Pool há tʋ́mʋ́ ná Tesaloniki mí
2
1 Maábináŋa, ɩ́ tɩɩ ɩ́ɔ̃́ zɩŋ rɩ́, á fa há mʋ́ɩ́wa dɩhɩ̃́ ɛ́, ʋ to yɔ́ɔ́.
2 Ká ráá zɩŋ mʋ́ɩ́wa dɩhɩ̃́, ɩ́ ɩ́ɔ̃́ zɩŋ rɩ́ ɓa tʋ́ksɩ́rá, a bɛ́ŋsɩ́rá Filipi* mí, amá Wɩɩsɛ dúórírá naasɛ, á bʋ́lʋ́ Labaarɩwero ná wɩ́ɛ́ pɛ́ɩ́wa, wálmɛ ɓɩzeno sɩɛrʋ.
3 Labaarɩwero ná á há bʋ́lɛ́ pá nɩɛ, ʋ to nyɩɛrʋ́, ʋ to sabɩŋ bɔ́ŋ, ʋ sɩɛ́ báá to nɩnyɩsɛ má.
4 Amá Wɩɩsɛ bélrá, raá ká nɩtɩɩwa nɛ́, ɛ́ nɛ́ tɛ ʋ lɩ́sɩ́rá, a púú Labaarɩwero ná hérá nɛ́sɛ mɛ́.
Ɛ́ wɩ́ɛ́, á wɩ bʋ́lɛ́ aá ja rɩ́ nɩbííne sɩɛnnɛ nɛ́ tɔrɛ, amá á bʋ́lɔ́ aá ja rɩ́ Wɩɩsɛ ná háá kɩ́ɛ́lɩ́rá sabɩŋsɛ, rʋ́ʋ́ sɩɛrʋ nɛ́ tɔrɛ.
5 Ɩ́ tɩɩ ɩ́ɔ̃́ pʋmmɩ́, á há kóíwa dɩhɩ̃́, á wɩ nʋŋmɔ́ŋwɩ́ɛ́ rɩ́ nɩnyɩsɛ nɛ́ kené ko.
Á sɩɛ́ báá wɩ lɩ́ŋwɩ́ɛ́ má bʋ́lɛ́, a makɛ rɩ́ɩ́wa párá ɓɩɛ.
Wɩɩsɛ kárá dáŋsɩ́ɛ́.
6 Á wɩ nɩbííne píŋ jɛ́ɛ́; á wʋ́ʋ́ jɛ́ɛ́ ɩ́ rɩ́, á wʋ́ʋ́ jɛ́ɛ́ nɩɛ náŋa má rɩ́.
7 Ká á há ká Zeezi nɩtʋmɛ́,* á fa mɔhɔ̃́ ráá fɩ́kɩ́wa.
Amá á há mʋ́ɩ́wa dɩhɩ̃́, á dé caasɛ pɔrɛ nɛ́.
Anɛ bɛlɛ maá háá bélú bɛlɛ mɛ́ ɛ́,
8 á má fa có, a tɩ́ŋrá há pɔ́rɛ́ pɛ́ɩ́wa ɛ́, ráá fa sɩ́ Labaarɩwero ná dʋŋɔ nɛ́ píí pɛ́ɩ́wa, ká ráá fa pírá mɩɩsɛ má tɩɩ pɛ́ɩ́wa, bee wɩ́ɛ́ ɩ́ kárá nɩcólle tɩɩ nɛ́.
9 Maábináŋa, á há tʋ́ŋ ɛ́ arɩ́ wɩɩla ná á há néé, ɩ́ wɩ sʋ́llɛ́.
Tɛ́ŋ ná mɛ́ á há kúé bʋl Wɩɩsɛ Labaarɩwero ná wɩ́ɛ́ aá pɛ́ɩ́wa, á dé tʋŋ wɔhɔ rɩ́ tɩ́taŋ wuu ní, a makɛ ráá sɩ́ɩ́wa oro wuu nyúú cɩka á.
10 Ɩ́ ká dáŋsɩ́ɛ́wa, Wɩɩsɛ má a dáŋsɩ́ɛ́, á há kéŋrá tɩɩ ɛ́, tékétéké arɩ́ sapʋmmɩ́, a wɩ wɩ́ɩ́ wuu zɔ́kɛ́, ɩ́ nɩɛ ná há lá Zeezi dí rí.
11 Ɩ́ sɩɛ́ báá ɩ́ɔ̃́ ráá keníwa nɛ́ŋ balá wuu, anɛ ɛ́, bɛlɛ áná háá kánʋ́ bɛlɛ nɛ́.
12 Á cáánɩ́wa, a dúóríwa naasɛ, a ɓáánɩ́wa wérí, rɩ́ɩ́wa ka málwero, a tɔrɛ Wɩɩsɛ sɩɛrʋ; ʋ nɛ́ yɩ́rɩ́wa rɩ́ɩ́wa ka ker, ʋ kuorí rɩ́rʋ́ píŋ ná sɩɛrʋ.
13 Ɛ́ nɛ́ tɛ, á bʋ́bɔ́llɛ Wɩɩsɛ tɛ́ŋ wuu mí, bee wɩ́ɛ́ Wɩɩsɛ wɩ́ɛ́ ná á há bʋ́lɛ́ pɛ́ɩ́wa, ɩ́ wɩ cákɛ́ lɔ́wɔ́ anɛ nɩbííne wɩ́bʋlɛ́, amá ɩ́ cákɔ́ lɔ́wɔ́, rɩ ɓa ɓɩɛ́na ká Wɩɩsɛ wɩ́ɛ́ tɩɩ nɛ́, aá tʋ́mɩ́wa nɩɛ ná há lá Zeezi dí beŋtunni mí.
14 Ɛ́ wɩ́ɛ́, maábináŋa, wɩcʋɔla púlli* nɩɛ ná há mɩŋ Ziide dɩtɩ́llɛ, a la Zeezi Kirisi wɩ́ɛ́ dí, ɓa há ná wɩ́ɩ́ ná tɩɩ nɛ́, ɩ́ má ná.
Ɩ́ há ná wɩɩla ná ɩ́ tɔ́ɔ́ nɩɛ nɛ́sɛ mɛ́, ɛ́ wɩɩla nʋ́ʋ́ nɛ́, ɓa má ná Zuwifiwa* nɛ́sɛ mɛ́.
15 Ɛ́ Zuwifiwa nɛ́ ɓʋ́ Nyuutɩna Zeezi arɩ́ Wɩɩsɛ wɩ́laabʋlla, a bɛ́ŋsɩ́rá má.
Wɩɩsɛ sɩɛrʋ wʋ́ɔ́ nyúú tɔ́rɛ́; ɓa ká nɩɛ wuu dɩŋdɔma nɛ́.
16 Ɓa pɔ́ɔ́ ráá sɩ́ Wɩɩsɛ wɩ́ɛ́ bʋ́l pá nɩɛ ná há to Zuwifiwa, rɩ́wɔ́ ná Wɩɩsɛ laatɛ́.
Ʋ ɛ́ a wɩ́bɔ́ŋ, a súúríwó wɩ́bɔŋkana ná ɓa há ɛ́ɛ́ mɛ́, ɓa duki nɛ́sɛ.
Ɛ́ sɩɛ́ ɔ́ɔ́ ɓa mʋ́ gírsi Wɩɩsɛ cɔwɩɩlɔ́ sɩɛrʋ.
Pool có Tesaloniki tɩ́náwa bɩrmʋ́ néé
17 Maábináŋa, á rɩ́rɩ́wa há tá náŋá tɛ́ŋ ná mʋɔ́, ká á sabɩŋsɛ é há de mɩŋ náŋá mɛ́, á dé hé dóé ní aá ja ŋmɛ́nɔ, ráá bɩrko néíwa; ʋ nɛ́ á de caasɛ aá hɩɛ̃nɛ.
18 Ŋ é Pool, ŋ há hé dóé rɩ́ŋ kóíwa dɩhɩ̃́, ʋ kɛ naasɩ́ balá, ká Sɩtaanɛ* kɛ́rɩ́rá ŋmɛ́nɔ, ráá sɩ́ kó.
19 Á yɩɛla rɩ́rá satɔrɔ́, arɩ́rá ballɩ́ jʋɔsɛ́ wuu mɩ́nɩ́wa mɛ́ nɛ́, á Nyuutɩna Zeezi bɩrkoe mí.
20 Taŋá, ɩ́ nɛ́ lá yɩr párá; á bélíwa nɛ́ káá jʋɔsɛ.