Bʋllɛ kɛnɔ ná Pool há pʋ́ŋsɛ́ pá
Tesaloniki tɩ́náwa
Cʋɔla
1
1 Ŋ Pool* rɩ́ Sɩlvɛŋ* arɩ́ Timote* ní pʋ́ŋsɛ kɛnɔ né, aá pɛ́ɩ́wa wɩcʋɔla púl* nɩɛ ná há mɩŋ Tesaloniki* mí, a árá Ana Wɩɩsɛ rɩ́ Nyuutɩna Zeezi Kirisi nɩɛ.
2 Ráá Ana Wɩɩsɛ rɩ́rá Nyuutɩna Zeezi Kirisi pɛ́ɩ́wa bárka arɩ́ tɛŋfɩ́ɛ́l!
Zeezi tápʋl koolí sarɩ́ya
3 Maábináŋa, ʋ mɔhɔ̃́ ráá bɔ́llɛ Wɩɩsɛ tɛ́ŋ wuu mí, ɩ́ wɩ́ɛ́.
Ʋ cɛ́rɔ́ ráá a ɛ́, bee wɩ́ɛ́ ɩ́ há á yardá ná rɩ́ Wɩɩsɛ, ʋ ɔ́sɔ́ aá súúri wérí, cólle ná má ɩ́ wuu há kené náŋá mɛ́, ʋ má ɔsɛ aá súúri.
4 Ɛ́ nɛ́ tɛ, á bʋ́lɩ́wa wɩ́ɛ́ káá nyʋ́kɛ, wɩcʋɔla púlli nɩɛ sɩ́ɛ́; bee wɩ́ɛ́ ɩ́ há mɩŋ wálmɛ rɩ́ wɩhála mɛ́, ká ɩ́ ha nyammɛ a ka wérí, a cɩ́nɩ́wa yardá naa mɛ́.
5 Ʋ ɛ́ mákɔ́ rɩ sarɩ́ya ná Wɩɩsɛ háá á rʋ́ʋ́ dí, ʋ sɩ́ɩ́ mɛ́ nɛ́, bee wɩ́ɛ́ ɩ́ há ná wɩɩla Wɩɩsɛ kuótɔ́ɔ́* ná wɩ́ɛ́, ʋ cɛ́rɔ́ rɩ́ɩ́wa zʋ ráŋ.
6 Taŋá, Wɩɩsɛ é rɩ́, ʋ sɩ́ɩ́ mɛ́ nɛ́ ká, rʋ́ʋ́ a rɩ́ wɩhála peri nɩɛ ná háá héíwa wɩhála mɛ́,
7 ká párá rɩ́rɩ́wa nɩɛ ná há mɩŋ wɩɩla mɛ́, fɩɛla, tɛ́ŋ ná mɛ́, Nyuutɩna Zeezi háá á rʋ́ʋ́ lɛ bána nyúú rí ko, arɩ́rʋ́ malɩ́kaduoru,
8 níŋváá sɩɛrʋ, rʋ́ʋ́ bɛŋsɛ nɩɛ ná há wɩ Wɩɩsɛ ɛ̃, arɩ́ nɩɛ ná há wɩ́rá Nyuutɩna Zeezi Labaarɩwero ná sáŋɛ́.
9 Bɛŋsɛ́ ná duo ɓa háá á rɩ́wɔ́ ná nɛ́ ká, zɔ́krʋ ɓɩzeno ná há waá tenni, ká rɩ́wɔ́ kɛkɛ Nyuutɩna dɩmɩnɩ́ rɩ́rʋ́ dóé ná há píŋó mí,
10 tápʋl ná ʋ háá á rʋ́ʋ́ ko rʋ́ʋ́ nɩtɩ́llɛ wuu píŋsú, rɩ́ nɩɛ ná má wuu há lɔ́ʋ́ dí bɩ́bɛ́llʋ́.
Ɩ́ má sɩɛ́ mɩŋ ɛ́ nɩɛ sɩɛrʋ nɛ́, bee wɩ́ɛ́ á há bʋ́lʋ́ wɩ́ɛ́ pɛ́ɩ́wa, ɩ́ lɔ́ɔ́ dí.
11 Ɛ́ nɛ́ tɛ, á cʋ́ɔ́lɩ́rá Wɩɩsɛ aá pɛ́ɩ́wa tɛ́ŋ wuu mí, aá sʋ́lʋ́, a makɛ rʋ́ʋ́ a rɩ́ɩ́wa mála a wérí, anɛ ʋ há yɩ́rɩ́wa aá ja rɩ́ɩ́wa nɛ ɛ́; a ha sʋ́sʋ́lʋ́ rʋ́ʋ́ sáŋɩ́wa mɛ́ arɩ́rʋ́ dóé, rɩ́ɩ́wa a wɩ́were ná wuu ɩ́ há có rɩɩ́wa ɔ́ɔ́, ká rʋ́ʋ́ a rɩ́ɩ́wa yardá wɩ́ɛ́ wuu cɛ́rɛ,
12 a makɛ rɩ́ nɩɛ píŋsírá Nyuutɩna Zeezi yɩr, ɩ́ wɩ́ɛ́; ká rɩ́ɩ́wa má ná píŋ, ʋ yɩr mɛ́, a tɩ́ŋrá Wɩɩsɛ rɩ́rá Nyuutɩna Zeezi Kirisi bárka mɛ́.