Nyuutɩna Zeezi bɩrkoe wɩ́ɛ́
5
1 Maábináŋa, ʋ baa to rɩ́ŋ pʋ́ŋsɛ pɛ́ɩ́wa, a máŋsɛ tɛ́ŋ ná rɩ́ cɛ́rɛ ná, wɩ́ɛ́ nyáŋ háá á rɩ́wɔ́ tʋŋ.
2 Ɩ́ tɩɩ ɩ́ɔ̃́ zɩŋ rɩ́ Nyuutɩna tápʋl koolí ná sɩ́ uri, anɛ gaarɔ háá ko uri tɩ́taŋ ɛ́.
3 Tɛ́ŋ ná mɛ́ nɩbííne há sɩ́ bʋlɛ́ tɛŋfɩ́ɛ́l mɩ́nɔ́ sɩ́sɛ́nyɛ, wɩ́ɩ́ wuu báá toó, ɛ́ tɛ́ŋ mɛ́ nɛ́, rɩ́ zɔ́krʋ ko úrwó mí, naasɩ́ balá, rɩ́wɔ́ sɩ́ wóllí lúú lɛ, anɛ hápuuko lowɩɩla háá ko isi úrú mí ɛ́.
4 Amá ɩ́ é, maábináŋa, ɩ́ há to bíno mí, ɛ́ tápʋl wɩ mɔhɛ̃́ rʋ́ʋ́ úríwa mɛ́, anɛ gaarɔ háá ko uri ɛ́.
5 Ɩ́ é wuu ká pʋmmɔ nɩɛ nɛ́; ɩ́ ká wɔhɔ nɩɛ nɛ́.
Á to tɩ́taŋ nɩɛ, á to bíno má nɩɛ.
6 Ɛ́ wɩ́ɛ́, ʋ wɩ mɔhɛ̃́ ráá pɩ́ dóŋ, anɛ nɩɛ ná náŋa háá pɩ́ ɛ́; amá ʋ mɔhɔ̃́ ráá barɛ dóŋ, a káŋrá tɩɩ wérí, a pɔ́.
7 Tɩ́taŋ nɛ́ ká dóŋ pɩ́nɛ, tɩ́taŋ nɛ́ ká sɩ́ŋ nyɔɔ buké má.
8 Amá á é há ká wɔhɔ nɩɛ, ʋ mɔhɔ̃́ ráá káŋrá tɩɩ a pɔ́.
Ʋ mɔhɔ̃́ ráá ka wérí, a makɛ raá yardá ná á há kené arɩ́ Zeezi, arɩ́rá náŋá cólle ná, rɩ́wɔ́ nɩɛsɛ hɔɔ gɛsuo,* á há píé suu kɛ́rɩ́rá tɩɩ mɛ́, ká ráá laatɛ́ yɩɛla ná má nɛ hɔɔ néŋcúú,* ráá cú.
9 Wɩɩsɛ wɩ́rá tʋ́ɔ́sɛ́ rʋ́ʋ́ cɔwɩɩlɔ́ dírá nyúú ní, amá ʋ tʋ́ɔ́sɩ́rá, ráá ná laatɛ́ nɛ́, a tɩ́ŋrá Nyuutɩna Zeezi Kirisi mí.
10 Á yɩr mɛ́ nɛ́ ʋ sʋwɛ, a makɛ, ʋ bɩrkoe mí, raá wómmó, raá sʋ́sɔ́, ráá ka mɩɩsɛ ʋ rɩ́.
11 Ɛ́ wɩ́ɛ́ sɩɛ́, ɩ́ cɩ́cáánɛ náŋá, a súsúúri náŋá yardá, anɛ ɛ́ ɩ́ há válɛ́ aá a.
Hatɩ́ŋnɩ́cáánɛ rɩ́ cʋɔla
12 Maábináŋa, áá sʋ́lɩ́wa, rɩ́ɩ́wa zíl nɩɛ ná háá tʋŋ Wɩɩsɛ tʋtʋmɛ́ ɩ́ dɩhɩ̃́.
Nyuutɩna nɛ́ héwó rɩ́wɔ́ dííwa sɩ́ɛ́, aá kármɩ́wa.
13 Ɩ́ zílwó wérí, a píŋsíwó, a cóllíwó kɩ́ŋkáŋ má, bee wɩ́ɛ́ ɓaá tʋŋ Wɩɩsɛ tʋtʋmɛ́ nɛ́.
Ɩ́ ka náŋá wérí, rɩ́ɩ́wa kéne a wérí.
14 Maábináŋa, áá sʋ́lɩ́wa, ɩ́ pʋʋsɛ tɛŋwɩtɩɩna dɩlla mɛ́, a dúóri héwɩ́tɩɩna naasɛ, a sáŋ nɩɛ ná há wɩ dóé kené mí, ká ka nyamma rɩ́ nɩɛ wuu.
15 Ɩ́ pɔ́, rɩ́ nɛrɔ wuu sɩ́ bɔ́ŋbɔ́ŋ píí túŋ bɔ́ŋbɔ́ŋ, amá ɩ́ hé dóé tɛ́ŋ wuu mí, a a wérí náŋá mɛ́, ká a wérí pa nɩɛ wuu.
16 Ɩ́ jɩ́jʋɔsɛ tɛ́ŋ wuu mí.
17 Ɩ́ cɩ́cʋɔlɛ Wɩɩsɛ cɛ́rɛ wuu mí.
18 Ɩ́ bʋ́bɔ́llɛ Wɩɩsɛ wɩ́ɩ́ wuu mí.
Wɩɩsɛ já rɩ́ɩ́wa tʋ́tʋŋ ɛ́ nɛ́, ɩ́ nɩɛ ná há mɩŋ Zeezi Kirisi mí.
19 Wɩɩsɛ Sabɩɩna tʋtʋmɛ́ nɩhɩ̃́ níŋ ní, ɩ́ sʋ́ʋ́ dʋ́sʋ́;
20 ɩ́ sɩ́ Wɩɩsɛ wɩ́laabʋlɛ́ gúónú.
21 Amá ɩ́ kɩ́ɛ́lɛ wɩ́ɩ́ wuu, ká sáŋʋ́ ná há wéró.
22 Ɩ́ pɔ́ rɩ́ɩ́wa sɩ́ bɔ́ŋbɔ́ŋ rɩ́rʋ́ dúó oro wuu á.
23 Rɩ́ Wɩɩsɛ tɩɩ nɛ́ háá pá tɛŋfɩ́ɛ́l, a rɩ́ɩ́wa sɩ́ busunnu mʋɔ́ má ɓárʋ́; rʋ́ʋ́ bélíwa sabɩɩna rɩ́rɩ́wa dʋma arɩ́rɩ́wa tɛŋ wuu mí, rɩ́wɔ́ sɩ́ dɩzɔkɩ́ mʋɔ́ wuu kánʋ́, á Nyuutɩna Zeezi Kirisi tápʋl koolí!
24 Wɩɩsɛ ná há yɩ́rɩ́wa, ʋ sɩ́ tʋŋ ɛ́, bee wɩ́ɛ́ ʋ nʋtállɛ waá giri.
25 Maábináŋa, ɩ́ má sʋl Wɩɩsɛ párá.
26 Ɩ́ cʋ́ɔ́lɩ́rá maábináŋa wuu, a tɩŋ náŋá baŋa vɔsɛ́ mɛ́, anɛ ɛ́ Zeezi laadííre há mɔhɛ̃́ rɩ́wɔ́ a.
27 Ŋŋ́ jɛ́nnɩ́wa, Nyuutɩna yɩr mɛ́, ɩ́ karmɛ kɛnɔ né párá maábináŋa wuu.
28 Ráá Nyuutɩna Zeezi Kirisi héíwa nyúú bárka!