3
1 Á sɩɛ́ há dɛ́llɛ́ aá bɔl, ɛ́ nɛ́ á dʋŋɔ ké Atɛɛnɛ mɛ́,
2 ká tʋ́ŋrá maábinɔ́ŋɔ Timote ɩ́ rɩ́; á rɩ́rʋ́ wuu ní tʋ́mɛ́ aá pá Wɩɩsɛ, a bʋl Kirisi Labaarɩwero ná aá pá nɩɛ.
Á sɩɛ́ tʋ́mʋ́ ɩ́ rɩ́, a makɛ rʋ́ʋ́ ko dúóríwa naasɛ nɛ́, ká cáánɩ́wa, rɩ́ɩ́wa cɩ́ tɩkɛ yardá ná ɩ́ há ɛ́ɛ́ arɩ́ Wɩɩsɛ,
3 a makɛ rɩ́ wɩhála né á há mɩ́nʋ́ sɩɛrʋ nyɛ, rɩ́ oro wuu sɩ́ bɩ́rmʋ́ har rɩ́.
Ɩ́ tɩɩ ɩ́ɔ̃́ zɩŋ rɩ́ Wɩɩsɛ bílrá ɛ́ wɩ́ɛ́ nɛ́.
4 Á fa há mɩ́nɩ́wa dɩhɩ̃́ ɛ́, á fa pí fól bʋl pɛ́ɩ́wa, a bʋlɛ́ ráá sɩ́ dí wɩhála.
Ɩ́ tɩɩ ɩ́ɔ̃́ rɩ́ ɛ́ nɛ́ péré nyɛ.
5 Ɛ́ nɛ́ tɛ, ŋ há kúé dɛllɛ aá bɔl ná, ŋ tʋŋ Timote, rɩ́ŋ zɩ́mɩ́wa yardá ná mʋɔsɔ, ɩ́ há kené arɩ́ Wɩɩsɛ.
Ŋ faá fá héwíŋ, rɩ́ Sɩtaanɛ háá nyɩ́sɩ́wa rɩ́ɩ́wa yéŋŋi, kárá tʋmɛ́ ná wuu tá yɔ́ɔ́.
6 Amá Timote sɩɛ́ nɛ́ dé lɩ́ɩ́wa dɩhɩ̃́ ko; ʋ párá labáárɛ ná há wéró, a mʋ́ tɩ́ɩ́nɩ́wa há kéŋ yardá ɛ́ arɩ́ Wɩɩsɛ, arɩ́ cólle ná há mɩ́nɩ́wa pɛ́kɛ.
Ʋ sɛ́ rɩ́ɩ́waá bɩ́ɩ́nɩ́rá wɩ́ɛ́ wérí, tɛ́ŋ wuu mí, ká bʋlɩ́wa de caasɛ aá ja rɩ́ɩ́wa nárá rɩ́ sɩ́ɩ́ nɛ́, anɛ á má há cóíwa néé ɛ́.
7 Maábináŋa, á mɩŋ wɩɩla rɩ́ wálmɛ ɓɩzeno mí.
Amá á naasɛ dúóró, á há nɩ́ɩ́wa wɩ́ɛ́, rɩɩ́wa cɩ́nɔ́ tɩkɛ yardá ná ɩ́ há ɛ́ɛ́.
8 Mʋ́l néé mí, á híẽ́só, ɩ́ há cɩ́nɛ́ tɩkɛ Nyuutɩna ŋmɛ́nɔ ná rɩ́ taŋá;
9 satɔrɔ́ há súrá á jɩ́jʋ́ɔ́sɩ́wa wɩ́ɛ́ Wɩɩsɛ sɩ́ɛ́, á báá wɩ́rá háá bɔ́llʋ́ rɩ́ɩ́ mɔ ɛ́ ɛ̃.
10 Wɔhɔ rɩ́ tɩ́taŋ wuu, á de caasɛ hé dóé ní, aá sʋl Wɩɩsɛ rʋ́ʋ́ párá ŋmɛ́nɔ ráá ko néíwa, a súúri wɩ́ɛ́ ná ɩ́ ha há wɩ ɛ̃, a makɛ rɩ́ɩ́wa yardá súúri.
11 Áá sʋ́lrá Ana Wɩɩsɛ tɩɩ, arɩ́rá Nyuutɩna Zeezi, rɩ́wɔ́ wúri ŋmɛ́nɔ párá, ráá kóíwa dɩhɩ̃́.
12 Rɩ́ Nyuutɩna a rɩ́ cólle ná há mɩ́nɩ́wa pɛ́kɛ, rʋ́ʋ́ súúri kɩ́ŋkáŋ, rɩ́ɩ́wa ɔsɛ cólli náŋá, a cólli nɩɛ wuu, anɛ á há cóíwa ɛ́;
13 rʋ́ʋ́ ɓáŋɩ́wa beŋtunni, ká rɩ́ɩ́wa a sapʋmmɔtɩ́náwa, a sɩ́ dɩzɔkɩ́ kánʋ́, á Ana Wɩɩsɛ sɩ́ɛ́, á Nyuutɩna Zeezi rɩ́rʋ́ nɩtɩ́llɛ wuu bɩrkoe mí!