Kirisi Zeezi sóójiwero wɩ́ɛ́
2
1 Ɩ é ŋ bio, sɩɛ́ lo rí zilé né á há néé, Kirisi Zeezi mí, rʋ́ʋ́ nɛ́ ɛ́ɩ́ dóé.
2 Wɩ́ɛ́ ná ŋ há bʋ́lɛ́ nɩkana sɩ́ɛ́ ɩ nɛ, píwó máŋsɛ pá nɩtaŋáwa ná má há sɩ́ wóllíwó pii karmɛ nɩɛ náŋa.
3 Dí wɩɩla rɩ́rɩ́ŋ, anɛ Kirisi Zeezi sóójiwero.
4 Rɩ ɓa lɩ́sɛ nɛrɔ sóóji mí, rʋ́ʋ́ jɩ́ja rʋ́ʋ́ nɔhɔ̃́ sɩɛrʋ tɔ́rʋ́ nyúú, ʋ wɩ mɔhɛ̃́ rʋ́ʋ́ púú nyúú hé wɩ́ɛ́ ná há to sóóji wɩ́ɛ́ mɛ́.
5 Rɩ fɩ́fáárɔ má nɩ́ɩ́ fɛ́ɛ́, rʋʋ wɩ fɛ́ɛ́ wádawa tɩ́ŋɛ́, ʋ wɩ túme wuó ná.
6 Paarɔ ná tɛŋ há háákɔ́, ʋ nɩ́ɩ́ la sɩ́ɛ́ nóú oŋparɛ́ ker.
7 Ka wɩ́ɛ́ nyáŋ ŋ há bʋ́lɛ́ pɛ́ɩ́, aá bɩɩnɛ; Nyuutɩna sɩ́ pɛ́ɩ́ mɛ́, rɩ́ɩ́ nɩ́wɔ́ wuu mʋ́ʋ́la.
8 Pi Zeezi Kirisi há ká kuóro Davidi* dunɛrɔ wɩ́ɛ́ líísí tɩɩ; ʋ bɩ́rɔ́ isi sʋʋ mɛ́, anɛ ɛ́ Labaarɩwero ná wɩ́ɛ́ ŋ háá bʋlɛ́, há máŋsɛ́.
9 Ɛ́ Labaarɩwero wɩ́ɛ́ nɛ́, ŋ nɩ́ná wɩɩla nyɛ, ɓa vɔ́wɩ́ŋ anɛ wɩ́bɔŋ'aarɔ.
Amá ɓa wɩ Wɩɩsɛ wɩ́bʋlɛ é wuó vɔwɛ.
10 Ɛ́ nɛ́ tɛ, ŋ nyámmɩ́wɔ́ wuu, Wɩɩsɛ nɩtʋɔsɛ́ ná wɩ́ɛ́, a makɛ rɩ́wɔ́ má ná laatɛ́ ná há mɩŋ Kirisi Zeezi mí, arɩ́rʋ́ píŋ ná há waá tenni.
11 Wɩ́ɩ́ né ŋ háá á rɩ́ŋ bʋl ká wɩ́tɩɩ rɛ́, nɩɛ wuu zɩ́mʋ́ mɛ́.
Ʋ nɛ́ ká:
«Raá rɩ́ Zeezi wuu ní sʋ́sɛ́,
á rɩ́rʋ́ wuu sɩ́ bɩr'isi má, a ka mɩɩsɛ.
12 Raá nɛ́ cɩ́nɛ́ tɩkɛ rɩ́ taŋá,
a wɩ yardá tɛ́ɩ́, á rɩ́rʋ́ wuu sɩ́ dí kuorí má;
ká raá nɛ́ báásʋ́, ʋ má sɩ́ báásɩ́rá.
13 Rɩ nɩɛ nɛ́ wɩ́rá yardá wuó a, ɓa wóú é yardá aá a;
bee wɩ́ɛ́ ʋ há sʋ́ʋ́ ná, ʋ nɩ́ɩ́ cɩ́nɛ́.»
Tʋtʋnnɔ ná Nyuutɩna sɩɛrʋ há tɔ́rʋ́ nyúú
14 Pi wɩ́ɛ́ nyáŋ liisi nɩɛ wuu, ká sʋ́lwɔ́ kɩ́ŋkáŋ Wɩɩsɛ sɩ́ɛ́, rɩ́wɔ́ sɩ́ wɩ́ɛ́ káá pʋ́pɔsɛ náŋá; kapɔsɛ wɩ wɩ́ɩ́ wúú ɔsɛ, rʋʋ nɛ́ to rʋ́ʋ́ zɔkɛ nɩɛ ná háá zesé.
15 Hé dóé, a makɛ rɩɩ kúó cɩ́ Wɩɩsɛ sɩ́ɛ́, rɩ́ɩ́ nɛ tʋtʋnnɔ ná hɩɩ̃sɛ há wʋ́ʋ́ kené, ká rʋ́ʋ́ sɩɛrʋ tɔ́rɩ́ nyúú.
Bʋl Wɩɩsɛ wɩ́bʋlɛ ná há ká taŋá, ʋ sɩ́ɩ́ mɛ́, a pá nɩɛ.
16 Lɩ́sɩ́ tɩɩ rɩ́ wɩ́bʋlyɔ́ɔ́wa ná rɩ́ Wɩɩsɛ wɩ́ɛ́ há wɩ náŋá hé mí; nɩɛ ná há cówó, ɓa ɔ́sɔ́ káŋwɔ́ tɩɩ nɛ́ aá kɛkɛ Wɩɩsɛ mɛ́.
17 Ɛ́ wɩ́ɛ́ duo sɩ́ zɔkɛ nɩɛ, anɛ goŋtoro háá káári a zɔkɛ naa wuu ɛ́.
Imene rɩ́ Fɩlɛtɛ sɩɛ́ mɩŋ ɛ́ wɩ́ɛ́ bʋ́bʋlla sɩɛrʋ nɛ́.
18 Ɓa tá taŋá ŋmɛ́nɔ ná, ká bʋlɛ́ sʋsɛ bɩr'isé ná dáárɔ́; ɓa bʋlɛ́ ná ɔ́ɔ́ nɩɛ náŋa vɛ Wɩɩsɛ ŋmɛ́nɔ.
19 Ká Wɩɩsɛ taŋá ná ʋ há bílé anɛ jaa mʋ́l, ʋ duokí, ʋ waá zíksi.
Wɩ́ɛ́ ná há pʋ́ŋsʋ́ nyúú ní ká:
«Nyuutɩna Wɩɩsɛ ʋ́ʋ̃́ nɩɛ;»
a baa pʋ́ŋsɛ bʋlɛ́:
«Nɛrɔ ná wuu há sʋ́ʋ́ ká Nyuutɩna Wɩɩsɛ nɛ́ŋ,
rʋ́ʋ́ tɩ́na tá wɩ́bɔmɔ ɛɛ.»
20 Jɩzeno mí, salmɛ gbaŋsɛ rɩ́ wárɛ gbaŋsɛ dʋŋɔ rá ráŋ, ɓa rɩ́ cʋ́ʋ́ oŋ'máálɛ rɩ́ dagbaŋsɛ wuu ní ráŋ; náŋa ká tʋtʋ́ŋpiŋe wɩ́ɛ́ nɛ́, náŋa tʋtʋ́ŋwɩɛla wɩ́ɛ́.
21 Ɛ́ wɩ́ɛ́, rɩ nɛ́ŋ rɩ́ lɩ́sʋ́ tɩɩ wɩ́bɔma mɛ́, ʋ sɩ́ nɛ gbaŋa ná ɓa há kené aá tʋŋ tʋtʋ́ŋpiŋe, rʋ́ʋ́ tɩ́na lɩ́sʋ́ bílú dʋŋɔ, ʋ tʋtʋmɛ́ yɩr mɛ́, rʋ́ʋ́ sɩ́ busunnu ɓárʋ́, ká rʋ́ʋ́ kaá tʋŋ tʋtʋ́ŋwere rɩ́wɔ́ duó wuu.
22 Lɩ́sɩ́ tɩɩ heŋbiwafɛlɛ wɩ́cólle ná há lɔ́rɛ́ mɛ́, ká, nɩɛ ná háá cʋɔlɛ Nyuutɩna rɩ́ sapʋmmɩ́, hé dóé, rɩ́ wérí rɩ́ yardá, rɩ́ cólle, arɩ́ tɛŋfɩ́ɛ́l mɩ́nɩ́wa pɛ́kɛ.
23 Vɛ nɩcʋ́ltɩ́ŋtɔ́ɛ́ ná há wɩ nyʋɔrɛ́ kené; ɩ ɩ́ɔ̃́ rɩ́ ɛ́ tɩ́ŋtɔ́ɛ́ duo, kéŋ nɛsɛ nɛ́ aá ko.
24 Ká ʋ wɩ mɔhɛ̃́ rɩ́ Nyuutɩna tʋtʋnnɔ na nɛsɛ.
Ʋ mɔhɔ̃́ rʋ́ʋ́ zízíl nɩɛ wuu, a wólli kɩ́karmɛ, a ka nyamma má.
25 Ʋ mɔhɔ̃́ rʋ́ʋ́ pɔ́rʋ́ tɩɩ mɛ́, a karmɛ nɩɛ ná há cɩ́nʋ́ mɛ́, a káŋwɔ́ aá hé ŋmɛ́nɔ mɛ́, ká ka yɩɛla, rɩ Wɩɩsɛ sɩ́ a rɩ́wɔ́ bɩ́rsɛ, a zɩŋ taŋá ná,
26 a bɩrɛ ná wɩ́zɩmɛ, a lɩ́sɩ́wɔ́ tɩɩ Sɩtaanɛ* báráwa mɛ́; Sɩtaanɛ nɛ́ fa kɛ́sɩ́wɔ́, a a ɓaá tɩ́ŋʋ́ cólle.