Wɩɩsɛ laatɛ́ ná ká zilé rí
2
1 Tésíé mí, ɩ́ fa ká sʋ́sɛ́ rɛ́, Wɩɩsɛ sɩ́ɛ́ mɛ́, a tɩ́ŋɩ́wa wɩ́zɔkɛ́ rɩ́rɩ́wa wɩ́bɔma ɛɛ mɛ́.
2 Ɩ́ fa tɩ́ŋ dúníé nɩɛ mɛ́ a píwó naa aá va; ɩ́ faá tɩŋ kaŋtɔmɔ kuóro ná há mɩŋ bána rɩ́ tíé pɛ́kɛ, poo sɩɛrʋ, ʋ nʋɔ nɛ́; ʋ sabɩɩna dóé ní mɩŋ kéké nɩbííne ná há cɩ́ Wɩɩsɛ mɛ́, a káŋwɔ́ aá tʋŋ.
3 Á wuu sɩɛ́ fa mɩŋ ɛ́ nɩɛ sɩɛrʋ nɛ́, a fa mɩ́ŋrá nɩbinní wɩ́hɩɛ̃nɛ́ mɛ́ aá tʋŋ, aá tʋ́ŋrá nɩbinní rɩ́rá sabɩɩna cólle.
Ɛ́ wɩ́ɛ́, a tɩ́ŋrá mála mɛ́, Wɩɩsɛ cɔwɩɩlɔ́ fa mɩ́ŋrá nyúú, anɛ ʋ cɔwɩɩlɔ́ há mɩŋ ɛ́ nɩɛ nyúú ɛ́.
4 Amá Wɩɩsɛ susufárʋ zénó; ʋ cólle má zénó ʋ kaa cóllírá,
5 ɛ́ nɛ́ tɛ, á nɩɛ ná fa há ká sʋ́sɛ́, a tɩ́ŋrá wɩ́zɔkɛ́ ɛɛ mɛ́, ʋ a á rɩ́ Kirisi wuu ka hiẽsó.
Wɩɩsɛ zilé sɩɛrʋ nɛ́, ʋ lɛ́ɩ́wa tá.
6 A tɩ́ŋrá rɩ́ Kirisi Zeezi há ká balá wɩ́ɛ́, ʋ íllírá rɩ́rʋ́ wuu sʋʋ mɛ́, a a, á rɩ́ Kirisi Zeezi wuu dí kuorí bána nyúú.
7 Wɩɩsɛ á ɛ́, a makɛ rʋ́ʋ́ cíé tɩŋ Kirisi Zeezi mí, a mákʋ́ zílzeno ná há dúkí nɛ́sɛ, arɩ́rʋ́ sawér ná nɛ́.
8 Ɛ́ wɩ́ɛ́, Wɩɩsɛ zilé sɩɛrʋ nɛ́ ʋ lɛ́ɩ́wa tá, a tɩŋ ɩ́ há lɔ́ʋ́ dí wɩ́ɛ́; ʋ ɛ́ sɩɛ́ wɩ́ɩ́wa tɩɩ lɩ́ɛ́, ʋ ká zilé rí, Wɩɩsɛ pɛ́ɩ́wa.
9 Ɩ́ tʋtʋ́ŋwere wɩ́ɛ́ rá Wɩɩsɛ lɛ́ɩ́wa tá, a makɛ rɩ́ nɛ́ŋ wuu sʋ́ʋ́ tɩɩ mákʋ́.
10 Á ká Wɩɩsɛ nɛ́sɛ nɩmáálɛ nɛ́.
Ʋ tɩ́ŋ Kirisi Zeezi mí ní a márá, a makɛ ráá tʋ́tʋŋ tʋtʋ́ŋwere.
Ɛ́ tʋtʋ́ŋwere, Wɩɩsɛ tɩɩ nɛ́ lá sɩ́ɛ́ máŋsɩ́wɔ́ tá fól wuu, ráá tʋŋ.
Nɩbííne duo wuu tɩ́ŋ Kirisi mí a a balá
11 Ɩ́ líísíwa tɩɩ ná, ɩ́ fa há ká ɛ́, tésíé mí.
Ɓa há lʋ́lɩ́wa, ɩ́ to Zuwifiwa; Zuwifiwa* keníwa aá yɩ́rɛ pɛŋkɛnnɛ tɩ́náwa nɛ́, káá yɩ́rwɔ́ tɩɩ pɛŋconné tɩ́náwa, a tɩŋ ɓa há cónníwó pɛŋkɛnnɛ wɩ́ɛ́.
12 Taŋá, ɛ́ tɛ́ŋ mɛ́, ɩ́ fa wɩ Kirisi ɛ̃; ɩ́ fa ká nɩhʋ́ɔ́rá rɛ́, ɩ́ to Ɩzɩrayɛl duo* nɩ́ɛ́, ɩ́ fa wɩ kér kené Wɩɩsɛ nʋtállɛ* ná sɩɛrʋ; ɩ́ fa dé mɩŋ dúníé sɩɛrʋ ɛ́ nɛ́, a wɩ yɩ́ɛ́lá kené, a wɩ Wɩɩsɛ má ɛ̃.
13 Amá mʋ́l néé mí, a tɩŋ Kirisi Zeezi mí, ɩ́ nɩɛ ná rɩ́ Wɩɩsɛ pɛ́kɛ fa há bóló, Kirisi cɛ́l ná há bɩ́sɛ́, keníwa peri Wɩɩsɛ.
14 Kirisi tɩɩ nɛ́ ɛ́ɛ́ tɛŋfɩ́ɛ́l mɩ́ŋrá pɛ́kɛ, ʋ há kéŋ Zuwifiwa arɩ́ nɩɛ ná há to Zuwifiwa hé náŋá mɛ́, ɓa a duo balá.
Dɩŋdɔmɩ́ ná fa há mɩŋ Zuwifiwa rɩ́ to Zuwifiwa pɛ́kɛ, anɛ zéŋ, Kirisi sʋʋ ná gíri ɛ́ zeŋ; dɩŋdɔmɩ́ báá toó.
15 Kirisi gírí Zuwifiwa kíŋse rɩ́wɔ́ wɩ́máŋsɛ ŋmɛ́ŋsɛ ná, Moyizi* fa há pʋ́ŋsɛ́, a makɛ rɩ́ Zuwifiwa rɩ́ nɩɛ ná há to Zuwifiwa tɩ́ŋʋ́ mɛ́, a hé náŋá mɛ́, a a dufɛlɔ balá; ʋ nɛ́ ɛ́ɛ́ tɛŋfɩ́ɛ́l mɩ́ŋwɔ́ pɛ́kɛ.
16 A tɩ́ŋʋ́ dagɛsɛ́* daha sʋʋ ná mɛ́, ʋ héwó wuu náŋá mɛ́, ɓa a tɛŋ balá, ʋ sɩɛ́ káŋwɔ́ rɩ́ Wɩɩsɛ hé náŋá mɛ́; a tɩ́ŋʋ́ dagɛsɛ́ daha sʋʋ ná mɛ́, ʋ ɔ́ɔ́ dɩŋdɔmɩ́ yʋ́ksɛ.
17 Kirisi kó dúníé a bʋl tɛŋfɩ́ɛ́l Labaarɩwero wɩ́ɛ́, a pɛ́ɩ́wa nɩɛ ná rɩ́ Wɩɩsɛ pɛ́kɛ fa há bóló, arɩ́ nɩɛ ná má rɩ́ Wɩɩsɛ há ká tɛ́sɩ́ɩ́.
18 A sɩɛ́ tɩŋ Kirisi mí, Zuwifiwa arɩ́ nɩɛ ná há to Zuwifiwa, á wuu wo Wɩɩsɛ Sabɩɩna ná balá mɛ́ tɩŋ, aá zʋ́rá Ana Wɩɩsɛ sɩ́ɛ́.
19 Ɛ́ wɩ́ɛ́, ɩ́ nɩɛ ná há to Zuwifiwa, ɩ́ báá to nɩhʋ́ɔ́rá, ɩ́ to zʋ́zʋ́llɛ́, amá ɩ́ sɩ́sɛ́nyɛ ká Wɩɩsɛ jaa nɩɛ nɛ́, Wɩɩsɛ nɛ́ tɩ́ɩ́wa.
20 Ɩ́ nɩhɩ̃́ wárɛ́wa ɓa há píé sɔ Wɩɩsɛ jaa nɛ́.
Kirisi nɩtʋmɛ́ arɩ́ Wɩɩsɛ wɩ́laabʋlla nɛ́ sɩɛ́ ká ɛ́ jaa mʋ́l, ká Kirisi Zeezi tɩɩ nɛ́ sɩɛ́ a nagbáŋjɛ́ dɔ́wɩ́.
21 Kirisi ní kéŋ jaa ná wuu cɛ́, ʋ ka dóé wérí, aá hɩ́ɛ̃́sɛ, rʋ́ʋ́ a Nyuutɩna Wɩɩsɛ Wɩcʋɔlɩjɩzeno* ná há ká páár.
22 Ɩ́ rɩ́ Kirisi sɩɛ́ há ká balá, ɩ́ má nɩhɩ̃́ wárɛ́wa rɛ́, ɓa kaá sɔ ɛ́ jaa, Wɩɩsɛ tɩ́ŋʋ́ Sabɩɩna mɛ́, a zʋʋ mɩ́nʋ́ sɩɛrʋ.