2 Kɔrɛŋtɛ 1

Bʋllɛ kɛnɔ ná Pool há pʋ́ŋsɛ́ pá

Kɔrɛŋtɛ tɩ́náwa

Cʋɔla

1 Ŋ Pool* há ká Zeezi Kirisi nɩtʋmɩ́* Wɩɩsɛ cólle mí, ŋ rɩ́rá maábinɔ́ŋɔ Timote* ní pʋ́ŋsɛ kɛnɔ né, a pá wɩcʋɔla púl* nɩɛ ná há mɩŋ Kɔrɛŋtɛ mɛ́, ɓa rɩ́ Wɩɩsɛ nɩɛ ná wuu há mɩŋ Akayi* tíé wuu mí.

2 Ráá Ana Wɩɩsɛ rɩ́rá Nyuutɩna Zeezi Kirisi pɛ́ɩ́wa bárka arɩ́ tɛŋfɩ́ɛ́l!

Pool bárkɛ Wɩɩsɛ

3 Á bɩ́rá Nyuutɩna Zeezi Kirisi Ana Wɩɩsɛ mɛ́. Ʋ ká Ana ná sɩɛrʋ há wéró, a a Wɩɩsɛ ná há ɛ̃ nɩɛ naasɛ dúóre, wɩ́ɩ́ wuu mí. 4 Á wɩɩla wuu sɩɛrʋ, ʋ nɩ́ɩ́ dúórírá naasɛ, a makɛ ráá má wólli nɩɛ ná háá ná wɩɩla duó wuu, naasɛ dúóri, arɩ́ nadúóriwɩ́ɛ́ ná ʋ há píé dúórírá naasɛ. 5 Á há ná wɩɩla kɩ́ŋkáŋ aá mɔ ɛ́, Kirisi wɩ́ɛ́, ʋ má dúórírá naasɛ aá mɔ ɛ́ nɛ́. 6 Raá nɩ́ɩ́ ná wɩɩla, ɩ́ naasɛ dúóre rɩ́rɩ́wa laatɛ́ wɩ́ɛ́ nɛ́. Rɩ Wɩɩsɛ nɛ́ dúórírá naasɛ, ráá má wóllíwa naasɛ dúóri wɩ́ɛ́ nɛ́; a makɛ rɩ́ɩ́wa ka nyamma, a saŋ wɩɩlawa ná tɩɩ tɩɩ, á háá néé. 7 Á kéŋ yɩɛla wérí ɩ́ wɩ́ɛ́. Á ɩ́ɔ̃́ zɩŋ rɩ́ wɩɩlawa ná á háá néé ní, ɩ́ má nɩ́ná; ɛ́ wɩ́ɛ́, ɛ́ há dúórírá naasɛ, ɛ́ nɛ́ sɩ́ dúóríwa má naasɛ.

8 Maábináŋa, á sɩɛ́ já rɩ́ɩ́wa zɩŋ ráá ná wɩɩla wérí, Azi dɩtɩ́llɛ. Ɛ́ wɩɩla fa dúkrá nɛ́sɛ, á wɩ bɩ́ɩ́nɛ́ raá sɩ́ wa má tɩɩ. 9 Á fa nóó rɩ ɓa ɓʋ́rá tenni. Ɛ́ ɔ́ɔ́ á wɩ́rá tɩɩ dóé mí yéllé, ká pírá tɩɩ yelli Wɩɩsɛ ná háá ílli sʋsɛ mɛ́ nɛ́. 10 Wɩɩsɛ nɛ́ sɩɛ́ lárá tá. Ʋ nɛ́ sɩɛ́ báá ha sɩ́ lárá tá, ɛ́ sʋʋ duo nɛ́sɛ mɛ́. Á kéŋ ɛ́ yɩɛla rʋʋ ha sɩ́ lárá tá. 11 Ɩ́ má pɛ́rá mɛ́, a sʋl Wɩɩsɛ párá. Wɩɩsɛ sɩ́ saŋ nɩkana wɩsʋlɔ́, ká dí zilé párá, a makɛ rɩ́ nɩkana bárkʋ́ á wɩ́ɛ́.

Wɩ́ɩ́ ná há tɛ Pool bɩ́rsʋ́ sabɩɩna, a bʋlʋ́ báá wɩ Kɔrɛŋtɛ mʋ́

12 Wɩ́ɩ́ ná há tɛ á nyʋ́nyʋ́kɛ, á sabɩɩna dí ɛ́ wɩ́ɩ́ dáŋsɩ́ɛ́; ʋ nɛ́ ká: Á kéŋrá tɩɩ wérí dúníé mí, a wɩ busunnu ɓákɛ́, Wɩɩsɛ sɩ́ɛ́ mɛ́. Ɩ́ rɩ́ nɛ́ sɩɛ́ á ɔsɛ káŋrá tɩɩ wérí wuu. Ʋ ɛ́ lɛ́ Wɩɩsɛ zilé ná há pɛ́rá mɛ́ nɛ́, ʋ wɩ nɩbííne zɩmɛ́ lɩ́ɛ́. 13 Á kɛnnɛ ná á há pʋ́ŋsɛ́ pɛ́ɩ́wa, á wɩ wɩ́ɩ́ nɔ́ŋ wɩ́ɛ́ bʋ́lɛ́ ráŋ. Ɩ́ há kármɩ́wɔ́ ná, a nɩ́wɔ́ mʋ́ʋ́la, ɓa nɛ́ á pʋ́ŋsɛ. Wɩ́ɩ́ né má sɩɛ́, ŋ kéŋ yɩɛla rɩɩ́wa sɩ́ nʋ́ʋ́ mʋ́l peri. 14 Mʋ́l néé mí, ɩ́ nʋ́ʋ́ mʋ́l kɩɛsʋ́ rɛ́. Ʋ nɛ́ ká: Nyuutɩna Zeezi kal koolí, ɩ́ sɩ́ nyʋ́nyʋ́kɛ, á wɩ́ɛ́; ká ráá má nyʋ́nyʋ́kɛ, ɩ́ wɩ́ɛ́.

15 Ɛ́ wɩ́ɩ́ yardá nɛ́ fa ŋ ka, a faá ja rɩ́ŋ la sɩ́ɛ́ kóíwa rɩ́, rɩ́ɩ́wa ná wér bʋllɛ. 16 Ŋ faá já rɩ́ŋ ko tɩ́ŋɩ́wa dɩhɩ̃́ nɛ́ a daarɛ mʋ́ Masɩdʋanɛ.* Ká rɩŋ bɩ́rɔ́ lɛ Masɩdʋanɛ aá ko, rɩ́ŋ baa tɩ́ŋɩ́wa dɩhɩ̃́, rɩ́ɩ́wa ja mʋɔ́ sáŋɩ́ŋ mɛ́, rɩ́ŋ daarɛ peri Ziide. 17 Ŋ sɩɛ́ fa há sɩ́ŋ já rɩ́ŋ kóíwa dɩhɩ̃́ ɛ́, ŋ wɩ bɩ́ɩ́nɛ́ nɛ́ ká bʋl ɛ́? Ŋ sɩɛ́ háá ko bʋlɩ́ŋ já rɩ́ŋ a wɩ́ɩ́ é, ɩ́ bɩ́ɩ́nɔ́ rɩ nɩbinní ní ŋ tʋ́tʋŋ, anɛ nɩɛ wuu, a bʋlɛ́ «óó» ká baa bʋlɛ́ «aɩ́» má, mʋ́l ná tɩɩ tɩɩ mɛ́?

18 Ɩ́ ɩ́ɔ̃́ rɩ́ Wɩɩsɛ ká taŋá, ʋ wʋ́ʋ́ nʋɔ hár bɩrɛ, ɩ́ sɩɛ́ zɩŋ rɩ́ wɩ́ɛ́ ná á há bʋ́lɛ́ pɛ́ɩ́wa to «óó» rɩ́ «aɩ́» nɛ́ hé náŋá mɛ́. 19 Wɩɩsɛ Bio Zeezi Kirisi ná wɩ́ɛ́, ŋ rɩ́ Sila rɩ́ Timote há bʋ́lɛ́ pɛ́ɩ́wa, ʋ to «óó» rɩ́ «aɩ́». Amá «óó» dʋŋɔ nɛ́ mɩ́nʋ́ mɛ́. 20 Wɩɩsɛ há tá nʋɔ rʋ́ʋ́ a wɩ́ɛ́ ná wuu párá, ɓa «óó» ní mɩŋ Zeezi Kirisi mí. Á háá bɩ Wɩɩsɛ mɛ́ ko tenni ká bʋlɛ́ «Amɩɩ*» ná má, Zeezi Kirisi mí ní á tɩŋ aá bʋl ɛ́, rɩ́ Wɩɩsɛ yɩr la píŋ. 21 Wɩɩsɛ tɩɩ nɛ́ sɩɛ́ ɛ́ɛ́, á rɩ́rɩ́wa wuu ka dóé, hiẽsó ná Kirisi há píé párá sɩɛrʋ. Ʋ nɛ́ lɩ́sɩ́rá, a cáksɩ́rá rɩ́ nɩɛ náŋá mɛ́, 22 a púú tɩ́llɛ malla hérá mɛ́. Ʋ púú Sabɩɩna* hérá sɩɛrʋ, ráá zɩŋ rʋ́ʋ́ sɩ́ párá oŋkana má.

23 Wɩɩsɛ káŋ dáŋsɩ́ɛ́. Rɩŋ nyɛ́ nyɩɛrʋ, ʋ́ʋ́ láŋ mɩɩsɛ. Rɩ́ wɩɩla sɩ́ɩ́wa pérú wɩ́ɛ́ nɛ́ tɛ́, ŋ wɩ bɩ́rɛ́ ko Kɔrɛŋtɛ ɛ́. 24 Á waá ja ráá fɩ́kɩ́wa mɛ́, ɩ́ yardá wɩ́'állɛ mɛ́, bee wɩ́ɛ́ ɩ́ yardá bɩ́ɔ́. Amá áá já ráá pɛ́ɩ́wa mɛ́ nɛ́, rɩ́ɩ́wa ná satɔrɔ́.