Kirisi tɩɩ múúre rɩ́rʋ́ píŋ wɩ́ɛ́
2
1 Ɩ́ há mɩŋ Kirisi mí, ɩ́ ná bʋɔlɛ́, ʋ cólle dúóríwa naasɛ, Wɩɩsɛ Sabɩɩna a, ɩ́ a balá, a ka susufárʋ rɩ́ sawér náŋá rɩ́, ɛ́ rá?
2 Ɩ́ hé náŋá mɛ́ a ka cólle balá, a ka sabɩɩna balá, a tʋŋ wɩ́jaalɩ́ balá má mɛ́; ɛ́ sɩ́ a rɩ́ŋ sɩɛrʋ ɔsɛ tɔrɛ kɩ́ŋkáŋ.
3 Ɩ́ sɩ́ wɩ́ɩ́ wuu á, arɩ́ sagʋʋmɩ́, ɛ́ rá má arɩ́ nyʋkyɔ́ɔ́.
Amá ɩ́ múúríwa tɩɩ, ká bélíwa náŋa, rɩ ɓa nɛ́ kɩ́ɩ́wa.
4 Rɩ́ɩ́wa sɩɛrʋ oro wuu sɩ́ wɩ́ɩ́ wuu á, rɩ́ɩ́ jɩ́jɔ́ʋ́ dʋŋɔ ɔsɛ́ nɛ́, amá rʋ́ʋ́ bɩ́ɩ́nʋ́ náŋa má ɔsɛ́ wɩ́ɛ́.
5 Ɩ́ kéne sɩɛrʋ, ʋ mɔhɔ̃́ rɩ́ɩ́wa ka sabɩɩna ná há mɩŋ Kirisi mí ní.
6 Ʋ rɩ́ Wɩɩsɛ nɛ́ fa mɔhɩ̃́ náŋá,
ká ʋ wʋ́ʋ́ tɩɩ kené hé ɛ́ mɛ́ géŋgéŋ,
rʋʋ rɩ́ Wɩɩsɛ mɔhɩ̃́ náŋá.
7 Amá ʋ tɩɩ satɔrɔ́ mɛ́, ʋ tá ɛ́, ká pi yómo nɩɩsɔ,
ɓa lʋ́lʋ́ anɛ nɩbííno, nɩɛ nóú nɩbinní;
8 ʋ saŋ a múúrú tɩɩ,
a tɩŋ Wɩɩsɛ nʋɔ a mʋ́ lúrú mɩɩsɛ lɩ́sɛ mɛ́,
a saŋ dagɛsɛ́* daha sʋʋ má tɩɩ.
9 Ɛ́ nɛ́ tɛ Wɩɩsɛ íllú sʋʋ mɛ́,
a kánʋ́ zɩ́ bil dɩkéni ná nɔ́ŋɔ há toó mí,
a pɔ́ʋ́ yɩr ná má há kɛ yɩra wuu,
10 a makɛ rɩ́ Zeezi yɩr ná a,
rɩ́ bána nyúú rɩ́ tíé nyúú,
arɩ́ tíé mʋ́l onni wuu ɓírmi tíé,
11 ká rɩ́ nɩɛ wuu wúrwó nʋʋsɛ mɛ́ a bʋlɛ́:
Zeezi Kirisi ní ká Nyuutɩna!
Rɩ́ ɛ́ párá Ana Wɩɩsɛ píŋ.
Ɩ́ tʋl dúníé mí anɛ pʋmmɔ
12 Ɛ́ wɩ́ɛ́, ŋ nɩcólle tɩɩ, tɛ́ŋ wuu mí, ɩ́ sáŋɔ́ aá tɩ́ŋɩ́ŋ nʋɔ, tɛ́ŋ ná mɛ́ ŋ fa há mɩ́nɩ́wa dɩhɩ̃́; sɩ́sɛ́nyɛ sɩɛ́ ŋ há tóíwa dɩhɩ̃́, arɩ́ ɛ́ wuu ɩ́ ha ɔsɛ tɩ́ŋɩ́ŋ nʋɔ.
Ɩ́ sɩɛ́ bel Wɩɩsɛ laatɛ́ ná, ká múúríwa tɩɩ a tʋŋ arɩ́ sɩ́fárʋ.
13 Wɩɩsɛ mɩ́nɩ́wa beŋtunni mí aá tʋŋ.
Ʋ nɛ́ ɛ́ɛ́ ɩ́ ka wólle, a ka satɔrɔ́ aá tʋŋ tʋtʋmɩ́ ná ʋ háá jɛɛ́.
14 Ɓa há sɩ́ɩ́wa a wɩ́ɩ́ ná wuu, ɩ́ a, ká sɩ́ káá vásɛ, a sɩ́ ŋmúrmú má,
15 a makɛ rɩ́ɩ́wa sɩ́ dɩzɔkɩ́ kánʋ́, a sɩ́ busunnu kánʋ́, ká rɩ́ɩ́wa a Wɩɩsɛ bɛlɛ ná wɩ́ɛ́ wuu há cɛ́rɛ́, a mɩŋ dúníé né wɩ́bɔŋ'aara rɩ́ nɩbɔma sɩɛrʋ.
Ɛ́ wɩ́ɛ́, ʋ mɔhɔ̃́ rɩ́ɩ́wa tʋ́tʋl dúníé mí, anɛ caŋwʋllɛ háá tʋl ɛ́ bána nyúú,
16 a ka wɩ́bʋlɛ ná háá pá hiẽsó wérí, a mákʋ́ pá nɩbííne.
Rɩɩ́wa nɩ́ɩ́ tʋ́ŋ ɛ́, ŋ sɩɛrʋ sɩ́ tɔ́rɩ́wa nyúú, Kirisi tápʋl koolí, bee wɩ́ɛ́ ŋ tʋtʋmɩ́ ná arɩ́rɩ́ŋ wɩɩla ná wɩ yɔ́ɔ́ tɛ́ɛ́.
17 Rʋʋ nɛ́ héé rɩ́ŋ cɛ́l tá anɛ nyíí, a gáárɩ́wa Wɩɩsɛ laadí ná há ká vʋ́k rɛ́, ɩ́ pííwa tɩɩ ɔsɛ pá Wɩɩsɛ, ŋŋ́ jʋ́ɔ́sʋ́ rɛ́, ɛ́ yɩr mɛ́, a jɩ́jʋɔsɛ arɩ́rɩ́wa wuu má.
18 Ɩ́ má jɩ́jʋɔsɛ ɛ́ yɩr mɛ́, a jɩ́jʋɔsɛ arɩ́rɩ́ŋ má.
Timote rí Epafiroditi tʋmɛ́ wɩ́ɛ́
19 Ŋ kéŋ yɩɛla Nyuutɩna Zeezi yɩr mɛ́, rɩŋ sɩ́ tʋŋ Timote tápʋlɛ nyáŋ nʋɔ mɛ́ rʋ́ʋ́ kóíwa dɩhɩ̃́, ká bɩrkánɩ́wa labáárɛ ko páŋ, a makɛ rɩ́ŋ naasɛ dúóri.
20 Ʋ dʋŋɔ nɛ́ pɛ́ŋ mɛ́ aá ɔ́sɩ́ŋ wɩ́ɛ́, ká kánɩ́wa wɩ́ɛ́ wérí.
21 Nɩɛ ná náŋa wuu, ɓaá zɩ́ŋwɔ́ tɩɩ wɩ́ɛ́ nɛ́, ɓa sɩ́ɛ́ to Kirisi Zeezi wɩ́ɛ́ mɛ́.
22 Amá Timote é, ɩ́ tɩɩ ʋ́ʋ̃́ há mákʋ́ taŋá ɛ́ rɛ́.
Ʋ sáŋɔ́ hóú tɩɩ Labaarɩwero tʋtʋmɛ́ ná mɛ́, ŋ rɩ́rʋ́ tʋŋ anɛ bio rɩ́rʋ́ áná háá tʋŋ ɛ́.
23 Rɩŋ sarɩ́ya wɩ́ɛ́ sɩ́ɛ́ nɛ́ lɩ́ɛ́, ŋŋ́ bɩ́ɩ́nʋ́ rɩ́ŋ tʋ́mʋ́ nɛ́ ɩ́ rɩ́.
24 Ŋ kéŋ yardá arɩ́ Nyuutɩna, rɩ rɛɛ́ rɩ́ mʋɔ́, ŋ tɩɩ má sɩ́ kóíwa dɩhɩ̃́.
25 Ŋ sɩɛ́ ha béló rʋʋ cɛ́rɔ́, rɩ́ŋ tʋ́mɩ́ŋ maábinɔ́ŋɔ Epafiroditi ɩ́ dɩhɩ̃́; ŋ tʋtʋ́nnʋ́nɔ́ŋɔ nɛ́; ŋ rɩ́rʋ́ wuu níí lowé Labaarɩwero ná wɩ́ɛ́.
Ɩ́ nɛ́ fa tʋ́mʋ́, ʋ ka sáŋɛ ná ŋ háá jɛɛ́, a ko páŋ.
26 Ʋ dé caasɛ aá hɩɛ̃nɛ rʋ́ʋ́ bɩrko néíwa nɛ́; ɩ́ há nɩ́ɛ́ rʋʋ tɛŋ fa wɩ fɩɛlɛ ná, ʋ wɩ dóŋ pɛ́ ɛ́ wɩ́ɛ́.
27 Taŋá, ʋ ɓɩɛ́na fa wɩ́ɩ́lɔ́ wérí, a cɩ́ sʋʋ mɛ́.
Amá Wɩɩsɛ fɔ́ʋ́ susu, a fáŋ má susu, ká dúórú; rʋʋ fa sʋ́wɔ́, ŋ sazɔkɔ́ fa sɩ́ ɔsɛ súúri kɩ́ŋkáŋ.
28 Ɛ́ wɩ́ɛ́, ŋ sɩ́ɩ́ fɛ́lɔ́ rɩ́ŋ tʋ́mʋ́ kɩ́kɛ́lɛ́, rʋ́ʋ́ ko rɩ́ɩ́wa nóú, a makɛ rɩ́ɩ́wa jɩ́jʋɔsɛ, ká rɩ́ŋ má sazɔkɔ́ múúri.
29 Ɩ́ sɩɛ́ cakɛ lɔ́ʋ́ Nyuutɩna yɩr mɛ́, arɩ́ satɔrɔ́ ɓɩzeno.
Ɩ́ zízíl nɩɛ nyáŋ duo;
30 bee wɩ́ɛ́ Kirisi tʋtʋmɛ́ yɩr mɛ́ nɛ́, ʋ fa cɩ́ rʋ́ʋ́ sʋwɛ.
Sáŋɛ ná ɩ́ tɩɩ há wɩ wuo kaa ko aá páŋ, ʋ yóú mɩɩsɛ tá, a ka ɛ́ sáŋɛ ko páŋ.