Kɛnɔ ná ɓa há pʋ́ŋsɛ́ pá
Ebirewa
Wɩɩsɛ tɩ́ŋʋ́ Bio mí bʋl wɩ́ɛ́ párá
1
1 Tésíé mí, Wɩɩsɛ tɩ́ŋʋ́ wɩ́laabʋlla* mɛ́, a bʋl wɩ́ɛ́ párá naabálwa naasɩ́ ɛrɛ́, a tɩŋ wɩbámmáwa mɛ́.
2 Amá zaá né, hatɩ́ŋnɩ́tápʋlɛ nyáŋ mɛ́, ʋ tɩ́ŋʋ́ Bio mí ní, a bʋl wɩ́ɛ́ párá.
Wɩɩsɛ tɩ́ŋʋ́ mɛ́ nɛ́ a onni wuu, a píwó wuu hóú nɛ́sɛ mɛ́, ʋ tɩ́llɩ́wɔ́.
3 Wɩɩsɛ píŋ wér wuú tʋ́lʋ́ Bio mí ní; Wɩɩsɛ nɩɩsɔ tɩɩ tɩɩ nɛ́, ʋ la.
Ʋ nʋɔ wɩ́bʋlɛ́ kéŋ dóé, a ka onni wuu ké.
Ʋ sɩɛ́ há mʋ́ʋ́rɛ nɩbííne wɩ́bɔma, ɛ́ har rɩ́ mɛ́, ʋ zɩ́nɔ́ ké dóé wuu Wɩɩsɛ néduu, bána nyúú.
4 Ʋ nɛ́ kɛ Wɩɩsɛ malɩ́kawa wuu, ɛ́ nɛ́ tɛ, yɩr ná duo Wɩɩsɛ há pɔ́ʋ́, ɔ́ʋ́ dʋŋɔ, a kɩ́llɛ malɩ́kawa wuu yɩra.
Wɩɩsɛ Bio kɛ malɩ́kawa
5 Wɩɩsɛ sɩɛ́ ha wʋ́ʋ́ malɩ́ka* oro rɩ́ bʋ́lɛ́ bʋlɛ́:
«Ɩ káŋ Bio ní; ŋ nɛ́ lʋ́lɩ́ zaa.»
Ʋ báá wɩ oro má rɩ́ bʋ́lɛ́ bʋlɛ́:
«Ŋ sɩ́ ɔ́ʋ́ Ana, ká rʋ́ʋ́ má áŋ Bio.»
6 Wɩɩsɛ háá já rʋ́ʋ́ tʋ́mʋ́ Bio dúníé mí, ʋ nɛ́ há ká bihɔ̃́, ʋ sɛ́:
«Wɩɩsɛ malɩ́kawa wuu mɔhɔ̃́ rɩ́wɔ́ cʋ́ɔ́lʋ́.»
7 Ʋ sɩɛ́ bʋ́lʋ́ malɩ́kawa wɩ́ɛ́ bʋlɛ́:
«Ʋ ɔ́ɔ́ ʋ malɩ́kawa nɛ poo arɩ́ níŋvásɛ nɛ́, ʋ kaá tʋŋ.»
8 Amá ʋ Bio é rɩ́ ʋ sɛ́:
«Ɩ ká Wɩɩsɛ nɛ́, ɩ kuorí díí waá tenni.
Taŋá nɛ́ ɩ kaá bélí dɩtɩ́llɛ mɛ́.
9 Ɩ có tékétéké, ɩ wɩ bɔ́ŋbɔ́ŋ ja,
ɛ́ nɛ́ tɛ Wɩɩsɛ, ɩ Wɩɩsɛ lɩ́sɩ́
a bɩ́sɛ jʋɔsɛ́ nʋʋ*f1* héí nyúú mí.
Ʋ cóí ní kɩ́llɩ́ náŋa.»
10 Ʋ báá ha sɛ́:
«Nyuutɩna, púle mí, ɩ nɛ́ŋsa nɛ́ á tíé arɩ́ bána.
11 Ɓa wuu sɩɛ́ sɩ́ yʋ́ksɛ, ká rɩ́ɩ́ é mɩŋ.
Tíé rɩ́ bána wuu sɩ́ bɩŋ a kúsi anɛ gɛnnɛ.
12 Ɩ sɩ́ káŋwɔ́ guŋ hé náŋá mɛ́,
anɛ ɓa háá guŋ gɛrɔ ɛ́, rɩ́wɔ́ bɩ́rsɛ,
anɛ gɛrɔ wér háá lɛ, ʋ bɩ́rsɛ ɛ́.
Amá tɛ́ŋ wuu mí, ɩ é nána nɛ́, ɩ bɩŋsɛ waá toki.»
13 Malɩ́ka orí é rí rɩ́ sɩɛ́, Wɩɩsɛ bʋl bʋlɛ́:
«Kéníŋ néduu, a kaá ja tápʋl ná
ŋ háá á rɩ́ŋ kɛ́sɩ́ dɩŋdɔma wuu héí nɛ́sɛ mɛ́?»
14 Malɩ́kawa ná é wuu ká Wɩɩsɛ tʋtʋnna nɛ́, ʋ tʋ́tʋ́ŋwɔ́ ɓaá sáŋ nɩɛ ná ʋ háá á rʋ́ʋ́ laa tá mɛ́.