ ná Wɩɩsɛ wɩ́laabʋlla há lá sɩ́ɛ́ bʋl, arɩ́ wɩ́máŋsɛ ná Nyuutɩna há kárá Laataarɔ há pá nɩtʋmɛ́ ná, ɓa má baa makɛ pɛ́ɩ́wa nɛ́.
3 Ŋ taŋá já rɩ́ɩ́wa la sɩ́ɛ́ zɩŋ rɩ́ dúníé isé tɛ́ŋ mɛ́, nɩɛ sɩ́ isi aá tʋ́ŋwɔ́ tɩɩ satɔrɔ́ wɩ́hɩɛ̃nɛ́, ká cícérmíwa mɛ́.
4 Ɓa sɩ́ bʋlɛ́:
«Zeezi Kirisi wɩ sʋ́ʋ́ sɩ́ bɩrko?
Ʋ sɩɛ́ mɩŋ nɛɛ́?
Á naabálwa sʋ́sɔ́ rɛ́ wáárɛ, ká wɩ́ɩ́ wuu ha wɩ bɩ́rsɛ́; dúníé ha dé nʋ́ʋ́ nɩɩsɔ nɛ́, anɛ ɛ́ Wɩɩsɛ há ɛ́ɛ́.»
5 Nɩɛ ná háá bʋl nyɛ, ɓa sánɔ́ nɛ́ a sʋ́llɛ, rɩ fól wuu rí, Wɩɩsɛ tɩ́ŋʋ́ wɩ́bʋlɛ mɛ́, a a bána rɩ́ tíé wuu.
Wɩɩsɛ á tíé ʋ pɩ́nʋ́ dʋŋɔ, nyii má pɩ́ŋwɔ́ dʋŋɔ.
6 Wɩɩsɛ ɔ́ɔ́ duózeŋsi ko, nyii ná tɩɩ tɔ́ tésíé dúníé ná wuu mí, a zɔ́kʋ́.
7 Wɩɩsɛ sɩɛ́ báá sɛ́ rʋ́ʋ́ sɩ́ a rɩ́ níŋ dí zaa bána, arɩ́ tíé né wuu zɔkɛ.
Ɛ́ wɩ́bʋlɛ taŋa sɩ́ káŋwɔ́ cɩ́ nyɛ, a kaá ja tápʋl ná Wɩɩsɛ háá á rʋ́ʋ́ dí dúníé nɩɛ sarɩ́ya, a zɔkɛ nɩɛ ná há wʋ́ʋ́ nʋɔ tɩ́ŋɛ́.
8 Amá ŋ nɩcólle tɩɩ, ɩ́ sɩ́ wɩ́ɩ́ né balá mɛ́ sʋ́llʋ́; ʋ nɛ́ ká:
Wɩɩsɛ é rɩ́, tápʋl balá nɩhɩ̃́ anɛ bɩŋsɛ bʋ́ɩ́ nɛ́, ká bɩŋsɛ bʋ́ɩ́ má nɛ tápʋl balá.
9 Nɩɛ náŋa bɩ́ɩ́nɔ́ rɩ Wɩɩsɛ fɩ́ɛ́lɔ́ rɛ́; rʋʋ tá nʋɔ bʋlʋ́ sɩ́ a wɩ́ɩ́, ʋ wɩ kɩ́kɛ́lɛ́ a.
Wɩɩsɛ sɩɛ́ wɩ fɩɛlɛ, amá ʋ kéŋ nyamma nɛ́, ɩ́ wɩ́ɛ́, ʋ waá ja rɩ́ nɛ́ŋ wuu zɔkɛ.
Ʋ taŋá já rɩ́ nɩɛ wuu bɩ́rsɛ nɛ́, a lo Wɩɩsɛ mɛ́ aa zɔkɛ́.
10 Amá Nyuutɩna Zeezi bɩrkoe ná sɩ́ uri nɩɛ mɛ́, anɛ gaarɔ háá uri ɛ́.
Ʋ kal koolí ná sɩɛ́, dɔ́mɛ ɓɩzeno sɩ́ dɔ́ŋ nyúú rí, rɩ́ bána nyɩ́ɩ́kɛ, rɩ́ níŋ mɩ́ɛ́rɛ bána nyúú onni wuu, ká rɩ́ tíé rɩ́rʋ́ onni wuu má nyɩ́ɩ́kɛ.
11 Ɩ́ sɩɛ́ há ɩ́ɔ̃́ rɩ́ onni nyáŋ wuú á rɩ́wɔ́ nyɩ́ɩ́kɛ nyɛ, ɩ́ zɩŋ rʋ́ʋ́ mɔhɔ̃́ rɩ́ɩ́wa kánɩ́wa tɩɩ, kanɛ́ oro rí:
Ɩ́ pííwa tɩɩ pá Wɩɩsɛ ɓóŋ, aá tɩ́ŋʋ́ ŋmɛ́nɔ, wɩ́ɩ́ wuu mí,
12 a dɩ́dɛllɛ Wɩɩsɛ tápʋl ná, ká pɛ́ hé dóé, rɩ́ ɛ́ tápʋl peri kɩ́kɛ́lɛ́.
Ɛ́ tápʋl nɛ́ rɩ́ bána mɩ́ɛ́rɛ níŋ sɩɛrʋ, a nyɩ́ɩ́kɛ, rɩ́ onni ná wuu há mɩŋ bána nyúú má mɩ́ɛ́rɛ níŋ sɩɛrʋ.
13 Amá Wɩɩsɛ tá nʋɔ bʋlʋ́ sɩ́ a báŋfɛlɔ arɩ́ tífɛlɔ, rɩ́ tékétéké dʋŋɔ nɛ́ mɩŋ ráŋ.
Á é kéŋwó yɩɛla nɛ́.
14 Ɛ́ wɩ́ɛ́, ŋ nɩcólle tɩɩ, ɩ́ há mɩŋ ɛ́ tápʋl dɛllɛ́ mɛ́, ɩ́ héíwa taŋá wuu, a makɛ rɩ́ɩ́wa sɩ́ busunnu mʋɔ́ wuu kánʋ́, ká rɩ́ɩ́wa wɩ́ɛ́ wuu cɛ́rɛ, Wɩɩsɛ sɩ́ɛ́, rɩ́ tɛŋfɩ́ɛ́l má mɩ́nɩ́wa rɩ́ Wɩɩsɛ pɛ́kɛ.
15 Ɩ́ zɩŋ rɩ́ Nyuutɩna nyamma ná ká ŋmɛ́nɔ́ rɛ́, ʋ wúri pá nɩɛ, rɩ́wɔ́ ná laatɛ́, anɛ ɛ́ á nɩcólli tɩɩ Pool* há kárá maábinɔ́ŋ, há tɩ́ŋ wɩ́zɩmɛ ná Wɩɩsɛ há pɔ́ʋ́ mɛ́, a pʋ́ŋsɛ pɛ́ɩ́wa.
16 Ʋʋ́ a ɛ́ nɛ́, ʋ kɛŋpʋ́ŋsɛ ná wuu sɩɛrʋ, ʋ háá bʋl wɩ́ɩ́ né wɩ́ɛ́.
Wɩ́ɛ́ náŋa sɩɛ́ mɩŋ ráŋ, ɓa mʋ́ʋ́la nɩɩ duokí.
Nɩɛ ná há wɩ wɩ́ɛ́ ɛ̃, a wɩ wérí má bɩ́ɛ́ Wɩɩsɛ wɩ́ɛ́ sɩɛrʋ, ɓaá ka ɛ́ wɩ́ɛ́ bɩ́rsɛ ɓa bɩrmɛ wɩ́húónní, anɛ ɓa há válɛ́ ka Wɩɩsɛ Kɛnɔ wɩ́ɛ́ náŋa aá bɩ́rsɛ ɛ́.
Ɓa sɩɛ́ háá tʋŋ ɛ́, ɓaá zɔ́kwɔ́ tɩɩ nɛ́.
17 Ɩ́ é sɩɛ́, ŋ nɩcólle tɩɩ, ɩ́ ɛ̃ ɛ́ mɛ́ rɛ́, wáárɛ.
Ɛ́ wɩ́ɛ́, ɩ́ pɔ́ɩ́wa tɩɩ mɛ́, rɩ́ ɛ́ nɩɛ há wɩ Wɩɩsɛ wɩ́ɛ́ tɩŋ, rɩ́wɔ́ sɩ́ɩ́wa yíkí héwó tɛlɛ́ ná mɛ́, rɩ́ɩ́wa báá sɩ́ nɩbɩɩlɛ́ á, Wɩɩsɛ wɩ́ɛ́ sɩɛrʋ.
18 Amá ɩ́ ha ɔsɛ aá mʋ́ sɩ́ɛ́, á Nyuutɩna Zeezi Kirisi há kárá Laataarɔ bárka ná sɩɛrʋ, a ɔsɛ zɩ́mʋ́ wérí.
Ʋ nɛ́ tɛ píŋ, nyɛ mɛ́, ká kaá mʋ́ wuu!
Amɩɩ*!(1.17) Ŋ sɩɛrʋ wuu ní tɔ́rʋ́ wɩ́ɛ́ (2 Pɩɛrɛ 1.17) Zeezi balá nɛ́ ká nɛrɔ ná wɩ́'állɛ rɩ́rʋ́ wɩ́bʋlɛ́ wuu há wéró a tɔrɛ Wɩɩsɛ sɩɛrʋ.
Zeezi dʋŋɔ vʋk'ɔsɔ́ nɛ́ dʋ́sɛ́ Wɩɩsɛ cɔwɩɩlɔ́.
Ɛ́ nɛ́ Wɩɩsɛ tɩɩ tɛ ɛ́ sɩɛ́da pɔ́ʋ́.
(Matie 17.5; Markɛ 9.7; Liki 9.35)