Bʋllɛ kɛnɔ ná Pool há pʋ́ŋsɛ́ pá
Timote
Cʋɔla
1
1 Ŋ Pool,* Kirisi Zeezi nɩtʋmɩ́,* a tɩŋ Wɩɩsɛ cólle mí, ŋ nɛ́ pʋ́ŋsɛ kɛnɔ né.
Wɩɩsɛ há bʋ́lɛ́ bʋlʋ́ sɩ́ tɩŋ Kirisi Zeezi mí, a párá mɩɩsɛ ná, ɛ́ mɩɩsɛ wɩ́ɛ́ nɛ́ ʋ tʋ́mɩ́ŋ, rɩ́ŋ bʋl pá nɩɛ.
2 Ŋ pʋ́ŋsɛ kɛnɔ né aá pɛ́ɩ́ Timote* ní, ŋ bicólli tɩɩ.
Ráá Ana Wɩɩsɛ rɩ́ Kirisi Zeezi á Nyuutɩna, fɛ́ɩ́ susu, a pɛ́ɩ́ bárka rɩ́ tɛŋfɩ́ɛ́l!
Pool dúóri Timote naasɛ
3 Ŋŋ́ bɔ́llɛ Wɩɩsɛ ná ŋ naabálwa die há tʋ́mɛ́ pá, ŋ má zaa baa isi a tʋŋ aá pɔ́ʋ́, arɩ́ sawero.
Wɔhɔ rɩ́ tɩ́taŋ wuu, rɩŋ nɩ́ɩ́ cʋɔlɛ Wɩɩsɛ, ŋ wɩ́ɩ́ wɩ́ɛ́ sʋ́llɛ.
4 Ŋ há ísí dɩhɩ̃́ ɩ wi ɛ́, ŋ ha wɩ sʋ́llɛ́.
Ŋ sɩɛ́ de caasɛ fɛ́l sɩ́ɩ́ nɛ́, aá ja rɩ́ŋ néí, a makɛ rɩ́ satɔrɔ́ súŋ.
5 Ɩ há kéŋ yardá ná rɩ́ taŋá, ŋ wʋ́ʋ́ má mɩ́ɩ́ sʋ́llɛ.
Ɩ nahã́ Loyisi rɩ́rɩ́ maá Eniisi, ɓa má fa kéŋ ɛ́ yardá duo ní arɩ́ Wɩɩsɛ; ŋ ɩ́ɔ̃́ rɩ́ ɛ́ yardá nɛ́, ɩ má ka.
6 Ɛ́ nɛ́ tɛ, ŋ cɩ́cáánɩ́, pálɔ ná Wɩɩsɛ há pɛ́ɩ́, tɛ́ŋ ná mɛ́ ŋ há píŋ nɛ́ŋsa tɩ́kɩ́ mɛ́,*f1* ka ɛ́ pálɔ aá tʋŋ.
7 Wɩɩsɛ Sabɩɩna* ná ʋ há píé párá, ʋ wɩ́rá gbɛ́l, amá ʋʋ́ párá dóé, cólle rɩ́ zɩ́mɩ́ tɩɩ kanɛ́ nɛ́.
8 Ɛ́ wɩ́ɛ́, sɩ́rá Nyuutɩna wɩ́ɛ́ bʋlɛ́ hɩɩ̃sɛ fá, a sɩ́ŋ má hɩɩ̃sɛ fá, ʋ wɩ́ɛ́ nɛ́ ɓa tɔ́ŋ bɩnajaa mɛ́.
Amá arɩ́ Wɩɩsɛ dóé, saŋ rɩ́ŋ rɩ́rɩ́ dí wɩɩla Labaarɩwero ná yɩr mɛ́.
9 Wɩɩsɛ nɛ́ lárá tá, a yɩ́rɩ́rá, ráá ɔ́ʋ́ nɩɛ; ʋ wɩ́rá wɩ́were ní bélé ká lárá tá, amá ʋ lʋ́ʋ́ tɩɩ Sabɩɩna makɛ́ nɛ́, ʋ fárá susu a tɩŋ Kirisi Zeezi mí, a tʋŋ ɛ́ fól wuu, rɩ dúníé ha toó.
10 Amá mʋ́l néé mí, a tɩ́ŋrá Laataarɔ Kirisi Zeezi mí, ɛ́ susu fárʋ́ ká nyaamɩ́.
Kirisi Zeezi sɩɛ́ zɔ́kɛ́ sʋʋ dóé, ká tɩŋ Labaarɩwero ná mɛ́, a máŋsɛ mɩɩsɛ ná há waá tenni wɩ́ɛ́ pá nɩɛ, ʋ de a pʋmmɩ́.
11 Wɩɩsɛ lɩ́sɩ́ŋ rɩ́ŋ ɔ́ʋ́ nɩtʋmɩ́, a gʋɔrɛ búóli Labaarɩwero né wɩ́ɛ́ aá pá nɩɛ, aá karmɛ nɩɛ má.
12 Ɛ́ wɩ́ɛ́ nɛ́ tɛ, ŋ nɩ́ná wɩɩla nyɛ, amá ʋ to hɩɩ̃sɛ́ a páŋ, bee wɩ́ɛ́ ŋ ɛ̃ nɛrɔ ná ŋ há lɛ́ɛ́ dí, a zɩŋ rɩ́ taŋá, rʋʋ kéŋ dóé a wólli omo ná ʋ há píé héŋ nɛ́sɛ mɛ́ aá bel, a kaá ja Kirisi Zeezi tápʋl koolí.
13 Wɩ́táŋsɛ ná ŋ há bʋ́lɛ́ pɛ́ɩ́, tɩ́ŋwɔ́, a bʋ́lwɔ́ nɛ́ aá pá nɩɛ, ká ka yardá rɩ́ cólle ná á há kené, a tɩŋ Kirisi Zeezi mí wérí.
14 Wɩɩsɛ há pí omo ná héí nɛ́sɛ mɛ́, bélú mí wérí, arɩ́ Wɩɩsɛ Sabɩɩna ná há mɩ́ŋrá mɛ́ dóé.
15 Ɩ ɩ́ɔ̃́ rɩ́ Azi dɩtɩ́llɛ nɩɛ wuu vɛ́ŋ, Fɩzɛl rɩ́ Ɛrmɔzɛnɛ má mɩ́ŋwɔ́ sɩɛrʋ.
16 Rɩ́ Wɩɩsɛ fá Ɔnɛzɩfɔɔrɛ rɩ́rʋ́ jaa nɩɛ susu, bee wɩ́ɛ́ ʋ válɔ́ aá dúóríŋ naasɛ; ŋ bɩnajaa mɛ́ mɩnɛ́ to hɩɩ̃sɛ́ ʋ rɩ́.
17 Ʋ há ko Romi,* ʋ jáŋ dɩhɩ̃́ arɩ́ taŋá má tɩɩ, ká zɩŋ túkíŋ mí.
18 Ŋ fa há mɩŋ Ɩfɛɛzɛ* má mɛ́ ʋ sáŋɩ́ŋ mɛ́ mɔ ɛ́, ɩ ʋ́ʋ̃́ kɩ́llɛ nɩɛ wuu.
Rɩ́ Nyuutɩna fɔ́ʋ́ susu, sarɩ́ya kaldíí.