Dʋ́ŋdʋ́ʋ̃́ kɛnɔ ná Pool há pʋ́ŋsɛ́ pá
Tesaloniki tɩ́náwa
Cʋɔla
1
1 Ŋ Pool* rí Sɩlvɛŋ* arɩ́ Timote* ní pʋ́ŋsɛ kɛnɔ né, aá pɛ́ɩ́wa Wɩɩsɛ púl* nɩɛ ná há mɩŋ Tesaloniki* mí, a árá Ana Wɩɩsɛ rɩ́rá Nyuutɩna Zeezi Kirisi nɛ́sɛ nɩɛ.
Rɩ́ Wɩɩsɛ pɛ́ɩ́wa bárka arɩ́ tɛŋfɩ́ɛ́l!
Pool bɔ́llɛ Wɩɩsɛ, Tesaloniki Zeezi laadííre
yardá rɩ́wɔ́ wɩ́'állɛ wɩ́ɛ́
2 Áá bɔ́llɛ Wɩɩsɛ ɩ́ wuu wɩ́ɛ́ nɛ́ tápʋ́l wuu.
Raá nɩ́ɩ́ cʋɔlɛ Wɩɩsɛ má, á wɩ́ɩ́wa mɩ́ɩ́ sʋ́llɛ.
3 Áá líísírá tɩɩ á Ana Wɩɩsɛ sɩ́ɛ́, tɛ́ŋ wuu mí, ɩ́ yardá wɩ́'állɛ rɩ́rɩ́wa cólle tʋtʋmɛ́ wɩ́ɛ́, arɩ́ taŋá ná ɩ́ há héé, aá yɩ́ɛ́lɩ́rá Nyuutɩna Zeezi Kirisi wɩ́ɛ́.
4 Maábináŋa, Wɩɩsɛ nɩcólle, á ɩ́ɔ̃́, ʋ nɛ́ tʋ́ɔ́sɩ́wa rɩ́ɩ́wa ɔ́ʋ́ nɩɛ.
5 Á fa há bʋ́l Zeezi Labaarɩwero ná wɩ́ɛ́ pɛ́ɩ́wa, ʋ to nʋɔ dʋŋɔ, á bʋ́lʋ́ arɩ́ Wɩɩsɛ Sabɩɩna* dóé arɩ́ yardá tɩɩ má rɛ́.
Ɩ́ ɛ̃ ɛ́ ná á fa há kéŋrá tɩɩ ɩ́ sɩ́sɩ́ɛ́nnʋ́wa rɛ́, ɩ́ wérí wɩ́ɛ́.
6 Ɩ́ tɩ́ŋrá nabulle ní, a tɩŋ Nyuutɩna Zeezi má nabulle; ɩ́ há dí wɩhála ɓɩzeno ná, ká ɩ́ ha dɔwɛ saŋ Wɩɩsɛ wɩ́bʋlɛ́ ná, arɩ́ satɔrɔ́ ná Wɩɩsɛ Sabɩɩna há pɛ́ɩ́wa.
7 A tɩŋ ɛ́ wɩ́ɛ́, Masɩdʋanɛ* rɩ́ Akayi* tíé Zeezi laadííre wuu bélíwa nɛ́ káá va.
8 Ʋ mʋ́l nɛ́ ká, a tɩ́ŋɩ́wa yɩr mɛ́, Nyuutɩna Zeezi wɩ́bʋlɛ́ ná wɩ́ɩ́wa dɩhɩ̃́ lɩ́ɛ́ mʋ́ yakɛ Masɩdʋanɛ rɩ́ Akayi dʋŋɔ mɛ́ nɛ́, ɩ́ há lá Wɩɩsɛ dí ná, ɛ́ labáárɛ céŋ dɩhɛ̃́ wuu ní.
Ɛ́ wɩ́ɛ́, ʋ báá to ráá bʋ́lɩ́wa wɩ́ɛ́ pá nɩɛ má tɩɩ.
9 Á há mʋ́ɩ́wa dɩhɩ̃́ ɩ́ káŋrá ɛ́, nɩɛ wuu dé bʋ́bʋ́lʋ́ nɛ́, arɩ́ ɛ́wa ɩ́ há vɛ́ venni tá ráŋ, ká bɩ́rsɛ, a tɩŋ Wɩɩsɛ mɛ́, rɩ́ɩ́wa tʋŋ pɔ́ʋ́, ʋ nɛ́ há ká Wɩɩsɛ ná há wómmó a a taŋá,
10 káá dɛ́llʋ́ Bio, rʋ́ʋ́ lɛ bána nyúú, Wɩɩsɛ rɩ́, a ko.
Ʋ Bio Zeezi ná ʋ há ílli sʋʋ mɛ́ ʋ bɩrlɛ sʋsɛ mɛ́, rʋ́ʋ́ lárá tá Wɩɩsɛ sarɩ́ya ná há pérí tɛ́sɩ́ɩ́ mɛ́.