Ɩ́ sʋl Wɩɩsɛ párá
3
1 Maábináŋa, á wɩ́tenní ní ká:
Ɩ́ sʋl Wɩɩsɛ párá, a makɛ rɩ́ Nyuutɩna wɩ́bʋlɛ ná ceŋ dɩhɛ̃́ wuu, ká ná píŋ má, anɛ ʋ há nɩhɩ̃́ ɛ́, ɩ́ dɩhɩ̃́.
2 Ɩ́ baa ha sʋl Wɩɩsɛ párá, a makɛ rɩ́ Wɩɩsɛ lɩ́sɩ́rá nɩbɔma rɩ́ sɔhɔtɩɩna nɛ́sɛ mɛ́, bee wɩ́ɛ́ nɩɛ wuu ra wɩ sáŋɛ́ laá dí.
3 Amá Nyuutɩna nʋtállɛ waá giri.
Ʋ sɩ́ pɛ́ɩ́wa dóé, ká lɩ́sɩ́wa Sɩtaanɛ* nɛ́sɛ mɛ́.
4 Nyuutɩna ɔ́ɔ́ á kánɩ́wa yardá, rɩɩ́waá a wɩ́ɛ́ ná á há bʋ́lɛ́ pɛ́ɩ́wa, ká á baa ha kánɩ́wa yardá, rɩɩ́wa sɩ́ ka ɛ́ naa mɛ́, a kaá mʋ́ wuu.
5 Rɩ́ Nyuutɩna makɛ ŋmɛ́nɔ pɛ́ɩ́wa, rɩ́ Wɩɩsɛ cólle rɩ́ Kirisi nyamma mɩ́nɩ́wa sɩɛnnɛ!
Nɛrɔ wuu mɔhɔ̃́ rʋ́ʋ́ tʋŋ
6 Maábináŋa, Nyuutɩna Zeezi Kirisi yɩr mɛ́, á bʋ́lɔ́ aá pɛ́ɩ́wa, ɩ́ lɩ́sɩ́wa tɩɩ rɩ́ maábináŋa ná wuu há ká tɛŋwɩtɩ́ɩ́ná, a wɩ wɩ́ɛ́ ná á há píé kármɩ́wɔ́ tɩŋ.
7 Ɩ́ tɩɩ ɛ̃ ɛ́ ná, ɩ́ há mɔhɛ̃́ rɩ́ɩ́wa tɩ́ŋrá nabulle.
Á fa há mɩ́nɩ́wa dɩhɩ̃́, á fa to tɛŋwɩtɩ́ɩ́ná.
8 Á wɩ nɛ́ŋ ɓɩdíílí yɔ́ɔ́ díé.
Amá á dé caasɛ tʋŋ nɛ́, a ná wɩɩla wɔhɔ rɩ́ tɩ́taŋ wuu, a makɛ ráá sɩ́ɩ́wa oro wuu nyúú cɩka á.
9 Á sɩɛ́ há tʋ́ŋ ɛ́, ʋ to anɛ á wɩ ŋmɛ́nɔ kené ráá dííwa ɓɩɛ nɛ́, amá á tʋ́ŋ ɛ́, a makɛ rɩ́ɩ́wa tɩ́ŋrá nabulle ní.
10 Á fa há mɩ́nɩ́wa dɩhɩ̃́, á bʋ́lɔ́ pɛ́ɩ́wa rɩ́ taŋá a bʋlɛ́:
«Nɛrɔ ná wuu há wɩ tʋmɛ́ ja, ʋ wɩ mɔhɛ̃́ rʋ́ʋ́ dí ɓɩɛ.»
11 Á nɩ́ɔ́ rɩɩ́wa sɩɛrʋ nɩɛ náŋa dé ká tɛŋwɩtɩɩna nɛ́; ɓa wɩ tʋtʋmɩ́ wuú tʋŋ, rʋʋ nɛ́ to rɩ́wɔ́ píwó nʋʋsɛ hé nɩɛ wɩ́ɛ́ mɛ́.
12 Ɛ́ nɩɛ duo mí, á có ráá bʋl pɔ́wɔ́, a sʋ́lwɔ́ Nyuutɩna Zeezi Kirisi yɩr mɛ́, rɩ́wɔ́ pɔ́rwɔ́ tɩɩ mɛ́ a tʋŋ, aá díwó tɩɩ suolé.
13 Ká ɩ́ má, maábináŋa, ɩ́ sɩ́ bʋ́lɩ́wa bɔ́l wɩ́were ɛɛ mɛ́.
14 Rɩ nɛ́ŋ sʋ́ʋ́ wɩ kɛnɔ né wɩ́ɛ́ tɩŋ, ɩ́ mallɛ tɩ́na mɛ́ bil, a lɩ́sɩ́wa tɩɩ rɩ́rʋ́ ɓóŋ, a makɛ rɩ́ hɩɩ̃sɛ kánʋ́.
15 Ɩ́ taŋa sʋ́ʋ́ píí mákɩ́wa dɩŋdɔ́ŋ, amá ɩ́ cɩ́cáánʋ́ anɩ́wa maábinɔ́ŋɔ.
Hatɩ́ŋnɩ́wɩ́ɛ́ rɩ́ cʋɔla
16 Nyuutɩna nɛ́ háá pá tɛŋfɩ́ɛ́l, rʋ́ʋ́ tɩɩ pɛ́ɩ́wa tɛŋfɩ́ɛ́l tɛ́ŋ wuu mí, arɩ́ wɩ́ɛ́ wuu mí!
Rɩ́ Nyuutɩna bélíwa wuu mí!
17 Cʋɔla dɩhɩ̃́ né, ŋ Pool tɩɩ nɛ́ pʋ́ŋsɛ́ arɩ́rɩ́ŋ nɛ́sɛ, aá cʋ́ɔ́lɩ́wa.
Ŋ kɛŋpʋ́ŋsɛ wuu mí, ŋ cíkíŋ nɛ́sɛ nyɛ nɛ́.
Ŋ pʋ́ŋsɛ nɛ́ ɛ́.
18 Ráá Nyuutɩna Zeezi Kirisi héíwa wuu nyúú bárka!