Kɛnɔ ná Pool há pʋ́ŋsɛ́ pá
Ɩfɛɛzɛ tɩ́náwa
Cʋɔla
1
1 Ŋ é Pool* há ká Kirisi Zeezi nɩtʋmɩ́,* a tɩŋ Wɩɩsɛ cólle mí, ŋ nɛ́ pʋ́ŋsɛ kɛnɔ né aá pɛ́ɩ́wa Wɩɩsɛ nɩɛ ná há mɩŋ Ɩfɛɛzɛ* mɛ́, a ka Kirisi Zeezi wɩ́ɛ́ arɩ́ taŋá.
2 Ráá Ana Wɩɩsɛ rɩ́rá Nyuutɩna Zeezi Kirisi pɛ́ɩ́wa bárka arɩ́ tɛŋfɩ́ɛ́l!
Wɩɩsɛ tɩ́ŋ Kirisi mí a ɔ́sɩ́rá wérí
3 Á píŋsi Wɩɩsɛ!
Ʋ nɛ́ kárá Nyuutɩna Zeezi Kirisi Ana.
Wɩɩsɛ tɩ́ŋ Kirisi mí ní, a púú Sabɩɩna* bárka rɩ́rʋ́ duó wuu a párá, bána nyúú.
4 Wɩɩsɛ tɩ́ŋ Kirisi mí a lɩ́sɩ́rá, rʋʋ ha wɩ dúníé ɛ́ɛ́, a makɛ rʋ́ʋ́ tɩ́llɩ́rá, ráá árá dʋŋɔ, ráá sɩ́ wɩ́zɔkɩ́ wuu kánʋ́ ʋ sɩ́ɛ́ mɛ́.
5 Ʋ há córá, ʋ lá sɩ́ɛ́ tɩŋ Zeezi Kirisi mí, a pírá mákʋ́ bɛlɛ; ʋ tʋ́ŋ ɛ́ ʋ satɔrɔ́ rɩ́rʋ́ sawér mí ní.
6 Ʋ sɩɛ́ á ɛ́, a makɛ ráá bʋ́ʋ́ mɛ́ nɛ́, a tɩ́ŋʋ́ zilé ná há kéŋ píŋ wɩ́ɛ́.
Ʋ Bicolli mí ní ʋ tɩŋ makɛ ɛ́ zilé párá.
7 Kirisi há púú tɩɩ ɔsɛ vʋk ɛ́, ʋ cɛ́l ná bɩ́sɛ, ɓa yɔ́wɔ́ lárá, ká á nárá wɩ́zɔkɛ́ má suúri.
Wɩɩsɛ tɩ́ŋ ɛ́ mɛ́, a mákʋ́ zilé ná há zénó párá.
8 Taŋá, Wɩɩsɛ ɔ́ɔ́ ʋ zilé ná wáálɩ́rá, ʋ há párá zɩmɛ́ ɓɩzeno arɩ́ wɩ́zɩmɛ ɓɩzeno.
9 Ʋ ɔ́ɔ́ á zɩŋ wɩ́féŋsi ná, ʋ háá á rʋ́ʋ́ aa párá mʋ́l.
Ɛ́ wɩ́féŋsi ní ká, ʋ fa há bɩ́ɩ́nɛ́ fól wuu, rʋ́ʋ́ tɩŋ Kirisi mí a tʋŋ tʋtʋmɩ́ ná ʋ satɔrɔ́ mɛ́.
10 Wɩɩsɛ sɩɛ́ á ɛ́, a makɛ rʋʋ tɛ́ŋ makɩ́* nɛ́ péré, rʋ́ʋ́ hé bána nyúú, rɩ́ tíé nyúú onni wuu náŋá mɛ́, a pá Kirisi, rʋ́ʋ́ nɛ́ ɔ́wɔ́ wuu kuóro.
11 Wɩɩsɛ tɩ́ŋ Kirisi mí ní a lɩ́sɩ́rá, á ka liwe, anɛ ɛ́ ʋ fa há bɩ́ɩ́nɛ́ fól wuu, ʋ satɔrɔ́ mɛ́, rʋ́ʋ́ tʋŋ.
12 Ʋ sɩɛ́ tʋ́ŋ ɛ́, a makɛ ráá bʋ́ʋ́ yɩr ná há píŋó mí, á nɩɛ ná há lá sɩ́ɛ́ pírá yɩɛla hé Kirisi mí.
13 Ɩ́ má sɩɛ́ tɩ́ŋ Kirisi mí ní, a nɛ Labaarɩwero ná nɛ́ há ká taŋá wɩ́bʋlɛ, Wɩɩsɛ tɩ́ŋʋ́ mɛ́ a lɛ́ɩ́wa tá.
Ɩ́ lá Kirisi dí, ɛ́ nɛ́ tɛ Wɩɩsɛ púú malla héíwa mɛ́.
Ɛ́ malla nɛ́ sɩɛ́ kɔ́ʋ́ Sabɩɩna ná, ʋ há tá nʋɔ pá nɩɛ.
14 Wɩɩsɛ Sabɩɩna ná nɛ́ ʋ la sɩ́ɛ́ pii bil mʋ́l a párá, a makɛ ráá zɩŋ rɩ́ síkesíke toó, á kéŋ liwe yɩɛla ʋ dɩhɩ̃́, tɛ́ŋ ná mɛ́ ʋ há sɩ́ yɔwɛ lárá, a tɩ́llɩ́rá ɓóŋ.
Ɛ́ wɩ́ɛ́, á bɩ Wɩɩsɛ yɩr ná há píŋó mí.
Pool sʋ́l Wɩɩsɛ pá Ɩfɛɛzɛ Zeezi laadííre
15,16 Ɛ́ nɛ́ tɛ tɛ́ŋ wuu mí, ŋŋ́ bɔ́llɛ Wɩɩsɛ ɩ́ yɩr mɛ́, ɩ́ há lá Nyuutɩna Zeezi wɩ́ɛ́ dí ɛ́, arɩ́rɩ́wa há có Wɩɩsɛ nɩɛ wuu ɛ́, ŋ nɩ́wɔ́ wuu ní; ŋ sɩɛ́ sʋ́lʋ́, rʋ́ʋ́ pɛ́ɩ́wa mɛ́,
17 a makɛ ráá Nyuutɩna Zeezi Kirisi Wɩɩsɛ, há ká Ana ná há píŋó, rʋ́ʋ́ tɩ́ŋʋ́ Sabɩɩna mɛ́, a pɛ́ɩ́wa zɩmɛ́, a nyɩ́ɩ́sʋ́ tɩɩ rɩ́ɩ́wa ɔsɛ zɩ́mʋ́.
18 Ŋŋ́ sʋl Wɩɩsɛ rʋ́ʋ́ wúólíwa sɩɛnnɛ, a makɛ rɩ́ɩ́wa wólli zɩŋ yɩɛla ná duo há mɩ́nʋ́ yɩ́rɛ ná sɩɛrʋ, arɩ́rʋ́ liwe ná há ká kuó'oŋpíŋí, ɩ́ rɩ́ Wɩɩsɛ nɩɛ ná wuu há tʋ́mʋ́ mɛ́.
19 Ŋ haá sʋl Wɩɩsɛ, rʋ́ʋ́ a rɩ́ɩ́wa zɩ́mʋ́ dóényána ná há zénó mɔ ɛ́, ʋ kaá sáŋrá nɩɛ ná há lɔ́ʋ́ dí mí.
Ɛ́ dóé mí ní Wɩɩsɛ tɩŋ, aá tʋŋ arɩ́ taŋá.
20 Ɛ́ dóé ní, Wɩɩsɛ kaa a, Kirisi há sʋ́wɛ́, ʋ bɩr'isi a lɛ sʋsɛ mɛ́, ʋ kánʋ́ zɩ́ bána nyúú a bílú ʋ néduu,
21 ʋ kɩ́llɛ tíŋ wuu, rɩ́ dóé wuu, rɩ́ bɩbara wuu, rɩ́ kuóre wuu, a a, ʋ yɩr má kɩ́llɛ yɩra tɩ́náwa ná wuu, ɓa há wúóló aá dɩɩsɛ, zaa dúníé né mí, arɩ́ cíé dúníé wuu mí.
22 Wɩɩsɛ pí onni wuu dóé hé Kirisi nɛ́sɛ mɛ́, a bílú ʋ a wɩcʋɔla púl Nyuutɩna, wɩ́ɛ́ wuu mí.
23 Wɩcʋɔla púl ní ká Kirisi tɛŋ; Kirisi sɩɛ́ mɩŋ wɩcʋɔla púl wɩ́ɛ́ wuu mí ní; ká Wɩɩsɛ má mɩŋ Kirisi mí, wɩ́ɛ́ wuu mí, a la dɩhɩ̃́ wuu.