Kirisi lárá tá, á tɩ́llɩ́rá tɩɩ
5
1 Kirisi há lárá tá, ʋʋ́ járá tɩ́llɩ́rá tɩɩ nɛ́.
Ɛ́ wɩ́ɛ́, ɩ́ ka wérí, ɩ́ sɩɛ́ báá sɩ́ɩ́wa tɩɩ píí hé yomí mí.
2 Ŋ é Pool, ŋ bʋ́lɔ́ aá pɛ́ɩ́wa:
Rɩɩ́wa lóó rɩ́wɔ́ cónníwa pɛnɛ, Kirisi há tʋ́mʋ́ ná pɛ́ɩ́wa, ʋ wuu tá yɔ́ɔ́ nɛ́.
3 Ká ŋ baa ha bʋl aá súúri:
Báálɔ ná wuu há lóé ɓa cókú pɛŋ, ʋ tɩ́na mɔhɔ̃́ rʋ́ʋ́ tɩŋ kíŋse ná wuu duóduó ní.
4 Ɩ́ nɩ́ɛ́ ná háá jɛɛ́ rɩ́ɩ́wa tɩŋ kíŋse ní, a a tékétéké Wɩɩsɛ sɩ́ɛ́ mɛ́, ɩ́ lɩ́sɩ́wa tɩɩ Kirisi mí ní ɛ́.
Ɩ́ sɩɛ́ gúl Wɩɩsɛ zílé ná mɛ́.
5 Á é kéŋ yɩɛla, rɩ Wɩɩsɛ sɩ́ bʋlɛ́ ráá ká tékétéké ʋ sɩ́ɛ́ mɛ́.
Ʋ nɛ́ á dɩ́dɛllɛ arɩ́ yardá, a tɩŋ Wɩɩsɛ Sabɩɩna dóé mí.
6 Rɩ nɛrɔ lá Zeezi dí, ʋ rɩ́rʋ́ a óŋ balá, rɩ tɩ́na cókú pɛŋ, rʋʋ wɩ cóké, ʋ ɛ́ to wɩ́ɩ́; óŋ ná wɩ́ɛ́ há fɩ́ɛ́mɔ́ nɛ́ ká yardá.
Yardá ná nɛrɔ háá ka, a cólli nɩɛ.
7 Ɩ́ fa púl wérí rí aá va, áŋ rɩ́ sɩɛ́ kɛ́rɩ́wa mɛ́ ɩ́ cɛ́, a báá wɩ taŋá tɩŋ?
8 Nyɛ wɩ́ɩ́ wɩ Wɩɩsɛ ná há yɩ́rɩ́wa lɩ́ɛ́.
9 Sɩbʋ́r* mʋɔ́ nɛ́ ɓaá hé dɩpɛ́ŋ míŋbuulé mí, ká ɓa wuu isi ŋmɛrɛ.
10 Ŋ á yardá, Nyuutɩna Zeezi yɩr mɛ́, rɩŋ rɩ́rɩ́wa wuu wɩ́bɩɩnɛ́ nɛ́ balá.
Amá Wɩɩsɛ sɩ́ bɛŋsɛ nɛrɔ ná há zʋ́ɛ́ aá vúkmi wɩ́ɛ́ ɩ́ sɩ́sɩɛrʋ, rʋʋ tɩ́na có rʋ́ʋ́ mɔ ɛrɛ́ má.
11 Maábináŋa, rɩŋ nɛ́ ha sɩ́ nɩɛ cúcónníwó pɛnɛ, bee yɩ́r mɛ́ rɛ́ sɩɛ́, ɓa baa wɩ́wálmɩ́ŋ?
Rɩ ɛ́ nɛ́, Kirisi dagɛsɛ́ daha sʋʋ ná wɩ́ɛ́ ŋ háá bʋlɛ́, ʋ báá fa wɩ nɛ́ŋ wuu míí wɛ.
12 Ŋ có rí nɩɛ ná wuu háá vúkmíwa kéne, rɩ́wɔ́ lɩ́ɩ́wa sɩɛrʋ, a férwó tɩɩ ɓóŋ.
13 Maábináŋa, Wɩɩsɛ há yɩ́rɩ́wa, ʋ sɩ́ɩ́wa ko tɩ́llɩ́wa tɩɩ nɛ́; ɩ́ sɩɛ́ sɩ́ tɩ́ŋtɩɩ ná káá ŋmɔwɛ nyɛlɔ, káá mɩŋ nɩbinní wɩ́hɩɛ̃nɛ́ sɩɛrʋ.
Amá ɩ́ tʋŋ aá pá náŋá arɩ́ cólle.
14 Wɩɩsɛ kíŋse ná wuu ʋ há máŋsɛ́ pá Moyizi, ɓa wuu lɛ́sɛ́ wɩ́ɩ́ balá sɩɛrʋ́ rɛ́.
Ɛ́ wɩ́ɩ́ nɛ́ ká:
«Cóllí nɩbínɔ́ŋɔ, anɛ ɩ há cóí tɩɩ ɛ́.»
15 Amá rɩɩ́wa nɛ́ dʋ́sɛ́ náŋá cʋ́cɔ́nnɛ, anɛ kaadíhuorúwa, ɩ́ pɔ́ɩ́wa tɩɩ mɛ́, ɩ́ sɩ́ ko zɔkɛ náŋá tenni.
Ɩ́ lo rí Wɩɩsɛ Sabɩɩna nɛ́ kánɩ́wa aá va
16 Ɩ́ nóú ná ŋ háá já rɩ́ŋ bʋl pɛ́ɩ́wa:
Ɩ́ tɩŋ Wɩɩsɛ Sabɩɩna cólle mí, ɛ́ nɛ́ rɩ́ɩ́wa sɩ́ nɩbinní wɩ́hɩɛ̃nɛ́ á.
17 Nɩbinní wɩ́hɩɛ̃nɛ́ cɩ́ Wɩɩsɛ Sabɩɩna wɩ́hɩɛ̃nɛ́ mɛ́, ká Sabɩɩna má wɩ́hɩɛ̃nɛ́ cɩ́ nɩbinní má wɩ́hɩɛ̃nɛ́ mɛ́.
Ɓa wɩ náŋá mɩ́ɩ́ hé; ɛ́ wɩ́ɛ́, ɩ́ wɩ́ɩ́wa wɩ́cólle wuó a.
18 Amá rɩ Wɩɩsɛ Sabɩɩna nɩ́ɩ́ tɩ́ɛ́sɩ́wa, kíŋse báá wɩ́ɩ́wa wo.
19 Nɩbinní wɩ́'állɛ sɩɛ́ wɩ féŋsé; ɓa nɛ́ ká:
nɩlɩɩlɩ́wɩ́ɛ́, busunnu wɩ́ɛ́, nyúzɔ́krɩ́wɩ́ɛ́,
20 venni cʋɔlɛ́, bɔmɩ́, nɩbɛ́rɔ, nanáárɩ́wɩ́ɛ́, sahaksɩ́, cɔwɩɩlɔ́, kapɔsɛ, cɩ́nɩ́ŋ dʋŋɔ arɩ́ cakɔ́,
21 sɩ́ɩ́, sɩnyɔɔ, dídaarɔ́, arɩ́ wɩ́ɛ́ ná náŋa há nɩhɩ̃́wɔ́.
Ɩ́ lo rɩ́ŋ baa ɓáánɩ́wa, anɛ ŋ há la sɩ́ɛ́ bʋ́lʋ́ pɛ́ɩ́wa ɛ́:
Nɩɛ ná háá a ɛ́ wɩ́ɛ́ duo mí, ɓa wɩ Wɩɩsɛ kuótɔ́ɔ́ ná sɩɛrʋ wuó zʋ.
22 Amá Wɩɩsɛ Sabɩɩna háá a wɩ́ɛ́ ná anɛ nɔnɔ,* ɓa nɛ́ ká:
cólle, satɔrɔ́, tɛŋfɩ́ɛ́l, nyamma, sawér, wɩ́wer'aasɛ, nɩtáŋnɛ, pɔrɛ́, arɩ́ wóllí tɩɩ kanɛ́.
23 Wɩɩsɛ kíŋse ná wɩ nyɛ wɩ́ɛ́ duo mí cɩ́nɛ́.
24 Nɩɛ ná wuu há lá Zeezi Kirisi wɩ́ɛ́ dí, ɓa nɩbinní sʋ́wɔ́.
Ʋ sʋ́wɔ́ rɩ́rʋ́ wɩ́jaalɛ́, arɩ́rʋ́ wɩ́hɩɛ̃nɛ́ wuu.
25 Wɩɩsɛ Sabɩɩna nɛ́ háá párá hiẽsó, á lo rʋ́ʋ́ tɩ́ɛ́sɩ́rá.
26 Á sɩ́ nyʋkɔ á, a sɩ́ náŋá nʋʋsɛ mɛ́ kɩ́ɛ́rʋ́, a sɩ́ náŋá ɓɩ́ɛ́ má hɩ́ɛ̃́nʋ́.