Ɩ́ kánɩ́wa neŋdulí wérí
3
1 Ŋ maábináŋa, ɩ́ sɩ́ lo rɩ́ɩ́wa sɩɛrʋ nɩɛ a ɓɩkáná, aá ja rɩ́wɔ́ a Wɩɩsɛ kɛŋzɩnna, bee wɩ́ɛ́ ɩ́ ɩ́ɔ̃́ zɩŋ rɩ́, á é nɩɛ ná háá karmɛ́, á sarɩ́ya nɛ́ duoké a kɩ́llɛ nɩɛ náŋa.
2 Á wuu ní bʋ́l wɩ́ɛ́ aá pérki wɩ́ɛ́ ɓɩkana mɛ́.
Rɩ nɛrɔ nɛ́ wɩ wɩ́ɛ́ bʋ́lɛ́ aá pérki, ʋ ká nɛ́ŋ tɩɩ nɛ́, a wóllú tɛŋ wuu aá ka.
3 Áá ja garka nɛ́ a hé záksɛ nʋʋsɛ mɛ́, a makɛ ráá wólli a, rɩ́wɔ́ tɩ́tɩ́ŋrá nʋɔ, ráá a rɩ́wɔ́ mʋ́mʋ́ ráŋ ná á háá jɛɛ́.
4 Ɩ́ bel nyiidaborzeŋsi, ɓa rɩ́wɔ́ zeŋsí ná wuu, pozeŋsi má lú a lɛ́lwɔ́ aá va, ká ʋ dɩkaamɩlmɩ́ múúre, nɛrɔ ná háá mɩlɛ́ kánʋ́ mɛ́, a kaá bɩ́rʋ́ há có ɛ́.
5 Nɩbííno neŋdulí má sɩɛ́ ká ɛ́ nɛ́, ʋ ká tɛŋ cɔwié rí, amá ʋʋ́ bʋl wɩ́zeŋsi ní.
Ɩ́ ná níŋwie mʋɔ́, ká rʋʋ kéŋ gɩr ná há zénó, ʋ dúú wuu.
6 Nɩbííno neŋdulí má sɩɛ́ nɩhɩ̃́ níŋ ní.
Ʋ mɩ́ŋrá tɛŋ mɛ́ ɛ́, ká nɛ́ a dúníé wɩ́bɔma wuu ɩ́'aarɔ; ʋ yíkrá tɛŋ wuu ní aá hé busunnu mí; níŋjaa* níŋ ní, ʋ kaá nyɩ́krá hiẽsó wɩ́ɛ́ wuu, á dúníé mɩnɛ́ wuu mí.
7 Nɩbííno kéŋ dóé, balla rɩ́wɔ́ duó wuu nyúú, ɓa rɩ́ fíŋfille rɩ́ tíé tútuure arɩ́ nyii sɩɛrʋ ɓɩɛ wuu, ʋ wówó.
8 Amá neŋdulí é, nɛ́ŋ wuu wʋ́ʋ́ dóé kené, a sɩɛ́ wúwóllú.
Ʋ ká oŋbɔmɔ ná nɛ́ŋ wuu há wʋ́ʋ́ wuo nyáŋ aá bil cɩ́m nɛ́; ʋ wuu dé sú arɩ́ huõno ná háá ɓʋ́ʋ́sɛ nɩɛ nɛ́.
9 Á neŋdulí ní á kaá bɩ́rá Nyuutɩna Wɩɩsɛ há kárá Ana mɛ́, a kánʋ́ tɩɩ bʋrɛ aá hé nɩbííne ná mɛ́ Wɩɩsɛ há mɛ́ɛ́, ɓa nɩ́ɛ́sʋ́ tɩɩ Wɩɩsɛ.
10 Nʋɔ ná háá bɩɛ́, ɛ́ nʋɔ nɩ́ɩ́ bʋrɛ́ má.
Ŋ maábináŋa, ʋ sɩɛ́ wɩ mɔhɛ̃́ rʋ́ʋ́ nɛ ɛ́.
11 Ɩ́ ha ná nyiwere rɩ́ nyihaarʋ, rɩ ɓa tɩ́ŋ nyibulsɩ́ɩ́ balá mɛ́ aá lɛ?
12 Ŋ maábináŋa, piro sɩ́ wólli ɛ́llɛ́wa nɔŋ?
Ɛ́ rá má, ɛ́llɛ́ tuu sɩ́ wólli piro nɔŋ?
Nyii ná há nɩhɩ̃́ yɛsɛ háá bul nyibulsɩ́ɩ́ ná mɛ́, nyiwere wɩ ráŋ wuó bul.
Wɩ́zɩmɛ ná há lɛ́ Wɩɩsɛ
13 Ɩ́ sɩɛrʋ orí rí kéŋ wɩ́zɩmɛ arɩ́ sɩ́puró?
Rɩ́ tɩ́na tɩ́ŋʋ́ málwero mí, a a wɩ́were ná háá makɛ́, rʋʋ ká nɩpɔrɩ́ a ɓɩɛ́na ka wɩ́zɩmɛ.
14 Amá rɩɩ́wa nɛ́ kéŋ sahaksɩ́ kɩ́ŋkáŋ arɩ́ sagʋʋmɔ́, ɩ́ sɩ́ nyʋ́nyʋ́kʋ́ anɛ ɩ́ kéŋ wɩ́zɩmɛ; ɩ́ sɩ́ nyɩɛrʋ nyɛ́ɛ́ cɩ́ taŋá mɛ́.
15 Ɛ́ wɩ́zɩmɛ duo sɩɛ́ wɩ Wɩɩsɛ rɩ́ lɩ́ɛ́; ʋ lɛ́ dúníé ní, a lɛ nɩbinní, a lɛ Sɩtaanɛ* má.
16 Ráŋ ná sahaksɩ́ rɩ́ sagʋʋmɔ́ há mɩ́nɔ́, wɩ́ɩ́ wuu báá wɩ ŋmɛ́nɔ́ pi, wɩ́bɔma rɩ́wɔ́ duó wuu níí tʋmɛ́.
17 Amá wɩ́zɩmɛ ná há lɛ́ Wɩɩsɛ rɩ́, ʋ wɩ busunnu kené kɛ́rɛ́wa mɛ́; a baa pɩ́pá tɛŋfɩ́ɛ́l; ʋ pɔrɛ́, a a nɩɛ nɩ́nɛ náŋá mɛ́, a a nɩɛ fɩ́fá náŋá susu, a a nɩɛ ɩ́'a wɩ́were, ʋ wɩ nɩɛ́ tʋɔsɛ, ʋ wɩ nʋŋmɔ́ŋyɔ́wɩ́ɛ́ a.
18 Nɩɛ ná há có tɛŋfɩ́ɛ́l, ɓaá du tɛŋfɩ́ɛ́l nɛ́, ɓa kílo wuu anɛ oŋduo, ʋ nɔnɔ nɛ́ sɩɛ́ ká tékétéké ná ɓa há sɩ́ ná Wɩɩsɛ sɩ́ɛ́.