2
1 Ɛ́ nɛ́ tɛ, ŋ wɩ́ɩ́wa dɩhɩ̃́ kúé, rɩ́ŋ háá a rɩ́ɩ́wa sɩɛrʋ baa zɔkɛ.
2 Rɩŋ ɔ́ɔ́ zɔ́kɩ́wa sɩɛrʋ, áŋ rɩ́ sɩɛ́ báá áá tɔ́rɩ́ŋ má sɩɛrʋ?
Rɩɩ́wa nɩɛ ná ŋ há ɛ́ɛ́ zɔ́kɩ́wa sɩɛrʋ rá!
3 Wɩ́ɩ́ ná há tɛ ŋ pʋ́ŋsɛ nyɛ kɛnɔ pɛ́ɩ́wa, ŋ waá ja rɩ́ŋ kóíwa dɩhɩ̃́, ɩ́ nɩɛ ná há mɔhɛ̃́ rɩ́ɩ́wa a rɩ́ŋ sɩɛrʋ tɔrɛ, rɩ́ɩ́wa nɛ́ a rɩ́ŋ sɩɛrʋ zɔkɛ.
Ŋ sɩɛ́ ɩ́ɔ̃́ arɩ́ taŋá, rɩŋ sɩɛrʋ tɔ́rɔ́, ɩ́ má wuu sɩɛnnɛ tɔ́rɔ́ nɛ́.
4 Ŋ pʋ́ŋsɩ́wa mɛ́, káŋ tɛŋ wɩ́wáásɛ nɛ́, arɩ́ sazɔkɔ́ rɩ́ sɩ́mɩɩrʋ.
Ŋ sɩɛ́ wɩ pʋ́ŋsɛ́ aá ja rɩ́ɩ́wa sɩɛnnɛ zɔkɛ nɛ́, amá rɩ́ɩ́wa ná ɛ́ ná, ŋ há cóíwa nɛ́.
Hé nɛrɔ ná há á wɩ́ɩ́ zɔkɛ suúri
5 Rɩ nɛ́ŋ rɩ́ á sazɔ́krɩ́wɩ́ɩ́, ŋ dʋŋɔ sɩɛrʋ ra wɩ zɔ́kɛ́, ɩ́ má náŋa sɩɛnnɛ zɔ́kɔ́ rɛ́.
Bʋl daarɛ́ há wɩ weri, rɩ ɛ́ rá, ŋ bʋ́lɩ́wa má wuu sɩɛnnɛ zɔ́kɔ́ rɛ́.
6 Ʋ yɛ́rɛ́ nɛ́ ká, ɩ́ sɩɛrʋ nɩkana há ɛ́ɛ́, tɩ́na ná wɩɩla.
7 Amá mʋ́l néé mí, ɩ́ hóú suúri, a aa dúórú naasɛ, rʋ́ʋ́ sɩɛrʋ sɩ́ zɔ́kɩ́ daarɛ, rʋ́ʋ́ báá sɩ́ yɩɛla kánʋ́.
8 Ŋ sɩɛ́ sʋ́lɩ́wa rɛ́, ɩ́ aa makɛ rɩ́ tɩ́na zɩŋ rɩ́ɩ́wa cóú rí.
9 Ŋ kɛnɔ ná pʋ́ŋsɛ mʋ́l nɛ́ ká:
Ŋŋ́ já rɩ́ŋ mɩ́lɩ́wa ná, ɩ́ɩ́ tɩ́ŋɩ́ŋ wɩ́máŋsɛ ná wuu rí?
10 Rɩɩ́wa hé nɛrɔ wɩ́bɔmɔ suúri, ŋ má hé tɩ́na suúri rí.
Ká wɩ́ɩ́ ná suúri ŋ há héé, rɩŋ nɛ́ hé wɩ́ɩ́ suúri é, ɩ́ wɩ́ɛ́ nɛ́ ŋ hé suúri, Kirisi sɩ́ɛ́ mɛ́.
11 Ŋ waá ja rɩ́ Sɩtaanɛ* wóllírá; á ʋ́ʋ̃́ wɩ́kanɛ́ wuu ní.
Pool lɛ́ Tɩrɔwasɛ mɛ́, a mʋ́ Masɩdʋanɛ
12 Ŋ há kó Tɩrɔwasɛ rɩ́ŋ bʋl Kirisi Labaarɩwero ná pá nɩɛ, ŋ nóó rɩ Nyuutɩna wúri ŋmɛ́nɔ páŋ, rɩ́ŋ tʋŋ tʋtʋmɩ́ rɛ́ ráŋ.
13 Amá ŋ sabɩɩna wɩ dɩbalá pɩ́nɛ́, ŋ há wɩ́ŋ maábinɔ́ŋɔ Tiiti néé.
Ɛ́ nɛ́ ŋ cʋɔlɛ Tɩrɔwasɛ nɩɛ, ká col Masɩdʋanɛ.
Á dóé lɛ́ Zeezi Kirisi ní
14 Á bɩ Wɩɩsɛ mɛ́, ʋ há tɩ́ŋ Kirisi mí a, á zʋ ballɩ́ nɩɛ sɩɛrʋ, ká tɩ́ŋrá mɛ́ a, Kirisi zɩmɛ́ sɔ́ŋ nɛ tulaalé, a la dɩhɩ̃́ wuu.
15 Á ɓɩɛ́na ká tulaalé ná sɔ́ŋ há wéró ní, Kirisi pii pá Wɩɩsɛ.
Á kéŋ sɔ́ŋ ɛ́ nɛ́, nɩɛ ná Wɩɩsɛ há lɛ́ɛ́ tá sɩɛrʋ, a ka sɔ́ŋ ɛ́, nɩɛ ná má háá yʋ́ksɛ́ sɩɛrʋ.
16 Nɩɛ ná háá yʋ́ksɛ́ rɩ́, ʋ ká sɔ́ŋ ná há sʋ́ɔ́rɛ́ aá ɓʋ́ʋ́sɩ́wɔ́ nɛ́; ká nɩɛ ná Wɩɩsɛ há lɛ́ɛ́ tá é rɩ́, ʋ ká sɔ́ŋ ná háá pɔ́wɔ́ hiẽsó ní.
Áŋ rɩ́ sɩɛ́ wo nyɛ wɩ́ɩ́ aá a?
17 Á wɩ Wɩɩsɛ wɩ́bʋlɛ ná píé aá va yɛlɩ́, anɛ nɩɛ ɓɩkana háá a ɛ́.
Amá Wɩɩsɛ tɩɩ nɛ́ há tʋ́ŋrá, áá bʋl wɩ́táŋsɛ nɛ́, ʋ tɩɩ sɩ́ɛ́ mɛ́, anɛ Kirisi tʋtʋnna.