Kirisi kɛ óŋ wuu
3
1 Ŋ maábináŋa, ŋ hatɩ́ŋnɩ́wɩ́ɩ́ ŋ háá á rɩ́ŋ bʋl nɛ́ ká:
ɩ́ jɩ́jʋɔsɛ, Nyuutɩna Wɩɩsɛ wɩ́ɛ́ sɩɛrʋ.
Ʋ to wɩhála a páŋ, rɩ́ŋ baa bɩrbʋl wɩ́ɛ́ ná tɩɩ tɩɩ ŋ há lá sɩ́ɛ́ bʋl pɛ́ɩ́wa; ɛ́ wɩ́ɛ́ nɩ́ɩ́ sáŋɩ́wa mɛ́, rɩ́ɩ́wa sɩ́ wɩ́bɔ́ŋ wuu zʋ́.
2 Ɩ́ pɔ́ɩ́wa tɩɩ mɛ́, arɩ́ nɩɛ ná háá tʋŋ vaarɩ́,* a a tʋtʋnna ná há ká nɩtɩ́ɛ́nnɛ́, a a nɩɛ ná há yíkí nɩɛ ɓaá cónníwó pɛnɛ yɔ́ɔ́.
3 Á nɛ́ ká nɩɛ ná há mɩŋ taŋá pɛŋcoki har, á há tɩ́ŋ Wɩɩsɛ Sabɩɩna mɛ́ nɛ́ aá cʋɔlɛ Wɩɩsɛ, aá mákrá tɩɩ Kirisi Zeezi wɩ́ɛ́ sɩɛrʋ.
Wɩ́ɛ́ ná nɩbííne há bélé rɩ ɓa kéŋ nyʋɔrɛ́, á wɩ́rá yardá píé aá héwó mí.
4 Ká, ŋ má fa wóŋ yardá pi aá hé wɩ́ɛ́ ná, nɩbííne há bélé rɩ ɓa kéŋ nyʋɔrɛ́ mɛ́ rɛ́.
Rɩ nɛ́ŋ béló rʋʋ wóú yardá pi aá hé wɩ́ɛ́ ná nɩbííne há bélé rɩ ɓa kéŋ nyʋɔrɛ́ mɛ́, ŋ wo ɛ́ a kɩ́llɛ tɩ́na.
5 Ɓa há lʋ́lɩ́ŋ, tápʋlɛ córí kal nɛ́ ɓa fɩ́ɩ́lɩ́ŋ; ŋ ká Ɩzɩrayɛl duo* nɛrɔ tɩɩ nɛ́, a lɛ Bɛŋzamɛ* jɩmʋ́l; ŋ ká Ebire ní, ŋ áná rɩ́rɩ́ŋ maá wuu Ebirewa*; Wɩɩsɛ kíŋse má tɩŋɛ́ mɛ́, ŋ ká Farɩzɩɛ̃ nɛ́.
6 Ŋ fa kéŋ kajáŋa wérí, a wɩ́wálmɛ wɩcʋɔla púl*; Wɩɩsɛ kíŋse tɩŋɛ́ taŋá sɩɛrʋ, ŋ wɩ oro wuu zɔ́kɛ́.
7 Wɩ́ɛ́ nyáŋ wuu fa kéŋ nyʋɔrɛ́ a páŋ, amá Kirisi wɩ́ɛ́, ŋ bélwó wuu sɩ́sɛ́nyɛ, rɩ ɓa ká ɓalɛ nɛ́.
8 Ŋ há kúé zɩ́mɩ́ŋ Nyuutɩna Kirisi Zeezi, a ná rʋʋ́ zɩmɛ́ ná wér kɛ óŋ wuu, ŋ bélwó wuu, rɩ ɓa ɓɩɛ́na ká ɓalɛ nɛ́.
Ʋ wɩ́ɛ́ nɛ́ ŋ saŋ vɛ ɛ́ wɩ́ɛ́ wuu tá, a bel rɩ ɓa nɩhɩ̃́ kʋ́ɔ́rá rɛ́ ŋ sɩ́ɛ́ mɛ́, ká makɛ rɩ́ŋ ná nyʋɔrɛ́ Kirisi rɩ́,
9 rɩ́ŋ rɩ́rʋ́ a balá, rɩ́ŋ ná tékétéké ná há wɩ́ŋ tɩɩ lɩ́ɛ́, a wɩ kíŋse má tɩŋɛ́ nɛ́ lɩ́ɛ́, amá rʋ́ʋ́ a tékétéké ná há lɛ́ Kirisi laadí ní; ʋ nɛ́ ká tékétéké ná há lɛ́ Wɩɩsɛ rɩ́, Wɩɩsɛ pi aá pá nɛrɔ ná wuu há lá Kirisi wɩ́ɛ́ dí.
10 Ŋ wɩ́jaalɩ́ nɛ́ ká rɩ́ŋ zɩŋ Kirisi, a zɩ́mʋ́ sʋʋ mɛ́ isé dóé ná, a tɩŋ dí wɩɩla ná ʋ há díé, a má nɩ́ɛ́sʋ́, a mʋ́ lúrú sʋʋ ná mɛ́,
11 a makɛ rɩ́ŋ ka yɩɛla, rɩŋ nɛ́ sʋ́wɛ́, rɩ́ŋ má bɩr'isi sʋʋ mɛ́.
Á hé dóé a makɛ ráá nárá wɩ́kirí
12 Ŋ háá kiri wɩ́ɩ́ ná, ŋ ha wʋ́ʋ́ néé, ŋ sɩɛ́ báá wɩ wuó bʋl rɩ́ŋ é wɩ́ɛ́ wuu cɛ́rɔ́ má.
Amá ŋ taŋa hé dóé ní, aá kiri rɩ́ŋ kánɩ́ŋ wɩ́kirí, bee wɩ́ɛ́ Kirisi Zeezi ní keníŋ.
13 Ŋ maábináŋa, ŋ wɩ sɩ́ŋ náŋ wɩ́kirí, amá ŋ nyúú wuu mɩŋ wɩ́balá mɛ́ rɛ́; ʋ nɛ́ ká:
Rɩ́ŋ sʋ́llɛ wɩ́ɛ́ ná wuu há mɩŋ har rɩ́, ká hé dóé aá kiri wɩ́ɛ́ ná há mɩŋ sɩ́ɛ́.
14 Ɛ́ wɩ́ɛ́, ŋ píŋ sɩ́ɛ́ tʋʋlɛ térké ní, a fá aá ja omo ná Wɩɩsɛ há tɩ́ŋ Kirisi Zeezi mí, a yɩ́rɩ́rá rʋ́ʋ́ párá, bána nyúú; ʋ nɛ́ káŋ wɩ́kirí.
15 Á wuu sɩɛ́ há ká nɩɛ ná há bɩ́ɛ́ Wɩɩsɛ wɩ́ɛ́ sɩɛrʋ, ʋ mɔhɔ̃́ ráá ka nyɛ sabɩɩna nɛ́.
Ká, rɩɩ́wa nɩ́ɩ́ bɩɩnɛ bɩɩnɛ́ oro wɩ́ɛ́ náŋa mɛ́, Wɩɩsɛ sɩ́ lɩ́sɩ́wɔ́ mʋ́ʋ́la tɩɩ pɛ́ɩ́wa, rɩ́ɩ́wa zɩŋ rɩ́ ɛ́ rá.
16 Arɩ́ ɛ́ wuu, á zaa cɩ́nɛ́ né mí, ʋ mɔhɔ̃́ ráá hé dóé ní a mʋ́ sɩ́ɛ́, ká sɩ́ har hé.
17 Ŋ maábináŋa, ɩ́ wuu césíŋ.
Nɩɛ ná háá tɩ́ŋrá nabulle ná á há tɛ́ɛ́ pɛ́ɩ́wa, ʋ mɔhɔ̃́ rɩ́ɩ́wa bíbélwó ní.
18 Nɩɛ ɓɩkana wɩ́'állɛ lɔrɛ́; ɓa lá Kirisi dí, káá a, anɛ ʋ dagɛsɛ́ daha sʋʋ ná ká yɔ́ɔ́ rɛ́.
Ŋ sɩɛ́ lá sɩ́ɛ́ bʋ́lʋ́ pɛ́ɩ́wa naasɩ́ ɛrɛ́, ká zaa baa ha bʋ́lʋ́ aá pɛ́ɩ́wa arɩ́ sɩ́mɩɩrʋ.
19 Ɛ́ nɩɛ duo dɩgírsi, Wɩɩsɛ sɩ́ zɔ́kwɔ́, bee wɩ́ɛ́ ɓa filli ní kɔ́wɔ́ wɩŋsa.
Wɩ́ɩ́ ná há kɔ́wɔ́ hɩɩ̃sɛ, ɛ́ wɩ́ɩ́ nɛ́ kɔ́wɔ́ satɔ́ɔ́rwɩ́ɩ́.
Ɓa sɩ́ɛ́ wuu dé mɩŋ dúníé né onni dʋŋɔ mɛ́ nɛ́.
20 Amá á é, á ká Wɩɩsɛ zʋ́ɔ́ nɩɛ nɛ́.
Áá dɛ́llɩ́rá Laataarɔ, Nyuutɩna Zeezi Kirisi, rʋ́ʋ́ lɛ ráŋ nɛ́ ko.
21 Rʋʋ nɛ́ kúé, dóé ná ʋ há kené, a wólli a onni wuu mɩ́nʋ́ tíŋ sɩɛrʋ, ʋ bíbélwó wuu, ʋ sɩ́ ka ɛ́ dóé a bɩ́rsɩ́rá tɛnnɛ nyáŋ há to óŋ wuu, rɩ́wɔ́ nʋ́ʋ́ tɩɩ tɛŋ ná há kéŋ píŋ.