4
1 Ɛ́ wɩ́ɛ́, ŋ nɩcólle, ɩ́ ɔsɛ vɔwɛ Nyuutɩna tɩŋa mɛ́ wérí.
Ɩ́ káŋ maábináŋa nɛ́, ŋ cóíwa kɩ́ŋkáŋ, a de caasɛ aá hɩ́ɛ̃́nɩ́wa ko néé.
Ɩ́ nɛ́ ŋ bel káá jʋɔsɛ; ɩ́ wɩ́ɛ́, ŋ sɩ́ ná bɩbasiile.
Hatɩ́ŋnɩ́cáánɛ
2 Ŋŋ́ sʋl Evodi, aá sʋl Siŋtiisi, rɩ́wɔ́ ka nʋtʋmɛ Nyuutɩna Zeezi wɩ́ɛ́ sɩɛrʋ.
3 Ŋŋ́ sʋ́lɩ́ má, ŋ tʋtʋ́nnʋ́ nɔ́ŋɔ tɩɩ, rɩ́ɩ́ pɛ́ ɛ́ háála bɛllɛ mɛ́; ŋ rɩ́wɔ́ rɩ́ Kilemaŋ, arɩ́rɩ́ŋ tʋtʋ́nnʋ́náŋa, á wuu ní lówí Labaarɩwero ná wɩ́ɛ́.
Ɓa wuu yɩra nɛ́ sɩɛ́, Wɩɩsɛ pʋ́ŋsɛ hé hiẽsó kɛnɔ ná sɩɛrʋ.
4 Ɩ́ jɩ́jʋɔsɛ Nyuutɩna wɩ́ɛ́ sɩɛrʋ, tɛ́ŋ wuu mí; ʋ nɛ́ ha ŋ bʋ́bʋl, ɩ́ jɩ́jʋɔsɛ.
5 Ɩ́ a nɩpɔrɛ́, rɩ́ nɩɛ wuu zɩŋ ɛ́ mɛ́.
Nyuutɩna Zeezi mɩŋ tɛ́sɩ́ɩ́.
6 Ɩ́ sɩ́ ló rí óŋ wuu wɩ́ɛ́ wɩ́wálmɩ́wa; amá wɩ́ɩ́ wuu mí, ɩ́ mákɩ́wa wɩ́jaalɛ́ pá Wɩɩsɛ, a tɩŋ wɩsʋlɔ́ mɛ́ arɩ́ Wɩɩsɛ bɔ́llɛ mɛ́.
7 Ɛ́ é, Wɩɩsɛ tɛŋfɩ́ɛ́l ná há kɛ nɩbííne zɩmɛ́ wuu, ɛ́ tɛŋfɩ́ɛ́l sɩɛ́ sɩ́ a, rɩ́ɩ́wa beŋtunni rɩ́rɩ́wa sabɩŋsɛ pɩ́ dɩbalá, Kirisi Zeezi wɩ́ɛ́ sɩɛrʋ.
8 Ŋ maábináŋa, wɩ́ɛ́ ná há mɔhɛ̃́ rɩ́wɔ́ mɩ́nɩ́wa nyúú mí, a nɛ́ áŋ hatɩ́ŋnɩ́wɩ́ɩ́, ŋ jɩ́ja rɩ́ŋ bʋl pɛ́ɩ́wa, ɓa nɛ́ ká:
wɩ́ɛ́ ná há ká wɩ́táŋsɛ, wɩ́ɛ́ ná há kéŋ yɩr, wɩ́ɛ́ ná há ká tékétékéwa, wɩ́ɛ́ ná há wɩ busunnu kené, wɩ́ɛ́ ná nɩɛ há cówó, wɩ́ɛ́ ná nɩɛ há néé rɩ ɓa wéró, wɩ́ɛ́ ná há pí ŋmɛ́nɔ arɩ́ wɩ́ɛ́ ná há mɔhɛ̃́ rɩ́ nɩɛ bɩ́bɩ́wɔ́ mɛ́.
9 Wɩ́ɛ́ ná ŋ há píé mákɩ́wa, a bʋl pɛ́ɩ́wa, ɩ́ nɛ a saŋ, ɓa nɛ́ ɩ́ ná, rɩ ŋŋ́ á, ɩ́ má sɩɛ́ tɩ́ŋwɔ́.
Rɩɩ́wa nɩ́ɩ́ tɩ́ŋwɔ́, Wɩɩsɛ ná háá pá nɩɛ tɛŋfɩ́ɛ́l sɩ́ mɩ́nɩ́wa har.
Bɔlɛ
10 Ŋ sɩɛrʋ wuu ní tɔ́rɛ́, Nyuutɩna wɩ́ɛ́ sɩɛrʋ, ɩ́ báá há bɩ́ɩ́nɩ́ŋ wɩ́ɛ́ a sáŋɩ́ŋ mɛ́.
Taŋá, ɩ́ fa bɩ́ɩ́nɩ́ŋ wɩ́ɛ́ fól rí, ká ɩ́ wɩ ŋmɛ́nɔ nɛ́ néé rɩ́ɩ́wa sáŋɩ́ŋ mɛ́.
11 Ʋ sɩɛ́ to anɛ ŋ há wɩ óŋ wuu kené ní tɛ, ŋ bʋ́bʋl nyɛ, rɩŋ kéne có rʋ́ʋ́ nɛ ɛrɛ́wa má, ŋ háá a ɛ́, ká rɩ́ŋ sɩɛrʋ tɔrɛ, ŋ ʋ́ʋ̃́.
12 Rɩ óŋ ní toó, ŋ ɩ̃ ɛ́ ŋ há sɩ́ kánɩ́ŋ tɩɩ; rɩ ɓɩɛ nɛ́ búré má, ŋ ɩ̃ ɛ́ ŋ há sɩ́ kánɩ́ŋ tɩɩ.
Ŋ máŋsɩ́wɔ́ wuu ní dɩhɛ̃́ wuu, wɩ́ɛ́ wuu sɩɛrʋ.
Rɩŋ vɔ́kɔ́, rɩŋ wɩ vɔ́kɛ́, rɩ ɓɩdííle búró, rɩ losu zʋ́ɔ́, ŋ sɩ́ɛ́ to ráŋ.
13 Ŋ wóŋ tɩɩ aá ka wɩ́ɛ́ nyáŋ wuu sɩɛrʋ, bee wɩ́ɛ́ Kirisi níí páŋ dóé.
14 Ká, ɩ́ taŋa á wérí, ɩ́ há pɛ́ŋ mɛ́, ŋ wɩɩla sɩɛrʋ.
15 Ɩ́ é nɩɛ ná há mɩŋ Filipi mí, ɩ́ ɩ́ɔ̃́ zɩŋ rɩ́ŋ há púlé bʋl Labaarɩwero ná wɩ́ɛ́ aá pá nɩɛ Masɩdʋanɛ* dɩtɩ́llɛ, ká lɛ ráŋ col, ɩ́ wɩcʋɔla púl* nɩɛ dʋŋɔ nɛ́ sáŋɩ́ŋ mɛ́, káŋ má pɛ́ɩ́wa mɛ́.
Wɩcʋɔla púl oro wuu ha wɩ́ŋ mɛ́ sáŋɛ́, káŋ má pɛ́wɔ́ mɛ́.
16 Ŋ fa há mɩŋ Tesaloniki* mí, naasɩ́ ɛrɛ́, ɩ́ tɛ́ ɓɩɛ rɩ́ŋ laa sáŋɩ́ŋ tɩɩ mɛ́.
17 Ʋ sɩɛ́ to anɛ ŋŋ́ ja rɩ́ɩ́wa pɩ́páŋ ɓɩɛ nɛ́, amá ŋ háá jɔ́ʋ́ ná nɛ́ ká, rɩ́ Wɩɩsɛ tɩ́ŋɩ́wa tɛɛ ná mɛ́, a ɔsɛ pɛ́ɩ́wa túme kɩ́ŋkáŋ.
18 Ɩ́ há tʋ́ŋ Epafiroditi rʋ́ʋ́ ka ɓɩɛ ná ko páŋ, ɓa péró rí.
Mʋ́l néé mí, ŋ háá ja onni ná wuu ní mɩnɛ́, a gʋ́sɩ́ŋ má tɩɩ.
Ɓɩɛ ná ɩ́ há páŋ, ɓa dé nɛ omo ná sɔ́ŋ há wéró, anɛ tulaalé, ɓa há píé pá Wɩɩsɛ, ʋ la arɩ́ satɔrɔ́ nɛ́.
19 Ŋ Wɩɩsɛ sɩ́ pɛ́ɩ́wa onni ná wuu ɩ́ háá jɛɛ́, a tɩ́ŋʋ́ nɛ́kanɔ́ rɩ́rʋ́ píŋ mí, Kirisi Zeezi yɩr mɛ́.
20 Ráá Ana Wɩɩsɛ nɛ́ tɩ́llɛ píŋ tɛ́ŋ wuu mí, a kaá mʋ́ wuu!
Amɩɩ*!
Hatɩ́ŋnɩ́cʋɔla
21 Nɩɛ ná wuu há tɩ́ŋ Kirisi Zeezi mí, a a Wɩɩsɛ nɩɛ, ŋŋ́ cʋ́ɔ́lɩ́wɔ́ wuu, balá baláwa.
Ŋ rɩ́rɩ́ŋ maábináŋa ná há mɩŋ rɛɛ́, ɓaá bɔ́llɩ́wa.
22 Wɩɩsɛ nɩɛ ná wuu há mɩŋ rɛɛ́, ɓa máá bɔ́llɩ́wa.
Ɓa ná háá tʋŋ Romi* kuózeno jaa mɛ́, ɓa nɩ́ɩ́ bɔ́llɩ́wa kɩ́ŋkáŋ wuu.
23 Rɩ́ Nyuutɩna Zeezi Kirisi héíwa nyunni bárka!