Kirisi pɛ́ɩ́wa málfɛlɔ
3
1 Rɩɩ́wa rɩ́ Kirisi ní sɩɛ́ hé náŋá mɛ́ bɩr'isi sʋʋ mɛ́, ɩ́ jɩ́ja onni ná há mɩŋ bána nyúú, ráŋ nɛ́ Kirisi ké, Wɩɩsɛ néduu.
2 Ɩ́ cúŋ bána nyúú onni jɛɛ mɛ́, ká tá tíé nyúú onni,
3 bee wɩ́ɛ́ ɩ́ sʋ́sɔ́ rɛ́, ká ɩ́ hiẽsó mɩŋ Kirisi rɩ́, a féŋsi Wɩɩsɛ mɛ́.
4 Kirisi ní sɩɛ́ há kɛ́ɩ́wa mɩɩsɛ, tɛ́ŋ ná mɛ́ ʋ háá á rʋ́ʋ́ bɩrko, ɩ́ sɩ́ nóú píŋ ná, rɩ́ɩ́wa rɩ́rʋ́ wuu nyɩɩsɛ, nɩɛ sɩ́ɛ́ mɛ́.
5 Ɩ́ sɩɛ́ ɓʋ́ dúníé wɩ́ɛ́ ná wuu há mɩ́nɩ́wa mɛ́.
Ɓa nɛ́ ká:
nyúzɔ́krɩ́wɩ́ɛ́, busunnu wɩ́'állɛ, nɩlɩɩlɩ́wɩ́ɛ́, bɔ́ŋbɔ́ŋ hɩɛ̃nɛ́ arɩ́ safʋʋnɩ́ nɛ́ há ká venni ɓaarɛ́.
6 Wɩ́ɛ́ nyáŋ nɩ́ɩ́ ílli Wɩɩsɛ cɔwɩɩlɔ́; [nɩɛ ná há wʋ́ʋ́ nʋɔ tɩŋ nyúú.]
7 Tésíé mí, ɩ́ má fa há mɩŋ ɛ́ wɩ́ɛ́ sɩɛrʋ, ɩ́ má mála fa nɩhɩ̃́ nyɛ nɛ́.
8 Amá mʋ́l néé mí, ɩ́ lɩ́sɩ́wa tɩɩ ɓa wuu mí.
Ɩ́ sɩ́ cɔwɩɩlɔ́ dí, ɩ́ sɩ́ ló rɩ́ɩ́wa cɔ́ɛ́ pusi, ɩ́ sɩ́ sɔhɔ á, ɩ́ sɩ́ nɩɛ tʋ́ksʋ́, a sɩ́ wɩ́tɩɛnnɛ bʋ́bʋ́lʋ́.
9 Ɩ́ sɩ́ nyɩɛnnɛ nyɛ́ɛ́ pɩ́pá náŋá, bee wɩ́ɛ́ ɩ́ wúrkíwa tésíé mála wɩ́'állɛ rɛ́, anɛ gɛrɔ,
10 ká pi málfɛlɔ súíwa tɩɩ; ɩ́ sɩɛ́ ká nɩfɛ́lɛ́ rɛ́, mɩ́máárɔ Wɩɩsɛ ɔsɛ bɩ́bɩrmɛ tɛ́ŋ wuu mí, rɩ́ɩ́wa nɩ́ɛ́sʋ́, a zɩ́mʋ́ ɓóŋ.
11 Mʋ́l néé mí, málfɛlɔ né sɩɛrʋ, ɓɩ́ŋ to Zuwifi, ɓɩ́ŋ ká Zuwifi, ɓɩ́ŋ cókú pɛŋ, ɓɩ́ŋ wʋ́ʋ́ pɛŋ cóké, ɓɩ́ŋ ká nɩhʋ́ɔ́r, ɓɩ́ŋ sɩ́ɛ́ wɩ púré, ɓɩ́ŋ ká yómó, ɓɩ́ŋ tʋ́ʋ́ tɩɩ, ɛ́ báá toó, ɓa wuu ní balá; Kirisi ní kɩ́wɔ́ wuu, ʋ nɛ́ mɩ́ŋwɔ́ wuu mí.
12 Wɩɩsɛ tʋ́ɔ́sɩ́wa ɩ́ ɔ́ʋ́ nɩɛ, ʋ tɩ́llɩ́wa, a cóllíwa wérí.
Ɛ́ wɩ́ɛ́, ɩ́ lo rí susufárʋ, rɩ́ sawér, rɩ́ tɩɩ múúre, rɩ́ tɩɩ pɔrɛ́ arɩ́ nyamma súíwa.
13 Ɩ́ nyammɛ náŋá wɩ́ɛ́, káá zíl náŋá má; rɩ oro á wɩ́ɩ́ zɔ́kʋ́ nɔ́ŋɔ mɛ́, ɩ́ hé náŋá suúri; Nyuutɩna há héíwa suúri ɛ́, ɩ́ má híhé náŋá suúri.
14 Amá ɓa wuu wɩ́nyúú ní sɩɛ́ ká náŋá cólle; cólle ní ká vɔwɛ́ ná há sɩ́ a rɩ́ɩ́wa ka nʋtʋmɛ, rɩ́ɩ́wa wɩ́ɛ́ wuu cɛ́rɛ wérí.
15 Ɩ́ lo rí Kirisi tɛŋfɩ́ɛ́l ná dí kuorí ɩ́ baŋcɩllɛ mɛ́; Wɩɩsɛ yɩ́rɩ́wa rɩ́ɩ́wa hé náŋá mɛ́, a a tɛŋ balá, a mɩŋ tɛŋfɩ́ɛ́l mɛ́ nɛ́.
Ɩ́ bʋ́bɔ́llɛ Wɩɩsɛ.
16 Ɩ́ lo rí Kirisi wɩ́bʋlɛ wuu mɩ́nɩ́wa baŋcɩllɛ mɛ́ wérí.
Ɩ́ kɩ́karmɛ náŋá, aá cáánɛ náŋá arɩ́ wɩ́zɩmɛ.
Ɩ́ yɩ́yɛ yɩɩla ná há mɩŋ Wɩɩsɛ Kɛnɔ sɩɛrʋ, arɩ́ yɩɩla ná Wɩɩsɛ nɩɛ háá yɩɛ́, arɩ́ yɩɩla ná Wɩɩsɛ Sabɩɩna há sɩ́ makɛ.
Ɩ́ yɩ́wɔ́ arɩ́rɩ́wa sɩɛrʋ wuu, aá bɔ́llɛ Wɩɩsɛ.
17 Ɩ́ wɩ́'állɛ rɩ́rɩ́wa wɩ́bʋlɛ́ wuu mí, ɩ́ lo rɩ́wɔ́ wuu a Nyuutɩna Zeezi yɩr mɛ́ nɛ́, ká rɩ́ɩ́wa tɩ́ŋʋ́ mɛ́ aá bɔ́llɩ́rá Ana Wɩɩsɛ.
Zeezi laadííre rɩ́wɔ́ jaa nɩɛ kéne
18 Háála, ɩ́ múúríwa tɩɩ pɛ́ɩ́wa báláwa, anɛ ɛ́ há cɛ́rɛ́ Nyuutɩna Zeezi ŋmɛ́nɔ mɛ́.
19 Báála, ɩ́ cóllíwa háála, ɩ́ sɩ́wɔ́ mɛ́ nyɛ́lʋ́.
20 Bɛlɛ, wɩ́ɩ́ wuu mí, ɩ́ tɩ́ŋɩ́wa ánáwa rɩ́rɩ́wa maáwa nʋʋsɛ, ʋ ɛ́ nɛ́ weré Nyuutɩna Zeezi ŋmɛ́nɔ mɛ́.
21 Ɩ́ má bɛlɛ ánáwa rɩ́ maáwa, ɩ́ sɩ́ á rɩ́ɩ́wa bɛlɛ cɔ́ɛ́ wɩ́wɩ́ɩ́wa nyúú, rɩ́wɔ́ naasɛ yʋɔrɛ.
22 Yósi, wɩ́ɩ́ wuu mí, ɩ́ má tɩ́ŋɩ́wa nyúútɩ́náwa nʋʋsɛ tíé nyúú rɛɛ́.
Ɩ́ sɩ́ ló rʋ́ʋ́ a ɓa há tɩ́ŋɛ́ aá bélíwa nɛ́, rɩ́ɩ́wa tʋŋ aá ja rɩ́wɔ́ sɩɛnnɛ tɔrɛ, amá ɩ́ tʋŋ arɩ́rɩ́wa sɩɛnnɛ wuu, anɛ ɛ́ ɩ́ háá zíl Nyuutɩna Zeezi.
23 Tʋtʋmɩ́ ná wuu ɩ́ háá tʋmɛ́, ɩ́ tʋŋ rɩ́rɩ́wa taŋá wuu, anɛ Nyuutɩna Zeezi tɩɩ nɛ́, ɩ́ tʋŋ aá pá, nɩbííne rá.
24 Ɩ́ sɩɛ́ zɩŋ rɩ́ɩ́wa sɩ́ ná túme Nyuutɩna Zeezi rɩ́; ɛ́ túme ní ká liwe ná ʋ há bílú nɩɛ mɛ́, bána nyúú.
Ɛ́ wɩ́ɛ́, ɩ́ tʋŋ aá pá Kirisi, ʋ nɛ́ kɛ́ɩ́wa Nyuutɩna tɩɩ.
25 Amá nɛrɔ ná háá tʋŋ bɔ́ŋbɔ́ŋ, bɔ́ŋbɔ́ŋ nɩ́ɩ́ túŋ tɩ́na mɛ́, bee wɩ́ɛ́ Wɩɩsɛ wɩ nɩɛ́ caksɛ.