Á ká nʋtʋŋfɛlɔ tʋtʋnna nɛ́
3
1 Ɛ́ sɩɛ́ ká, áá járá baa mákrá tɩɩ nɛ́?
Nɩɛ náŋá ja kɛŋpʋ́ŋsɛ nɛ́, rɩ́wɔ́ kaa ko mákwɔ́ tɩɩ cáánɩ́wa, ɛ́ rá má, rɩ́ɩ́wa nɛ́ pʋ́ŋsɛ kɛnnɛ, a mákwɔ́ cáánɛ.
Á máá jɔ́wɔ́ rɛ́?
2 Ɩ́ nɛ́ kárá é kɛnnɛ, a pʋ́ŋsɩ́rá sɩɛnnɛ, nɩɛ wuu zɩŋ aá karmɛ.
3 Ʋ ká nyaamɩ́, ɩ́ nɛ́ ká kɛnɔ ná Kirisi há pʋ́ŋsɛ́, a tɩ́ŋrá Labaarɩwero bʋlɛ́ mɛ́.
Ʋ sɩɛ́ wɩ kɛŋpʋ́ŋsɛ dawie ní kené pʋ́ŋsɛ, ʋ kéŋ Wɩɩsɛ ná há wómmó Sabɩɩna nɛ́ pʋ́ŋsɛ.
Ʋ sɩɛ́ báá wɩ pʋ́ŋsɛ́ tá dɔ́wɩ́pɛ́rsɛ daha nɛ́, amá ʋ pʋ́ŋsɔ́ hé nɩbííne sɩɛnnɛ nɛ́.
4 Á wɩ bʋ́lɛ́ káá fá, á tɩ́ŋ Kirisi mí, a ka Wɩɩsɛ yardá.
5 Á sɩɛ́ wɩ wo ráá bʋlɛ́ ráá tɩɩ dóé mí ní, á wólli nyɛ wɩ́ɩ́ a a.
Amá á wólle wuu lɛ́ Wɩɩsɛ nɛ́.
6 Wɩɩsɛ nɛ́ párá wólle, á bɩrmɛ nʋtʋŋfɛlɔ* tʋtʋnna.
Ɛ́ nʋtʋmɛ* to Wɩɩsɛ kíŋse óŋ, ʋ kɔ́ʋ́ Sabɩɩna óŋ rí.
Kíŋse ná éé ɓʋ́ nɛ́, ká Sabɩɩna wɩ́ɛ́ pɩ́pá hiẽsó.
7 Ɓa fa pʋ́ŋsɛ kíŋse ná háá ɓʋ́ɛ́, a hé dɔ́wɩ́pɛ́rsɛ daha nɛ́, ká Wɩɩsɛ píŋ ha nyɩɩsɛ ɛ́ tɛ́ŋ mɛ́.
Moyizi* há lá ɛ́ kíŋse aá ko, ʋ sɩ́ɛ́ wuu dé tʋ́tʋl nɛ́ pólpól, aá cuoli Ɩzɩrayɛl nɩɛ sɩ́ɛ́, ɓa wʋ́ʋ́ wuó bel má tɩɩ; ká ʋ sɩ́ɛ́ cuolé ná to wɩ́dáánɛ́.
8 Wɩɩsɛ píŋ cuolé ná há kíl Sabɩɩna, nɛ́ sɩɛ́ kɩ́ɛ́ wuu.
9 Rɩ omo ná há pí zɔ́krɛ aá pá nɩɛ píŋ ní mɔhɩ̃́ nyɛ, omo ná há ɛ́ɛ́ nɩbííne a tékétéké Wɩɩsɛ sɩ́ɛ́ mɛ́, píŋ ní kɩ́ɛ́.
10 Ɛ́ wɩ́ɛ́, dʋ́ŋdʋ́ʋ̃́ píŋ ná tʋlɛ́ dé to óŋ wuu, píŋ ɓɩzeno ná há kúé lɔ́ʋ́ mɛ́, ʋ tʋlɛ́ laka.
11 Rɩ omo ná há waá dáánɛ nɛ́ fa kéŋ píŋ, omo ná háá dáánɛ́, a waá daarɛ nɛ́ kéŋ píŋ wuu.
12 Á há kéŋ ɛ́ wɩ́ɩ́ yɩɛla nɛ́ tɛ, á wɩ wɩ́ɩ́ fá.
13 Á wɩ Moyizi nɩhɛ̃́.
Ʋ fa pí pɛ́nɛ nɛ́ tɔ́ʋ́ sɩ́ɛ́ mɛ́, rɩ́ píŋdaarɩ́ ná tʋlɛ́ sɩ́ nyɩ́ɩ́sʋ́, rɩ́ Ɩzɩrayɛl nɩɛ nóú tokó.
14 Amá Ɩzɩrayɛl nɩɛ ná sɩɛrʋ ɓáŋɔ́.
Arɩ́ zaa wuu, rɩ ɓa nɩ́ɩ́ karmɛ Wɩɩsɛ Kɛŋbɩnɛ sɩɛrʋ, óŋ rɩ́ɩ́ tɔ́wɔ́ sɩ́ɛ́ mɛ́, anɛ ɛ́ pɛ́nɛ.
Nɛrɔ ná há lá Kirisi dí dʋŋɔ nɛ́, ɛ́ pɛ́nɛ wʋ́ʋ́ sɩ́ɛ́ mɛ́ tɔ́ɛ́.
15 Zaa má ha, rɩ Ɩzɩrayɛl nɩɛ nɩ́ɩ́ karmɛ Wɩɩsɛ kíŋse* kɛnnɛ ná Moyizi há pʋ́ŋsɛ́, ʋʋ́ nɛ óŋ rí tɔ́wɔ́ wɩ́zɩmɛ mɛ́, anɛ pɛ́nɛ.
16 Ká rɩ ɓa kúó la Nyuutɩna wɩ́ɛ́ dí, Wɩɩsɛ ka ɛ́ pɛ́nɛ dórwó mí.
17 Nyuutɩna nɛ́ ká Wɩɩsɛ Sabɩɩna ná.
Ká Wɩɩsɛ Sabɩɩna há mɩŋ ráŋ ná, ráŋ nɛ́ nɩɛ tɩ́llɩ́wɔ́ tɩɩ.
18 Pɛ́nɛ wɩ́rá oro wuu sɩ́ɛ́ mɛ́ tɔ́ɛ́, ká Nyuutɩna píŋ ná tʋ́tʋ́lrá mɛ́, anɛ nyiiló háá cuolé.
Ɛ́ nɛ́ Nyuutɩna Sabɩɩna ná bɩ́rsɩ́rá, á má nɛ Nyuutɩna tɩɩ, á ka píŋ ná há ɔ́sɛ́ aá súúri wuu.