Pool mʋ́ Zerizalɛmɛ dʋ́ŋdʋ́ʋ̃́ céŋzeno
2
1 Bɩŋsɛ fí rí baná há dáárɛ́, ŋ rɩ́ Barnabasɛ ísó mʋ́ Zerizalɛmɛ.
Ŋ pɛ́ ka Tiiti tɩ́ŋɩ́ŋ tɩɩ mɛ́.
2 Wɩɩsɛ nɛ́ ɛ́ɛ́, ŋ zɩŋ rʋ́ʋ́ mɔhɔ̃́ rɩ́ŋ mʋ́ ráŋ, ŋ mʋ́.
Ŋ sɩɛ́ máŋsɛ Labaarɩwero ná, ŋ há bʋ́lɛ́ aá pá nɩɛ ná há to Zuwifiwa wɩ́ɛ́ pá Zeezi laadííre.
Ŋ rɩ́wɔ́ sɩ́dííre ní cíké, ŋ máŋsɛ ɛ́ pɔ́wɔ́, a makɛ rɩ́ŋ fól wuu yʋ́ɔ́sɛ, rɩ́rɩ́ŋ zaa yʋ́ɔ́sɛ ná, wuu sɩ́ yɔ́ɔ́ tá.
3 Tiiti tɩɩ há ká Gɩrɛkɛ, ɓa wʋ́ʋ́ fɩ́kɛ́ rʋ́ʋ́ cókú pɛŋ;
4 maábináŋa yɩryɔ́ɔ́wa ná há mɩ́ŋrá sɩɛrʋ, ɓa é fa có ɛ́ nɛ́.
Ɓa lʋ́ɔ́rɔ́ zʋʋ kúósírá sɩɛrʋ, rɩ́wɔ́ kɩ́ɛ́lɩ́rá nɛ́; rɩ́wɔ́ ná ɛ́, á rɩ́ Zeezi Kirisi há ká óŋ balá, á wɩ kusúŋ wɩ́ɛ́ tɩŋ, ká tɩ́llɩ́rá tɩɩ.
Ɓa faá já rɩ́wɔ́ hérá yomí mí ní báá.
5 Á wɩ sáŋɛ́ pɔ́wɔ́ mʋɔ́ má, ká vɛ́wɔ́ máŋsɛ wuu, a makɛ rɩ́ Labaarɩwero taŋá ná sɩ́ yʋ́ksʋ́, ɩ́ sɩ́sɩɛrʋ.
6 Sɩ́dííre ná há mɩ́ŋwɔ́ sɩɛrʋ, (ɓa há kɔ́ʋ́ ná rá ŋ bíbel, Wɩɩsɛ é wɩ nɩbííne caksɛ;) ɛ́ sɩ́dííre há mɩ́ŋwɔ́ sɩɛrʋ, ɓa wɩ wɩ́fɛ́lʋ́ wuu mákɛ́ páŋ.
7 Ɓa taŋa nóó rɩ Wɩɩsɛ tʋ́mɩ́ŋ nɛ́, rɩ́ŋ bʋl Labaarɩwero ná pá nɩɛ ná há to Zuwifiwa, ká tʋŋ Pɩɛrɛ má, rʋ́ʋ́ má bʋ́lʋ́ pá Zuwifiwa.
8 Wɩɩsɛ dóé ná há tʋ́ŋ Pɩɛrɛ Zuwifiwa rɩ́, ɛ́ dóé ní tʋ́mɩ́ŋ má, nɩɛ ná há to Zuwifiwa rɩ́.
9 Zakɛ* rɩ́ Pɩɛrɛ* rɩ́ Zaŋ* nɛ́ wɩcʋɔla púl* nɩɛ pii mákwɔ́ nɩhɩɛ̃́sɛ.
* Ɓa nóó rɩ Wɩɩsɛ zílíŋ rí, a pi ɛ́ tʋtʋmɩ́ páŋ.
Ɓa kánɩ́ŋ rɩ́ Barnabasɛ héwó sɩɛrʋ, á wuu pii hé balá.
Ɓa sɛ́ ráá mʋ́ tʋ́tʋŋ nɩɛ ná há to Zuwifiwa sɩɛrʋ, ká rɩ́wɔ́ má mʋ́ tʋ́tʋŋ Zuwifiwa sɩɛrʋ.
10 Wɩ́ɩ́ ná balá ɓa há píé sʋ́lrá nɛ́ ká:
«Ráá sɩ́wɔ́ sɩɛrʋ summe mí sʋ́llʋ́.»
Ŋ sɩɛ́ á ɛ́ nɛ́, arɩ́rɩ́ŋ sɩɛrʋ wuu.
Pool bʋ́l Pɩɛrɛ, ʋ há wɩ wérí ɛ́ɛ́ Aŋtɩɔsɛ mɛ́
11 Pɩɛrɛ há kó Aŋtɩɔsɛ, ŋ dé cɩ́nʋ́ sɩ́ɛ́ mɛ́ nɛ́ a bʋ́lʋ́ wérí, ʋ há wɩ wérí ɛ́ɛ́ wɩ́ɛ́.
12 Tɛ́ŋ ná mɛ́ Zakɛ fa há wɩ nɩɛ tʋ́mɛ́ ɓa ko Aŋtɩɔsɛ, Pɩɛrɛ faá dí ɓɩɛ, nɩɛ ná há to Zuwifiwa dɩhɩ̃́.
Amá Zakɛ nɩtʋmɛ́ há kúé, ʋ lɩ́sʋ́ tɩɩ ɓa mɛ́, ʋ rɩ́wɔ́ báá wɩ ɓɩɛ́ dí, ʋ háá fá Zuwifiwa.
13 Zuwifiwa ná náŋa há mɩŋ ráŋ, má cɛl Pɩɛrɛ mɛ́, a má káŋwɔ́ tɩɩ kʋ́ʋ́rɛ, a sɩɛ́ pɛ́ pɔsɛ Barnabasɛ má héwó nʋŋmɔ́ŋyɔ́wɩ́ɛ́ ná mɛ́.
14 Ŋ nóó rʋʋ ɛ́ to taŋá, Labaarɩwero bʋlɛ́ mɛ́.
Ɛ́ nɛ́ ŋ bʋ́lʋ́ rɩ́ ɓa wuu sɩ́ɛ́ mɛ́ bʋlɛ́:
«Ɩ nɛ́, ɩ há ká Zuwifi, káá a, anɛ ɩ to Zuwifi, a wɩ Zuwifiwa wɩ́'állɛ́ a.
Beé mí sɩɛ́, ɩ fɩ́fɩkɛ nɩɛ ná há to Zuwifiwa mɛ́, rɩ́wɔ́ ɩ́'a Zuwifiwa wɩ́'állɛ?
Zuwifiwa rɩ́ nɩɛ ná há to Zuwifiwa wuu
tɩ́ŋ yardá dʋŋɔ mɛ́ nɛ́, aá ná laatɛ́
15 «Á é ká Zuwifiwa nɛ́, ɓa lʋ́lrá ɛ́ nɛ́.
Á to wɩ́bɔŋ'áárá, anɛ nɩɛ ná há to Zuwifiwa há ká wɩ́bɔŋ'áárá ɛ́.
16 Á sɩɛ́ ɩ́ɔ̃́ rɩ́ nɩbíŋ wɩ Wɩɩsɛ kíŋse* ná Moyizi* há pʋ́ŋsɛ́ mɛ́ wuo tɩŋ, aá a tékétéké Wɩɩsɛ sɩ́ɛ́ mɛ́, rɩ Zeezi Kirisi laadí dʋŋɔ mɛ́ rá.
Ɛ́ nɛ́ á má la Zeezi Kirisi dí, a makɛ ráá tɩŋ ɛ́ mɛ́ nɛ́, a a tékétéké.
Rɩ nɩbííno tɩ́ŋ kíŋse ná Moyizi há pʋ́ŋsɛ mɛ́, ʋ wɩ tékétéké wuó a.
17 «Á sɩɛ́ há có raá tɩŋ Kirisi mí ní, a a tékétéké Wɩɩsɛ sɩ́ɛ́ mɛ́, raá nɛ́ sɩɛ́ báá a wɩ́bɔmɔ, Kirisi ní tɛ wɩ́ɩ́?
Aɩ́, ɛ́ rá!
18 Wɩɩsɛ kíŋse ná Moyizi há pʋ́ŋsɛ́, ŋ vɛɛ tá, rɩŋ nɛ́ báá bɩ́rɛ́ mʋ́ aá tɩ́ŋwɔ́, ʋ ɛ́ ká ŋ héŋ tɩɩ wɩ́bɔmɔ ɛɛ mɛ́ nɛ́.
19 Ŋ tɩ́ŋ Wɩɩsɛ kíŋse ná mɛ́, ɓa ɓʋ́ŋ, ŋ sʋwɛ ká tá ɛ́ kíŋse wɩ́'állɛ, ká makɛ rɩ́ŋ híhiẽsi Wɩɩsɛ yɩr mɛ́.
20 Ŋ rɩ́ Kirisi ní ɓa ɓásɛ ɓʋ́, dagɛsɛ́* daha.
Ɛ́ wɩ́ɛ́, rɩŋ nɩ́ɩ́ hiẽsé, ŋ rá waá hiẽsi, Kirisi níí híẽ́síŋ mí.
Mʋ́l néé mí, rɩŋ nɩ́ɩ́ hiẽsé tɛŋnamɩɛ sɩɛrʋ má, ŋ hiẽsó lɛ́ yardá ná, ŋ há kené rɩ́ Wɩɩsɛ Bio ní.
Wɩɩsɛ Bio ná há cóŋ, a púú mɩɩsɛ lenni sʋʋ ŋ wɩ́ɛ́.
21 Ŋ wɩ Wɩɩsɛ zilé ná vɛ́ɛ́; bee wɩ́ɛ́ rɩ nɩbíínó tɩŋ kíŋse ná mɛ́ nɛ́, rɩ́ɩ́ a tékétéké Wɩɩsɛ sɩ́ɛ́, Kirisi sʋʋ ná ká yɔ́ɔ́ nɛ́.»