Wɩɩsɛ pí oŋwero hé cʋ́ʋ́ viini sɩɛrʋ
4
1 Wɩɩsɛ sawér mí ní, ʋ pí tʋtʋmɩ́ né hérá nɛ́sɛ mɛ́.
Ɛ́ nɛ́ tɛ, á naasɛ waá yʋɔrɛ.
2 Hɩɩ̃sɛ wɩ́ɛ́ ná ɓa há lʋ́ɔ́rɛ́ aá a, á vɛ́wɔ́.
Á wɩ nɩɛ́ gɩrmɛ, á wɩ Wɩɩsɛ wɩ́bʋlɛ ná kené aá bɩ́rsɛ.
Amá á cáásɔ́ bʋl wɩ́ɛ́ arɩ́ taŋá Wɩɩsɛ sɩ́ɛ́ mɛ́, nɩɛ wuu zɩŋ ɛ́ mɛ́.
3 Rɩ Labaarɩwero ná á háá bʋlɛ́, rʋʋ nɛ́ ha ká wɩ́féŋsí má, ʋ ká wɩ́féŋsí, nɩɛ ná há ká nɩyʋ́ksɛ́,
4 a wɩ Wɩɩsɛ lɛ́ɛ́ dí rɩ́ nɛ́.
Dúníé né kuóro tɔ́wɔ́ sɩ́ɛ́ mɛ́, rɩ́wɔ́ sɩ́ Kirisi Labaarɩwero ná píŋ tʋlɛ́ ná; Kirisi ná há ká Wɩɩsɛ cuunó.
5 Á tɩɩ wɩ́ɛ́ rá á pii aá kármɩ́wa, Zeezi Kirisi há ká Nyuutɩna wɩ́ɛ́ nɛ́, á pi aá kármɩ́wa.
Zeezi wɩ́ɛ́ nɛ́, á sɩ́rá kɛ́ɩ́wa tʋtʋ́nná.
6 Wɩɩsɛ ná há sɛ́:
«Rɩ́ pʋmmɔ tʋl bíno sɩɛrʋ.»
Ʋ nɛ́ ɛ́ɛ́, ʋ pʋmmɔ tʋ́lrá má sɩɛnnɛ.
Ɛ́ pʋmmɔ nɛ́ ɛ́ɛ́, á nóú píŋ ná háá tʋlɛ́, Kirisi sɩ́ɛ́ mɛ́.
7 Á nɩhɩ̃́ cʋ́ʋ́ viini ní, ká Wɩɩsɛ púú oŋwero kɩ́ŋkáŋ hérá sɩɛnnɛ.
Ʋ á ɛ́, rɩ́ nɩɛ zɩŋ rɩ́ dóé ná wuu lʋ́ʋ́ Wɩɩsɛ nɛ́, ʋ wɩ́rá lɩ́ɛ́.
8 Nɩɛ ɔ́ɔ́ á ná wɩɩla duo wuu ní, ká á há cɩ́ tɩkɛ.
Wɩ́ɛ́ nɩ́rá wérí, amá á naasɛ wɩ yʋ́ɔ́rɛ́.
9 Ɓa wálmɩ́rá wérí, amá Wɩɩsɛ wɩ́rá vɛ́ɛ́ tá.
Ɓaá ko pírá yo tíé, amá ɓa wɩ́rá ɓʋ́ʋ́sɛ́.
10 Zeezi sʋʋ ná wɩɩla nɛ́, á má pii cɩ́ɩ́nɩ́rá tɩɩ kal wuu, a makɛ rɩ́ nɩɛ tɩ́ŋrá mɛ́, a zɩŋ rɩ́ Zeezi wómmó.
11 Á dúníé mí mɩnɛ́ wuu mí, ɓa tɩ́ŋ Zeezi wɩ́ɛ́ aá járá mɩɩsɛ lɩ́sɛ kál wuu ní.
Ɓa sɩɛ́ sɩ́ ná Zeezi hiẽsó ná, á tɛnnɛ nyáŋ há sɩ́ sʋsɛ mɛ́.
12 Ɛ́ wɩ́ɛ́, sʋʋ nɛ́ mɩ́ŋrá mɛ́, ká hiẽsó ní mɩ́nɩ́wa é mí.
13 Wɩɩsɛ Kɛnɔ sɩɛrʋ, ɓa pʋ́ŋsɔ́ bʋlɛ́:
«Ŋ lá Wɩɩsɛ wɩ́ɛ́ dí, ɛ́ nɛ́ ŋ bʋ́lwɔ́ aá pá nɩɛ.»
Ɛ́ yardá tɩɩ nɛ́ mɩ́ŋrá mɛ́, á má la Wɩɩsɛ wɩ́ɛ́ dí, a bʋl aá pá nɩɛ.
14 Á ɩ́ɔ̃́ zɩŋ rɩ́ Wɩɩsɛ nɛ́ ílli Nyuutɩna Zeezi sʋʋ mɛ́.
Ʋ sɩ́ a ráá má tɩŋ Zeezi mí isi, káá a, ráá rɩ́rɩ́wa wuu ko lɩɩ cɩ́nʋ́ sɩ́ɛ́.
15 Ɩ́ wɩ́ɛ́ nɛ́, wɩ́ɛ́ nyáŋ wuu a; a makɛ rɩ́ Wɩɩsɛ zilé peri nɩɛ ɓɩkana.
Ɛ́ nɛ́ rɩ́ nɩɛ yʋkɛ, a bárkɛ Wɩɩsɛ, káá píŋsú.
Á naasɛ waá yʋɔrɛ
16 Ɛ́ nɛ́ tɛ, á naasɛ wɩ yʋ́ɔ́rɛ́.
Raá tɛŋ né níí pʋɔlɛ́ má, á sabɩɩna dóé é ɔ́sɔ́ aá súúri rí, kál wuu.
17 Á zaa wɩɩla né é dɔ́lɔ́, a baa a oŋdaarɩ́ má; amá á háá kóó mʋ́ Wɩɩsɛ sɩ́ɛ́, rʋ́ʋ́ pi píŋ ná párá, ʋ kɛ wɩɩla né kɩ́ŋkáŋ.
Ká ɛ́ píŋ to oŋdaarɩ́ má.
18 Ɛ́ nɛ́ tɛ, á wɩ́rá sɩ́ɛ́ píé cɔ́ sɩ́ɩ́ oŋnáálɛ mɛ́, á pírá sɩ́ɛ́ cɔ́ onni ná sɩ́ɩ́ há waá ná mɛ́ nɛ́.
Sɩ́ɩ́ oŋnáálɛ éé dáárʋ́ rɛ́, amá sɩ́ɩ́ há wʋ́ɔ́ ná ná é, ɓa waá dáárɩ́ ná.