Kɛnɔ ná Pool há pʋ́ŋsɛ́ pá
Kɔlɔsɛ tɩ́náwa
Cʋɔla
1
1 Ŋ Pool,* Kirisi Zeezi nɩtʋmɩ́* a tɩŋ Wɩɩsɛ cólle mí, ŋ rɩ́ Timote* há kárá maábinɔ́ŋ, á nɛ́ pʋ́ŋsɛ kɛnɔ né,
2 ráá pɛ́ɩ́wa Wɩɩsɛ nɩɛ ná há kárá maábináŋa tɩɩ, Kirisi mí, a mɩŋ Kɔlɔsɛ mɛ́; áá bɔ́llɩ́wa.
Ráá Ana Wɩɩsɛ pɛ́ɩ́wa bárka arɩ́ tɛŋfɩ́ɛ́l!
Pool bɔ́llɛ Wɩɩsɛ
3 Á wɩcʋɔlɔ́ sɩɛrʋ, tɛ́ŋ wuu mí, á sʋ́lrá Nyuutɩna Zeezi Kirisi Ana Wɩɩsɛ aá pɛ́ɩ́wa, káá bɔ́llʋ́ ɩ́ wɩ́ɛ́;
4 á nɩ́ɩ́wa Kirisi Zeezi laadí wɩ́ɛ́, a nɩ́ɩ́wa há có Wɩɩsɛ nɩɛ wuu má ɛ́.
5 Onni ná Wɩɩsɛ há bílíwa mɛ́ yɩɛla nɛ́ ɩ́ ka, aá tʋŋ ɛ́; fól wuu, Labaarɩwero ná há ká taŋá tɩɩ há péríwa, ɓa bʋ́l ɛ́ wɩ́ɛ́ pɛ́ɩ́wa.
6 Labaarɩwero ná sɩɛ́ sú dúníé wuu ní, a wa, anɛ tuu, a nɔŋ nɔnɔ, anɛ ɛ́ ʋ há nɔ́nɛ́ ɩ́ má dɩhɩ̃́, a de kaa pɔ́ kal ná ɓa há bʋ́l Wɩɩsɛ zilé ná wɩ́ɛ́ ɩ́ nɛ, a saŋ, a zɩ́mʋ́ rʋʋ ká taŋá tɩɩ.
7 Á nɩcólli kárá tʋtʋ́nnʋ́nɔ́ŋɔ Ɩpafɩrasɛ nɛ́ máŋsɩ́wa ɛ́ wɩ́ɛ́.
Ʋ ká Kirisi tʋtʋnnʋtaŋá rɛ́ a tʋŋ aá pɛ́ɩ́wa.
8 Ʋ nɛ́ sɩɛ́ bʋ́l cólle ná Wɩɩsɛ Sabɩɩna* há píé héíwa mɛ́ wɩ́ɛ́, a párá.
Pool wɩsʋlɔ́
9 Ɛ́ nɛ́ tɛ, a de kaa pɔ́ kal ná á má há nɛ́ ɛ́ wɩ́ɩ́, á dé sʋl Wɩɩsɛ nɛ́ aá pɛ́ɩ́wa, tɛ́ŋ wuu mí.
Áá sʋ́lʋ́, rʋ́ʋ́ a rɩ́ɩ́wa zɩŋ wɩ́ɛ́ ná wuu ʋ háá jɛɛ́ nyaamɩ́, a tɩ́ŋʋ́ Sabɩɩna háá á rʋ́ʋ́ pɛ́ɩ́wa wɩ́zɩmɛ arɩ́ zɩmɛ́ ná mɛ́.
10 Ɛ́ é, ɩ́ sɩ́ wólli va ɛ́ ná há cɛ́rɛ́, Nyuutɩna Zeezi Kirisi ŋmɛ́nɔ mɛ́, a tɔ́rʋ́ sɩɛrʋ ɩ́ wɩ́'állɛ wuu mí.
Ɩ́ sɩ́ a wɩ́were rɩ́wɔ́ duó wuu, ká rɩ́ɩ́wa ɔsɛ zɩŋ Wɩɩsɛ aá súúri, anɛ tuu háá nʋ́nɔŋ, ká wa aá súúri ɛ́.
11 Áá sʋl Wɩɩsɛ rʋ́ʋ́ tɩ́ŋʋ́ dóé ná há píŋó mí, a a rɩ́ɩ́wa ka dóé ɩ́ wɩ́'állɛ wuu mí, a makɛ rɩ́ɩ́wa dí nyamma, ká cɩ́ pɩ́ɩ̃́ arɩ́ satɔrɔ́.
12 Ɩ́ bɔ́llɛ Wɩɩsɛ ná há ká Ana, ʋ há ɛ́ɛ́ ɩ́ wólli ka ker ʋ nɩtɩ́llɛ liwe sɩɛrʋ, ʋ pʋmmɔ kuótɔ́ɔ́ ná mɛ́.
13 Ʋ nɛ́ lárá tá bíno* kuóro nɛ́sɛ mɛ́, a pírá hóú Bicolli kuótɔ́ɔ́ sɩɛrʋ.
14 Ʋ Bicolli ná nɛ́ yɔ́wɛ́ lárá, a hérá wɩ́zɔkɛ́ suúri má.
Kirisi kéŋ dóé wɩ́ɩ́ wuu mí, ʋ nɛ́ kɛ óŋ wuu
15 Kirisi ní ká Wɩɩsɛ ná nɩɛ há wʋ́ʋ́ wuó ná nɩɩsɔ,
ʋ nɛ́ ká bihɔ̃́, ʋ nɛ́ kɛ oŋ'máálɛ wuu.
16 Ʋ mɛ́ nɛ́ Wɩɩsɛ tɩŋ a onni ná wuu,
há mɩŋ bána nyúú arɩ́ tíé nyúú,
ɓa ná há wúóló aá ná,
arɩ́ ɓa ná sɩ́ɛ́ há wɩ wuó ná wuu, kuóre,
tíŋ tɩ́náwa, dóé tɩ́náwa arɩ́ bɩbara.
Ʋ mɛ́ nɛ́ Wɩɩsɛ tɩŋ,
a ɔ́wɔ́ wuu ɓa wuu mɩŋ ʋ yɩr mɛ́.
17 Ʋ mɩ́nɔ́ rɩ óŋ wuu ha toó;
ʋ nɛ́ sɩɛ́ tɛ onni wuu mɩ́ŋwɔ́ dɩmɩnɛ́.
18 Kirisi ní ká wɩcʋɔla púl* Nyuutɩna;
wɩcʋɔla púl ná kɔ́ʋ́ tɛŋ nɛ́,
ká ʋ nɛ́ sɩɛ́ a nyúú.
Ʋ nɛ́ ká púle,
ʋ nɛ́ ká dʋ́ŋdʋ́ʋ̃́ nɛrɔ ná,
há bɩ́rɛ́ isi sʋʋ mɛ́,
a makɛ rɩ́ wɩ́ɩ́ wuu mí,
rʋ́ʋ́ nɛ́ a dʋ́ŋdʋ́ʋ̃́ nɛrɔ.
19 Ʋ sɩɛ́ ká Wɩɩsɛ wɩ́cólli ní,
ɛ́ nɛ́ tɛ ʋ púú nɩɩsɔ wuu hóú mí.
20 Kirisi mí ní Wɩɩsɛ tɩŋ a,
ʋ rɩ́ onni wuu pɛ́kɛ a wérí,
ɓa ná há mɩŋ tíé nyúú,
arɩ́wɔ́ ná há mɩŋ bána nyúú;
ʋ cɛ́l ná há bɩ́sɛ dagɛsɛ́* daha nɛ́ sɩɛ́ ɛ́ɛ́,
tɛŋfɩ́ɛ́l mɩŋ Wɩɩsɛ rɩ́ ɛ́ onni wuu pɛ́kɛ.
21 Ká tésíé mí, ɩ́ má rɩ́ Wɩɩsɛ fa waá dí, ɩ́ rɩ́rʋ́ pɛ́kɛ fa kéŋ gɩr, a tɩ́ŋɩ́wa sabɩŋtɩɛnnɛ ná arɩ́rɩ́wa wɩ́bɔma ná ɩ́ háá ɛɛ́ wɩ́ɛ́.
22 Amá mʋ́l néé mí, a tɩŋ Kirisi tɛŋnamɩɛ sʋʋ ná mɛ́, ʋ keníwa rɩ́ Wɩɩsɛ hé náŋá mɛ́, ɩ́ pɛ́kɛ a wérí, a makɛ rɩ́ɩ́wa sɩ́ wɩ́bɔ́ŋ rɩ́ busunnú wuu kánʋ́, rɩ́ɩ́wa wɩ́ɛ́ wuu de caasɛ cɛ́rɛ wérí, rɩ́ hagaasɛ sɩ́ mɩ́nʋ́, ká rʋ́ʋ́ kánɩ́wa zʋ Wɩɩsɛ sɩ́ɛ́.
23 Ɛ́ wɩ́ɛ́, ʋ mɔhɔ̃́ rɩ́ɩ́wa cɩ́nɩ́wa yardá naa mɛ́ wérí, a ɔsɛ ka géŋgéŋ, ká sɩ́ ló rɩ́wɔ́ a rɩ́ɩ́wa kɛkɛ yɩɛla ná há kɛ́ɩ́wa óŋ, ɓa bʋ́lʋ́ wɩ́ɛ́ Labaarɩwero ná sɩɛrʋ, ɩ́ nɛ, púle mí wuu.
Rɩ ɛ́ rá, ɩ́ sɩ́ gúl.
Ɓa sɩɛ́ bʋ́l ɛ́ Labaarɩwero wɩ́ɛ́ pá nɩbííne duo wuu ní; ŋ má Pool sɩɛ́ ká ɛ́ Labaarɩwero tʋtʋnnɔ nɛ́.
Tʋtʋmɩ́ ná Pool há tʋ́mɛ́ pá wɩcʋɔla púl
24 Mʋ́l néé mí, ŋŋ́ jʋ́ɔ́sʋ́ rɛ́, wɩɩla ná ŋ háá díé ɩ́ yɩr mɛ́ wɩ́ɛ́.
Sazɔkɔ́ ɓɩzeno ná há pérí Kirisi, ʋ káánɛ nɛ́ ŋ kaá tenni, a tɩŋ wɩɩla ná ŋ háá díé ŋ tɛŋnamɩɛ mɛ́, wɩcʋɔla púl ná há ká Kirisi tɛŋ yɩr mɛ́.
25 Ŋ sɩɛ́ ká wɩcʋɔla púl tʋtʋnnɔ nɛ́.
Wɩɩsɛ nɛ́ pí ɛ́ tʋtʋmɩ́ héŋ nɛ́sɛ mɛ́, rɩ́ŋ bʋ́lʋ́ nʋɔ wɩ́ɛ́ wuu a pɛ́ɩ́wa.
26 Ɛ́ wɩ́ɛ́ fa ká wɩ́féŋsé rí fól wuu, nɩbííne woó woówa wuu sɩ́ɛ́ mɛ́, ká mʋ́l néé mí, Wɩɩsɛ mákwɔ́ pɔ́ʋ́ nɩɛ.
27 Wɩɩsɛ já rʋ́ʋ́ nɩɛ nɛ́ zɩŋ ɛ́ wɩ́féŋse píŋ há wéró kɩ́ŋkáŋ ɛ́, nɩɛ ná há to Zuwifiwa sɩɛrʋ.
Ɛ́ wɩ́ɩ́ nɛ́ ká:
Kirisi mɩ́nɩ́wa mɛ́; ɛ́ wɩ́ɛ́, ɩ́ kéŋ yɩɛla rɩɩ́wa sɩ́ zʋ Wɩɩsɛ píŋ ná sɩɛrʋ.
28 Kirisi wɩ́ɛ́ nɛ́ á bʋl aá pá nɩɛ, a máŋsɛ aá pá nɛrɔ wuu, rʋ́ʋ́ pɔ́ʋ́ tɩɩ mɛ́, a tɩŋ wɩ́zɩmɛ wuu mí aá karmɛ nɛrɔ wuu, a makɛ ráá tɩŋ Kirisi mí, a a rɩ́ nɛrɔ wuu a nɩbɩɩlɩ́ Wɩɩsɛ sɩ́ɛ́.
29 Ná wɩ́ɩ́ ná há tɛ ŋ hé dóé aá tʋŋ, aá lowi arɩ́ Kirisi dóézeno ná há mɩ́nɩ́ŋ mɛ́, a kánɩ́ŋ aá a.