Kɛnɔ ná
Zakɛ
há pʋ́ŋsɛ́
Cʋɔla
1
1 Ŋ é Zakɛ,* há ká Wɩɩsɛ arɩ́ Nyuutɩna Zeezi Kirisi tʋtʋnnɔ, ŋ nɛ́ pʋ́ŋsɛ kɛnɔ né, aá pá Ɩzɩrayɛl* jɩmʋ́ʋ́la fí rí bɛllɛ ná nɩɛ há lá Zeezi dí, ká a nɩpɩsɛ́, a mɩŋ dúníé tɔ́nɛ náŋa mɛ́.
Ŋŋ́ bɔ́llɩ́wa.
Wálmɛ rɩ́ nyamma wɩ́ɛ́
2 Ŋ maábináŋa, rɩ wálmɛwa rɩ́wɔ́ dúó wuu ní kúó péríwa má, ɩ́ lo rʋ́ʋ́ ɛ́ ɛ́ɩ́wa satɔrɔ́ ɓɩzéní.
3 Ɩ́ ɩ́ɔ̃́ rɩɩ́wa yardá nɛ́ wóllé cakɛ wálmɛ rɩ́ɩ́ cɛ́, ɛ́ nɩ́ɩ́ ɛɛ́ rɩ́ɩ́wa ka nyamma.
4 Ɩ́ sɩɛ́ dí nyamma wérí a mʋ́ gírsi, a makɛ rɩ́ɩ́wa wɩ́ɛ́ wuu cɛ́rɛ wérí, rɩ́ɩ́wa sɩ́ dɩzɔkɩ́ kánʋ́, rɩ́ɩ́wa sɩ́ óŋ wuu má jáá gúl.
Wɩsʋlɔ́ arɩ́ wɩ́zɩmɛ wɩ́ɛ́
5 Rɩɩ́wa sɩɛrʋ oro kúó rʋʋ wɩ wɩ́zɩmɛ kené, rʋ́ʋ́ sʋl Wɩɩsɛ rɩ́, ʋ sɩ́ pɔ́ʋ́ wɩ́zɩmɛ, bee wɩ́ɛ́ ʋʋ́ tʋŋ zilé ɛ́ nɛ́, nɩɛ wuu mí, ká wʋ́ɔ́ bʋl.
6 Amá ʋ mɔhɔ̃́ rʋ́ʋ́ sʋl arɩ́ yardá nɛ́, ká sɩ́ káŋsʋ́.
Nɛrɔ ná háá káŋsɛ́, ʋ nɩhɩ̃́ mʋʋ nyii, poo há kené gʋɔrɛ aá híkli ní.
7 Ɛ́ nɛrɔ duo sɩɛ́ sɩ́ yɩ́yɩ́ɛ́lʋ́, rʋʋ sɩ́ ná óŋ Nyuutɩna Wɩɩsɛ rɩ́,
8 bee wɩ́ɛ́ ʋ wʋ́ʋ́ háá ɔ́ɔ́ ɛ̃, ʋ wɩ dɩbalá cɛ́, ʋ wɩ́'állɛ wuu mí.
Summe rɩ́ ɓɩɛ tɩ́náwa wɩ́ɛ́
9 Nɛrɔ ná há ká súmmú, Zeezi laadííre sɩɛrʋ, ʋ́ʋ́ jɩ́jʋɔsɛ, bee wɩ́ɛ́ Wɩɩsɛ nɩ́ɩ́ píŋsú.
10 Nɛrɔ ná má há ká ɓɩɛ tɩ́na, Zeezi laadííre sɩɛrʋ, ʋ́ʋ́ má jɩ́jʋɔsɛ, bee wɩ́ɛ́ Wɩɩsɛ nɩ́ɩ́ múúrú.
Ɓɩɛ tɩ́na dé nɛ nyɔ́fɩl nɛ́;
11 wɩɩsɛ há dé poŋ, ʋ lʋmɔ wuuri nyɔ́ɔ́ ʋ hɩl, ʋ fɩl dé ɓɔ́rɛ ɓal nɛ́, ʋ wér ná wuu yʋ́ksɛ.
Ɓɩɛ tɩ́na má ká ɛ́ nɛ́, ʋ máá de yʋ́ksɛ nɛ́, ʋ wɩ́'állɛ sɩɛrʋ.
Díŋewa wɩ́ɛ́
12 Nɛrɔ ná há wóllé dí nyamma díŋewa sɩɛrʋ, ʋ ná wér; ʋ há nyámmɛ́ cɩ́ tɩkɛ ɛ́, ʋ sɩ́ ná bɩba'omo* ná, nɛ́ há ká mɩɩsɛ ná há waá tenni, Nyuutɩna Wɩɩsɛ há tá nʋɔ bʋlʋ́ sɩ́ pá nɩɛ ná há cóú.
13 Rɩ díŋe pérí nɛrɔ wuu, ɩ pɔ́ rɩ́ɩ́ háá bʋlɛ́ Wɩɩsɛ nɩ́ɩ́ díŋí.
Óŋ wuu wɩ Wɩɩsɛ wuó díŋ, ʋ ɩ́'a bɔ́ŋbɔ́ŋ, Wɩɩsɛ má tɩɩ sɩɛ́ wɩ nɛ́ŋ wuú díŋ.
14 Rɩ díŋe ní díŋrá, ʋ lɩ́rá tɩɩ wɩ́hɩɛ̃nɛ́ ná háá yíkrá, aá nyɩ́sɩ́rá nɛ́.
15 Hɩɛŋ ná nɛ́ sɩɛ́ ka puo, a lʋl wɩ́bɔmɔ, wɩ́bɔmɔ sɩɛ́ lɔ́ʋ́ tɩɩ, a má baa lʋl sʋʋ.
16 Ŋ maábináŋa káŋ nɩcólle tɩɩ, ɩ́ sɩ́ɩ́wa tɩɩ nyɩ́sʋ́.
17 Pálɔ ná é wuu há kéŋ yɩr arɩ́ zilé ná wuu há wéró, ɓa lɛ́ bána nɛ́, Wɩɩsɛ rɩ́ aá ko.
Ʋ nɛ́ á bána nyúú onni ná wuu há kéŋ pʋmmɔ; ʋ waá bɩ́rsɛ, anɛ wɩpomí háá a fɩ́ɛ́la bɩ́bɩ́rsɛ ɛ́, ʋ nána nɛ́.
18 Ʋ cólle mí ní, ʋ tɩŋ wɩ́bʋlɛ ná há ká taŋá mɛ́, a a, á bɩ́rmʋ́ bɛlɛ, a makɛ ráá nɛ́ ɔ́ʋ́ oŋ'aalɛ́ wuu oŋfólewa.
Wɩɩsɛ wɩ́bʋlɛ zesé rɩ́rʋ́ tɩŋɛ́ wɩ́ɛ́
19 Ŋ maábináŋa há káŋ nɩcólle tɩɩ, ɩ́ ɛ̃ nyáŋ wuu ní.
Ɛ́ wɩ́ɛ́, rɩ́ nɛrɔ wuu a lʋ́ŋlʋ́ŋ wɩ́ɛ́ zesé mí, ká taŋa a fɛ́lɛ́lɛ́ wɩ́ɛ́ bʋlɛ́ mɛ́, a sɩ́ cɔ́ɛ́ má ɓulúɓulú dí;
20 nɩbííno wʋ́ʋ́ cɔwɩɩlɔ́ mɛ́ wuo tɩŋ, aá a wɩ́ɛ́ ná há pí ŋmɛ́nɔ Wɩɩsɛ sɩ́ɛ́.
21 Ɛ́ wɩ́ɛ́, ɩ́ lɩ́sɩ́wa tɩɩ busunnu wɩ́'állɛ wuu mí, a lɩ́sɩ́wa tɩɩ sahaksɩ́ wɩ́ɛ́ mɛ́, ká pɔ́rɩ́wa tɩɩ mɛ́ a saŋ wɩ́bʋlɛ ná Wɩɩsɛ há dúé ɩ́ sɩɛnnɛ; ɛ́ wɩ́bʋlɛ kéŋ dóé a wóllíwa la aá tá.
22 Ɩ́ sɩ́ ɛ́ wɩ́bʋlɛ zesé dʋŋɔ nɛ́ bélú, amá ɩ́ tɩŋ wɩ́bʋlɛ ná há sʋ́ʋ́ ná, rɩ ɛ́ rá, ɩ́ɩ́ nyɩ́sɩ́wa tɩɩ nɛ́.
23 Rɩ nɛrɔ nɛ́ zésí wɩ́bʋlɛ ná, ká wʋ́ʋ́ há sʋ́ʋ́ ná tɩ́ŋɛ́, ʋ nɩhɩ̃́ anɛ nɛrɔ há bél nyiiló mí, a nóú há nɩhɩ̃́ ɛ́,
24 ká lɛ, mʋ́l ná tɩɩ tɩɩ mɛ́, rʋʋ sʋ́llʋ́ nɩɩsɔ ná ʋ há bélé ná.
25 Amá nɛrɔ ná há múúlí kíŋse ná há wéró, a a nɩɛ tɩ́tɩ́llɩ́wɔ́ tɩɩ sɩɛrʋ, a fɛ́l sɩ́ɩ́ ɓa mɛ́, a wʋ́ɔ́ zésé káá sʋ́llɛ, ká tɩ́ŋwɔ́ há sʋ́ʋ́ ná, ɛ́ tɩ́na sɩ́ ná wér, ʋ wɩ́'állɛ wuu mí.
26 Rɩ nɛ́ŋ sʋ́ʋ́ ká wɩcʋ́ɔ́l, ká wʋ́ʋ́ neŋdulí wo, ɛ́ tɩ́ná nyɩ́sʋ́ tɩɩ nɛ́, ʋ Wɩɩsɛ ná cʋɔlɛ́ ká yɔ́ɔ́ nɛ́.
27 Wɩcʋɔ́llɛ ná há wɩ busunnu kené, ká cɛ́rɛ wérí á Ana Wɩɩsɛ sɩ́ɛ́ mɛ́ nɛ́ ká:
Ɩ́ bel bisíŋsi rɩ́ yúháála mɛ́, ɓa wɩhála sɩɛrʋ, ká pɔ́ rɩ́ dúníé busunnu sɩ́ɩ́wa ɓákʋ́.