Nɩbííno wuu há dú omo ná, ʋ nɛ́ rʋ́ʋ́ kʋŋ
6
1 Maábináŋa, rɩɩ́wa oro kúó zɔkɛ wɩ́ɩ́ rɩ́wɔ́ cɛ́rʋ́, ɩ́ nɩɛ ná Wɩɩsɛ Sabɩɩna há mɩ́nɩ́wa mɛ́, ɩ́ pɔ́rɩ́wa tɩɩ mɛ́, a kánʋ́ hé ŋmɛ́nɔ mɛ́.
Ɩ́ pɔ́ɩ́wa tɩɩ mɛ́, rɩ́ díŋe sɩ́ɩ́wa má wóllú.
2 Ɩ́ pɛ́ náŋá mɛ́, a cɩ́ɩ́nɛ náŋá cɩksɛ́.
Ɛ́ nɛ́ ká Kirisi wɩ́makɛ́ tɩŋɛ́.
3 Rɩ nɛ́ŋ púú tɩɩ makɛ óŋ, ká to óŋ, ʋʋ́ nyɩ́sʋ́ tɩɩ nɛ́.
4 Nɛrɔ wuu kɩ́ɛ́lʋ́ wɩ́'állɛ ná.
Rɩ ɓa wér mɔhɛ̃́ jʋɔsɛ́, rʋ́ʋ́ tɩŋ ɛ́ wɩ́ɛ́ jɩ́jʋɔsɛ, ká sɩ́ nɩɛ náŋa wɩ́ɛ́ bélú, rɩ́ɩ́ jɩ́jʋɔsɛ,
5 bee wɩ́ɛ́ nɛrɔ wuu wɩ́ɛ́ cɩ́ɩ́nʋ́ tɩɩ nɛ́.
6 Nɛrɔ ná ɓa há pí Wɩɩsɛ wɩ́ɛ́ aá kármʋ́, ʋ mɔhɔ̃́ rʋ́ʋ́ lɩ́sʋ́ ɓɩɛ aá pá nɛrɔ ná háá kármʋ́.
7 Ɩ́ sɩ́ɩ́wa tɩɩ nyɩ́sʋ́, ɓa wɩ Wɩɩsɛ mɔŋ.
Nɩbííno wuu há dú omo ná, ʋ nɛ́ rʋ́ʋ́ kʋŋ.
8 Rɩɩ tɩ́na oŋduulé ní ká nɩbinní wɩ́hɩɛ̃nɛ́, ɩɩ́ mʋ́ʋ́ kʋŋ nɩbinní wɩ́ɛ́ há ká sʋʋ nɛ́; amá nɛrɔ ná há dú Wɩɩsɛ Sabɩɩna wɩ́hɩɛ̃nɛ́, ʋʋ́ mʋ́ʋ́ kʋŋ Sabɩɩna wɩ́ɛ́ ná há ká mɩɩsɛ ná há waá tenni ní.
9 Ɩ́ sɩ́ lórá bɔl wɩ́were ɛɛ mɛ́; raá nɛ́ wɩ píé tá, ká rɩ́ tɛ́ŋ ko peri, a sɩ́ mʋ́ ná óŋ kʋŋ.
10 Ɛ́ wɩ́ɛ́, raá nɛ́ ná gbel, ɩ́ lo ráá a wɩ́were pá nɩɛ wuu, a ɔsɛ a wɩ́were kɩ́llɛ, a pá Zeezi laadííre, á maábináŋa.
Hatɩ́ŋnɩ́dɩlpʋʋsɔ́ rɩ́ cʋɔla
11 Ɩ́ ná pʋ́ŋsɩbíé há zéŋsó ɛ́; ŋ tɩɩ nɛ́sɛ nɛ́ ŋ kaa pʋ́ŋsɛ a pɛ́ɩ́wa.
12 Nɩɛ ná háá fɩ́kɩ́wa mɛ́ rɩ́ɩ́wa cónníwa pɛnɛ, ɓaá mákwɔ́ tɩɩ nɛ́, nɩbinní mí.
Ɓa tɩɩ lá Zeezi wɩ́ɛ́ dí rí, káá fá, rɩ́ nɩɛ sɩ́wɔ́ wálmʋ́, Kirisi dagɛsɛ́ wɩ́ɛ́.
13 Ɛ́ nɩɛ tɩɩ sɩɛ́ há cónníwó pɛnɛ, ɓa wɩ Wɩɩsɛ kíŋse náá tɩŋ; ɓa taŋá já rɩ́ɩ́wa cónníwa pɛnɛ, rɩ́wɔ́ nyʋ́nyʋ́kɛ, ɓa há ɛ́ɛ́ ɛ́ malla mɩ́nɩ́wa tɛŋ mɛ́ nɛ́.
14 Ŋ é sɩɛ́ waá ja rɩ́ŋ tɩŋ óŋ wuu wɩ́ɛ́ nyʋ́kɛ, raá Nyuutɩna Zeezi Kirisi há sʋ́wɛ́ dagɛsɛ́ ná daha, wɩ́ɛ́ rá.
Kirisi dagɛsɛ́ daha sʋʋ ná wɩ́ɛ́, dúníé nɩhɩ̃́ anɛ ʋ sʋ́wɔ́ rɛ́, ŋ sɩ́ɛ́ mɛ́, ŋ má nɛ, anɛ ŋ sʋ́wɔ́, dúníé sɩ́ɛ́ mɛ́.
15 Rɩɩ cókí pɛŋ rá to wɩ́fɩɛmɔ, rɩɩ wɩ cóké má rá to wɩ́fɩɛmɔ; ʋ ná há ká wɩ́fɩɛmɔ nɛ́ ká, rɩ́ Wɩɩsɛ bɩ́rsɩ́rá, ráá a nɩfɛ́lɛ́.
16 Nɩɛ ná wuu há sáŋɛ́, aá tɩ́ŋɩ́ŋ cáánɛ né, rɩ́ Wɩɩsɛ fɔ́wɔ́ susu, a pɔ́wɔ́ tɛŋfɩ́ɛ́l; ɓa rɩ́ Wɩɩsɛ nɩɛ wuu!
17 A pɔ́ zaa ká káá mʋ́ wuu, nɛ́ŋ wuu báá sɩ́ŋ wálmʋ́, Zeezi ní tɩ́ŋ, ɛ́ malla fʋgɩgɔrʋ nɛ́ ŋ tɛŋ mɛ́.
18 Maábináŋa, ráá Nyuutɩna Zeezi Kirisi hé bárka pɛ́ɩ́wa wuu!
Amɩɩ*!