Ɩ́ sɩ́ nɩɛ tʋ́ɔ́sʋ́
2
1 Ŋ maábináŋa, ɩ́ há lárá Nyuutɩna Zeezi Kirisi ná há píŋó a dí, ɩ́ báá sɩ́ nɩɛ tʋ́tʋ́ɔ́sʋ́.
2 Anɛ:
Ɩ́ wɩcʋɔla púl* há cíké, nɛrɔ nɔ́ŋɔ su gɛpiŋe, a hé salmɛ nénípɩr a ko zʋ, ká nɔ́ŋɔ má há ká súmmú a su gɛkɔŋsa, ʋ má ko zʋ.
3 Ɛ́ nɛ́ ɩ́ isi fá lɛrɛ gɛpiŋe ná tɩ́na, a bʋ́lʋ́ rɩ́ bʋlɛ́:
«Ɩ waá ko ké rɛɛ́wa, rɛɛ́ nɛ́ weré!»
Ká bʋl summo ná é rɩ́ bʋlɛ́:
«Ɩ é, cɩ́ dahá ráŋ ná!»
Ɛ́ rá má:
«Ké tíé ŋ naasɛ laka!»
4 Ʋ ɛ́ to nɩtʋɔsɔ́ nɛ́ rɛ́?
Ʋ sɩɛ́ to sabɔ́ŋ sarɩ́ya é rí, ɩ́ dídí rí?
5 Ŋ maábináŋa káŋ nɩcólle, ɩ́ cɩ́ rɩ́ŋ pɛ́ɩ́wa:
Wɩɩsɛ wɩ nɩɛ ná há ká súmmé nɩbííne sɩ́ɛ́ mɛ́ nɛ́ tʋ́ɔ́sɛ́, rɩ́wɔ́ a kuóré yardá sɩɛrʋ, a nɛ́ tɩ́llɛ Wɩɩsɛ kuótɔ́ɔ́ ná, ʋ há tá nʋɔ bʋlʋ́ sɩ́ pá nɩɛ ná há cóú ní rí?
6 Ká ɩ́ é hɩ́hɩɩ̃sɛ summo!
Ɓɩɛ tɩ́náwa ná ra sɩɛ́ wɩ́ɩ́waá bɛŋsɛ, a kɛ́sɩ́wa mʋ́mʋ́ sarɩ́yadííre sɩ́ɛ́ rɛ́?
7 Ɓa ra wɩ yɩwero ná é Wɩɩsɛ há pɛ́ɩ́waá zɔkɛ rɛ́?
8 Taŋá, rɩɩ́wa nɩ́ɩ́ tɩŋ Wɩɩsɛ kuótɔ́ɔ́ kíŋse makɛ́ ná é, anɛ ɛ́ ɓa há pʋ́ŋsɛ́ Wɩɩsɛ Kɛnɔ sɩɛrʋ, ʋ wéró; ɓa pʋ́ŋsɔ́ bʋlɛ́:
«Cóllí nɩbínɔ́ŋɔ anɩ́ tɩɩ.»
9 Amá rɩɩ́wa nɩ́ɩ́ tʋɔsɛ nɩɛ é, wɩ́bɔmɔ nɛ́ ɩ́ ɩ́'a ɛ́; ɩ́ zɔ́kɛ́ kíso ná nɛ́, ʋ sarɩ́ya sɩɛ́ yóíwa.
10 Rɩ nɛrɔ nɛ́ zɔ́kɛ́ Wɩɩsɛ kíso* ná wɩ́ɩ́ balá, ká tɩŋ káánɛ ná wuu má, ɛ́ tɩ́na zɔ́kɛ́ kíso ná wuu ní ɛ́.
11 Wɩɩsɛ ná sɩɛ́ há sɛ́:
«Sɩ́ cɔ́rmʋ á.»
Ʋ nɛ́ ha sɛ́:
«Sɩ́ nɩɛ ɓʋ́ʋ́sʋ́.»
Ɛ́ wɩ́ɛ́, rɩɩ nɛ́ wɩ cɔ́rmʋ́ a, ká ɓʋ́ nɛrɔ, ɩ zɔ́kɛ́ Wɩɩsɛ kíso ní ɛ́.
12 Rɩɩ́wa nɩ́ɩ́ bʋl wɩ́ɛ́ ká ɩ́'a wɩ́ɛ́, ɩ́ bɩ́bɩɩnɛ rɩ Wɩɩsɛ sɩ́ tɩŋ kíŋse ná há ɛ́ɛ́ nɛrɔ tɩ́tɩ́llʋ́ tɩɩ mɛ́, a dííwa sarɩ́ya.
13 Nɛrɔ ná há wʋ́ʋ́ náŋa susu fɛ́ɛ́, Wɩɩsɛ má sɩ́ dí tɩ́na sarɩ́ya, ká sʋ́ʋ́ susu fá.
Amá nɛrɔ ná háá fá nɩɛ susu, ʋ wɩ wɩ́ɩ́ wuú fá, sarɩ́ya kal díí.
Yardá arɩ́ wɩ́were ɛɛ wɩ́ɛ́
14 Ŋ maábináŋa, nɛrɔ há sʋ́ʋ́ kéŋ yardá, ká wɩ wɩ́weré a, ʋ nyʋɔrɛ́ mɩŋ nɛɛ́?
Ɛ́ yardá duo wóú la aá tá rɛ́?
15 Anɛ:
Á maábináŋa bamma, bál ɛ́ rá má hál, rɩ́ wɩ gɛrɔ kené, a wɩ ɓɩdííli má kené,
16 rɩ́ɩ́wa nɔ́ŋɔ sɩɛ́ bʋ́lwɔ́ rɩ́ bʋlɛ́:
«Á mɩŋ mʋɔ́, ɩ́ mʋ́ wérí a su gɛnnɛ a kɛ́rɛ waarʋ mɛ́, a dí vɔksɛ.»
Ɩ há bʋ́l ɛ́, ká wʋ́ɔ́ óŋ pɛ́ɛ́ rɩ́wɔ́ laa sáŋwɔ́ tɩɩ mɛ́, ʋ kéŋ mʋ́l rɛ́?
17 Ɛ́ wɩ́ɛ́, nɛrɔ há sʋ́ʋ́ á Wɩɩsɛ yardá, ká wɩ wɩ́weré a, ʋ yardá ná ká yɔ́ɔ́ nɛ́.
18 Nɛrɔ nɔ́ŋɔ sɩɛ́ sɩ́ bʋlɛ́:
«Ŋ é á Wɩɩsɛ yardá.»
Rɩ́ nɔ́ŋɔ má bʋlɛ́:
«Ŋ máá a wɩ́were ní.»
Ŋ sɩɛ́ sɩ́ bɔ́sɩ́ bʋlɛ́:
«Mákɩ́ŋ ɛ́ ná ɩ há sɩ́ wólli a Wɩɩsɛ yardá, ká sɩ́ wɩ́were a, ká rɩ́ŋ má mákɩ́ ɛ́ ná ŋ há tɩ́ŋ wɩ́were mí, a mákɩ́ŋ há a Wɩɩsɛ yardá.»
19 Ɩ ɩ́ɔ̃́ rɩ́ Wɩɩsɛ ká balá nɛ́?
Ʋ wéró, ɩ há ɛ̃ ɛ́ mɛ́.
Kaŋtɔmɔ má ɛ̃ ɛ́ mɛ́, a cícel.
20 Ɩ sɩɛ́ cʋ́ʋ́lɔ́!
Ɩɩ́ já rɩ́wɔ́ makɛ pɛ́ɩ́ nɛ́ rɩ́ɩ́ zɩŋ, rɩɩ nɛ́ á Wɩɩsɛ yardá, ká wɩ wɩ́weré a, ɩ yardá ká yɔ́ɔ́ nɛ́?
21 Á naabál Abɩrahaŋ* tɩ́ŋ ɛrɛ́ rɛ́ ná tékétéké Wɩɩsɛ sɩ́ɛ́?
Wɩ́'állɛ mɛ́ nɛ́, bee wɩ́ɛ́ ʋ fa kenú bio Ɩzakɛ* mʋ́ sakɛ koro* nyúú, rʋ́ʋ́ ɓʋ́, a pá Wɩɩsɛ.
22 Ɩ nóú rí, Abɩrahaŋ fa á Wɩɩsɛ yardá, káá a wɩ́were má, ɛ́ nɛ́ tɛ, ʋ yardá cesi.
23 Ɛ́ ɔ́ɔ́ ɓa há pʋ́ŋsɛ wɩ́ɩ́ ná Wɩɩsɛ Kɛnɔ sɩɛrʋ nʋɔ sú; ɓa pʋ́ŋsɔ́ bʋlɛ́:
«Abɩrahaŋ yardá wɩ́ɛ́ nɛ́ Wɩɩsɛ sʋ́ʋ́ ká tékétéké.»
Ɛ́ nɛ́ Wɩɩsɛ kánʋ́ aá yɩ́rʋ́ naŋnɔ́ŋɔ.
24 Ɩ́ nóú rí, Wɩɩsɛ tɩ́ŋ nɩbííno wɩ́were ɛɛ mɛ́ aá pɔ́ʋ́ tékétéké rí, ʋ wɩ yardá dʋŋɔ mɛ́ nɛ́ tɩ́ŋɛ́, aá pá nɩbííno tékétéké.
25 Ʋ ká ɛ́ nɛ́ a pá hátuútuú Rahabɛ* má; Wɩɩsɛ tɩ́ŋʋ́ wɩ́'állɛ mɛ́ nɛ́ a bʋlʋ́ ká tékétéké, bee wɩ́ɛ́ ʋ fa cákɔ́ la Ɩzɩrayɛl duo* nɩɛ nɩtʋmɛ́, ʋ jaa mɛ́, a makɛ ŋmɛ́nɔ nɔ́ŋɔ pɔ́wɔ́, ɓa tɩŋ ráŋ lú lɩ́wɔ́ dɩŋdɔma nɛ́sɛ mɛ́, a col.
26 Rɩ nɩbííno tɛŋ nɛ́ wɩ hiẽsó kené, ʋ sʋ́wɔ́ nɛ́; ʋ sɩɛ́ ká ɛ́ nɛ́, rɩ nɛrɔ nɛ́ á Wɩɩsɛ yardá, ká wɩ wɩ́weré a, ʋ yardá ná ká yɔ́ɔ́ nɛ́.