Mála ná háá tɔrɛ Wɩɩsɛ sɩɛrʋ
4
1 Maábináŋa, á wɩ́tenní ní ká:
Á fa máŋsɩ́wa ɛ́ ná há mɔhɛ̃́ rɩ́ɩ́wa kánɩ́wa tɩɩ, rɩ́ Wɩɩsɛ sɩɛrʋ tɔ́rɩ́wa nyúú; ɩ́ má ɓɩɛ́na sɩɛ́ keníwa tɩɩ ɛ́ nɛ́.
Amá á haá sʋ́lɩ́wa, aá jɛ́nnɩ́wa Nyuutɩna Zeezi yɩr mɛ́, rɩ́ɩ́wa ɔsɛ kánɩ́wa tɩɩ kɩ́llɛ ɛ́.
2 Ɩ́ ɛ̃ wɩ́ɛ́ ná Nyuutɩna Zeezi há máŋsɛ́ párá, á má baa makɛ pɛ́ɩ́wa rɛ́.
3 Wɩɩsɛ háá jɔ́ʋ́ ná nɛ́ ká, rɩ́ɩ́wa sɩ́ busunnu ɓárʋ́, a sɩ́ nɩcɔ́rmá á.
4 Rɩ́ nɛrɔ wuu rɩ́rʋ́ háálɔ mɩŋ náŋá mɛ́, anɛ ɛ́ ná Wɩɩsɛ háá jɛɛ́, rɩ́ hagaasɛ sɩ́ mɩ́nʋ́.
5 Ɩ́ sɩ́ ló rɩ́ háála hɩɛŋ dúkíwa nɛ́sɛ, rɩ́ɩ́wa tʋŋ bɔ́ŋbɔ́ŋ, anɛ nɩɛ ná há wɩ Wɩɩsɛ ɛ̃ háá tʋŋ ɛ́.
6 Rɩ́ nɛrɔ wuu sɩ́ áá zɔ́kʋ́ nɔ́ŋɔ mɛ́, háála wɩ́ɛ́ mɛ́, a sʋ́ʋ́ nɔ́ŋɔ má gɩ́rmʋ́.
Nyuutɩna sɩ́ bɛŋsɛ nɩɛ ná háá tʋŋ ɛ́; á bʋ́lʋ́ pɛ́ɩ́wa fól wuu, arɩ́ sɩ́fɩɛma.
7 Wɩɩsɛ wɩ́rá cɔ́rmʋ wɩ́ɛ́ nɛ́ yɩ́rɛ́, amá ʋ yɩ́rɩ́rá, ráá ɔ́ʋ́ nɩɛ nɛ́, a sɩ́ busunnu ɓárʋ́.
8 Ɛ́ nɛ́ tɛ́, nɛrɔ ná wuu há vɛ́ wɩ́ɛ́ nyáŋ, nɛ́ŋ rá tɩ́na vɛ, amá Wɩɩsɛ ná há púú Sabɩɩna pɛ́ɩ́wa nɛ́, tɩ́na vɛ.
9 Maábináŋa, ʋ báá to rɩ́ŋ pʋ́ŋsɛ pɛ́ɩ́wa, a mákɩ́wa náŋá cólle wɩ́ɛ́; Wɩɩsɛ máŋsɩ́wa, ɩ́ tɩɩ zɩŋ ɛ́ ná há mɔhɛ̃́ rɩ́ɩ́wa cólli náŋá.
10 Taŋá, ɩ́ cóíwa maábináŋa, Wɩɩsɛ nɩɛ ná há mɩŋ Masɩdʋanɛ* mɛ́, amá maábináŋa, áá sʋ́lɩ́wa rɩ́ɩ́wa ɔsɛ aa kɩ́llɛ ɛ́.
11 Ɩ́ hé dóé rɩ́ɩ́wa kéne a wérí, a bélíwa tɩɩ tʋtʋmɛ́ mɛ́, a wóllíwa tɩɩ nʋɔ mɛ́ lɩ́sɛ, anɛ ɛ́ á fa há mákɛ́ pɛ́ɩ́wa.
12 Rɩɩ́waá á ɛ́, nɩɛ ná há wɩ Zeezi lɛ́ɛ́ dí sɩ́ zílíwa, ká rɩ́ɩ́wa sɩ́ kéní tɩkɛ, rɩ́ nɛ́ŋ rɩ́ pɛ́ɩ́wa onni ná ɩ́ háá jɛɛ́.
Sʋsɛ bɩr'isé wɩ́ɛ́
13 Maábináŋa, áá já rɩ́ɩ́wa zɩŋ nɩɛ ná há sʋ́sɛ́ wɩ́ɛ́ taŋá, a makɛ rɩ́ɩ́wa sɩɛrʋ sɩ́ zɔ́kʋ́, anɛ nɩɛ ná há wɩ yɩɛla kené.
14 Á lɔ́ʋ́ dí rɩ Zeezi sʋ́wɔ́ ká bɩr'isi sʋʋ mɛ́.
Ɛ́ wɩ́ɛ́, á lɔ́ɔ́ dí rɩ Wɩɩsɛ sɩ́ tɩŋ Zeezi mí, a a rɩ́ nɩɛ ná há lá Zeezi dí ká sʋsɛ, rɩ́wɔ́ má isi sʋʋ mɛ́.
15 Ɛ́ wɩ́ɛ́, ɩ́ ná wɩ́ɩ́ ná, á háá á ráá bʋl pɛ́ɩ́wa, anɛ ɛ́ Nyuutɩna tɩɩ há mákɛ́:
Ʋ kal koolí, á nɩ́ɛ́ ná ha há wɩ sʋ́sɛ́, á waá a ráá la nɩɛ ná há sʋ́sɛ́ sɩ́ɛ́.
16 Ɓɛɛlɔ́ sɩ́ ɓɛ, rɩ́ Wɩɩsɛ malɩ́kawa nɔhɔ̃́ liŋó lɛ, rɩ́ Wɩɩsɛ bʋ́gɩla mu, ká rɩ́ Nyuutɩna Zeezi Kirisi tɩɩ sɩɛ́ lɛ bána nyúú tuwi, rɩ́ nɩɛ ná há lɔ́ʋ́ dí ká sʋsɛ, rɩ́wɔ́ la sɩ́ɛ́ bɩr'isi sʋʋ mɛ́;
17 ʋ har rɩ́ mɛ́, á nɩ́ɛ́ ná há wómmó a káánɛ, ráá rɩ́wɔ́ wuu sɩɛ́ hé náŋá mɛ́, a céŋ Nyuutɩna Zeezi, duóbásɛ sɩɛrʋ, bána nyúú, a makɛ ráá rɩ́ Nyuutɩna mɩŋ náŋá mɛ́, tɛ́ŋ wuu mí.
18 Ɛ́ wɩ́ɛ́, ɩ́ bʋl wɩ́ɛ́ nyáŋ aá pá náŋá, a makɛ rɩ́ɩ́wa naasɛ sɩ́ yʋ́ɔ́rʋ́.