Nɩɛ ná háá karmɛ nyɛwɩ́ɛ́, Wɩɩsɛ sɩ́ díwó sarɩ́ya
2
1 Tésíé mí, wɩ́laabʋlla fa mɩŋ Ɩzɩrayɛl duo* nɩɛ sɩɛrʋ, a a nyɛtɩ́ɩ́ná; ʋ sɩɛ́ á rʋ́ʋ́ nɛ ɛ́ tɩɩ nɛ́, a pɛ́ɩ́wa má, nɩɛ ná háá karmɛ nyɛwɩ́ɛ́ sɩ́ zʋ́ɩ́wa sɩɛrʋ, a lʋɔrɛ karmɛ wɩ́ɛ́ ná háá zɔkɛ nɩɛ.
Ɓa sɩ́ vɛ Nyuutɩna ná há lɔ́wɔ́ tá; a tɩŋ ɛ́ wɩ́ɛ́, ʋ waá dáánɛ, ká rɩ́ zɔ́krʋ ɓɩzeno pérwó.
2 Nɩɛ ɓɩkana sɩɛ́ sɩ́ tɩ́ŋwɔ́ mɛ́, aá a nɩlɩɩlɩ́wɩ́ɛ́, rɩ́ nɩɛ tɩŋ ɛ́ mɛ́ a zɔkɛ Wɩɩsɛ ŋmɛ́nɔ yɩr.
3 Nɩɛ ná háá karmɛ nyɛwɩ́ɛ́, ɓa hɩ́ɛ̃́nɛ́ ɓɩɛ aá daarɛ; ɓa sɩɛ́ sɩ́ tɩŋ nʋŋmɔ́ŋ mɛ́, a nyɩsɛ aá lɛ́ɩ́wa ɓɩɛ.
Amá fól wuu rí, Wɩɩsɛ dí sarɩ́ya yówó; ɓa zɔkɛ́ báá wɩ tápʋ́l kené.
4 Wɩɩsɛ malɩ́kawa ná má tɩɩ fa há ɛ́ɛ́ zɔ́kʋ́ mɛ́, ʋ wʋ́ɔ́ yɔ́ɔ́ lóé.
Ʋ kɛ́sɩ́wɔ́ yoo hé níŋjaa* sɩɛrʋ, ɓa vɔ́sɩ́wɔ́ rɩ́ bɛŋzɛllɛ tá, bíno sɩɛrʋ ráŋ, aá dɛllɛ kal ná Wɩɩsɛ háá á rʋ́ʋ́ dí nɩɛ sarɩ́ya.
5 Tésíé mí, Nowe* tɛ́ŋ mɛ́ nɩɛ ná fa háá a wɩ́bɔma, Wɩɩsɛ wʋ́ɔ́ má yɔ́ɔ́ lóé.
Ʋ ɔ́ɔ́ duózeŋsi ko kɩ́ŋkáŋ, nyii gíri, a tɔ́ tíé wuu mí, a pa wɩ́bɔŋ'aara ná wuu, ká lo Nowe rɩ́rʋ́ nɩɛ:
ɓa nɩɛ córí dʋŋɔ.
Ɛ́ Nowe sɩɛ́ fa bʋ́l Wɩɩsɛ taŋá ná wɩ́ɛ́ pá nɩɛ.
6 Tɔ́nɛ bɛllɛ má fa mɩŋ ráŋ, ɓaá yɩ́rwɔ́ Sodomi* arɩ́ Gɔmɔɔrɛ.
* Ɓa má nɩɛ fa á wɩ́bɔma, Wɩɩsɛ dí sarɩ́ya yówó, a a níŋ díwó rɩ́wɔ́ onni wuu mʋ́ɔ́lɛ.
Ʋ ɛ́ɛ́ já rʋ́ʋ́ makɛ wɩ́ɩ́ ná háá á rʋ́ʋ́ peri wɩ́bɔŋ'aara wuu ní.
7 Ɛ́ tɛ́ŋ mɛ́, báálɔ oro, ɓaá yɩ́rɛ Lɔtɛ,* a fa a nɩtékétéké, a mɩŋ ɛ́ tɔ́nɛ wɩ́bɔŋ'aara ná sɩɛrʋ; ʋ dʋŋɔ nɛ́ Wɩɩsɛ a, ʋ lú lɛ.
Ɓa wɩ́'állɛ ná faá zɔkɛ Lɔtɛ sɩɛrʋ wérí.
8 Lɔtɛ sɩɛ́ fa há ká nɩtékétéké ká kéŋwó sɩɛrʋ, a nɩ́ná, ká nɩ́nɛ wɩ́bɔma ná ɓa háá ɛɛ́ kal wuu, ɛ́ faá mɩ́lmʋ́ wérí, ʋ nɩtáŋnɛ ná yɩr mɛ́.
9 Wɩ́ɛ́ nyáŋ wuu sɩɛ́ jɔ́wɔ́ mákrá, ráá zɩŋ rɩ́ Nyuutɩna Wɩɩsɛ ɛ̃ ŋmɛ́nɔ ná ʋ há sɩ́ tɩŋ, ká lɩ́sɛ nɩɛ ná háá tɩ́ŋʋ́ taŋá, díŋewa mɛ́, a zɩŋ ŋmɛ́nɔ ná má ʋ há sɩ́ tɩŋ, ká a rɩ́ nɩɛ ná háá tʋŋ bɔ́ŋbɔ́ŋ, rɩ́wɔ́ ná wɩɩla, cíé sarɩ́ya kal.
10 Nɩɛ ná há tɩ́ŋwɔ́ wɩ́hɩɛ̃nɛ́ mɛ́ aá a nɩlɩɩlɩ́wɩ́ɛ́, ká bel aá guoni Wɩɩsɛ tíŋ ná, ɛ́ nɩɛ nɛ́ rɩ́ Wɩɩsɛ ɔsɛ a rɩ́wɔ́ ná wɩɩla kɩ́ŋkáŋ.
Nɩɛ ná háá karmɛ nyɛwɩ́ɛ́ ná, ɓa wɩ nɛ́ŋ wuú fá, ká ka nyúduo má; ɓa wɩ píŋ tɩ́náwa ná há mɩŋ bána nyúú zíl mʋɔ́ má, ká tʋ́tʋ́ksɩ́wɔ́.
11 Nɩɛ ná háá karmɛ nyɛwɩ́ɛ́, Wɩɩsɛ malɩ́kawa dóé kɩ́wɔ́ a tá tíé, ká ɓa wɩ wɩ́zɔkɩ́ wuu píé cɩ́ɩ́nɛ ɛ́ píŋ tɩ́náwa, a tʋ́ksɩ́wɔ́, Nyuutɩna Wɩɩsɛ sɩ́ɛ́.
12 Nɩɛ ná háá karmɛ nyɛwɩ́ɛ́ ná, ɓaá a wɩ́ɛ́ bínó ní, anɛ balla há wɩ wɩ́zɩmɛ kené ɛ́, ká mɩŋ ŋmɔwɩɓʋ́ɩ́ dʋŋɔ wɩ́ɛ́ nɛ́.
Wɩ́ɛ́ ná ɓa há wʋ́ɔ́ ɛ̃ nɛ́, ɓa bʋl bɔ́ŋbɔ́ŋ aá caasɛ.
Ɓa má sɩɛ́ sɩ́ sʋsɛ anɛ balla.
13 Ɓa há á wɩ́bɔma ná wuu kɩŋ sɩ́ túŋwó mí.
Ɓa satɔrɔ́ nɛ́ ká, rɩ́wɔ́ a nɩlɩɩlɩ́wɩ́ɛ́ wɔhɔ.
Ɩ́ rɩ́wɔ́ náŋá mɛ́ hé dí ɓɩɛ ká hɩɩ̃sɛ́ rɛ́, a a yɩzɔkɔ́ má, ká ɓa wɩ́wálmɛ, rɩ́wɔ́ nyɩ́sɩ́wa hé wɩ́ɛ́ mɛ́, káá jʋɔsɛ.
14 Háála rɩ́ báála wɩ́ɛ́ dʋŋɔ nɛ́ mɩ́ŋwɔ́ nyunni mí; ɓa wɩ wɩ́bɔma ɛɛ́ bɔl.
Ɓaá nyɩsɛ nɩɛ ná yardá há múúré, aá hé wɩ́bɔma mɛ́.
Safʋʋnɩ́ ɓɩjɔɔ dʋŋɔ nɛ́ mɩ́ŋwɔ́ baŋcɩllɛ mɛ́.
Wɩɩsɛ ɓʋ́sɩ́wɔ́ pʋ́sɛ.
15 Ɓa vɛ́ Wɩɩsɛ ŋmɛ́nɔ, ká yéŋŋi a tɩŋ Bɔsɔrɛ bio Balaamɛ* nabulle.
Balaamɛ fa có rʋʋ tʋ́ŋ bɔ́ŋbɔ́ŋ, ká la meéwíé.
16 Ʋ sɩɛ́ há vɛ́ Wɩɩsɛ nʋɔ ɛ́, Wɩɩsɛ bɛ́sʋ́ mɛ́.
Wɩɩsɛ ɔ́ɔ́, kokúme há wɩ wɩ́ɛ́ bʋl, ʋ bʋl wɩ́ɛ́ anɛ nɩbííno, a kɛ́rɛ Balaamɛ rʋ́ʋ́ sɩ́ nɩcʋ́lwɩ́ɛ́ á.
17 Nɩɛ ná háá karmɛ nyɛwɩ́ɛ́ ná dé nɛ nyibúlbʋɔnnɛ há tóké ní, a baa nɛ duóbásɛ, pozeno há lúé pɩsɛ tá.
Wɩɩsɛ sɩɛ́ bɩ́rmɛ́ dɩhɩ̃́, bíno tíŋtíŋ sɩɛrʋ a bílwó mí.
18 Ɓaá kɔ kʋɔllɛ, a bʋ́bʋl nyʋkwɩ́ɛ́ ná há wɩ mʋ́ʋ́la kené, a tɩŋ nɩbinní satɔrɔ́ wɩ́hɩɛ̃nɛ́ ɛɛ mɛ́, a nyɩsɛ aá kɛsɛ nɩɛ ná sɩɛ́ nɛ́ há dé wálmɛ lɩ́sɩ́wɔ́ tɩɩ, nɩɛ ná há wɩ Wɩɩsɛ tɩŋ sɩɛrʋ.
19 Ɓaá bʋl pá nɩɛ bʋlɛ́, rɩ ɓa nɛ́ tɩ́ŋwɔ́ mɛ́, ɓa sɩ́ tɩ́llɩ́wɔ́ tɩɩ, ká ɓa tɩɩ a yósí, wɩ́sʋɔrɛ́ ná há yíkwó aá mʋ́ dɩzɔkɩ́ sɩɛrʋ; nɛrɔ wuu há lóé wɩ́ɩ́ ná málɩ́, a dí dóé ɩ nyúú, ɩ ká ɛ́ wɩ́ɩ́ yómo ní.
20 Ɛ́ wɩ́ɛ́, rɩ nɩɛ nɛ́ kúé zɩ́ŋrá Nyuutɩna Zeezi Kirisi há kárá Laataarɔ, rɩ́ɩ́ lɩ́sɩ́wɔ́ tɩɩ dúníé wɩ́ɛ́ ná há yíkí nɩɛ ɓaá a wɩ́bɔma mɛ́, káá báá lo rɩ́ ɛ́ wɩ́ɛ́ málwɔ́, a dí dóé ɓa nyúú, ʋ é, ɓa dɩgírsi sɩ́ lɔ́rɛ, a kɩ́llɩ́wɔ́ tésíé mí.
21 Rɩ ɛ́ nɩɛ fa wɩ taŋá ŋmɛ́nɔ ná tɩ́ŋɛ́ nɛ́ cúcó, ɓa há tɩ́ŋɛ́, ká baa vɛ Wɩɩsɛ wɩ́máŋsɛ ná ɓa fa há máŋsɛ pɔ́wɔ́.
22 Ɓa há sʋ́ɔ́lɛ́ bʋ́lʋ́ ná ká taŋá, ʋ nɛ́ sɩɛ́ bílwó mí.
Ɓa sɛ́:
«Váá tʋ́ɔ́sɔ́, a tɩɩ bɩrmʋ́ paa dí.»
A baa bʋlɛ́:
«Ɩ há dé mɩŋ koo fó tenné mí ní ká, ʋ báá há zʋ́ɛ́ bɩ́rɛ pɩpɛrɛ́.»