Kɛnɔ ná Pool há pʋ́ŋsɛ́ pá
Galasi tɩ́náwa
Cʋɔla
1
1,2 Ŋ é Pool* há ká Zeezi Kirisi rɩ́rʋ́ Ana ná há íllú sʋʋ mɛ́, nɩtʋmɩ́,* ká to nɩbííne nɩtʋmɩ́, ŋ nɛ́ pʋ́ŋsɛ kɛnɔ né aá pá wɩcʋɔla púlli* nɩɛ ná há mɩŋ Galasi* mí.
Ŋ rɩ́rá maábináŋa, Zeezi laadííre ná há mɩŋ rɛɛ́, á wuu ní pʋ́ŋsɛ́.
3 Ráá Ana Wɩɩsɛ rɩ́rá Nyuutɩna Zeezi Kirisi pɛ́ɩ́wa bárka arɩ́ tɛŋfɩ́ɛ́l!
4 Kirisi púú tɩɩ pá, ɓa ɓʋ́ʋ́, á wɩ́bɔmɔ wɩ́ɛ́ nɛ́, rʋ́ʋ́ lárá tá dúníé né há bɔ́mɔ́ nɛ́sɛ mɛ́.
Ʋ ɛ́ sɩɛ́ kárá Ana Wɩɩsɛ cólle mí ní;
5 ʋ nɛ́ tɛ píŋ, kál rɩ́ kál wuu.
Amɩɩ*!
Labaarɩwero ní balá léŋ
6 Wɩ́ɩ́ rɛ́ gɩ́rɩ́ŋ.
Ʋ há wɩ dáánɛ́, ká ɩ́ bɩ́rɩ́wa har yakɛ nɛrɔ ná há tɩ́ŋ Kirisi zilé mí yɩ́rɩ́wa, ká bɩ́rɩ́wa sɩ́ɛ́ hé labáárɩwero nɔ́ŋɔ mɛ́.
7 Labáárɩwero nɔ́ŋɔ sɩɛ́ báá toó; nɩ́ɛ́ rɛ́ taŋa mɩnɛ́ aá yéŋŋíwa, aá ja rɩ́wɔ́ bɩ́rsɛ Kirisi Labaarɩwero ná.
8 Ɛ́ wɩ́ɛ́, rɩ nɛ́ŋ kúó bʋl labáárɩwérí oro wɩ́ɛ́ pɛ́ɩ́wa, rʋʋ ná wɩ́ɛ́ á há bʋ́lɛ́ pɛ́ɩ́wa rá, raá tɩɩ nɛ́, rɩ bána nyúú malɩ́ka nɛ́, rɩ́ Wɩɩsɛ zɔkɛ tɩ́na!
9 Á lá sɩ́ɛ́ bʋ́lʋ́ pɛ́ɩ́wa rɛ́, káŋ baa ha bɩrbʋ́lʋ́ tɩɩ tɩɩ nɛ́, aá pɛ́ɩ́wa mʋ́l néé mí:
Rɩ nɛ́ŋ kúó bʋl labáárɩwérí oro pɛ́ɩ́wa, rʋʋ tóú ná á há bʋ́lɛ́ ɩ́ laa dí, rɩ́ Wɩɩsɛ zɔkɛ tɩ́na!
10 Nyɛ mɛ́ sɩɛ́, ŋŋ́ ja nɩbííne sɩ́ɛ́ wér ní yáá, ŋŋ́ ja Wɩɩsɛ sɩ́ɛ́ wér ní?
Ŋ ɔ́ɔ́ aá ja nɩbííne satɔrɔ́ nɛ́?
Rɩŋ faá já rɩ́ nɩbííne sɩɛrʋ nɛ́ tɔrɛ, ŋ fa wɩ Kirisi tʋtʋ́nnʋ́ a.
Pool há cɩ́ ɛ́wa, a a Zeezi nɩtʋmɩ́
11 Maábináŋa, ŋŋ́ já rɩ́ɩ́wa zɩŋ rɩ́ Labaarɩwero ná ŋ háá bʋlɛ́, ʋ wɩ nɩbíŋ lɩ́ɛ́.
12 Nɩbíŋ ra wʋ́ʋ́ píé páŋ, nɩbíŋ ra wʋ́ʋ́ píé kármɩ́ŋ.
Amá Zeezi Kirisi ní mákʋ́ páŋ.
13 Ŋ fa há mɩŋ Zuwifiwa* wɩcʋɔlɔ́ ŋmɛ́nɔ mɛ́, a nɛ nɩɩsɔ ná duo mí, ɩ́ nʋ́ʋ́ wɩ́ɛ́ rɛ́.
Ŋ fa héŋ dóé wuu, aá ja Wɩɩsɛ púl* nɩɛ zɔkɛ́ nɛ́, a gʋɔrɛ aá wálmɩ́wɔ́.
14 Ŋ fa ɛ̃ Zuwifiwa wɩcʋɔlɔ́ ŋmɛ́nɔ wɩ́ɛ́, a kɩ́llɩ́ŋ wonáŋa ná wuu há ká Zuwifiwa.
Ŋ fa kéŋ kajáŋdaarɔ́, á naabálwa kusúŋ wɩ́ɛ́ mɛ́.
15 Wɩɩsɛ sɩɛ́ há kéŋ zilé, ʋ lɩ́sɩ́ŋ, rɩŋ ha mɩ́nɩ́ŋ maá luoru mí ní, a yɩ́rɩ́ŋ rɩ́ŋ ko tʋŋ pɔ́ʋ́.
16 Wɩɩsɛ há kúé cólli, a mákʋ́ Bio páŋ, rɩ́ŋ bʋ́lʋ́ Labaarɩwero wɩ́ɛ́ pá nɩɛ ná há to Zuwifiwa, ŋ wɩ nɩbíŋ wuu rɩ́ mʋ́ɛ́, rʋ́ʋ́ cáánɩ́ŋ.
17 Ŋ wɩ nɩɛ ná má há láŋ sɩ́ɛ́, a a nɩtʋmɛ́ a mɩŋ Zerizalɛmɛ* mɛ́, rɩ́ mʋ́ɛ́.
Ŋ taŋa ísí kɩ́kɛ́lɛ́ a mʋ́ Arabi tíé ní, ká bɩrko Damaasɛ.
18 Bɩŋsɛ botoro ní dáárɛ́, káŋ mʋ́ Zerizalɛmɛ, a zɩŋ Pɩɛrɛ,* a kénú dɩhɩ̃́ tápʋlɛ fí rí bɔmmʋ́ɔ́.
19 Amá ŋ wɩ nɩtʋmɛ́ ná oro wuu néé, Nyuutɩna Zeezi maábio Zakɛ* dʋŋɔ nɛ́, ŋ ná.
20 Wɩ́ɛ́ nyáŋ ŋ há pʋ́ŋsɛ́ aá pɛ́ɩ́wa, ɓa ká wɩ́táŋsɛ́ rɛ́; Wɩɩsɛ sɩ́ɛ́ mɛ́, ŋ wɩ nyɩɛrʋ́ nyɛ.
21 Ɛ́ har rɩ́ mɛ́, ŋ ísó mʋ́ Siiri* rɩ́ Silisi dɩtɩ́llɛ tɔ́nɛ.
22 Ziide tíé, wɩcʋɔla púlli* ná há mɩŋ Kirisi mí, sɩɛ́ fa ha wɩ́ŋ ɛ̃.
23 Ɓa taŋa dé nɛ rɩ ɓa sɛ́:
«Nɛrɔ ná fa háá wálmɩ́rá nɛ́ zaá bʋl yardá Labaarɩwero ná, ʋ fa háá já rʋ́ʋ́ zɔkɛ wɩ́ɛ́.»
24 Ká ɓaá bɩ Wɩɩsɛ mɛ́, ŋ wɩ́ɛ́.