Ɓɩɛ tɩ́náwa, ɩ́ pɔ́ɩ́wa tɩɩ mɛ́
5
1 Ɩ́ má ɓɩɛ tɩ́náwa, ɩ́ zesi!
Ɩ́ wíwi a cáási kɩ́ŋkáŋ, bee wɩ́ɛ́ wɩɩlawa sɩ́ péríwa.
2 Ɩ́ ɓɩɛ ná zɔ́kɔ́, kalɩɛrɩwa má lɩ́ɛ́rɩ́wa gɛnnɛ.
3 Ɩ́ salmɛ rɩ́rɩ́wa wárɛ wuu fɩ́ɔ́; ɓa fɩɩlɔ́ sɩɛ́da cɩ́nɩ́wa mɛ́; ʋ sɩ́ dííwa tɛŋ, anɛ níŋ.
Dúníé isé péró, ká ɩ́ ha nyáŋ ɓɩɛ bil.
4 Ɩ́ vɔ́ɔ́, ɩ́ wɩ́ɩ́wa baksɛ tʋtʋnna túmé, ká ɓa wi aá héíwa mɛ́; ɩ́ wɩ taŋá tɩ́ŋɛ́.
Ɩ́ baksɛ tʋtʋnna ná ŋmaame sɩɛ́ zʋ́ Wɩɩsɛ dɩlla; ʋ nɛ́ ká dúníé wuu Nyuutɩna.
5 Ɩ́ dé mɩŋ wér rɩ́ satɔrɔ́ mɛ́ nɛ́, dúníé mí.
Ɩ́ dɩ́ɛ́sɩ́wa tɩɩ a vʋ́ hé nʋʋ, anɛ pʋsɛ ɓa háá dɔɛ́ rɩ́wɔ́ ɓʋ́ʋ́sɛ.
6 Ɩ́ dí sarɩ́ya yo nɩɛ ná há wɩ wɩ́ɩ́ wuu zɔ́kɛ́, a ɓʋ́ʋ́sɩ́wɔ́, ká ɓa wɩ lówé aá ja rɩ́wɔ́ lɔ́wɔ́ tɩɩ.
Ɩ́ dí nyamma
7 Ŋ maábináŋa, ɩ́ sɩɛ́ dí nyamma aá ja Nyuutɩna Zeezi bɩrkoe.
Ɩ́ ná bápaarɔ háá dí nyamma ɛ́, aá dɛllɛ rɩ́ oŋparɛ́ ɔsɛ wérí:
Ʋʋ́ pɔ́ duópuse mí ní, a kaá ja hatɩ́ŋnɩ́duonni.
8 Ɩ́ má sɩɛ́ dí nyamma, a lo rɩ́ɩ́wa naasɛ dúóri wérí, bee wɩ́ɛ́ Nyuutɩna Zeezi koe pérí tɛ́sɩ́ɩ́.
9 Ŋ maábináŋa, ɩ́ sɩ́ wɩ́ɛ́ ŋmúŋmúrmú náŋá rɩ́, rɩ́ Wɩɩsɛ háá dííwa sarɩ́ya.
Ɩ́ ná, sarɩ́yadííro pérí tɛ́sɩ́ɩ́, ʋ mɩŋ dánnʋɔ mɛ́.
10 Ŋ maábináŋa, ɩ́ bel Wɩɩsɛ wɩ́laabʋlla ná die há ná wɩɩla ɛ́, arɩ́ nyamma ná ɓa há díé, ká tɩ́ŋwɔ́ nabulle; ɓa faá bʋl wɩ́ɛ́ Nyuutɩna Wɩɩsɛ yɩr mɛ́ nɛ́.
11 Taŋá, á sɛ́ ɓa ná wér, ɓa há cɩ́nɛ́ tɩkɛ wérí.
Ɩ́ nɛ́ Zɔɔbɛ wɩ́ɛ́, ʋ há dí nyamma ɛ́, ʋ dɩgírsi, Nyuutɩna Wɩɩsɛ há pɔ́ʋ́ óŋ ná ɩ́ ɩ́ɔ̃́ rɛ́, bee wɩ́ɛ́ Nyuutɩna Wɩɩsɛ susufárʋ zénó, ʋ sawér má zéŋ.
12 Ŋ maábináŋa, ʋ ná wɩ́ɛ́ há fɩ́ɛ́mɔ́ nɛ́ ká:
Ɩ́ pɔ́ rɩ́ɩ́wa sɩ́ bána yɩr mɛ́ ŋmɩ́ɛ́sʋ́, a sɩ́ tíé yɩr mɛ́ ŋmɩ́ɛ́sʋ́, a sɩ́ óŋ wuu yɩr má mɛ́ ŋmɩ́ɛ́sʋ́.
Wɩ́ɩ́ há ká ɛ́, ɩ́ bʋl ɛ́:
rɩ óó ní, ɩ́ bʋlɛ́:
«Óó,» rɩ aɩ́ nɛ́ ɩ́ bʋlɛ́:
«Aɩ́,» a makɛ rɩ́ Wɩɩsɛ sɩ́ɩ́wa sarɩ́ya dí.
13 Rɩ nɛ́ŋ mɩ́nɩ́wa sɩɛrʋ aá ná wɩɩla, rɩ́ tɩ́na sʋl Wɩɩsɛ rʋ́ʋ́ sáŋʋ́ mɛ́.
Rɩ nɛ́ŋ mɩ́nɩ́wa sɩɛrʋ a mɩŋ satɔrɔ́ mɛ́, rɩ́ tɩ́na yɩ yɩɩla aá bɩ Wɩɩsɛ mɛ́.
14 Rɩ nɛ́ŋ mɩ́nɩ́wa sɩɛrʋ aá wɩɩlɛ, rɩ́ tɩ́na yɩ́rɛ wɩcʋ́ɔ́lɩ́sɩ́dííre,* rɩ́wɔ́ hé nʋʋ ʋ nyúú mí, Nyuutɩna yɩr mɛ́, ká sʋl Wɩɩsɛ pɔ́ʋ́.
15 Yardá wɩsʋlɔ́ sɩ́ a rɩ́ Nyuutɩna Wɩɩsɛ dúórú, a cúólú rʋ́ʋ́ isi.
Rʋʋ fa á wɩ́ɛ́ zɔkɛ má, ʋ sɩ́ ná suúri.
16 Ɛ́ wɩ́ɛ́, ɩ́ césíwa wɩ́zɔkɛ́ pá náŋá, a sʋl Wɩɩsɛ pá náŋá, a makɛ rɩ́ɩ́wa ná tɛŋfɩ́ɛ́l.
Nɩtékétéké wɩsʋlɔ́ kéŋ dóé wérí, aá ɔsɛ wɩ́zeŋsi.
17 Eli* má fa ká nɩbííno ní anɩ́rá má.
Ʋ sʋ́l Wɩɩsɛ rɩ́ taŋá, rɩ́ duóŋ sɩ́ ko; duóŋ ɓɩɛ́na cɩ́ a wɩ kúé, bɩŋsɛ botoro rí caŋsɛ balgo.
18 Ɛ́ har rɩ́ mɛ́ nɛ́, ʋ baa sʋl Wɩɩsɛ rɩ́ duóŋ ko; duóŋ ɓɩɛ́na ko, ɓɩɛ ɔsɛ.