Dʋ́ŋdʋ́ʋ̃́ kɛnɔ ná
Pɩɛrɛ
há pʋ́ŋsɛ́
Cʋɔla
1
1 Ŋ Pɩɛrɛ* há ká Zeezi Kirisi nɩtʋmɩ́,* ŋ nɛ́ pʋ́ŋsɛ kɛnɔ né, aá pá Wɩɩsɛ nɩtʋɔsɛ́ ná há ɓɛ́sɛ́, a mɩŋ dɩhɩ̃́ wuu a a nɩhʋ́ɔ́rá, a mɩŋ Pɔŋ dɩtɩ́llɛ, Galasi,* Kapadɔsɛ, Azi arɩ́ Bitini tíé wuu mí.
2 Fól wuu rí, á Ana Wɩɩsɛ tʋ́ɔ́sɩ́wa, a púú Sabɩɩna* héíwa mɛ́, ɩ́ ɔ́ʋ́ nɩɛ, a makɛ rɩ́ɩ́wa tɩ́tɩŋ Zeezi Kirisi nʋɔ, ká rʋ́ʋ́ cɛ́l ná há bɩ́sɛ́, mʋ́ʋ́rɩ́wa busunnu.
Rɩ́ Wɩɩsɛ bárka rɩ́rʋ́ tɛŋfɩ́ɛ́l súúri kɩ́ŋkáŋ a pɛ́ɩ́wa!
Yɩɛla ná á há kené
3 Á bɩ́rá Nyuutɩna Zeezi Kirisi Ana Wɩɩsɛ mɛ́!
Ʋ susufárʋ zéŋ mí ní tɛ, ʋ a, á ka mɩfɛlɔ, anɛ ɓa há bɩ́rɛ́ lʋ́lrá, a tɩ́ŋʋ́ há ílli Zeezi Kirisi sʋʋ mɛ́ ná yɩr mɛ́; ɛ́ wɩ́ɛ́, á kéŋ mɩɩsɛ yɩɛla,
4 aá dɛllɛ liwe ná Wɩɩsɛ há bílú nɩɛ mɛ́.
Ɛ́ liwe waá zɔkɛ, ɓa waá bírsi, ɓa wér má waá lɩ́ɩ́sɛ; ɓa nɛ́ sɩɛ́ Wɩɩsɛ bílíwa mɛ́, bána nyúú.
5 Ɩ́ nɩɛ ná há kéŋ yardá, Wɩɩsɛ tɩ́ŋʋ́ dóé mí ní, aá bélíwa mɛ́, rʋ́ʋ́ lɛ́ɩ́wa tá.
Dúníé isé mí ní sɩɛ́, rɩ́ nɩɛ ná, ɛ́ ná ʋ há lɛ́ɩ́wa tá.
6 Ɛ́ wɩ́ɛ́ nɛ́ tɛ, rʋʋ nɛ́ héé rɩ́ɩ́wa dí wɩɩla, rɩ́ɩ́wa sɩɛnnɛ zɔkɛ mʋ́l néé mí má, ɩ́ ha dɔwɛ aá jʋɔsɛ ɛ́.
7 Wɩɩla ná ɩ́ háá díé níí mákɩ́wa yardá wér mʋɔsɔ, anɛ salmɛ ɓa háá pi níŋ mɩ́ɛ́rɛ lɩ́sɛ, ʋ a wérí ɛ́, ká ʋ to omo ná há sɩ́ dáánɛ kaá mʋ́ wuu.
Amá ɩ́ yardá ná wɩɩla há mákʋ́ wér mʋɔsɔ, ʋ píŋ kɛ salmɛ naasɩ́ ɛrɛ́.
Ɛ́ nɩ́ɩ́ tɩ́llɛ́, rɩ́ Zeezi Kirisi bɩrkoe ná mɛ́, rɩ́ɩ́wa ná hʋʋma, píŋ arɩ́ yɩr.
8 Ɩ́ sɩ́ɩ́ wɩ Zeezi Kirisi néé, ká ɩ́ cóú.
Ɩ́ sɩ́ɩ́ ha wʋ́ʋ́ néé, ká ɩ́ lɔ́ʋ́ dí, a jɩ́jʋɔsɛ kɩ́ŋkáŋ, jʋɔsɛ́ ná há wɩ wuó máŋsɛ,
9 bee wɩ́ɛ́ ɩ́ Zeezi laadí ná ɔ́ɔ́ ɩ́ ná laatɛ́, Wɩɩsɛ rɩ́, ʋ nɛ́ kɛ́ɩ́wa wɩ́jaalɩ́.
10 Wɩɩsɛ wɩ́laabʋlla bɩ́ɩ́nɛ́ Wɩɩsɛ laatɛ́ né wɩ́ɛ́, a tɩ́ŋʋ́ naasɛ rɩ́ sɩ́fɩɛma, a bʋl bárka né Wɩɩsɛ fa há bílíwa mɛ́ wɩ́ɛ́ fól wuu.
11 Kirisi Sabɩɩna fa mɩ́ŋwɔ́ mɛ́, a la sɩ́ɛ́ máŋsɛ wɩɩla ná Kirisi háá á rʋ́ʋ́ dí, arɩ́ píŋ ná ʋ háá á rʋ́ʋ́ ná wɩ́ɛ́, a pɔ́wɔ́.
Ɓa sɩɛ́ fa hé dóé aá ja rɩ́wɔ́ zɩŋ cɛ́rɛ ná mɛ́, ɛ́ wɩ́ɛ́ háá á rɩ́wɔ́ peri, arɩ́ wɩ́ɩ́ ná mɛ́, ɓa háá tɩŋɛ́, rɩ́ɩ́ zɩŋ ɛ́ wɩ́ɛ́.
12 Amá Wɩɩsɛ mákɔ́ pɔ́ʋ́ wɩ́laabʋlla ná, rɩ́wɔ́ zɩŋ rɩ́ ɓa tɩɩ wɩ́ɛ́ rá, ɓa bʋl ɛ́ wɩ́ɛ́, amá ɩ́ wɩ́ɛ́ nɛ́.
Ɛ́ wɩ́ɛ́ nɛ́ sɩɛ́ zaá né, nɩɛ ná háá bʋl Labaarɩwero ná bʋl pɛ́ɩ́wa, arɩ́ Wɩɩsɛ Sabɩɩna ná ʋ há tʋ́mɛ́ ʋ lɛ́ bána tuwi dóé.
Wɩɩsɛ malɩ́kawa má tɩɩ dé hɩ́hɩɛ̃nɛ ɛ́ wɩ́ɛ́ zɩmɛ́ nɛ́.
Wɩɩsɛ nɩɛ há mɔhɛ̃́ rɩ́wɔ́ nɛ ɛ́
13 Ɛ́ wɩ́ɛ́, ɩ́ kánɩ́wa tɩɩ a pɔ́ wérí, a lo rɩ́ɩ́wa sabɩŋsɛ má a ɓɩwómmé, a sɩ́ wɩ́ɛ́ náŋa mɛ́ cúmú, ká lo rɩ́ɩ́wa yɩɛla wuu mɩŋ bárka ná, Zeezi Kirisi bɩrkoe mí, ɩ́ háá á rɩ́ɩ́wa ná mɛ́.
14 Ɩ́ tɩŋ Wɩɩsɛ nʋɔ, anɛ heŋbiisi háá tɩ́ŋwɔ́ áná nʋɔ ɛ́, ká báá sɩ́ɩ́wa tɩɩ píí héíwa tésíé wɩ́hɩɛ̃nɛ́ ná mɛ́, ɩ́ fa há wɩ ɛ̃ káá a.
15 Wɩɩsɛ ná há yɩ́rɩ́wa, ʋ wɩ busunnu mʋɔ́ wuu kené; ɛ́ wɩ́ɛ́, ɩ́ má pɔ́ rɩ́ busunnu sɩ́ɩ́wa mɛ́ mɩ́nʋ́, ɩ́ wɩ́'állɛ wuu sɩɛrʋ.
16 Ɓa pʋ́ŋsɛ Wɩɩsɛ Kɛnɔ sɩɛrʋ bʋlɛ́ Wɩɩsɛ sɛ́:
«Ɩ́ sɩ́ busunnu kánʋ́,
bee wɩ́ɛ́ ŋ tɩɩ wɩ busunnu kené.»
17 Ɩ́ wɩsʋlɔ́ mɛ́, ɩ́ kéŋ Wɩɩsɛ aá yɩ́rɩ́wa Ana nɛ́; ʋ nɛ́ sɩɛ́ dí nɛrɔ wuu wɩ́'állɛ sarɩ́ya, ʋ wɩ nɩɛ́ caksɛ.
Ɛ́ wɩ́ɛ́, ɩ́ dúníé né mí mɩnɛ́ mɛ́, ɩ́ fɔ́ʋ́ héwíŋ ɩ́ wɩ́'állɛ mɛ́.
18 Taŋá, ɩ́ ɛ̃ kɩŋ ná há ŋmɔ́wɛ́ mʋɔsɔ, a makɛ rɩ́ɩ́wa lɛ́ɩ́wa tɩɩ wɩ́yɔ́ɔ́wa ná ɩ́ naabálwa há tɛ́ɛ́ pɛ́ɩ́wa, ɩ́ ɩ́'a nɛ́sɛ mɛ́.
Ʋ sɩɛ́ to onni ná háá zɔkɛ́ anɛ salmɛ meéwí, ɛ́ rá má wárɛ meéwí ní túŋ ɛ́ kɩŋ.
19 Amá Kirisi cɛ́l ná píŋ há kɛ onni wuu, ní yɔ́wɛ́ lɛ́ɩ́wa.
Ʋ nɛ́ ɓa kaa ɔsɛ vʋk, anɛ pewie ná há wéró, a wɩ dɩkɔsʋ́ wuu kené.
20 Wɩɩsɛ fa lá sɩ́ɛ́ lɩ́sʋ́ ɩ́ wɩ́ɛ́, rʋʋ ha wɩ dúníé ɛ́ɛ́, ɛ́ nɛ́ tɛ, ʋ a ɩ́ zɩ́mʋ́ dúníé hatɩ́ŋnɛ́ tápʋlɛ nyáŋ mɛ́, ɩ́ wér wɩ́ɛ́.
21 Kirisi mí ní ɩ́ tɩŋ, a la Wɩɩsɛ dí.
Wɩɩsɛ nɛ́ íllú sʋʋ mɛ́, a pɔ́ʋ́ píŋ; ɛ́ wɩ́ɛ́, ɩ́ yardá rɩ́rɩ́wa yɩɛla mɩŋ Wɩɩsɛ mɛ́ nɛ́.
22 Ɩ́ háá tɩŋ taŋá ŋmɛ́nɔ ná ɛ́, ɩ́ pɩ́ɩ́rɩ́wa tɩɩ, ɩ́ báá wɩ busunnu kené, a makɛ rɩ́ɩ́wa cóllíwa maábináŋa arɩ́ taŋá.
Ɩ́ sɩɛ́ cólli náŋá kɩ́ŋkáŋ arɩ́rɩ́wa sɩɛnnɛ wuu.
23 Ɓa lʋ́lɩ́wa lʋlfɛlɔ nɛ́, a tɩŋ Wɩɩsɛ wɩ́bʋlɛ ná háá pá nɩɛ mɩɩsɛ mɛ́.
Nɩbííno háá sʋwɛ́ ra wɩ́ɩ́wa ɛ́ mɩɩsɛ pɛ́ɛ́, amá Wɩɩsɛ ná há waá sʋwɛ nɛ́ pɛ́ɩ́wa mɩfɛlɔ, a tɩ́ŋʋ́ wɩ́bʋlɛ ná há wómmó, a waá daarɛ má, a kaá mʋ́ wuu mí.
24 Ɓa pʋ́ŋsɛ Wɩɩsɛ Kɛnɔ sɩɛrʋ bʋlɛ́:
«Nɩbííno wuu nɩhɩ̃́ nyɔ́ɔ́ nɛ́.
Ʋ wér má wuu nɩhɩ̃́ nyɔ́fɩl há mɩŋ gɩr mɛ́ nɛ́.
Nyɔ́ɔ́ ná sɩɛ́ hɩl, ʋ fɩɩla má yuori.
25 Amá Nyuutɩna Wɩɩsɛ wɩ́bʋlɛ é sɩ́ mɩŋ,
a kaá mʋ́ wuu.»
Ɛ́ wɩ́bʋlɛ nɛ́ sɩɛ́ ká Labaarɩwero ná, ɓa há bʋ́lɛ́ pɛ́ɩ́wa.