Dʋ́ŋdʋ́ʋ̃́ kɛnɔ ná Pool há pʋ́ŋsɛ́ pá
Timote
Cʋɔla
1
1 Ŋ Pool,* Kirisi Zeezi nɩtʋmɩ́,* a tɩ́ŋrá Laataarɔ Wɩɩsɛ rɩ́ Kirisi Zeezi ná á háá yɩɛlɛ́ sɛ́ mɛ́; ŋ nɛ́ pʋ́ŋsɛ kɛnɔ né,
2 rɩ́ŋ pɛ́ɩ́ Timote,* ŋ bio tɩɩ, a tɩ́ŋɩ́ há lá Kirisi dí wɩ́ɛ́.
Ráá Ana Wɩɩsɛ rɩ́ Kirisi Zeezi á Nyuutɩna fɛ́ɩ́ susu, a pɛ́ɩ́ bárka rɩ́ tɛŋfɩ́ɛ́l!
Kánɩ́ tɩɩ rɩ́ nɩɛ ná háá karmɛ nyɛwɩ́ɛ́
3 Ŋ fa háá mʋ́ Masɩdʋanɛ* dɩtɩ́llɛ, ŋ sʋ́lɩ́ rɩ́ɩ́ ké Ɩfɛɛzɛ* mɛ́.
Ŋ ha có ríí ké ráŋ nɛ́, bee wɩ́ɛ́ nɩɛ mɩŋ ráŋ aá karmɛ nyɛwɩ́ɛ́; ʋ sɩɛ́ mɔhɔ̃́ rɩ́ɩ́ bʋl pɔ́wɔ́ rɩ́wɔ́ tá nyɛwɩ́ɛ́ ná karmɛ́,
4 a sɩ́ wɩ́luké píí héwó nyúú mí, a sɩ́wɔ́ naabálwa nɩtɩnnɛ diŋderé ná dɩ́dɩ́ɩ́sʋ́.
Ɛ́ wɩ́ɛ́ duo ɔ́sɔ́ aá zuki tɩ́ŋtɔ́ɛ́ nɛ́, ká wɩ Wɩɩsɛ wɩ́ɛ́ ná wuó ɔsɛ.
Yardá mɛ́ nɛ́ ɓa tɩŋ aá zɩ́ŋwɔ́.
5 Ŋ sɩ́ɩ́ bʋl nyɛ, a makɛ rɩ́wɔ́ cólli náŋa arɩ́ sapʋmmɩ́, a ka sawér, ká ka taŋá taŋá yardá arɩ́ Wɩɩsɛ.
6 Nɩɛ náŋa vɛ́ wɩ́ɛ́ nyáŋ tɩŋɛ́ nɛ́, ká yéŋŋi a mɩŋ wɩ́kaŋyɔ́ɔ́wa bʋlɛ́ mɛ́.
7 Ɓaá já rɩ́wɔ́ bɩrmɛ Wɩɩsɛ kíŋse karmɩ'ánáwa nɛ́, ká wʋ́ɔ́ tɩɩ wɩ́bʋlɛ́ arɩ́ wɩ́ɛ́ ná ɓa háá karmɛ́ rɩ́ taŋá, mʋ́ʋ́la ɛ̃.
8 Á ɩ́ɔ̃́ zɩŋ rɩ́ Wɩɩsɛ kíŋse wéró, rɩ nɩɛ nɩ́ɩ́ tɩ́ŋwɔ́ ɓa sɩ́ɩ́ mɛ́.
9 Á taŋa zɩŋ rɩ́ Wɩɩsɛ wɩ kíŋse* ná bílé, nɩɛ ná háá a wérí wɩ́ɛ́ nɛ́, amá nɩɛ ná wɩ́ɛ́ Wɩɩsɛ há bíl kíŋse ná nɛ́ ká:
wɩ́tɛ'aara rɩ́ waásaŋwa, nɩbɔma rɩ́ wɩ́bɔŋ'aara, nɩɛ ná há wɩ Wɩɩsɛ ŋmɛ́nɔ́ tɩŋ rɩ́ nɩɛ ná há wɩ Wɩɩsɛ onní bú, nɩɛ ná háá ɓʋ́ʋ́sɩ́wɔ́ ánáwa rɩ́ nɩɛ ná háá ɓʋ́ʋ́sɩ́wɔ́ maáwa, rɩ́ nɩɓʋ́ʋ́ra,
10 rɩ́ nɩcɔrma, rɩ́ nɩɛ ná há gɩ́rɛ́ aá pɩ́ŋwɔ́ bánáŋa rɩ́wɔ́ hánáŋa, yóbáyɛlɛ́, rɩ́ nyɛtɩɩna rɩ́ nɩɛ ná há có bʋra, arɩ́ wɩ́ɛ́ ná wuu há wɩ cɛ́rɛ́ rɩ́ wɩ́táŋsɛ ná, á háá karmɛ́.
11 Wɩ́ɛ́ nyáŋ ŋ há máŋsɛ́, ɓa lɛ́ Wɩɩsɛ Labaarɩwero* ná, ʋ há píé páŋ sɩɛrʋ nɛ́.
Ɛ́ Labaarɩwero sɩɛ́ lɛ́ Wɩɩsɛ ná há píŋó ní; ʋ nɛ́ ká wér wuu dɩbulí.
Pool bɔ́llɛ Wɩɩsɛ, bee wɩ́ɛ́ Wɩɩsɛ fɔ́ʋ́ susu
12 Ŋŋ́ bɔ́llɛ Kirisi Zeezi, á Nyuutɩna, ʋ há keníŋ yardá, a lɩ́sɩ́ŋ, a páŋ dóé rɩ́ŋ tʋŋ pɔ́ʋ́.
13 Ká tésíé mí, ŋ fa bʋ́lʋ́ bɔ́ŋbɔ́ŋ, ŋ fa cɩ́nʋ́ nɩɛ mɛ́ a wálmɩ́wɔ́, a tʋ́ksʋ́ má tɩɩ.
Amá arɩ́ ɛ́ wuu, Wɩɩsɛ fáŋ susu, bee wɩ́ɛ́ ŋ fa há wʋ́ʋ́ wɩ́ɛ́ lɛ́ɛ́ dí, ŋ fa wɩ́ŋ háá ɔ́ʋ́ ná ɛ̃.
14 Ká á Nyuutɩna ha tʋ́mʋ́ zilé kɩ́ŋkáŋ maahʋ̃́ a páŋ, a a ŋ la Kirisi Zeezi dí, a cóllú.
15 Ŋŋ́ já rɩ́ŋ bʋl wɩ́ɩ́ rɛ́; ʋ sɩɛ́ ká wɩ́tɩɩ rɛ́, nɩɛ wuu zɩ́mʋ́ mɛ́, a mɔ rɩ́ nɩɛ wuu lɔ́ʋ́ bílwó beŋtunni mí.
Ɛ́ wɩ́ɩ́ nɛ́ ká:
Kirisi Zeezi kó dúníé rʋ́ʋ́ la wɩ́bɔŋ'aara nɛ́ tá; ŋ nɛ́ sɩɛ́ kɔ́wɔ́ wuu nɩbɔmɔ.
16 Amá ŋ nɛ́ há ká wɩ́bɔŋ'aara wuu nɩbɔmɔ, Wɩɩsɛ fáŋ susu, a makɛ rɩ́ Zeezi Kirisi tɩ́ŋɩ́ŋ mɛ́, a mákʋ́ nyamma wuu, a makɛ rɩ́ nɩɛ ná wuu cíé háá á rɩ́wɔ́ lɔ́ʋ́ dí, a ná mɩɩsɛ ná há waá tenni, rɩ́wɔ́ bel ɛ́.
17 Kuózeno Wɩɩsɛ há wɩ dɩpúli rɩ́ dɩtenní kené, ʋ waá sʋ́wɩ́ ná, ʋ dʋŋɔ léŋ ní há ká Wɩɩsɛ ná ɓa há wʋ́ʋ́ wuó ná, rʋ́ʋ́ nɛ́ tɩ́llɛ píŋ rɩ́ hʋʋma, tɛ́ŋ wuu mí!
Amɩɩ*!
Pool dúóri Timote naasɛ
18 Ŋ bio Timote, anɛ Wɩɩsɛ wɩ́laabʋlla fa há lá sɩ́ɛ́ bʋl wɩ́ɛ́ ná a mʋ́ tɩ́ɩ́nɩ́ mɛ́, cáánɛ ná ŋ há kené rɩ́ŋ pɛ́ɩ́ nɛ́ ká, rɩ́ɩ́ píí tɩɩ yelli ɛ́ wɩ́ɛ́ mɛ́, ká lowi lowero,
19 a cɩ́nɩ́ yardá naa mɛ́, a ka sawero má.
Nɩɛ náŋa vɛ́ sawero ná wɩ́ɛ́ nɛ́, ɛ́ nɛ́ tɛ, ɓa báá wɩ yardá kené.
20 Imene rɩ́ Alɛkzaŋdɛ má mɩŋ ɛ́ nɩɛ sɩɛrʋ nɛ́.
Ɛ́ nɛ́ tɛ, ŋ tɔ́wɔ́ pá Sɩtaanɛ,* a makɛ rɩ́wɔ́ máŋsɛ wɩ́zɩmɛ, a báá sɩ́ Wɩɩsɛ bɔ́ŋbɔ́ŋ bʋ́lʋ́.