2
1 Ŋ sɩɛ́ já rɩ́ɩ́wa zɩŋ lozeno ná ŋ háá lowé ɩ́ wɩ́ɛ́, arɩ́ Lawodise nɩɛ wɩ́ɛ́, arɩ́ nɩɛ ná wuu sɩ́ɩ́ ha há wɩ́ŋ néé wɩ́ɛ́.
2 Ŋ sɩɛ́ á ɛ́ aá ja rɩ́wɔ́ baŋcɩllɛ nɛ́ ɓaŋ, rɩ́wɔ́ cólli náŋá a ka nʋtʋmɛ má, ká rɩ́wɔ́ zɩŋ Wɩɩsɛ wɩ́féŋsi ná wuu wérí arɩ́ taŋá, rʋʋ nɛ́ ká Kirisi.
3 Wɩ́zɩmɛ arɩ́ zɩmɛ́ ká oŋpíŋé rí, anɛ salmɛ, a féŋsi Kirisi mí.
4 Ŋ bʋ́l nyɛ pɛ́ɩ́wa, a makɛ rɩ́ɩ́wa pɔ́ rɩ́ nɛ́ŋ wuu sɩ́ nʋŋmɔ́ŋwɩ́ɛ́ mɛ́ tɩ́ŋ yéŋŋíwa.
5 Taŋá, rɩŋ tɩɩ nɛ́ tóíwa sɩɛrʋ má, ŋ sabɩɩna é mɩ́nɔ́ arɩ́rɩ́wa; ɛ́ nɛ́ tɛ ŋ jɩ́jʋɔsɛ, ŋ há néé rɩɩ́wa kéŋ náŋá wérí, a ka Kirisi laadí ná má géŋgéŋ.
Á há mɩŋ Kirisi mí, á kéŋ hiẽsíwero
6 Ɛ́ wɩ́ɛ́, ɩ́ sɩɛ́ há sáŋɛ́ rɩ Kirisi Zeezi ní ká Nyuutɩna, ɩ́ lo rɩ́ɩ́wa rɩ́rʋ́ ka nʋtʋmɛ, ɩ́ wɩ́'állɛ wuu mí.
7 Ɩ́ nyʋ́ cɔ́ʋ́ mɛ́, a lo rɩ́ɩ́wa nalursi zʋ́ʋ́, anɛ tuu nalursi háá zʋ tíé ɛ́.
Ɩ́ sɔ́ɩ́wa tɩɩ ʋ daha, anɛ jaa.
Ɩ́ ɔsɛ cɩ́nɩ́wa yardá naa mɛ́ wérí, anɛ ɛ́ ɓa há kármɩ́wa, a ɔsɛ aá bɔ́llɛ Wɩɩsɛ kɩ́ŋkáŋ.
8 Ɩ́ pɔ́ɩ́wa tɩɩ mɛ́, rɩ́ nɛ́ŋ wuu sɩ́ nɩbííne wɩ́zɩmɛ mɛ́ tɩ́ŋ nyɩ́sɩ́wa arɩ́ wɩ́ɛ́ ná há wɩ mʋ́ʋ́la kené; ɓa ká nɩbííne kusúŋ wɩ́ɛ́ rɛ́, a a wɩ́ɛ́ ná tésíé nɩɛ háá tɩŋɛ́ má, ɓa wɩ Kirisi lɩ́ɛ́; ɩ́ sɩɛ́ pɔ́ rɩ́ nɛ́ŋ wuu sɩ́wɔ́ mɛ́ tɩ́ŋ kɛ́sɩ́wa, anɛ bárá háá ka ballɔ ɛ́.
9 Wɩɩsɛ nɩɩsɔ wuu mɩŋ Kirisi tɛŋ mɛ́ nɛ́;
10 Kirisi mí ní sɩɛ́ ɩ́ tɩŋ a vɔkɛ óŋ wuu.
Ʋ nɛ́ kɛ bɩbara rɩ́ dóé tɩ́náwa wuu.
11 Ɩ́ rɩ́ Kirisi há ká balá ná, ʋ ká pɛŋcoki* rí ɛ́, a pɛ́ɩ́wa; ɛ́ pɛŋcoki duo sɩɛ́ wɩ nɩbííne lɩ́ɛ́, amá ʋ lɛ́ Kirisi ní, ʋ há lɩ́sɩ́wa ɩ́ tésíé málbɔmɔ ná mɛ́; ʋ nɛ́ ká Kirisi pɛŋcoki.
12 Ɓa há keníwa muŋsi nyii mí ɛ́, ʋ ká húí rí, Wɩɩsɛ húíwa arɩ́ Kirisi.
Ɩ́ sɩɛ́ há bɩ́rɛ́ lɛ nyii ná mɛ́ má, ʋ ɛ́ ká ɩ́ rɩ́ Kirisi wuu ní bɩ́rɛ́ lɛ sʋsɛ má mɛ́, a tɩŋ ɩ́ há lɛ́ɛ́ dí rɩ Wɩɩsɛ ná há ílli Kirisi sʋʋ mɛ́, rʋʋ kéŋ dóé aá íllíwa má.
13 Tésíé mí, ɩ́ fa ká sʋ́sɛ́ rɛ́, ɩ́ fa háá a wɩ́bɔma ná, a wɩ Zuwifiwa pɛŋcoki ná cóké wɩ́ɛ́.
Amá mʋ́l néé mí, Wɩɩsɛ há ílli Kirisi sʋʋ mɛ́, ʋ pɛ́ɩ́wa mɩɩsɛ.
Wɩɩsɛ hérá wɩ́zɔkɛ́ wuu suúri.
14 Á fa há wɩ Wɩɩsɛ wɩ́ɛ́ tɩŋ ɛ́, á zɔ́kɛ́ Wɩɩsɛ kíŋse, ʋ dírá sarɩ́ya a yórá, a pʋ́ŋsɛ bil; amá Wɩɩsɛ dʋ́sɛ́ ɛ́ wɩ́zɔkɛ́, ká cɔ́nnɛ sarɩ́ya kɛnɔ ná, a tɩŋ Kirisi dagɛsɛ́ daha sʋʋ ná yɩr mɛ́.
15 Kirisi dagɛsɛ́ daha sʋʋ ná mɛ́ nɛ́, ʋ la bɩbara rɩ́ dóé tɩ́náwa dóé wuu, a hɩɩ̃́sɩ́wɔ́ jamáŋ sɩ́ɛ́; ká cáási ballɩ́, a lɔ́wɔ́ sɩ́ɛ́, anɛ lalyooro bɩbar há yóé kɛsɛ nɩɛ, a cáási lɔ́wɔ́ sɩ́ɛ́ ɛ́.
16 Ɛ́ wɩ́ɛ́, ɩ́ sɩ́ ló rí nɛ́ŋ wuu tɩ́ŋɩ́wa ɓɩdííle rɩ́rɩ́wa nyɔɔlɔ́ wɩ́ɛ́, a dííwa sarɩ́ya, a bʋlɩ́wa wɩ mɔhɛ̃́ rɩ́ɩ́wa dí omo né, ɩ́ wɩ mɔhɛ̃́ rɩ́ɩ́wa nyɔ nyɔɔlɔ́ né; a sɩ́ ló rɩ́wɔ́ tɩŋ Zuwifiwa* caŋsɛ* díí arɩ́ caŋfɛlɔ lɩɩ, rɩ́ Zuwifiwa fɩɛlɛ́ tápʋlɛ* má wɩ́ɛ́, aá dííwa sarɩ́ya.
17 Ɛ́ wɩ́ɛ́ wuu nɩhɩ̃́ anɛ cúŋsí rí, aá máŋsɛ wɩ́ɛ́ ná háá kué; ɓa wɩ́taŋá tɩɩ nɛ́ ká Kirisi.
18 Ɩ́ sɩ́ ló rɩ́ nɛ́ŋ wuu bʋl yóíwa, a bʋlɩ́wa mɔhɔ̃́ rɩ́ɩ́wa bɛ́ŋsɩ́wa tɛŋnamɩɛ, káá cʋɔlɛ Wɩɩsɛ malɩ́kawa má.
Ɛ́ nɛrɔ duo púú taŋá wuu yelli wɩ́muulináálɛ mɛ́ nɛ́, a lo nyʋkyɔ́ɔ́ oro súú, bee wɩ́ɛ́ ʋ sabɩŋsɛ wuu ká dúníé*f1* sabɩŋsɛ nɛ́.
19 Ɛ́ nɛrɔ duo rí Kirisi to náŋá mɛ́, ká Kirisi ní a nɔhɔ̃́, a a nyúú.
Kirisi laadííre ní kɔ́ʋ́ tɛŋ, a zʋ náŋá wérí, a ka dɩcɔ́llɛ rɩ́ gule, ʋ pɩ́pɔ́ʋ́ dóé ʋ wʋ́wa, anɛ ɛ́ Wɩɩsɛ háá jɛɛ́.
20 Rɩɩ́wa rɩ́ Kirisi wuu ní hé náŋá mɛ́ sʋsɛ, ɩ́ zɩŋ rɩ́ɩ́wa lɩ́sɩ́wa tɩɩ rɛ́ tésíé nɩɛ háá tɩŋ wɩ́ɛ́ ná mɛ́; beé rí sɩɛ́ tɛ, ɩ́ ha a anɛ ɩ́ ká nɩwómmé a mɩŋ ɛ́ wɩ́ɛ́ mɛ́, a lo ɓa píwó wádawa aá fɩ́kɩ́wa mɛ́ rɩ́ɩ́wa tɩŋ?
Ɛ́ wádawa nɛ́ ká:
21 Sɩ́ omo né pí, sɩ́ omo né dí, sɩ́ omo né mí tɩ́kʋ́!
22 Ɛ́ wádawa mʋ́ɔ́ tɩɩnɛ onni ná nɩbííne háá dí ɓa yʋ́ksɩ́wɔ́ tɛŋ mɛ́ nɛ́.
Ɓa sɩɛ́ ká nɩbííne wɩ́máŋsɛ rɩ́wɔ́ wɩ́karmɛ́ rɛ́.
23 Taŋá, ɓa nɩhɩ̃́ zɩmɛ́ wɩ́ɛ́ é ní, aá makɛ nɛrɔ wuu Wɩɩsɛ tɩŋɛ́, tɩɩ múúre, tɩɩ bɛŋsɛ́, ká ɛ́ rá toó; ɛ́ wɩ́ɛ́ wɩ sáŋɛ wuu kené, aá pɛ́ nɩbííno mí, rʋ́ʋ́ lóú tɛŋnamɩɛ wɩ́cólle ɛɛ.