Wɩɩsɛ há lɩ́sɛ Pool ɛ́, rʋ́ʋ́ bʋ́lʋ́ wɩ́ɛ́ pá nɩɛ ná há to Zuwifiwa
3
1 Ɛ́ nɛ́ tɛ, ŋ é Pool sʋl Wɩɩsɛ aá pɛ́ɩ́wa.
Ŋ ká bɩnajaa nɛ́ŋ rɛ́, Kirisi Zeezi yɩr mɛ́, ɩ́ nɩɛ ná há to Zuwifiwa wɩ́ɛ́.
2 Taŋá, ɩ́ nɩ́ɔ́ rɩ Wɩɩsɛ tɩ́ŋʋ́ sawér mí, a lɩ́sɩ́ŋ rɩ́ŋ tʋŋ pɛ́ɩ́wa.
3 Anɛ ɛ́ ŋ há lá sɩ́ɛ́ bʋl mʋɔ́ pɛ́ɩ́wa, kɛnɔ né sɩɛrʋ, ŋ máŋsɛ ɛ́ ná, Wɩɩsɛ há mákɛ́ wɩ́ɩ́ ná há ká wɩ́féŋsí a páŋ.
4 Rɩɩ́wa nɛ́ kármɛ́ ɛ́ wɩ́ɛ́, ɩ́ sɩ́ zɩŋ rɩ́ŋ ɓɩɛ́na ɛ̃ wɩ́ɩ́ ná há ká wɩ́féŋsí, a mʋ́ tɩɩnɛ Kirisi mí.
5 Tésíé mí, Wɩɩsɛ fa wɩ ɛ́ wɩ́féŋsi mákɛ́ pá nɩbííne; amá mʋ́l néé mí, ʋ tɩ́ŋʋ́ Sabɩɩna mɛ́, a mákʋ́ pɔ́ʋ́ nɩtʋmɛ́ arɩ́rʋ́ wɩ́laabʋlla.
6 Ɛ́ wɩ́féŋsi ní nyɛ:
Liwe ná Wɩɩsɛ há bíl Zuwifiwa mɛ́, nɩɛ ná há to Zuwifiwa má kéŋ ker ráŋ.
Ɓa rɩ́ Zuwifiwa wuu ní sɩ́sɛ́nyɛ ká balá.
Omo ná Wɩɩsɛ há sɛ́ rʋ́ʋ́ sɩ́ pá Kirisi Zeezi nɩɛ, ʋ sɩ́ pɔ́wɔ́ má.
Ɓa wuu sɩɛ́ lɛ́ ɓa há lá Labaarɩwero ná dí ní.
7 Wɩɩsɛ zilé yɩr mɛ́ nɛ́ ʋ a, ŋ ɔ́ʋ́ tʋtʋ́nnʋ́, a makɛ rɩ́ŋ bʋl Labaarɩwero ná wɩ́ɛ́ aá pá nɩɛ.
Wɩɩsɛ dóé mí ní, ʋ tʋŋ ɛ́.
8 Wɩɩsɛ nɩɛ wuu sɩɛrʋ, ŋ nɛ́ wɩ cúcó, ká Wɩɩsɛ zilé ná sɩɛrʋ, ʋ lɩ́sɩ́ŋ nɛ́ rɩ́ŋ bʋl wɩ́wero né pá nɩɛ ná há to Zuwifiwa; ɛ́ wɩ́wero ní ká:
Kirisi kuóɓɩɛ wɩ nʋɔ kené.
9 Wɩɩsɛ sɛ́ rɩ́ŋ mákʋ́ wɩ́ɩ́ ná fa há ká wɩ́féŋsí a pá nɩɛ wuu.
Wɩɩsɛ nɛ́ sɩɛ́ há ká onni wuu ɩ́'aarɔ, ʋ lóó ɛ́ wɩ́ɩ́ féŋsi ɛ́, fól wuu, a ko peri nyɛ mɛ́,
10 a makɛ rɩ́ mʋ́l néé mí, a tɩŋ wɩcʋɔla púl* nɩɛ mɛ́, rɩ́ tíŋ tɩ́náwa rɩ́ dóé tɩ́náwa ná wuu há mɩŋ bána rɩ́, rɩ́wɔ́ zɩŋ Wɩɩsɛ há kéŋ wɩ́zɩmɛ rɩ́rʋ́ duo wuu a mɔ ɛ́.
11 Wɩɩsɛ sɩɛ́ fa há bɩ́ɩ́nɛ́ rʋ́ʋ́ tʋŋ ɛ́ ná, rɩ dúníé ha wɩ púlé má tɩɩ, ʋ nɛ́ ʋ tɩ́ŋrá Nyuutɩna Kirisi Zeezi mí, a tʋŋ ɛ́.
12 A tɩ́ŋrá há lá Kirisi dí, á rɩ́rʋ́ a balá, ŋmɛ́nɔ wúró a párá, ráá mʋ́ Wɩɩsɛ sɩ́ɛ́, ká rɩ́ héwíŋ mʋɔ́ wuu sɩ́rá kánʋ́.
13 Ɛ́ wɩ́ɛ́, ŋŋ́ sʋ́lɩ́wa, rɩ́ɩ́wa sɩ́ ló rɩ́ɩ́wa naasɛ yʋɔrɛ, a tɩŋ wɩɩla né ŋ háá díé ɩ́ wɩ́ɛ́; ŋ wɩɩla né díí ká yɩ́r rɛ́, a pɛ́ɩ́wa.
Zeezi há córá ɛ́
14 Rɩŋ nɛ́ bɩ́ɩ́nɛ́ ɛ́ wɩ́ɛ́, ŋŋ́ de ɓírmi tíé ní, Ana Wɩɩsɛ sɩ́ɛ́.
15 Ʋ nɛ́ bíl duo wuu, bána nyúú arɩ́ tíé nyúú.
16 Ʋ ɓɩɛ́na píŋó kɩ́ŋkáŋ, ʋ kéŋ ɓɩɛ wuu ní.
Ɛ́ nɛ́ tɛ ŋ sʋ́sʋ́lʋ́, rʋ́ʋ́ Sabɩɩna ná há dúókó, dúóríwa beŋtunni.
17 Ŋ haá sʋ́lʋ́, rɩ́ Kirisi ná dɩkéni ɩ́ beŋtunni sɩɛrʋ, a tɩ́ŋɩ́wa há lɔ́ʋ́ dí ná wɩ́ɛ́, ká rɩ́ɩ́wa ka cólle géŋgéŋ, anɛ tuu nalursi há zʋ́ tíé ɛ́, anɛ jaa mʋ́l ɓa háá bil ʋ cɩ́ wérí ɛ́;
18 a makɛ rɩ́ɩ́wa rɩ́ Wɩɩsɛ nɩɛ wuu wólli zɩŋ Kirisi cólle há mɔhɛ̃́ ɛ́, ʋ gbési, ʋ jɛ́l, ʋ isé arɩ́rʋ́ lúŋ mʋɔsɔ.
19 Ŋŋ́ sʋl Wɩɩsɛ, rɩ́ɩ́wa zɩŋ Kirisi cólle ná há kɛ nɩbííne zɩmɛ́ wuu, a makɛ rɩ́ Wɩɩsɛ má mɩ́nɩ́wa mɛ́ wérí.